1. Tingasisita njani Tihlabelelo 15:1-5?

 ESIHLOKWENI lesendlulile, sifundze kutsi tikhonti taJehova letitinikele tingaba tivakashi ethendeni lakhe lelilungumfanekiso ngekutsi tibe nebuhlobo lobuhle naye. Kodvwa yini lesingayenta kuze sibe tivakashi taJehova? Tihlabelelo 15 tisho lokunyenti ngalendzaba. (Fundza Tihlabelelo 15:1-5.) Lesihlabelelo sisinika tifundvo letingasisita kuze sisondzelane naNkulunkulu.

2. Yini lokungenteka yenta umhlabeleli Davide wakhuluma ngelithende laJehova?

² Tihlabelelo 15 tivula ngemavi latsi: “Awu Jehova, ngubani longamvumela kutsi angene ethendeni lakho? Ngubani longahlala entsabeni yakho lengcwele?” (Hla. 15:1) Ngesikhatsi umhlabeleli Davide akhuluma ‘ngelithende’ laJehova, kungenteka bekacabanga ngelithende lekukhontela lebeliseGibeyoni sikhatsi lesitsite. Davide waphindze wakhuluma ngentsaba yaNkulunkulu lengcwele, lokungenteka bekuyiSiyoni leseJerusalema. Eningizimu yaseGibeyoni, Davide wamisa lithende kuze afake libhokisi lesivumelwane kuze kube ngulapho kwakhiwa indzawo lekahle lebelitawuhlala kuyo.​—2 Sam. 6:17.

3. Yini leyenta sifune kuticondza Tihlabelelo 15? (Buka nesitfombe.)

³ Ema-Israyeli lamanyenti bekangakavumeleki kutsi asebente ethendeni lekukhontela, ingasaphatfwa-ke yekungena ngekhatsi kulelithende lapho bekunelibhokisi lesivumelwane khona. Kodvwa tonkhe tinceku taJehova letetsembekile betingaba  tivakashi takhe ethendeni lakhe lelingumfanekiso ngekutsi tibe bangani bakhe futsi tichubeke tingibo. Sonkhe siyakufisa loko. Tihlabelelo 15 tikhuluma ngaloko lokufanele sikwente kuze sichubeke sibangani baJehova.

PHILA IMPHILO LEMSULWA FUTSI WENTE LOKULUNGILE

4. Sati njani kutsi akusiko kubhajatiswa kuphela Jehova lakulindzele kitsi? (Isaya 48:1)

⁴ KuTihlabelelo 15:2, umngani waNkulunkulu uchazwa ngekutsi ngumuntfu “lophila imphilo lemsulwa, lowenta lokulungile.” Lena yintfo lokufanele sichubeke siyenta. Kodvwa kungenteka yini vele kutsi umuntfu aphile “imphilo lemsulwa”? Yebo. Nanobe sonkhe sinesono, Jehova utawutsi siphila “imphilo lemsulwa” nangabe senta konkhe lokusemandleni etfu kuze simlalele. Nasitinikela kuye futsi sibhajatiswa, sisuke sicala kuhamba naNkulunkulu. Naka kutsi ngetikhatsi tekubhalwa kweliBhayibheli, kuba ngumIsrayeli bekungamenti umuntfu kutsi akufanele kuba sivakashi saJehova. Labanye bebambita, kodvwa bebangambiti “ngeliciniso nangekulunga.” (Fundza Isaya 48:1.) Ema-Israyeli lebekatimisele kukhonta Jehova bekufanele afundze ngemitsetfo yakhe futsi ayilalele. Ngendlela lefanako lamuhla, kuze Nkulunkulu asemukele ulindzele lokungetulu nje kwekutsi sibhajatiswe futsi sibe yincenye yelibandla. Kufanele sichubeke ‘senta lokulungile.’ Singakwenta njani loko?

