1. San wi e leri fu Psalm 15:1-5?

 NA INI na artikel na fesi, wi leri taki den sma di kan de na ini na agersi tenti fu Yehovah, na sma di gi densrefi abra na en èn di e tan bun mati fu en. Ma san wi musu du fu man kon na ini Yehovah en tenti? Psalm 15 e taki fu a tori disi. (Leisi Psalm 15:1-5.) A psalm disi e sori wi san wi musu du fu man de bun mati fu Gado.

2. San ben kan meki taki David taki fu a tenti fu Yehovah?

² Psalm 15 e bigin nanga den wortu disi: „Yehovah, suma kan kon tan nanga yu na ini yu tenti? Suma kan kon tan na tapu yu santa bergi?” (Ps. 15:1) Di a psalm skrifiman David ben taki fu a „tenti” fu Yehovah, dan a kan taki a ben e denki fu a tabernakel di ben de na ini Gibeon fu wan pisi ten. David e taki tu fu a „santa bergi” fu Yehovah. A kan taki a ben prakseri a tenti di ben de na Sion-bergi na ini Yerusalem, di ben de sowan 10 kilometer na a zuidsei fu Gibeon. Na drape David seti wan tenti fu poti na ark fu a ferbontu na ini, teleki a tempel ben bow.​—2 Sam. 6:17.

3. Fu san ede wi wani meki muiti fu ferstan Psalm 15? (Luku a prenki.)

³ A no de fu taki dati furu fu den Israelsma no ben mag dini na a tabernakel, èn soso wan tu fu den ben mag go na insei fu a tenti pe na ark fu a ferbontu ben de. Ma ala den getrow futuboi fu Yehovah di ben tron en mati èn ben e tan en mati, ben kan kisi a kari fu kon na ini na agersi tenti fu en. Disi na wan sani di wi alamala wani. Psalm 15 e taki fu wan tu sani di wi musu du fu man tan Yehovah en mati.

 LIBI WAN KRIN LIBI ÈN DU SAN RETI

4. Fa wi du sabi taki Yehovah e ferwakti moro fu wi leki fu dopu nomo? (Yesaya 48:1)

⁴ Psalm 15:2 e taki dati wan mati fu Gado na wan sma di „e libi wan krin libi, [èn] di e du san reti”. Disi na wan sani di wi musu tan du doronomo. Ma a tru taki wi man „libi wan krin libi”? Iya. Aladi wi alamala na sondu sma, tòg Yehovah o si wi leki sma di e „libi wan krin libi” te wi e du ala san wi man fu gi yesi na en. Te wi gi wisrefi abra na Gado èn teki dopu, dan disi na soso a bigin. Fu eksempre, na ini Bijbel ten, wan sma no ben kan kon na ini a tenti fu Yehovah soso fu di a ben de wan Israelsma. Son sma ben e kari a nen fu Yehovah ’aladi den ben e lei èn aladi den no ben e du san reti’. (Leisi Yesaya 48:1.) Ret’ati Israelsma ben musu kon sabi den wet fu Yehovah èn den ben musu gi yesi na den. Na so a de tu taki efu wi wani de bun mati fu Yehovah na ini a ten disi, dan a no nofo te wi dopu èn te sma e kari wi Yehovah Kotoigi. Wi musu tan „du san reti”. Fa wi kan du dati?

5. San a wani taki fu gi yesi na Yehovah na ini ala sani?

⁵ Te wi e „libi wan krin libi” èn te wi e „du san reti”, dan gi Yehovah disi wani taki moro leki te wi abi a gwenti fu go na den gemeente konmakandra ibri wiki (1 Sam. 15:22). Wi musu du muiti fu gi yesi na Yehovah na ini ala san wi e du, srefi te wi de wi w’wan (Odo 3:6; Preik. 12:13, 14). A prenspari taki wi e du muiti fu gi yesi na Yehovah srefi te a abi fu du nanga pkinpkin sani. Te wi e du dati, dan wi e sori taki wi lobi en trutru èn a o lobi wi moro.​—Yoh. 14:23; 1 Yoh. 5:3.

6. Soleki fa Hebrewsma 6:10-12 e sori, dan san moro prenspari leki den bun sani di wi du na ini a ten di psa?

 ⁶ Yehovah trutru e warderi den sani di wi du gi en na ini a ten di psa. Ma a no fu di wi du bun sani na ini a ten di psa, meki wi musu denki taki dati nofo kba fu man tan na ini a tenti fu Yehovah. Wi kan ferstan dati krin te wi e leisi Hebrewsma 6:10-12. (Leisi en.) Yehovah no e fergiti den bun sani di wi du gi en. Ma a wani taki wi e tan dini en nanga wi heri ati „te na a kaba”. A o de wi mati fu ala ten „efu wi no kon weri”.​—Gal. 6:9.

