1. Xú káʼnii embáyulú Salmo 15:​1-5 rá.

 NÁA artículo rí niʼniga̱jma̱a̱ timbá xmáná nijmañulúʼ rí xa̱bi̱i̱ Jeobá bi̱ nixnaxímíjná náa ikhaa, ma̱ndoo makuwá náa guʼwá xtíin ndrígóo Jeobá á mu nambájxu̱u̱n májánʼ gajmiún. Mú, xú káʼnii gándoo gambáxu̱u̱n májánʼ gajmiún xá. Náa Salmo 15 ma̱ndoo muxkamaa xóo exti̱ʼña̱a̱ grajxe̱ rígi̱, ikhí kagu̱ ikha rí gíʼdoo numuu rí mambáyulú muʼgua kanuu náa Dios (atraxnuu Salmo 15:​1-5). a

2. Ndiéjunʼ mbáa xtaa randxa̱ʼwáminaʼ David índo̱ niʼthí ga̱jma̱a̱ numuu goʼwóo Jeobá rá.

² Náa Salmo 15 nagíʼdu̱u̱ naʼni grajxe̱: “Tátá Jeobá, tsáá gáxtáa náa guʼwáaʼ rá. Tsáá gáxtáa náa kúbá kaʼwu ndrígáaʼ rá.” (Sal. 15:1.) Índo̱ David niʼthí ga̱jma̱a̱ numuu “goʼwóo” Jeobá, mbáa ikhaa xtáa randxa̱ʼwáminaʼ ga̱jma̱a̱ numuu guʼwá xtíin dí nirígá mbá nguáthá tiempo náa xuajen Gabaón. David ma̱ngaa naʼthí ga̱jma̱a̱ numuu “kúbá kaʼwu” ndrígóo Dios mbáa xtáa raʼthí ga̱jma̱a̱ numuu kúbá Sion, dí rígá náa Jerusalén. Ikhí mijngii náa xígií náa sur ndrígóo Gabaón, David niʼni mbá guʼwá xtíin náa marigá arca rí nimbánuu asndu índo̱ garigá mbá guʼwá kiejunʼ (2 Sam. 6:17).

3. Ndíjkha nandulúʼ makru̱ʼu̱lú dí naʼthí náa Salmo 15 rá. (Atayáá ma̱ngaa xtiʼkhuu.)

³ Gajkhun má dí mbaʼin israelitas na̱nguá niñambáá mu maguma goʼwóo Jeobá, ga̱jma̱a̱ tándoo matu̱ʼu̱u̱n náa guʼwá xtíin náa  naxtagijxi̱i̱ arca rí nimbánuu, mú xúgíinʼ xa̱bi̱i̱ Jeobá bi̱ naguájun jmbu ma̱ndoo makuwá náa goʼwóo á mu nambájxu̱u̱n gajmiún ikhaa. Ga̱jma̱a̱ rúʼko̱ nindxu̱u̱ rí xúgiáánʼ nandulúʼ muʼni. Náa Salmo 15 naʼthí tikhuu rí ndayóo muʼnimbánii mu mambájxulú má xúʼko̱ gajmiúlú Jeobá.

