1. Ita bele hetan benefísiu saida hodi aprende kona-ba Salmo 15:​1-5?

 IHA lisaun antes neʼe, ita aprende ona katak ema neʼebé dedika sira-nia moris ba Jeová no iha relasaun besik ho nia bele sai bainaka iha ninia tenda. Maibé, saida mak ita presiza halo atu sai ninia bainaka? Salmo 15 koʼalia kona-ba neʼe. (Lee Salmo 15:​1-5.) Liafuan sira iha salmo neʼe hanorin ita lisaun oioin neʼebé bele ajuda ita atu hakbesik liután ba Maromak.

2. Karik David hanoin kona-ba saida bainhira nia temi kona-ba Jeová nia tenda?

² Salmo 15 hahú ho liafuan: “Oh Jeová, sé mak bele sai bainaka iha Ita-nia tenda? Sé mak bele hela iha Ita-nia foho santu?” (Sal 15:1) Bainhira temi kona-ba Jeová nia “tenda”, karik David hanoin kona-ba tenda santu neʼebé iha sidade Gibeão iha tempu neʼebá. Maibé tanba David mós temi kona-ba Maromak nia “foho santu”, entaun karik nia hanoin kona-ba tenda neʼebé iha foho Siaun iha Jeruzalein. Neʼe mak kilómetru balu husi Gibeão nia parte súl, no iha neʼebá mak David harii tenda atu tau arka aliansa nian antes harii templu.—2 Sam 6:17.

3. Tanbasá mak ita hakarak aprende kona-ba Salmo 15? (Haree mós dezeñu.)

³ Klaru katak ema Izraél uitoan deʼit mak bele serbí iha tenda santu, no husi ema sira-neʼe laʼós sira hotu mak bele tama ba fatin neʼebé rai arka aliansa nian. Maibé, Jeová nia atan hotu bele sai bainaka iha ninia tenda simbóliku hodi sai ninia belun ba nafatin. Neʼe mak buat neʼebé ita hotu hakarak. Salmo 15 temi kona-ba hahalok balu neʼebé ita presiza haburas no hatudu atu bele nafatin sai Jeová nia belun.

 MORIS HO HAHALOK LOOS NO HALO BUAT NEʼEBÉ LOOS

4. Oinsá ita hatene katak la toʼo atu hetan deʼit batizmu atu bele sai Jeová nia belun? (Isaias 48:1)

⁴ Salmo 15:2 hatete katak ema neʼebé sai Jeová nia belun mak ema neʼebé ‘moris ho hahalok loos no halo buat neʼebé loos’. Neʼe mak hahalok neʼebé ita presiza kontinua hatudu. Maibé ita bele “moris ho hahalok loos” ka lae? Sin. Maski ita la perfeitu, maibé Jeová bele haree ita nuʼudar ema neʼebé “moris ho hahalok loos” se ita hakaʼas an atu halo tuir nia. Bainhira ita dedika an ba Maromak no hetan batizmu, neʼe hanesan ita hahú laʼo hamutuk ho Maromak. Iha Bíblia nia tempu, kuandu ema ida sai parte ba nasaun Izraél, neʼe la dehan katak nia bele sai bainaka iha Jeová nia tenda. Porezemplu, ema balu halo orasaun ba Maromak maibé laʼós ho “lia-loos no hahalok loos”. (Lee Isaias 48:1.) Tan neʼe, ema Izraél presiza aprende kona-ba Jeová nia mandamentu no halo tuir. Nuneʼe mós ohin loron, atu bele sai Jeová nia belun la toʼo atu hetan deʼit batizmu no tuir reuniaun sira. Ita presiza kontinua “halo buat neʼebé loos”. Oinsá atu halo nuneʼe?