TAKI SANI NANGA WAN KRIN ATI

7. San a wani taki fu taki sani nanga wan krin ati?

⁷ Wan sma di wani tan na ini Yehovah en tenti, musu „taki sani nanga wan krin ati” (Ps. 15:2). Disi no wani taki nomo taki wi no musu lei. Yehovah wani taki wi musu de eerlijk na ini ala san wi e taki èn e du (Hebr. 13:18). A sani disi prenspari, „bika Yehovah e tegu gi sma di e bedrigi trawan, ma a de bun mati nanga den sma di ati krin”.​—Odo 3:32.

8. Fa wi no musu tyari wisrefi?

⁸ Den sma di „e taki sani nanga wan krin ati”, no e du neleki den e gi yesi na Gado na fesi tra sma, aladi den e psa den wet fu Gado te den de den w’wan (Yes. 29:13). Den no e du sani na wan triki fasi. Wan sma di abi triki kan bigin denki taki a no ala ten a de wan koni sani fu gi yesi na den wet fu Yehovah (Yak. 1:5-8). Kande a e trangayesi Yehovah te abi fu du nanga sani di a e si leki pkinpkin sani. Èn te a gersi leki a sani dati no tyari takru bakapisi kon gi en, dan a e bigin du moro ogri sani. A sma disi e denki taki a e dini Gado, aladi Yehovah no feni na anbegi fu en bun (Preik. 8:11). Ma wi wani de eerlijk na ini ala sani.

9. San psa a fosi leisi di Yesus miti Natanael, èn san disi e leri wi? (Luku a prenki.)

⁹ A prenspari srefsrefi taki wi e „taki sani nanga wan krin ati”. Wi kan si dati te wi e luku san psa di Filipus tyari en  mati Natanael fu go miti Yesus. Aladi a ben de a fosi leisi di Yesus ben miti Natanael, tòg a taki: „Luku, a man disi na trutru wan Israelsma di no e bedrigi sma” (Yoh. 1:47). A no de fu taki dati Yesus sabi taki den tra disipel fu en ben eerlijk. Ma Natanael ben eerlijk srefi na ini pkinpkin sani. Natanael ben de wan sondusma neleki wi, ma a no ben e hoigri. A ben eerlijk na ini ala sani. Yesus ben lobi dati èn a prèise Natanael tu. A ben o de wan grani efu Yesus ben o denki so fu wi.

10. Fu san ede wi musu luku bun nanga san wi e taki? (Yakobus 1:26)

¹⁰ Furu fu den sani di kari na ini Psalm 15, abi fu du nanga a fasi fa wi e libi nanga trawan. Psalm 15:3 e taki dati wan sma di de na ini Yehovah en tenti ’no e taki ogri-ati lei nanga en mofo, a no e du nowan ogri nanga en kompe èn a no e taki takru sani fu en mati’. Te wi e du den sortu sani dati nanga trawan, dan dati kan hati den firi fu den trutru èn wi no ben o man tan moro na ini a tenti fu Yehovah.​—Leisi Yakobus 1:26.

11. San o psa nanga wan sma di e ferteri lei fu trawan sondro fu sori berow?

¹¹ A de krin taki a psalm skrifiman e taki fu wan sma di e ferteri lei fu pori a nen fu trawan. A sani di a e du na wan hati sani. Te wan sma e pori a nen fu trawan sondro fu sori berow, dan den brada o puru en fu a gemeente.​—Yer. 17:10.

12-13. Fa wi ben kan pori a nen fu wi mati sondro fu wi sabi? (Luku a prenki.)

¹² Psalm 15:3 e memre wi tu taki sma di de na ini a tenti fu Yehovah no e du nowan ogri nanga trawan èn den no e pori a nen fu den mati fu den. Fa wi ben kan pori a nen fu den mati fu wi?

¹³ Kande wi e ferteri trawan wan sani fu den, aladi wi no sabi seiker efu a sani dati tru. Fu eksempre: (1) wan  sisa e tapu nanga a furuten diniwroko, (2) wan trowpaar no e dini moro na Betel, noso (3) wan brada no e dini moro leki owruman noso leki dinari ini a diniwroko. Kande yu e denki taki den brada nanga sisa disi lasi den grani fu den fu di den du wan sani di no bun. A ben o fiti fu ferteri trawan a sani dati? Kwetkweti! Kande furu tra reide de fu san ede a situwâsi fu den kenki èn wi no sabi dati. Wan sma di de na ini Yehovah en tenti ’no e taki ogri-ati lei nanga en mofo, a no e du nowan ogri nanga en kompe èn a no e taki takru sani fu en mati’.