5. Kufaka ekhatsi ini kulalela Jehova kuto tonkhe tintfo?

⁵ KuJehova, kuphila “imphilo lemsulwa” ‘nekwenta lokulungile’ kusho lokungetulu nje kwekuhlale sikhona emihlanganweni yelibandla. (1 Sam. 15:22) Kufanele sitimisele kulalela Nkulunkulu kuko konkhe lesikwentako, ngisho nalapho sisodvwana. (Taga 3:6; Shu. 12:13, 14) Kubalulekile kutsi setame  kumlalela ngisho nasetintfweni letibonakala titincane. Kwenta njalo kukhombisa kutsi simtsandza mbamba Jehova, lokwenta kutsi naye asitsandze kakhulu.​—Joh. 14:23; 1 Joh. 5:3.

6. Ngekusho kwembhalo waKumaHebheru 6:10-12, yini lebaluleke kakhulu kunetintfo letinhle lesitentile esikhatsini lesendlulile?

⁶ Jehova ujabula kakhulu ngetintfo letinhle lesimentele tona esikhatsini lesendlulile. Kodvwa kutsi sente tintfo letinhle esikhatsini lesendlulile akusho kutsi sitawuchubeka sitivakashi ethendeni lakhe. Loku kucaciswe kahle KumaHebheru 6:10-12. (Fundza.) Jehova akatikhohlwa tintfo letinhle lesitentile. Kodvwa ufuna sichubeke simkhonta ngemphefumulo wonkhe “kuze kube sekugcineni.” Utawuba ngumngani wetfu kuze kube phakadze “nasingadzinwa.”​—Gal. 6:9.

KHULUMA LICINISO ENHLITIYWENI YAKHO

7. Kusho kutsini kukhuluma liciniso etinhlitiyweni tetfu?

⁷ Umuntfu lofuna kuba sivakashi endlini yaJehova kufanele ‘akhulume liciniso enhlitiyweni yakhe.’ (Hla. 15:2) Loku kusho kungagcini nje ngekungawakhulumi emanga. Jehova ufuna setsembeke kuko konkhe lesikushoko nalesikwentako. (Heb. 13:18) Loko kubalulekile “ngobe Jehova uyamenyanya umuntfu lolicili, kodvwa ungumngani lomkhulu webantfu labalungile.”​—Taga 3:32.

8. Yini lokufanele singayenti?

⁸ Labo ‘labakhuluma liciniso etinhlitiyweni tabo’ abenti ngatsi bayalalela nabasembikwebantfu kepha bephule imitsetfo yaNkulunkulu nabasemasitseleni. (Isa. 29:13) Bayakugwema kuba ngemacili. Umuntfu lolicili angase angabate kutsi leminye imitsetfo yaNkulunkulu ihlakaniphile. (Jak. 1:5-8) Angahle angamlaleli Jehova etintfweni labona ngatsi atikabaluleki kangako. Nakabona ngatsi kute lokubi lokwentekako ngekungalaleli kwakhe, angahle acale kwenta tintfo letimbi kakhulu. Nanobe acabanga kutsi ukhonta Nkulunkulu, kepha Jehova angeke akwemukele kukhonta kwakhe. (Shu. 8:11) Kodvwa tsine sifuna kwetsembeka kuto tonkhe tintfo.

9. Yini lesiyifundza kulokwenteka ngesikhatsi Jesu acala kubona Nathanayeli? (Buka nesitfombe.)

 ⁹ Singafundza ngekubaluleka kwekwetsembeka kuloko lokwenteka ngesikhatsi Jesu acala kubona Nathanayeli. Ngesikhatsi Filiphu aletsa umngani wakhe Nathanayeli kuJesu, kwenteka intfo lemangalisako. Nanobe Jesu bekacala kubona Nathanayeli, kepha watsi: “Lona ngum-Israyeli lokute bucili kuye.” (Joh. 1:47) Jesu bekati kutsi bafundzi bakhe bebetsembekile, kodvwa wabona kwetsembeka lokumangalisako kuNathanayeli. Nathanayeli bekanesono njengatsi, kodvwa bekangatentisi, beketsembeke kuko konkhe. Jesu wakutsandza loko ngaye futsi wamncoma ngako. Siyaciniseka kutsi natsi singajabula Jesu nakangasho loko ngatsi!

