1. Unfa Psalöm 15:1-5 sa heepi u?

 A DI woto di pasa, u bi si taa dee sëmbë dee buta de libi a Jehovah maun, sa dë a di tenti fëën te de ta mbei möiti u de ku ën dë gaan mati go dou. Ma andi u musu du fuu sa dë a di tenti fëën? Wë Psalöm 15 ta piki u sömëni soni di u musu ko sabi. (Lesi Psalöm 15:1-5.) Di Psalöm aki ta piki u andi u musu du fuu ku Gadu ko dë möön gaan mati.

2. Andi Dafiti bi sa ta pakisei di a bi ta taki soni u di tenti u Jehovah?

² Psalöm 15 ta bigi ku dee wöutu aki: „Jehovah o, ambë seei sa ko tan ku i a di tenti fii? Ambë sa ko tan a di santa kuun fii? (Ps. 15:1) Di Dafiti bi ta taki soni u di tenti u Jehovah, nöö a kan taa a bi ta mëni di tenti u Gadu di Mosesi bi mbei. A di ten dë, di tenti u Gadu bi dë a di köndë de kai Gibion u wan pisiten. Nöö u di Dafiti bi taki soni u di „santa kuun” u Gadu tu, mbei a kan taa a bi ta mëni di kuun de kai Sion di bi dë a Jelusalen. A bi mbei wan tenti a di kuun dë u buta di këdë u di buka fu te kuma de mbei wan möön bunu kamian u butëën. Di kuun dë bi dë a söwan 10 kilomëti longi u Gibion.​—2 Sam. 6:17.

3. Faandi mbei u kë fusutan Psalöm 15 bunu möön? (Luku di peentje tu.)

³ Tuu taa gaansë u dee Isaëli sëmbë an bi sa go dini Gadu a di tenti fëën, u di wantu u de nöö bi sa denda go a di tenti ka di këdë u di buka bi dë. Ma a di ten aki hii dee dinima u Jehovah tuu sa go a di tenti fëën te de ku hën ko dë mati, söseei te de ku ën dë mati go dou. Hii u tuu kë dë mati u Jehovah. Psalöm 15 ta taki u wantu soni di u musu ta du fuu sa dë mati ku Jehovah go dou.

 I MUSU TA LIBI WAN LIMBOLIMBO LIBI TA DU SONI A WAN LETI FASI

4. Unfa u du sabi taa Jehovah an kë fuu dopu nöö a kaba? (Jesaaja 48:1)

⁴ Psalöm 15:2 ta taki taa wan mati u Gadu da wan „sëmbë di ta libi wan limbolimbo libi”, söseei „di ta du soni a wan leti fasi”. Dee soni aki da soni di u musu ta du nöömö. Ma u sa „ta libi wan limbolimbo libi” tuutuu ö? Wë aai. Hii fa u da zöndu libisëmbë, tökuseei Jehovah o si u kuma sëmbë di „ta libi wan limbolimbo libi” ee u ta mbei möiti u piki hën buka a soni. U ta bigi waka ku Jehovah te u buta u libi nëën maun, nöö u dopu. Na awooten, nöö te wan sëmbë bi dë wan Isaëli sëmbë, nöö di soni dë an bi kë taki taa a bi sa go a di tenti u Jehovah. So u dee Isaëli sëmbë bi ta taki soni u Jehovah hii fa de an „bi ta du soni a wan leti fasi. (Lesi Jesaaja 48:1.) Ee wan Isaëli sëmbë bi kë ko dë mati ku Jehovah, nöö a bi musu mbei möiti u ko sabi unfa Jehovah kë faa libi, söseei a bi musu ta mbei möiti u libi kumafa Jehovah kë. Sö nöö a dë taa ee u kë dë gaan mati ku Jehovah, nöö wa musu dopu ta tjai di në taa u da Jehovah kotoigi nöö a kaba. Ma u musu „ta du soni a wan leti fasi” go dou. Unfa u sa du di soni dë?

5. Unfa wan sëmbë sa lei taa a ta piki Jehovah buka a hii futu?

⁵ A Jehovah wojo, wan sëmbë di ta „libi wan limbolimbo libi”, söseei „di ta du soni a wan leti fasi” an dë wan sëmbë di nango a komakandi nöö a kaba (1 Sam. 15:22). Ma u musu ta mbei möiti fuu ta piki Gadu buka a hii futu, aluwasi ee u dë u wanwan a wan kamian (Nöng. 3:6; Peleik. 12:13, 14). A dë fanöudu seei fuu ta mbei möiti fuu ta piki Jehovah buka, te kisi a dee pikipiki soni seei. Te u ta du sö, nöö u ta lei taa u lobi ën tuutuu, nöö di soni dë o mbei a möön lobi u.​—Joh. 14:23; 1 Joh. 5:3.