GI GRANI NA DEN WAN DI ABI LESPEKI GI YEHOVAH

14. Ferteri fa den sma di de na ini Yehovah en tenti e sori taki den „no lobi den wan di abi takru gwenti”.

¹⁴ Psalm 15:4 e taki dati wan mati fu Yehovah „no lobi den wan di abi takru gwenti”. Fa wi kan sabi efu wan sma abi takru gwenti? Fu di wi na sondu sma, meki wi no kan sabi krin efu wan sma abi takru gwenti. Fu san ede? We, kande wi lobi son sma fu di wi man feni en bun nanga den, ma kande wi no lobi tra sma fu di wi feni taki den ferferi. Dati meki wi musu wai pasi soso gi den wan di Yehovah „no lobi” (1 Kor. 5:11). Den sma di Yehovah no lobi na den wan di e tan du ogri sondro fu sori berow, sma di no e lespeki a bribi fu wi, noso sma di e pruberi fu pori a matifasi di wi abi nanga Yehovah.​—Odo 13:20

15. San na wan fasi fa wi kan gi grani na „den wan di abi lespeki gi Yehovah”?

¹⁵ Psalm 15:4 e taigi wi tu fu gi grani na „den wan di abi lespeki gi Yehovah”. Dati meki wi e sori swit’fasi nanga lespeki gi sma di de mati fu Yehovah (Rom. 12:10). Fa wi kan du dati? Psalm 15:4 e taki fu wan fasi fa wi kan du dati. A e taki dati wan sma di de na ini Yehovah en tenti „ala ten a e du san a pramisi, awinsi dati e tyari takru bakapisi kon gi en”. Te wi no e hori den pramisi fu wi, dan wi o hati den firi fu trawan (Mat. 5:37). Fu eksempre, Yehovah e ferwakti taki den sma di de na ini a tenti fu en e du san den pramisi makandra di den trow. A breiti tu te p’pa nanga m’ma e meki muiti fu du san den pramisi den pkin fu den. Fu di wi lobi Gado nanga tra sma, meki wi wani du ala sani wi man fu hori den pramisi fu wi.

16. San na wan tra fasi fa wi kan gi grani na den mati fu Yehovah?

¹⁶ Wan tra fasi fa wi kan gi grani na den mati fu Gado, na te wi lobi fu kari den kon na wi oso èn te wi lobi fu gi den sani (Rom. 12:13). Te wi e meki ten fu abi prisiri demakandra nanga den brada nanga sisa fu wi, dan wi e leri sabi den nanga Yehovah moro bun. Boiti dati, te wi lobi kari sma kon na wi oso, dan wi e teki na eksempre fu Yehovah.

NO DE SMA DI LOBI MONI

17. Fu san ede Psalm 15 e taki fu moni?

¹⁷ Psalm 15:5 e taki disi fu wan sma di de na ini a tenti fu Yehovah: „Te a e leni sma moni, a no e aksi den rente. A no e teki tyuku fu lei gi trawan di no du ogri” (Ps. 15:5). Fu san ede a syatu Psalm disi e taki fu moni? Fu di te wi lobi moni tumsi, dan wi kan hati den firi fu trawan èn wi kan pori a matifasi di wi abi nanga Yehovah (1 Tim. 6:10). Na ini Bijbel ten, son Kresten ben e meki den brada nanga sisa fu den di ben pôti, pai moro moni leki san den sma disi ben leni fu den.  Boiti dati, son krutuman ben e teki tyuku èn den no ben e krutu sma na wan reti fasi. Yehovah no ben lobi den sani disi kwetkweti.​—Esek. 22:12.

18. San wi kan aksi wisrefi efu wi wani sabi fa wi e si moni? (Hebrewsma 13:5)

¹⁸ A bun taki wi e kon sabi fa wi srefi e si moni. Aksi yusrefi: ’Mi e denki soso moni èn san mi kan bai nanga moni? Efu mi leni moni na wan sma, dan mi e draidrai fu pai a sma baka fu di mi feni taki a sma dati no abi a moni fanowdu? Mi feni taki mi bun moro trawan fu di mi abi moni? Mi lobi gi tra sma moni? Mi feni taki den brada nanga sisa fu mi di gudu, lobi moni moro leki fa den lobi Yehovah? Mi lobi fu de mati fu gudusma, aladi mi no e poti so furu prakseri na sma di no abi moni? Wi kisi a moi grani fu de na ini a tenti fu Yehovah. Ma na soso te wi e tan sma di no lobi moni, dan wi kan tan na ini a tenti fu Yehovah. Te wi e du dati, dan Yehovah no o libi wi noiti.​—Leisi Hebrewsma 13:5.

YEHOVAH LOBI DEN MATI FU EN

19. Fu san ede Yehovah wani taki wi du ala den sani di kari na ini Psalm 15?

¹⁹ Psalm 15 e tapu nanga a pramisi disi: „Sma di e libi na a fasi disi, no sa naki futu noiti” (Ps. 15:5). Dyaso a psalm skrifiman e sori fu san ede Gado wani taki wi du ala den sani di kari na ini a psalm disi. Yehovah wani taki wi de koloku. Te wi e du san Gado e aksi fu wi, dan wi o abi wan moro bun libi èn a o kibri wi.​—Yes. 48:17.

20. San den sma di de na ini a tenti fu Yehovah kan ferwakti?

²⁰ Den sma di mag tan na ini a tenti fu Yehovah kan ferwakti wan moi tamara. Den salfuwan o libi na ini hemel pe Yesus sreka wan presi gi den (Yoh. 14:2). Den sma di abi a howpu fu libi na grontapu e ferwakti fu kisi a pramisi di skrifi na Openbaring 21:3. A no de fu taki dati wi alamala e si en leki wan bigi grani taki Yehovah gi wi a kari fu tan ini en tenti fu ala ten.