5. Halo tuir Jeová iha buat hotu envolve saida deʼit?

⁵ Tuir Jeová nia haree, “moris ho hahalok loos” no “halo buat neʼebé loos” laʼós deʼit envolve tuir reuniaun beibeik iha Reuniaun-Fatin. (1 Sam 15:22) Ita presiza hakaʼas an atu halo tuir Jeová iha buat hotu iha ita-nia moris, inklui mós kuandu ita mesak. (Prov 3:6; Ecle 12:​13, 14) Importante mós atu halo tuir Jeová iha buat neʼebé kiʼik. Hodi halo nuneʼe, hatudu katak ita hadomi nia no nia mós sei hadomi ita.—João 14:23; 1 João 5:3.

6. Tuir Ebreu 6:​10-12, saida mak importante liu fali hahalok diʼak neʼebé ita hatudu iha tempu uluk?

 ⁶ Jeová hafolin tebes buat neʼebé ita halo iha tempu pasadu. Maibé, Ita-nia hahalok diʼak neʼebé ita hatudu tempu uluk la garantia katak ita sei nafatin sai bainaka iha Jeová nia tenda. Ita bele haree ida-neʼe ho klaru iha Ebreu 6:​10-12. (Lee.) Jeová nunka haluha buat diʼak neʼebé ita halo uluk. Maibé nia hakarak ita atu kontinua adora nia ho laran tomak “toʼo rohan”. No nia sei sai ita-nia Belun ba nafatin “se ita la sai kole”.—Gal 6:9.

HANOIN LIA-LOOS IHA ITA-NIA LARAN

7. Hanoin kona-ba lia-loos iha ita-nia laran envolve saida deʼit?

⁷ Ema neʼebé hakarak sai bainaka iha Jeová nia tenda presiza “hanoin kona-ba lia-loos iha ninia laran”. (Sal 15:2) Neʼe laʼós deʼit katak ita la bosok. Jeová hakarak ita atu hatudu laran-moos iha buat hotu. (Ebr 13:18) Neʼe importante tanba “Jeová hakribi ema neʼebé laran-makerek, maibé nia sai belun neʼebé besik ho ema laran-loos”.—Prov 3:32.

8. Ita presiza hasees an husi hahalok saida?

⁸ Ema neʼebé “hanoin kona-ba lia-loos iha ninia laran”, la finje atu halo tuir Maromak iha ema seluk nia oin no tuirmai halo hahalok kontra kuandu mesamesak. (Isa 29:13) Sira hasees an husi hahalok laran-makerek. Ema neʼebé laran-makerek karik komesa hanoin katak Jeová nia ukun-fuan balu mak la matenek. (Tgo 1:​5-8) No se sira hanoin katak ukun-fuan ruma ladún importante, karik sira deside atu la halo tuir ida-neʼe. Tuirmai, se sira la hetan konsekuénsia husi sira-nia hahalok kontra, karik sira sei brani atu halo buat neʼebé aat liután, no Maromak sei la simu sira-nia adorasaun. (Ecle 8:11) Maibé ita hakarak hatudu hahalok onestu iha situasaun hotu.

9. Saida mak akontese kuandu Jesus hasoru Natanael ba dala primeiru, no ita bele aprende saida? (Haree mós dezeñu.)

⁹ Ita bele aprende tanbasá importante atu iha laran neʼebé moos husi Jesus  kuandu nia foin hasoru Natanael. Bainhira Filipe lori Natanael atu hasoru Jesus ba dala primeiru, buat úniku ida akontese. Maski Jesus nunka hasoru Natanael, maibé Jesus hatete: “Haree bá, nia mak ema Izraél neʼebé la iha lia-bosok iha nia.” (João 1:47) Klaru katak Jesus haree ninia dixípulu sira seluk nuʼudar ema neʼebé laran-moos, maibé kona-ba Natanael, Jesus haree nia nuʼudar ema laran-moos iha dalan neʼebé boot liu. Hanesan ita, Natanael mós la perfeitu, maibé nia la laran-makerek no hatudu onestu iha buat hotu. Jesus admira no gaba Natanael kona-ba neʼe. Klaru katak neʼe mak priviléjiu se Jesus haree ita nuʼudar ema laran-loos!