6. Andi dë fanöudu möön hii dee soni dee u du da Jehovah a di ten di pasa, te u luku Hebelejën 6:10-12?

 ⁶ Jehovah ta tei dee soni dee u bi du dëën u bigi seei. Ma dee soni dë wanwan an tjika u heepi u fuu sa tan a di tenti fëën. Hebelejën 6:10-12 ta heepi u fuu fusutan di soni dë. (Lesi ën.) Jehovah an ta fëëkëtë dee bunu soni dee u bi du a di ten di pasa. Ma a kë fuu ta dini ën ku hii u hati go dou u te di kaba dou. Ee wa ko wei, nöö a o da u pasi fuu ku ën dë mati u teego.​—Gal. 6:9.

I MUSU TA TAKI SONI KU WAN LIMBO HATI

7. Andi di taki di u musu ta taki soni ku wan limbo hati kë taki?

⁷ Wan sëmbë di kë dë a di tenti u Jehovah musu ta „taki soni ku wan limbo hati” (Ps. 15:2). Di soni aki an kë taki nöö taa wa musu ta mindi soni nöö a kaba. Jehovah an kë fuu ta ganjan sëmbë a na wan u dee soni dee u ta taki, nasö dee u ta du (Heb. 13:18). Di soni aki dë fanöudu seei, „biga Jehovah ta buuse di sëmbë di ta ganjan wotowan, ma a dë gaan mati ku dee sëmbë dee ta libi leti”.​—Nöng. 3:32.

8. Andi u musu ta mbei hii möiti fu wa du?

⁸ Dee sëmbë dee ta „taki soni ku wan limbo hati” an ta du kuma de ta piki Gadu buka te de dë a sëmbë dendu, nöö te de dë de wanwan nöö de ta pasa dee wëti fëën (Jes. 29:13). Ma de ta mbei hii möiti u de an ta ganjan sëmbë. Wan sëmbë di ta ganjan wotowan sa bigi ko ta si kuma so u dee wëti u Jehovah an kaba bunu tuutuu (Jak. 1:5-8). Sö wan sëmbë sa pasa Jehovah buka a soni di a ta si kuma an dë gaan soni. Nöö ee a ta djei kuma soni an ta miti ën u di a ta pasa Jehovah buka, nöö a sa feni taanga u pasa Jehovah buka a möön gaan soni seei. Nöö hii fa a o ta si kuma a ta dini Gadu, tökuseei Jehovah an o ta si di dini di a ta dini ën u soni (Peleik. 8:11). Fëën mbei uu kë ta du soni ku wan limbo hati hii juu.

9. Andi u sa lei u di miti di Jesosi ku Nataniëli bi miti u di fosu pasi? (Luku di peentje tu.)

⁹ U sa si unfa a dë fanöudu tjika fuu abi wan limbo hati, te u luku andi bi pasa di Jesosi ku Nataniëli bi miti u di fosu pasi. Di Filipi bi tja hën mati Nataniëli go a Jesosi, hën wan  apaiti soni bi pasa. Hii fa Jesosi ku Nataniëli an bi miti wan daka, tökuseei Jesosi bi taki taa: „Un luku wan sëmbë ta ko aki. Bumbuu Isaëli sëmbë e. Biga aan ten seei a ta ganjan sëmbë möönsö” (Joh. 1:47). Jesosi bi sabi taa dee woto bakama fëën hati bi limbo, ma a bi si taa Nataniëli hati bi limbo gaanfa seei. Nataniëli bi dë zöndu libisëmbë kuma u nöö, ma tökuseei a bi ta du hii soni ku wan limbo hati. Di soni dë bi bigi da Jesosi seei. Fëën mbei a bi gafëën. An dë u taki taa hiniwan fuu bi o kë u Jesosi si u sö tu!