GUʼNI RÍ MÁJÁNʼ GA̱JMA̱A̱ GUʼNI RÍ JMBU

4. Ndíjkha nuʼtálú dí raʼkháa i̱ndó ndayóoʼ majngúlú iyááʼ mu Jeobá magruiguáanʼlú rá. (Isaías 48:1.)

⁴ Náa Salmo 15:2 naʼthí rí bi̱ nambájxu̱u̱ ga̱jma̱a̱ Dios nindxu̱u̱ mbáa “bi̱ tséʼni dí ra̱májánʼ ga̱jma̱a̱ bi̱ naʼni rí jmbu”. Ajngáa “tséʼni” ga̱jma̱a̱ “bi̱ naʼni”, nindxu̱u̱ mbá rí gíʼmaa maguma má xúʼko̱. Mú, lá gajkhun rí maʼngo̱o̱ muʼni má xúʼko̱ dí májánʼ ráʼ. Xúʼko̱. Maski má xúgiáánʼ nindxu̱lú xa̱bu̱ aʼkhá, Jeobá ndaʼyoo rí nuʼni rí májánʼ á mu nuʼni tsiakimíjna̱ muʼnimbulú kuʼyáá. Índo̱ muxnaxímíjná náa Dios ga̱jma̱a̱ najngúlú iyááʼ ndiʼkhún gi̱ʼdu̱u̱. Garmáʼáan a̱jkiu̱lú nákhá wajyúuʼ, raʼkháa i̱ndó israelita ma̱ndoo makuwá náa goʼwóo Jeobá. Tikhuun nugri̱ga̱a̱ Dios, maski má tséni ga̱jma̱a̱ “xúgíʼ a̱jkiu̱ún ma̱ngaa tséni xóo kaʼyoo” (atraxnuu Isaías 48:1). Mu musngajmá dí gajkhun nindúún rí magruiguíin náa guʼwá xtíin ndrígóo Jeobá, israelitas ndiyóoʼ majmañún ga̱jma̱a̱ numuu ikha ndrígóo ga̱jma̱a̱ munimbaníí. Ikhaa má erígá rí mbiʼi xúgi̱: Mu Dios magruiguáanʼlú, raʼkháa i̱ndó ndayóo’ majngúlú iyááʼ ga̱jma̱a̱ makuwáanʼ náa xuajñuu. Gíʼmaa muʼni má xúʼko̱ “rí nindxu̱u̱ jmbu”. Ndiéjunʼ nindxu̱u̱ rígi̱ rá.

5. Ndiéjunʼ eyoo gáʼthúu̱n rí muʼnimbulú kuʼyáá Jeobá náa xúgíʼ rá.

⁵ Náa iduu Jeobá “bi̱ tséʼni̱ dí ra̱májánʼ ga̱jma̱a̱ bi̱ naʼni rí jmbu” raʼkháa i̱ndó nindxu̱u̱ bi̱ tséndátígoo nimbá reunión (1 Sam. 15:22). Gíʼmaa muʼni mbá tsiaki̱i̱ mu muʼnimbulú kuʼyáá Dios náa xúgíʼ rí nuʼni asndu índo̱ kuwáanʼlu ndajkuáanʼ (Prov. 3:6; Ecl. 12:​13, 14). Gíʼdoo  wéñuuʼ numuu muʼnimbulú kuʼyáá Jeobá maski ajndu náa nakumulú rí na̱nguá má gíʼdoo numuu. Índo̱ nuʼnimbulú nusngajmáá rí nandulúʼ kuʼyáá, ga̱jma̱a̱ rígi̱ maʼni rí Jeobá maʼndoo kaʼyulú itháan (Juan 14:23; 1 Juan 5:3).

6. Xó má naʼthí náa Hebreos 6:​10-12, ndiéjunʼ rí itháán gíʼdoo numuu ki xóo rí niguajúnʼlú jmbu nákhá wajyúuʼ rá.

⁶ Jeobá nangajo̱o̱ rí niʼni ga̱jma̱a̱ numuu ikhaa nákha wajyúuʼ. Mú, raʼkháa rí niguajúnʼlú jmbu nákha ginii nandoo gáʼthúu̱n rí ma̱ndoo makuwáanʼ má xúʼko̱ náa goʼwóo Jeobá, xó má eʼthí náa Hebreos 6:​10-12 (atraxnuu). Jeobá tsémbumuu nimbá dí májánʼ rí niʼni. Ikhaa nandoo rí muʼni má xúʼko̱ ñajuunʼ ga̱jma̱a̱ xúgíʼ a̱jkiu̱lú “asndu índo̱ gártumuu mbiʼi”. “Á mu tségáanʼlú” maʼni numa̱a̱ʼlú ga̱jma̱a̱ ma̱ndoo mambájxulú gajmiúlú asndu kámuu (Gál. 6:9).