10. Kubaluleke ngani kutsi sigweme kusebentisa kabi lulwimi? (Jakobe 1:26)

¹⁰ Tintfo letinyenti letishiwo Tihlabelelo 15 timayelana nendlela lesiphatsa ngayo labanye. Tihlabelelo 15:3 titsi loyo losivakashi ethendeni laJehova “akanyundzeli muntfu ngelulwimi lwakhe, akenti lutfo lolubi kumakhelwane wakhe, futsi akakhulumi kabi ngebangani bakhe.” Kusebentisa kabi lulwimi kungabavisa buhlungu kakhulu labanye futsi kwente singasavunyelwa kutsi sibe tivakashi ethendeni laJehova.​—Fundza Jakobe 1:26.

11. Kuyini kunyundzela, futsi yini leyentiwako kumuntfu lonyundzelako longaphendvuki?

¹¹ Umhlabeleli ukhuluma ngekunyundzela. Kuyini kunyundzela? Kalula nje, yinkhulumo lengemanga lengona lidvumela lalomunye. Bantfu labanyundzelako labangaphendvuki bayayekeliswa kuba BoFakazi BaJehova.​—Jer. 17:10.

12-13. Kukutiphi timo lasingatikhandza sesikhuluma kabi ngebangani betfu? (Buka nesitfombe.)

¹² Tihlabelelo 15:3 tiphindze tisikhumbute kutsi tivakashi taJehova atenti lutfo lolubi kumakhelwane wato futsi atikhulumi kabi ngebangani bato. Kusho kutsini loko?

 ¹³ Singatikhandza sikhuluma kabi ngalabanye singakacondzi ngekutsi sisakate indzaba lengemanga. Nasi sibonelo: (1) asesitsi dzadze uyayekela kwenta umsebenti wasikhatsi sonkhe, (2) labashadene bayayekela kusebenta eBethel, nobe (3) umzalwane uyayekela kuba ngulomdzala welibandla nobe inceku lesebentako. Kungaba kahle yini kucabanga tizatfu letente kwaba nalolushintjo, bese sitjela labanye loko lesikucabangako? Kungenteka kunetizatfu lesingatati letente kwaba nalolushintjo. Ngetulu kwaloko, loyo losivakashi endlini yaJehova “akenti lutfo lolubi kumakhelwane wakhe, futsi akakhulumi kabi ngebangani bakhe.”

HLONIPHA LABO LABESABA JEHOVA

14. Chaza kutsi sivakashi saJehova sikhombisa njani kutsi ‘siyabenyanya bantfu lababi.’

¹⁴ Tihlabelelo 15:4 titsi umngani waJehova “uyabenyanya bantfu lababi.” Singakwenta njani loko? Njengobe sinesono, akusiko kwetfu kusho kutsi umuntfu mubi. Sisho ngani? Ngobe sivame kutsandza bantfu labanebuntfu lesibutsandzako futsi singabatsandzi labo labanebuntfu lesingabutsandzi. Ngako kufanele singatihlanganisi nalabo latsi Jehova ‘babi.’ (1 Khor. 5:11) Loku kufaka ekhatsi labo labenta tintfo letimbi labangaphendvuki, labedzelela kukholwa kwetfu netintfo lesitikholelwako nobe labetama kwenta buhlobo betfu naJehova bube butsakatsaka.​—Taga 13:20.

15. Nguyiphi lenye indlela lesikhombisa ngayo kutsi ‘siyabahlonipha labo labesaba Jehova’?

¹⁵ Tihlabelelo 15:4 tichubeka titsi kufanele ‘sibahloniphe labesaba Jehova.’ Sifuna tindlela lesingabakhombisa ngato umusa bangani baJehova nekutsi siyabahlonipha. (Rom. 12:10) Singakwenta njani loko? Lenye indlela kukhulunywa ngayo kuTihlabelelo 15:4, kutsi loyo losivakashi ethendeni laJehova “uyasifeza setsembiso sakhe, ngisho nobe sekumatima.” Nangabe sephula tetsembiso tetfu, loko kungabavisa buhlungu kakhulu labanye. (Mat. 5:37) Sibonelo nje, Jehova ulindzele kutsi tivakashi takhe tetsembeke esifungweni letasenta natishada. Ngetulu kwaloko, ujabula kakhulu nangabe batali benta konkhe lokusemandleni abo kuze bafeze tetsembiso labatente kubantfwana babo. Kutsandza Nkulunkulu namakhelwane kwenta kutsi sente konkhe lesingakwenta kuze sifeze tetsembiso tetfu.