10. Faandi mbei u musu ta köni be wa du hogi ku u buka? (Jakobosi 1:26)

¹⁰ Gaansë u dee soni dee sikifi a Psalöm 15, nama ku di fasi fa u musu ta libi ku wotowan. Psalöm 15:3 ta taki taa wan sëmbë di Jehovah kai ko a di tenti fëën „an ta taki mindimindi soni ku hën buka u poi sëmbë në. An ta du na wan hogi ku di wotowan fëën, söseei an ta taki hogi u dee mati fëën” tu. Ee u ta du hogi ku u buka, nöö a sa hati wotowan gaanfa seei. Nöö di soni dë sa mbei wa dë a di tenti u Jehovah möön.​—Lesi Jakobosi 1:26.

11. Andi sa pasa ku wan sëmbë di ta mindi soni da wotowan u poi de në ee an tjali u di soni di a du?

¹¹ Di psalöm sikifima taki gbelingbelin taa wa musu mindi soni da sëmbë u poi de në. Ee wan sëmbë ta mindi soni da wotowan u poi de në, nöö de sa puu ën a di kemeente ee an tjali u di soni di a du.​—Jel. 17:10.

12-13. Na un ten a sa pasa taa u taki hogi u dee mati fuu söndö fuu kë? (Luku di peentje tu.)

¹² Psalöm 15:3 ta taki tu taa dee sëmbë dee Jehovah kai ko a di tenti fëën an ta du na wan hogi ku dee wotowan u de, söseei de an ta taki hogi u dee mati u de. Unfa a sa pasa taa u taki hogi u dee mati fuu?

¹³ Wë u sa taki hogi u wan sëmbë söndö fuu kë, ee u paaja wan soni fëën di an dë sö tuu. Boo taki u dee dii soni aki: (1) wan sisa disa di hii-ten diniwooko, (2) wan baaa ku hën  mujëë an ta wooko a Bëtëli möön, ku (3) wan baaa an dë gaanwomi nasö dinai möön. I si kuma a bi o bunu fuu go pakisei luku faandi mbei dee soni dë pasa, nöö u go ta kondëën da wotowan u? Sömëni soni sa dë di mbei taa dee soni dë pasa, nöö kandë wa sabi de. Boiti di dë, wan sëmbë di Jehovah kai ko a di tenti fëën „an ta du na wan hogi ku di wotowan fëën, söseei an ta taki hogi u dee mati fëën”.

LESIPEKI DEE SËMBË DEE TA LESIPEKI JEHOVAH

14. Konda unfa dee sëmbë dee Jehovah kai ko a di tenti fëën ta köni u de an nama „ku sëmbë di abi taku guwenti”.

¹⁴ Psalöm 15:4 ta taki taa wan mati u Jehovah „an ta nama ku sëmbë di abi taku guwenti”. Unfa u sa ko sabi ee wan sëmbë abi taku guwenti? U di u da zöndu libisëmbë mbei useei an sa taki ku leti taa wan sëmbë abi taku guwenti. Faandi mbei u taki sö? Wë u di a ta pasa taa u ta kë dë makandi ku so sëmbë u di u lobi fa de dë. Nöö a sa pasa taa u ta buta so sëmbë a wan së u di wa ta fii bunu te u dë makandi ku de. Fuu taki ën, nöö ku dee sëmbë dee Jehovah ta si taa abi „taku guwenti” nöö wa musu ta nama (1 Kol. 5:11). Wantu u dee sëmbë dee abi taku guwenti, da dee sëmbë dee ta du hogi nango nöömö söndö u de tjali u dee soni di de ta du, nasö di an ta lesipeki di biibi fuu, nasö di ta suku u mbei u ku Jehovah an dë mati möön.​—Nöng. 13:20.

15. Andi da wan fasi fa u sa lei taa u ta lesipeki „dee sëmbë dee ta lesipeki Jehovah”?

¹⁵ Psalöm 15:4 ta taki tu taa u musu „ta lesipeki dee sëmbë dee ta lesipeki Jehovah”. Fëën mbei u ta suku fasi fuu sa ta lei dee mati u Jehovah taa u lobi de, söseei taa u ta lesipeki de (Lom. 12:10). Psalöm 15:4 ta taki u wan u dee fasi fa u sa du di soni dë. A ta taki taa wan sëmbë di Jehovah kai ko a di tenti fëën „ta du di soni di a paamusi taa a o du, aluwasi ee di soni dë ta tja hogi ko dëën”. Ee u booko di buka di u bi mbei, nöö woo du hogi ku wotowan (Mat. 5:37). Jehovah kë taa dee sëmbë dee a kai ko a di tenti fëën musu hoi deseei a di buka di de mbei di de tööu. A ta wai tu te dee sëmbë dee abi miii ta mbei hii möiti, u de du dee soni di de paamusi dee mii u de. U di u lobi Gadu ku woto sëmbë, mbei woo mbei hii möiti fuu du dee soni dee u paamusi taa woo du.