GUʼTHÁ RÍ GAJKHUN NÁA A̱JKIU̱LÚ

7. Ndiéjunʼ eyoo gáʼthúu̱n rí marata dí gajkhun náa awúu̱n a̱jkia̱a̱nʼ rá.

⁷ Náa Salmo 15:2 naʼthí rí xa̱bu̱ bi̱ Jeobá nagruiguíin náa goʼwóo nindxu̱u̱ bi̱ naʼthí rí gajkhun náa a̱jkiu̱u̱n, ra̱ʼkhá i̱ndó rí tséʼni nduwaʼ. Jeobá nandoo rí muʼthá dí gajkhun ga̱jma̱a̱ rí muʼni dí jmbu náá xúgíʼ (Heb. 13:18). Rígi̱ gíʼdoo wéñuuʼ numuu, “numuu rí Jeobá nawiyuuʼ kaʼyoo xa̱bu̱ bi̱ narkaʼwu múʼúun rí eʼni, mú ikhaa nambájxu̱u̱ gajmíi̱n bi̱ nuni̱ rí jmbu” (Prov. 3:32).

8. Ndiéjunʼ dí ragíʼmaa muʼnilú rá.

⁸ Bi̱ “naʼthí rí gajkhun náa a̱jkiu̱u̱n” raʼkháa i̱ndó naʼnimbo̱o̱ xtángoo ndrígóo Dios, náa kúwá mbaʼin xa̱bu̱ ga̱jma̱a̱ índo̱ xtáa mbáwíí tséʼnimbánuu (Is. 29:13). Raʼkhí kayuuʼ rí maguma xúʼko̱, ikháánʼlú tsíyulú muʼni rígi̱. Mbáa xa̱bu̱ ma̱ndoo magíʼdu̱u̱ maʼni a̱jma̱ a̱jkiu̱u̱n rí xtángoo ndrígóo Jeobá nindxu̱u̱ májánʼ má xúʼko̱ (Sant. 1:​5-8). Mbáa asndu xáʼnimbánuu tikhuu rí ikhaa naku̱mu̱u̱ rí na̱nguá gíʼdoo wéñuuʼ numuu. Á mu nda̱wa̱á índo̱ gáʼyoo rí nda̱a̱ má dí rígá ga̱jma̱a̱ numuu rí tséʼnimbo̱o̱, mbáa nagíʼdu̱u̱ maʼni rí nindxu̱u̱ itháán ra̱májánʼ. Maski má naku̱mu̱u̱ rí xtáa raʼni ñajuunʼ Jeobá Dios nditháan xágruígú gamajkhu rí naxnúu (Ecl. 8:11). Ikháanʼ nandulúʼ muʼthá rí gajkhun ga̱jma̱a̱ muʼni rí nindxu̱u̱ jmbu náa xúgíʼ rí nuʼni.

