1. Hagnampe antika hanao akore ty Salamo 15:1-5?

 NIANARANTIKA tamy i lahatsoratse taloha itoỳ fa afake ty hiambahiny amy i tragnolay i Jehovah agn’ohatsey ao ze ndaty nanokan-tegna ho aze naho mifandrambe marine ama’e. Faie ino ty toko’e hataontika mba ho ambahini’e nainai’e? Mirehake miomba izay ty Salamo 15. (Vakio ty Salamo 15:1-5.) Mirehake lesogne afake magnampe antika hifandrambe marine aman’Andrianagnahare i mpanao salamoy ty ao.

2. Ino ty raha va’e tan-tsay i Davida tao naho fa nirehake miomba ty tragnolay i Jehovah reke?

² Hoe izao ty fanomboha o Salamo 15 iohoe: “O Jehovah, ia ty hiambahiny an-tragnolai’o ao? Ia ty hitoboke amy i vohi’o masigney ao?” (Sal. 15:1) Va’e i tragnolay ta Gibeona tagney ty tan-tsay i Davida ao naho fa nirehake tihoe “tragnolay” reke. Va’e i Ziona ta Jerosalema tao ka ty tea’e horehafegne naho fa nirehake tihoe ‘vohitse masigne’ reke. Nagnoregne tragnolay tamy ty toeragne lavidavitse atimo i Gibeona agne ty Davida mba hisiagne i vata masigney amparake ty hagnoregnagne toeragne mete soa hisy aze.​—2 Sam. 6:17.

3. Nagnino ro mahaliagne antika ty Salamo 15? (Henteo i sarey.)

³ Mazava hoaze fa tsy o Israelitao iaby ro nengagne hanompo tamy i tragnolaỳ ao sady tsy ampe avao ka ty ndaty nahazo nilitse tamy i toeragne nisy i vata masigney ao. Faie o mpanompo i Jehovah tsy mivalikeo, le afake miambahiny amy i tragnolai’e agn’ohatsey ao iaby sady afake minamagne ama’e. Sambe magniry izay tikagne iaby. Mirehake ty raha toko’e hatao naho ty toetse ila’e hagnampe antika ho nama i Jehovah avao ty Salamo 15.

 MANDEHANA TSY MISY TSINY NAHO MANOA TY MAREGNE

4. Nagnino tika ro mirehake tie tsy ampe avao tihoe vita badisa naho te hifandrambe amy i Jehovah tika? (Isaia 48:1)

⁴ Atao tihoe naman’Andrianagnahare “ze mandeha tsy misy tsiny naho manao ty maregne” amy Salamo 15:2 ao. Ty rehake tihoe “mandeha” naho “manao”, le irehafagne raha atao mitohy. Faie afake ty ‘handeha tsy misy tsiny’ vao tika? Ie. Tsy misy voririke o ndatio, faie hevere i Jehovah tihoe “mandeha tsy misy tsiny” tika naho fa manao ze azontika atao mba hankatoavagne aze. Nanomboke niharo lia aman’Andrianagnahare tika naho fa nanokan-tegna naho natao badisa. Faie tamy ty andro ty Baiboly, ndra tie natao tihoe Israelita aza ty ndaty raike, le tsy midika zay tie le avy le afake ho ambahiny i Jehovah reke. Nitokavegne hoe izay ty ila’e faie tsy nanao ty “soa naho ty maregne.” (Vakio ty Isaia 48:1.) Tsy maintsy nianatse miomba ty fepetse nitake i Jehovah naho nagnorike izay areke ty Israelita tso-po. Manahake izay avao ka ty amy izao. Tsy ampe avao tihoe vita badisa naho tokavegne tihoe Vavolombelo i Jehovah naho te hifandrambe marine amy i Jehovah tika. Tsy maintsy “manao ty maregne” avao ka tika. Akore ty hahavitantika izay?

5. Ino ty tafilitse amy tihoe mankatò i Jehovah amy ze kila raha?

⁵ Amy i Jehovah, tihoe “mandeha tsy misy tsiny” naho “manao ty maregne”, le tsy midika tie mivory tsy tapake amy i Anjomba i Fanjakagney agne avao. (1 Sam. 15:22) Tsy maintsy mikezake mafe mankatò aze tika amy ty raha iaby ataontika amy ty fiaignagne ndra tie naho fa irerike aza. (Ohab. 3:6; Mpito. 12:13, 14) Tena lahibey tihoe mikezake mankatò i Jehovah avao ndra tie amy ty raha kedekede aza. Izay ty ampisehoantika fa tena tea aze tika.​—Jaona 14:23; 1 Jaona 5:3.