10. Tanbasá ita presiza kuidadu atu la uza sala ita-nia nanál? (Tiago 1:26)

¹⁰ Buat barak neʼebé hakerek iha Salmo 15 mak kona-ba hahalok neʼebé ita presiza hatudu ba ema seluk. Salmo 15:3 hatete katak bainaka iha Jeová nia tenda “la uza ninia nanál atu koʼalia aat no hafoʼer ema seluk nia naran, nia la halo aat ba ninia maluk, no nia la hafoʼer ninia belun nia naran”. Se ita uza sala ita-nia nanál, neʼe bele hakanek ema seluk no mós ita bele lakon ita-nia priviléjiu atu sai bainaka iha Jeová nia tenda.—Lee Tiago 1:26.

11. Se ema ida hafoʼer ema seluk nia naran no lakohi arrepende an, saida mak sei akontese ba nia?

¹¹ Hakerek-naʼin ba salmo neʼe temi liu kona-ba koʼalia aat hodi hafoʼer ema seluk nia naran. Se ema ida koʼalia aat ema seluk no lakohi arrepende an, nia bele hasai husi kongregasaun.—Jer 17:10.

12-13. Iha situasaun saida deʼit mak la ho neon ita bele hafoʼer ema seluk nia naran? (Haree mós foto.)

¹² Salmo 15:3 mós fó-hanoin ita katak Jeová nia bainaka sira la halo aat ba sira-nia maluk no hafoʼer sira-nia belun nia naran. Neʼe envolve saida deʼit?

 ¹³ Karik la ho neon ita bele hafoʼer ema ida nia naran hodi fahe informasaun neʼebé negativu. Porezemplu: (1) irmán ida para atu serbí nuʼudar pioneiru, (2) kaben-naʼin ida la serbí tan iha Betel, ka (3) irmaun ida la serbí tan nuʼudar katuas ka atan ba kongregasaun. La diʼak atu hatete ba ema seluk katak irmaun-irmán sira-neʼe karik halo sala ruma, tan neʼe mak sira lakon sira-nia knaar. Tuir loloos, karik iha razaun oioin neʼebé ita la hatene tanbasá sira la halaʼo tan knaar. Tan neʼe, ema neʼebé sai bainaka iha Jeová nia tenda “la halo aat ba ninia maluk, no nia la hafoʼer ninia belun nia naran”.

HAFOLIN EMA NEʼEBÉ HAMTAʼUK JEOVÁ

14. Esplika toʼok oinsá mak Jeová nia bainaka sira “la simu ema neʼebé la iha morál”.

¹⁴ Salmo 15:4 hatete katak Jeová nia belun “la simu ema neʼebé la iha morál”. Oinsá mak ita bele halo nuneʼe? Nuʼudar ema la perfeitu, ita la iha direitu atu deside se ema ida iha morál ka lae. Tanbasá? Tanba karik baibain ita gosta liu atu ransu ho ema neʼebé ita toman, no la gosta ema seluk tanba ninia hahalok ruma. Tan neʼe, ita lakohi ransu ho ema neʼebé Jeová hatete katak “la iha morál”. (1 Kor 5:11) Neʼe inklui sira neʼebé halo hahalok aat no la arrepende an, la respeitu ita-nia fiar, ka koko halo fraku ita-nia relasaun ho Jeová.—Prov 13:20.

15. Saida mak dalan ida atu “hafolin sira neʼebé hamtaʼuk Jeová”?

¹⁵ Salmo 15:4 mós hatete katak ita presiza “hafolin sira neʼebé hamtaʼuk Jeová”. Tan neʼe, ita hakarak buka dalan atu hatudu laran-diʼak no respeitu ba Jeová nia belun sira. (Rom 12:10) Oinsá? Dalan ida mak temi iha Salmo 15:​4, ema neʼebé sai bainaka iha Jeová nia tenda “kumpre nafatin ninia promesa sira maski neʼe lori susar ba nia”. Se ita la kumpre ita-nia promesa, neʼe bele hakanek ema seluk nia laran. (Mt 5:37) Porezemplu, Jeová hakarak ninia bainaka sira atu moris tuir sira-nia juramentu kona-ba kaben. Nia mós kontente bainhira inan-aman sira hakaʼas an atu kumpre sira-nia promesa ba sira-nia oan. Ita-nia domin ba Maromak no ema seluk sei book ita atu kumpre ita-nia promesa tuir ita-nia kbiit.