9. Ndiéjunʼ eʼsngúlú dí nirígá índo̱ Jesús nininiiʼ Natanael rá. (Atayáá ma̱ngaa xtiʼkhuu.)

 ⁹ Gíʼdoo wéñuuʼ numuu rí manindxu̱lú mbáa bi̱ naʼthí rí gajkhun náa a̱jkiu̱u̱n, ma̱ndoo mbuʼyáá rígi̱ ga̱jma̱a̱ numuu dí nirígá índo̱ Felipe nijkha kayáa Natanael bi̱ nambájxu ga̱jma̱a̱, mu maniniiʼ Jesús. Ikhú nirígá mbá rí nagui̱i̱ wéñuuʼ. Maski ajndu Jesús na̱nguá nininiiʼ Natanael, mú niʼthí: “Gu̱ya̱a̱ mbáa israelita bi̱ nda̱a̱ rí minduwaʼ náa ikhaa” (Juan 1:47). Gajkhun rí Jesús ndaʼyoo rí eʼwíinʼ xa̱bi̱i̱ tséthí rí nduwaʼ, mú ndiʼyoo dí Natanael nditháan tséʼthí rí minduwaʼ. Maski ajndu Natanael nindxu̱u̱ xa̱bu̱ aʼkhá xó má ikháanʼ, mú na̱nguá a̱jma̱ inuu ga̱jma̱a̱ nditháan tséʼthí rí nduwaʼ ga̱jma̱a̱ naʼthí rí jmbu náa xúgíʼ. Jesús ninigu̱u̱ʼ rí xúʼko̱ nindxu̱u̱ ga̱jma̱a̱ niʼthúu̱n rí májánʼ eʼni. ¡Ra̱ʼkhá tháán májánʼ gáʼnindxu̱u̱ rí Jesús maʼthí xúʼko̱ kaʼnii ga̱jma̱a̱ numulú!

10. Náá numuu dí gíʼmaa muñewa̱a̱n dí nuʼtálú rá. (Santiago 1:26.)

¹⁰ Mbaʼa rí na̱ʼkha̱ raʼthí náa Salmo 15 rí ndayóoʼ muʼnimbánii nindxu̱u̱ ga̱jma̱a̱ numuu rí xóo nuʼniu̱u̱n eʼwíinʼ. Salmo 15:3 naʼthí dí bi̱ nagruiguíin Jeobá náa goʼwóo “na̱nguá eʼni nduwaʼ ga̱jma̱a̱ raju̱u̱n. Tséʼniuu mbá dí ra̱májánʼ xa̱bu̱ numbaaʼ ga̱jma̱a̱, ga̱jma̱a̱ tséʼni gawúunʼ bi̱ nambáxu̱u̱ gajmíi̱n”. Rí xúñewa̱a̱n rí muʼthá raʼkháa i̱ndó maʼni gawúunʼ eʼwíinʼ; ma̱ngaa maʼni rí xákuwáanʼ náa goʼwóo Jeobá (atraxnuu Santiago 1:26).

11. Ndiéjunʼ nindxu̱u̱ rí matani nduwaʼ ga̱jma̱a̱ ndiéjunʼ gárígá á mu mbáa bi̱ naʼni nduwaʼ tsétanga̱a̱ a̱jkiu̱u̱n rá.

¹¹ Bi̱ niʼnirámáʼ Salmos naʼthí ga̱jma̱a̱ numuu nduwaʼ. Nindxu̱u̱ dí marata dí raʼkhí ga̱jma̱a̱ numún eʼwíinʼ. Rígi̱ gamíi maʼni gachúu mbiʼyuu bi̱ nuthi dí ragájkhun ga̱jma̱a̱ numuu. Bi̱ nuni̱ rígi̱ ga̱jma̱a̱ tsétanga̱a̱ a̱jkiu̱ún dí nuni̱ nduwaʼ, xándoo mani̱ndxu̱ún testigos de Jeobá (Jer. 17:10).

12, 13. Nguáná ma̱ndoo muʼni gachíí mbiʼyuu mbáa bi̱ nambájxulú gajmiúlú rá. (Atayáá ma̱ngaa xtiʼkhuu.)

¹² Salmo 15:3 naʼni marmáʼáan a̱jkiu̱lú rí bi̱ xtáa náa goʼwóo Jeobá “tséʼniuu mbá dí  ra̱májánʼ xa̱bu̱ numbaaʼ ga̱jma̱a̱, ga̱jma̱a̱ tséʼni gawúunʼ bi̱ nambáxu̱u̱ gajmíi̱n”. Xú káʼnii gándoo guʼni gachíi mbiʼyuu mbáa bi̱ nambájxu gajmiúlú rá.