6. Arake ty Hebreo 6:10-12, ino ty raha tena lahibey mandikoatse ty raha soa fa nivitantika taloha?

 ⁶ Tena mankasitrake ty raha nivitantika taloha ty Jehovah. Faie tsy midika zay tie lelia’e ho ambahiny i Jehovah avao tika satria nahavita raha soa tie taloha. Magnazava izay ty Hebreo 6:10-12. (Vakio.) Tsy haligno i Jehovah ty raha soa nataontika taloha faie tea’e naho manompo aze amy ty fontika iaby tika “hatrake ampara’e.” Ho nama’e nainai’e tika “naho tsy kivy.”​—Gal. 6:9.

MIREHAFA TY MAREGNE AGNATE FO’O AO

7. Ino ty dika tihoe mirehake ty maregne agnate fo ao?

⁷ Ty ndaty te hiambahiny an-tragnolay i Jehovah ao, le tsy maintsy “mirehake ty maregne agnate fo’e ao.” (Sal. 15:2) Tsy ampe avao tihoe tsy mavande fa tea i Jehovah ka tika naho manao ty maregne amy ty raha rehafentika naho ty raha ataontika. (Heb. 13:18) Tena lahibey zay satria “mampangorìgne i Jehovah ty ndaty fetsefetse, fa ty ndaty maregne ro managne fifandrambesagne marine ama’e.”​—Ohab. 3:32.

8. Ino ty findesam-batagne toko’e hohalavirentika?

⁸ Ty ndaty “mirehake ty maregne agnate fo’e ao” le tsy tihoe sare mankatò naho fa misy mahatrea, le ie reke tsy misy mahatrea manao raha raty. (Isaia 29:13) Tsy fetsefetse iareo. Ty ndaty fetsefetse le va’e hanomboke hisalasala tie tsy voatere hahasoa iaby ty lalà i Jehovah. (Jak. 1:5-8) Va’e tsy hankatò i Jehovah reke amy ty raha hevere’e ho madineke. Naho fa trea’e tie tsy misy voka’e raty ty tsy fankatoava’e, le vao mainke manao raha raty reke sady manjare soa miatreke avao ty fanompoagne atao’e. (Mpito. 8:11) Faie tsy hoe izay tikagne fa teantika ty hanao ty maregne amy ze kila raha iaby.

9. Ino ty raha niseho tamy i fotoagne nifankatreava i Natanaela naho i Jesosy voaloha’ey? (Henteo i Sarey.)

⁹ Tena lahibey tihoe ‘mirehake ty maregne agnate fo ao.’ Magnampe antika hahatrea izay ty raha niseho naho fa nasae i Filipo mba hifankatrea tamy i Jesosy ty Natanaela nama’e. Ndra tie mbe tsy nahatrea i Natanaela aza ty Jesosy, le hoe reke tama’e: “Israelita vata’e zao sady ndaty tsy misy fitake.”  (Jaona 1:47) Azo antoke fa ndaty maregne ka ty nifihevera i Jesosy i mpiana’e ila’e rey faie tena niambake ty ahy i Natanaela. Tsy voririke manahake antika avao reke faie tsy nanao soa miatreke, zane hoe nanao ty maregne tamy ze kila raha. Nidera i Natanaela ty Jesosy noho izay. Teantika naho hoe izay ka ty fihevera i Jesosy antika!

10. Nagnino tika ro toko’e hitao amy ty raha rehafentika? (Jakoba 1:26)

¹⁰ Miomba ty fomba toko’e hindesantika ty hafa ty ankamaroa ty raha rehafegne amy i Salamo 15 ao. Rehafe ty Salamo 15:3 tie “tsy magnendrekendreke amy ty lela’e, tsy manao raty ama o ndaty, ndra manalatse ty ragne’e maifitse aze” ty ndaty miambahiny an-tragnolay i Jehovah ao. Mandratse ty hafa tika naho magnendrekendreke iareo sady tsy hahafeno fepetse hiambahiny an-tragnolay i Jehovah ao.​—Vakio ty Jakoba 1:26.

11. Ino ty atao tihoe magnendrekendreke, le ino ty raha hiseho amy ty mpagnendrekendreke tsy mibebake?

¹¹ Nirehake miomba tihoe magnendrekendreke i mpanao salamoy. Ino ty atao tihoe magnendrekendreke? Amy ty ankapobei’e, le mirehake raha tsy maregne mba hanimbagne ty laza ty hafa ty ndaty hoe izay. Roahegne tsy ho agnisa ty fiangonagne ty mpagnendrekendreke tsy mibebake.​—Jer. 17:10.

12-13. Amy ty raha manao akore tika ro va’e hanalatse ty namantika ndra tie tsy satrientika aza zay? (Henteo i sarey.)

¹² Maniahy antika ka i Salamo 15:3​-oy fa tsy manao raty ama o ndaty sady tsy manalatse ty nama’e ty ambahiny i Jehovah. Akore ty va’e hahavy antika hanalatse ty namantika?