16. Andi da wan woto fasi fa u sa lei taa u ta lesipeki dee mati u Jehovah?

¹⁶ Wan woto fasi fa u sa lei taa u ta lesipeki dee mati u Gadu, hën da te u ta tei de ku wai a u wosu, söseei te u ta da de soni (Lom. 12:13). Te u ku dee baaa ku dee sisa fuu ta du soni di ta da u piizii, nöö u ku de ta ko dë möön gaan mati. Nöö u ku Jehovah seei ta ko dë möön gaan mati tu. Boiti di dë, te u ta tei wotowan ku wai, nöö u ta lei taa u ta djeesi Jehovah.

NA KO LOBI MÖNI

17. Faandi mbei Psalöm 15 ta taki soni u möni?

¹⁷ Psalöm 15 ta taki taa wan sëmbë di Jehovah kai ko a di tenti fëën „an ta hakisi sëmbë u de pakëën möni a liba te a leni de möni, söseei an ta mindi soni da sëmbë di an du hogi faa sa feni möni” (Ps. 15:5). Faandi mbei di psalöm aki ta taki soni u möni? Wë u di te wa ta si möni a di soifi fasi, nöö u sa du hogi ku wotowan, söseei a sa mbei taa u ku Gadu an ko dë mati möön (1 Tim. 6:10). Na awooten, so Isaëli sëmbë an bi ta libi bunu ku dee wotowan u de dee bi pooti. De bi ta mbei dee wotowan u de paka de möön hia möni, te de bi leni de wan möni. Boiti di dë, so kuutuma  bi ta tei möni a tafa basu, nöö de an bi ta kuutu soni ku leti da dee sëmbë dee an bi du hogi. Wë Jehovah buuse dee lö libi dë.​—Eze. 22:12.

18. Andi sa heepi u fuu wegi useei luku unfa u ta si möni? (Hebelejën 13:5)

¹⁸ A bunu fuu wegi luku unfa u ta si möni. Hakisi iseei dee soni aki: ’Pakisei u mi lo’ u dë a möni ku dee soni dee mi sa bai ku ën u? Ee mi juu möni a wan sëmbë, mi ta tei longi ufö mi toona pakëën, u di mi ta si kuma di sëmbë an abi di möni dë fanöudu ö? Mi ta si kuma mi bunu möön wotowan u di mi abi möni ö? A ta taanga da mi u mi da wotowan soni ö? Mi ta si kuma so baaa ku sisa lo’ möni möön Jehovah u di de abi te a hia möni ö? Mi ta kë dë mati u dee guduma, ma ma ta kë dë mati u dee pootima u?’ Jehovah da u di gaandi fuu sa dë a di tenti fëën. U sa köni fu wa lasi di gaandi dë, te u ta mbei möiti fu wa ko lobi möni. Ee u mbei di möiti dë, nöö Jehovah an o disa u möönsö!​—Lesi Hebelejën 13:5.

JEHOVAH LOBI DEE MATI FËËN

19. Faandi mbei Jehovah kë fuu du hii dee soni dee sikifi a Psalöm 15?

¹⁹ Psalöm 15 ta kaba ku dee wöutu aki: „Di sëmbë di ta libi a di lö fasi aki an o naki futu kai nöiti” (Ps. 15:5). Di psalöm sikifima ta piki u aki faandi mbei Gadu kë fuu du hii dee soni dee sikifi a di psalöm aki. Jehovah kë fuu ta dë waiwai. A lei unfa u musu ta libi faa sa ta tjubi u, söseei fuu sa abi wan möön bunu libi.​—Jes. 48:17.

20. Andi dee sëmbë dee Jehovah kai ko a di tenti fëën sa dë ku di mëni taa de o feni?

²⁰ Dee sëmbë dee Jehovah kai ko a di tenti fëën sa dë ku di mëni taa de o abi wan gaan bunu libi a di ten di ta ko. Dee salufuwan o go libi a liba ala, a dee kamian ka Jesosi seeka da de (Joh. 14:2). Dee sëmbë dee o libi a goonliba aki ta wakiti u de feni dee soni dee Gadu paamusi de na Akoalimbo 21:3. Hii u tuu ta wai seei taa Jehovah kai u fuu ko dë ku ën a di tenti fëën u teego!