16. Nguyiphi lenye indlela lesikhombisa ngayo kutsi siyabahlonipha bangani baJehova?

¹⁶ Lenye indlela lesingakhombisa ngayo kutsi siyabahlonipha bangani baNkulunkulu kutsi sibemukele emakhaya etfu futsi sibaphe tintfo lesinato. (Rom. 12:13) Sikhatsi lesimnandzi lesisicitsa nebazalwane betfu nabodzadze sisisita kutsi sicinise budlelwane betfu nabo kanye naJehova. Ngetulu kwaloko, sisuke silingisa Jehova nasemukela tivakashi.

UNGAYITSANDZI IMALI

17. Yini leyenta kukhulunywe ngemali kuTihlabelelo 15?

¹⁷ Sifundza kutsi sivakashi saJehova ‘nasibolekisa imali asibese sesifuna nentalo, futsi asikwemukeli kufumbatsiswa kute simelane nemuntfu lomsulwa.’ (Hla. 15:5) Yini leyenta kukhulunywe ngemali kulesihlabelelo lesifishane? Kungenca yekutsi nasitsandza imali, loko kungabalimata labanye futsi kulimate nebuhlobo betfu naNkulunkulu. (1 Thim. 6:10) Ngetikhatsi tekubhalwa kweliBhayibheli, labanye bebasitakala ngabomnakabo labeswele ngekutsi babafune intalo nabababoleka imali. Ngetulu kwaloko, labanye behluleli bebavuma kudizelwa bese babehlulela kabi  labo labete licala. Jehova ukwenyanya kakhulu loko.​—Hez. 22:12.

18. Ngumiphi imibuto lengasisita sibone kutsi sinamuphi umbono ngemali? (KumaHebheru 13:5)

¹⁸ Kubalulekile kutsi sitihlole kutsi sinamuphi umbono ngemali. Tibute: ‘Ngivame kucabanga ngemali yini netintfo lengingatitsenga ngayo? Nangiboleka imali, ngiyephuta yini kuyibhadala, ngititjele kutsi lomuntfu akayidzingi? Kuba nemali kungenta ngitive ngibalulekile yini kodvwa kube matima kutsi ngiyiphe labanye? Nangabe umzalwane nobe dzadze anemali, ngivame kucabanga kutsi utsandza imali yini? Ngakha bungani nebantfu labanjingile yini futsi ngingabanaki kangako labeswele?’ Sinikwe litfuba lelihle lekuba tivakashi taJehova. Kufanele sikhombise kutsi liligugu kitsi ngekutsi indlela lesiphila ngayo ihlale ikhombisa kutsi asiyitsandzi imali. Nasenta njalo, Jehova akayuze asishiye!​—Fundza KumaHebheru 13:5.

JEHOVA UYABATSANDZA BANGANI BAKHE

19. Yini leyenta Jehova afune sente tonkhe letintfo lokukhulunywe ngato kulesihlabelelo?

¹⁹ Tihlabelelo 15 tephetsa ngesetsembiso lesitsi: “Umuntfu lonjalo uyawukuma acine.” (Hla. 15:5) Umhlabeleli uchaza sizatfu lesenta Jehova afune sente tonkhe letintfo lokukhulunywe ngato kulesihlabelelo. Ufuna sijabule. Kungako asinika sicondziso lesitawenta kutsi sibusiswe futsi sivikeleke.​—Isa. 48:17.

20. Yini tivakashi taJehova letingayibuka ngalabovu?

²⁰ Tivakashi taJehova tingalibuka ngalabovu likusasa lelihle. Labagcotjiwe labetsembekile batawungeniswa ‘etindzaweni tekuhlala letinyenti’ Jesu labalungiselele tona ezulwini. (Joh. 14:2) Labo labanelitsemba lekuphila emhlabeni bakubuke ngalabovu kugcwaliseka kwetetsembiso letikuSembulo 21:3. Siyaciniseka kutsi sonkhe sijabula kakhulu ngekutsi Jehova ufuna sibe bangani bakhe futsi sibe tivakashi ethendeni lakhe kuze kube phakadze!