¹³ Mbáa asndu tséʼthá kiéjunʼlú dí raʼkhí ga̱jma̱a̱ numún eʼwíinʼ. Gundxaʼwamíjna̱ ga̱jma̱a̱ numuu rígi̱: 1) Mbáa ndxájulú niniñuuʼ raʼni kájxi̱ ñajuunʼ Jeobá, 2) xa̱bu̱ gajmii nagájniín náa Betel, 3) najuiʼthá rí mbáa ndxájulú nánguá nindxu̱u̱ bi̱ kayá edxu̱u̱ o siervo ministerial. Ikháanʼ xándoo muʼthá numún a̱ngiu̱lú bugi̱ ga̱jma̱a̱ numuu rí nini̱ mbá dí raʼkhí ikha jngóo niniñaaʼ rí kúwá runi̱, numuu rí ikháanʼ tséʼyá ndiéjunʼ nirígá ga̱jma̱a̱ garmáʼáan a̱jkiu̱lú dí bi̱ xtáa náa guʼwá xtíin ndrígóo Jeobá “tséʼniuu mbá dí ra̱májánʼ xa̱bu̱ numbaaʼ ga̱jma̱a̱, ga̱jma̱a̱ tséʼni gawúunʼ bi̱ nambáxu̱u̱ gajmíi̱n”.

GUʼYAMAJKÚN BI̱ NAMÍÑÚN KUYÁÁ JEOBÁ

14. a) Xú káʼnii eʼyoo bi̱ xtáa náa goʼwóo Jeobá “bi̱ naʼni dí ra̱májánʼ” rá. b) Xú káʼnii eʼyoo dí ragíʼmaa mambájxu̱u̱ ga̱jma̱a̱ rá.

¹⁴ Salmo 15:4 naʼthí rí bi̱ nambájxu̱u̱ ga̱jma̱a̱ Jeobá “tsíyoo gáʼyoo bi̱ naʼni dí ra̱májánʼ”. Mú, xú káʼnii eʼyáá rí mbáa “naʼni dí ra̱májánʼ” rá. Numuu rí nindxu̱lú xa̱bu̱ aʼkhá, xándoo muʼthá rí mbáa naʼni dí ra̱májánʼ i̱ndó ga̱jma̱a̱ numuu rí nundxaʼwamíjnálú ikháanʼ. Náá numuu rá. Numuu rí mbáa nanigulúʼ mambájxulú gajmiúlú tikhuun ga̱jma̱a̱ numuu rí nanigulúʼ xóo kaʼniún. Mú tsénigulúʼ mambajxú gajmiúlú eʼwíinʼ numuu rí tsénigulúʼ xóo enii. Ikha jngóo ragíʼmaa mambajxú gajmiúlú xa̱bu̱ bi̱ Jeobá ndaʼyoo rí nuni̱ dí ra̱májánʼ (1 Cor. 5:11). Xóo xa̱bu̱ bi̱ nakudaminaʼ aʼkhá ga̱jma̱a̱ tsétanga̱a̱ a̱jkiu̱ún, bi̱ tséyamajkuíí rí nuʼnimbulú ma̱ngaa bi̱ nunimíjna̱ muni̱ gachíí rí mambájxulú gajmiúlú Jeobá (Prov. 13:20).