16. Saida mak dalan seluk tan atu hafolin Jeová nia belun sira?

¹⁶ Dalan ida tan atu hafolin Maromak nia belun sira mak hodi hatudu laran-diʼak no laran-luak. (Rom 12:13) Hodi gasta tempu hamutuk ho ita-nia irmaun-irmán sira, bele ajuda ita atu hametin ita-nia relasaun nuʼudar belun ho sira no mós ho Jeová. Liután neʼe, hodi hatudu laran-diʼak, ita banati-tuir Jeová.

KETA HADOMI OSAN

17. Tanbasá mak Salmo 15 temi kona-ba osan?

¹⁷ Salmo 15:5 hatete katak Jeová nia bainaka “la husu osan-funan kuandu fó-empresta, no nia lakohi simu prezente hodi halo aat ba ema neʼebé la halo sala”. Tanbasá salmo neʼe temi kona-ba osan? Tanba hanoin sala kona-ba osan bele hakanek ema seluk, no estraga ita-nia relasaun belun ho Maromak. (1 Tim 6:10) Iha Bíblia nia tempu, ema balu aproveita sira-nia maun-alin neʼebé kiak hodi haruka sira selu osan-funan kuandu fó-empresta. No mós, juís balu simu osan subasubar no la hatudu justisa bainhira  tesi-lia ba ema neʼebé la sala. Jeová odi tebes hahalok sira-neʼe.—Eze 22:12.

18. Pergunta saida deʼit mak bele ajuda ita atu analiza ita-nia hanoin kona-ba osan? (Ebreu 13:5)

¹⁸ Diʼak atu analiza ita-nia hanoin kona-ba osan. Husu Ita-nia an: ‘Haʼu hanoin beibeik kona-ba osan no buat neʼebé haʼu hakarak sosa? Se haʼu empresta osan, haʼu neineik atu selu fali tanba hanoin ema neʼebé fó-empresta la presiza? Haʼu sente katak haʼu mak ema neʼebé importante tanba iha osan? Susar ba haʼu atu hatudu laran-luak ka lae? Haʼu hanoin katak irmaun no irmán sira neʼebé iha osan barak mak materializmu ka lae? Haʼu habelun ho ema neʼebé riku no la hatudu interese ba ema neʼebé kiak?’ Importante atu husu pergunta sira-neʼe tanba ita iha priviléjiu furak atu sai Jeová nia bainaka. Ita bele proteje ita-nia priviléjiu neʼe hodi la hadomi osan. Se ita halo nuneʼe, Jeová sei nunka husik hela ita!—Lee Ebreu 13:5.

JEOVÁ HADOMI NINIA BELUN

19. Tanbasá Jeová hakarak ita atu halo buat hotu neʼebé temi iha Salmo 15?

¹⁹ Salmo 15 remata ho promesa: “Ema neʼebé halo buat sira-neʼe sei hamriik metin nafatin.” (Sal 15:5) Iha neʼe, David esplika razaun tanbasá Jeová hakarak ita atu halo buat hotu neʼebé temi iha salmo neʼe. Jeová hakarak ita atu moris kontente. Tan neʼe, nia fó ita matadalan neʼebé sei lori bensaun no protesaun.—Isa 48:17.

20. Jeová nia bainaka sira hein namanas ba saida?

²⁰ Ema neʼebé Jeová simu nuʼudar ninia bainaka sei iha futuru neʼebé kapás. Kristu nia alin sira sei moris iha lalehan, fatin neʼebé Jesus prepara ona ba sira. (João 14:2) Ema neʼebé iha esperansa atu moris iha rai hein namanas ba promesa neʼebé hakerek iha Apokalipse 21:3. Klaru katak ita hotu hafolin tebes Jeová nia konvite atu sai bainaka iha ninia tenda ba nafatin!