15. Xú káʼnii ma̱ndoo mbuyamajkún bi̱ namíñún kuyáá Jeobá rá.

¹⁵ Ma̱ngaa náa Salmo 15:4 naʼthúlú rí gíʼma mbuʼyamajkún “bi̱ namíñún kuyáá Jeobá”. Ikha jngóo nuʼnimíjna manindxu̱lú mbáa májánʼ xa̱bu̱ ga̱jma̱a̱ mbuʼyamajkún bi̱ nambájxu̱u̱ gajmíi̱n Dios (Rom. 12:10). Xú káʼnii gándoo gúʼni rá. Salmo 15:4 naʼthí rí bi̱ xtáa náa guʼwá xtíin ndrígóo Jeobá “naʼnimbánuu má xúʼko̱ rí nakudaminaʼ maʼni maski ajndu tségájnuu májánʼ”. Á mu tséʼnimbánii rí nuxuʼdamíjná muʼni, gamíi muʼni gawúunʼ eʼwíinʼ (Mat. 5:37). Mbá xkri̱da Jeobá nagúʼthu̱u̱n rí bi̱ kúwá náa goʼwóo, xóo bi̱ nidamijná munimbáníí rí nixuʼdamíjna̱ ma̱ngaa nandoo rí bi̱ xa̱bu̱ guanii muni̱ tsiakimijna munimbaníí rí nuxudamijná náa e̱jñu̱ún. Numuu rí nandulúʼ kuʼyáá Dios ga̱jma̱a̱ nandulúʼ kuʼñúún a̱ngiu̱lú muʼni asndu xó má eʼngulú mu muʼnimbáníí rí nuxudamijná muʼni.

16. Ndiéjunʼ nindxu̱u̱ i̱mba̱ xóo ma̱ndoo mbuyamajkún bi̱ nambájxu̱u̱ gajmíi̱n Jeobá rá.

¹⁶ I̱mba̱ rí xóo ma̱ndoo musngajmá rí nduʼyamajkhún bi̱ nambájxu̱u̱ gajmíi̱n Dios nindxu̱u̱ rí mundriguíin májánʼ ga̱jma̱a̱ muxnún rí kuáʼdáá (Rom. 12:13). Índo̱ nuʼthúún a̱ngiu̱lú maguwáʼ muphiʼtsu gajmiúlú o muʼni gagimijná gajmiúlú rúʼko̱ naʼni rí mambájxulú májánʼ gajmiúlú ikhiin ga̱jma̱a̱ nambájxulú itháán májánʼ gajmiúlú Jeobá. Índo̱ nundriguíin májánʼ a̱ngiu̱lú nduʼyaridáá Jeobá.

XÁNIGULÚ MUGUAʼDÁÁ WÉÑUUʼ MBÚJKHA̱A̱

17. Ndíjkha rí náa Salmo 15, na̱ʼkha̱ raʼthí ga̱jma̱a̱ numuu mbújkha̱a̱ rá.

¹⁷ Ma̱ngaa náa Salmo 15 na̱ʼkha̱ raʼthí xóó ga̱jma̱a̱ numuu bi̱ xtáa náa goʼwóo Jeobá, rí ikhaa “na̱nguá exná mbújkho̱o̱ mawiʼtóo inuu, ga̱jma̱a̱ tségruigú mbújkha̱a̱ mu maʼniuu dí ra̱májánʼ xa̱bu̱ bi̱ nda̱a̱ aʼkhúun” (Sal. 15:5). Náá numuu rí náa Salmo naʼthí ga̱jma̱a̱ numuu mbújkha̱a̱ rá. Numuu rí tséʼni mingíjyúuʼ magua̱ʼa̱ muguaʼdáá mbújkha̱a̱. Ga̱jma̱a̱ á mu xúʼko̱ narígá, gamíi muʼni gawúúnʼ eʼwíinʼ ma̱ngaa ni xambáxulú gajmiúlú Dios (1 Tim. 6:10).  Xa̱bu̱ bi̱ nikúwá nákhá mbiʼi rí na̱ʼkha̱ raʼthí náa Biblia, tikhuun nini̱ ngíníi a̱ngiu̱ún bi̱ nuxnatíʼñúún mbújkha̱a̱ numuu rí nuruma̱a̱ inuu. Nikúwá tikhuun bi̱ nunimbáníí xkujndu, nundrígú regalo mu xa̱bu̱ bi̱ nda̱a̱ aʼkhúun mugíʼníí dí ra̱májánʼ. Jeobá nawiyuuʼ xúgíʼ rígi̱ (Ezeq. 22:12).

18. Ndiéjunʼ gíʼmaa murajximíjnalú rá. (Hebreos 13:5.)

¹⁸ Májánʼ gáʼni rí mbuʼyáá, xú káʼnii eʼyáá mbújkha̱a̱ ikháanʼ. Gurajximijnalú: “Lá i̱ndó nandxa̱ʼwáminaʼ ga̱jma̱a̱ numuu mbújkha̱a̱ ga̱jma̱a̱ rí ma̱ndoo matsi ráʼ. Á mu mbáa naxnátíʼñúʼ mbújkha̱a̱, lá ndajyúuʼ mu ma̱ni̱ ndxáwúu numuu rí naku̱mu̱ʼ rí ikhaa na̱nguá eyóoʼ mbújkho̱o̱ xáʼ. Lá naku̱mu̱ʼ rí ikhúún gúʼdoo itháán numuʼ, numuu rí gúʼdoo mbújkha̱a̱ ráʼ. Lá naʼniuu mingíjyúuʼ maxná rí gúʼdoo ráʼ. Lá nandxa̱ʼwáminaʼ rí a̱ngui̱nʼ bi̱ guáʼdáá mbújkha̱a̱ itháán má nandún kuyáá mbújkha̱a̱ ki xóo Jeobá xáʼ. Lá i̱ndó nambájxu̱ʼ gajmíʼ bi̱ guaʼdáá ki xóo bi̱ ngíníi ráʼ.” Ikháanʼlú kuaʼdáá mbá rí mitsaanʼ, ikhaa nindxu̱u̱ rí makuwáanʼlu náa goʼwóo Jeobá. Mu muñewa̱a̱n rígi̱ mbaʼyóoʼ rí xánigulú maguaʼdáá wéñuuʼ mbújkha̱a̱. Á mu nuʼni xúʼko̱, ¡Jeobá nimbá míʼtsú xániñulú! (Atraxnuu Hebreos 13:5).

JEOBÁ NANDOO KAʼÑÚÚN BI̱ NAMBÁJXU̱U̱ GAJMÍI̱N

19. Ndíjkha rí Jeobá nandoo rí muʼnimbáníí dí naʼthí náa Salmo 15 rá.

¹⁹ Náa Salmo 15 naguámbáa ga̱jma̱a̱ ajngáa rígi̱: “Tsí xtáa raʼni xkuaʼnii, xáʼga̱nú maxpátríguíi” (Sal. 15:5). Xúgi̱ kaʼnii salmista naʼtúlúʼ rí Jeobá nuxnulúʼ kiʼtáñajunʼ rígi̱ numuu rí ikhaa nandoo dí makuwáánʼlu gagi. Índo̱ nuʼni rí Dios na̱nda̱ʼa̱lú muʼni, ikhaa naʼni tsajkurámáanʼlu ma̱ngaa nañewu̱nlú (Is. 48:17).

20. Ndiéjunʼ dí ra̱ʼkhá tháán mitsaanʼ dí kuáʼti̱i̱n bi̱ kúwá náa goʼwóo Jeobá rá.

²⁰ Ra̱ʼkhá tháán mitsaanʼ rí kuáʼti̱i̱n nda̱wa̱á bi̱ kúwá náa goʼwóo Jeobá bi̱ gúguajún jmbu. Bi̱ kaxtaʼwíin magúun mekhuíí, náa Jesús nijkha gáʼni mújúunʼ “náa makuwá” (Juan 14:2). Eʼwíinʼ xa̱bi̱i̱ makuwá tsímáá náa tsu̱du̱u̱ Ku̱ba̱ʼ, xó má naʼthí náa Apocalipsis 21:3. ¡Ra̱ʼkhá tháán nagui̱i̱ rí Jeobá niʼthúlú mambajxúu gajmiúlú! ¡Ma̱ndoo makuwáanʼ náa goʼwóo ikhaa asndu kámuu mbiʼi!