¹³ Manalatse ty ndaty raike tika naho mampiparitake vaovao tsy maregne miomba aze ndra tie tsy satrientika aza zay. Intoa misy ohatse: 1) tsy mpisava lalagne sasa ty rahavave raike, 2) tsy manompo amy i Betela ao sasa ty mpivaly raike, 3) tsy  androanavi-pagnahy ndra mpagnampe amy ty fiangonagne sasa ty rahalahy raike. Tsy mete naho mirehake amy ty hafa tika tie va’e nanao raha raty o rahalahy naho rahavave reo matoa najanogne. Maro ty anto’e tsy fantantika nahavy o fiovagne reo. Ty ndaty te hiambahiny an-tragnolay i Jehovah ao areke le “tsy manao raty ama o ndaty sady tsy manalatse ty ragne’e maifitse aze.”

HAJAO ZE NDATY MATAHOTSE I JEHOVAH

14. Hazavao tie akore ty fomba handiera ty ambahiny i Jehovah ty “ndaty tsy misy dika’e.”

¹⁴ Rehafe ty Salamo 15:4 tie ‘mandietse ty ndaty tsy misy dika’e’ ty nama i Jehovah. Akore ty hahafahantika manao izay? Tsy azontika atao ty mamaritse tie tsy misy dika’e ty ndaty raike satria izay ty fahatreavantika aze. Ino ty anto’e? Satria tsy voririke tika, le va’e hoteantika ty ndaty raike heverentika tie mora ifandrambesagne fa tsy ho teantika ty hafa satria hoe mandagìgne antika. Ze ndaty hevere i Jehovah tihoe “tsy misy dika’e” areke ty toko’e holierentika. (1 Kor. 5:11) Agnisa izay ze nanao raha raty faie tsy mibebake, ze tsy magnaja ty raha inoantika ndra ze mikezake hanimba ty fifandrambesantika amy i Jehovah.​—Ohab. 13:20.

15. Akore ty fomba ahafahantika magnaja “ze matahotse i Jehovah”?

¹⁵ Mifanohetse amy izay, le hoe ty Salamo 15:4 tie hajao “ze matahotse i Jehovah.” Mila mipay fomba hanehoagne hasoa fagnahy naho fagnajagne ty nama i Jehovah tika. (Rom. 12:10) Akore ty azontika anoagne izay? Mirehake ty fomba azontika anoagne izay ty Salamo 15:4. Rehafegne ao tie “tsy mivalike amy ty vava nanoe’e” ty ndaty miambahiny an-tragnolay i Jehovah ao “ndra tie misy voka’e raty ama’e zay.” Azo antoke fa handratse ty hafa tika naho tsy magnatanterake ty raha nampitamaentika. (Mat. 5:37) Mitamà ohatse ty Jehovah fa hitagne ty vava nanoe’e tamy ty vali’e ty ambahini’e. Tena fale ka reke naho fa mikezake mafe manao ze hagnatanterahagne ty raha nampitamae iareo ty ana’e o rae aman-dreneo. Noho ty hateantika an’Andrianagnahare naho o ndatio ty mahavy antika hanao ze azontika atao mba hitanagne ty vava nanoentika.

16. Ino ka ty fomba hafa ahafahantika magnaja ty nama i Jehovah?

¹⁶ Magnaja ty nama i Jehovah ka tika naho tea mandrambe ambahiny sady matarike. (Rom. 12:13) Ankoatse tihoe miarake mivory naho miarake manompo, le toko’e hanokagne fotoagne hiarahagne amo o rahalahy naho rahavaveo ka tika mba hahavy antika hifandrambe soa amy iareo naho amy i Jehovah. Tsy vita izay fa manahake i Jehovah ka tika naho tea mandrambe ambahiny.

KO TEA VOLA LOATSE

17. Nagnino ty Salamo 15 ro mirehake miomba ty vola?

¹⁷ Ty ambahiny i Jehovah le ‘tsy mipay tombo’e naho fa mampitrosa sady tsy mandrambe aferafera mba hagnamelohagne ty ndaty maregne.’ (Sal. 15:5) Nagnino i mpanao salamoy ro nirehake miomba ty vola? Satria hanimba ty hafa tika naho tea vola loatse sady ho simba ty fifandrambesantika amy i Jehovah. (1 Tim. 6:10) Tamy ty andro ty Baiboly, le nangalake tombo’e tamy ty rahalahi’e mahantra ty ndaty ila’e naho fa nampitrosa. Nanao aferafera ka ty mpitsara ila’e, le tsy nanao ty rare’e naho fa nitsara. Tena malaigne ze raha zay ty Jehovah.​—Ezek. 22:12.

18. Ino ty fagnonteneagne hagnampe antika hahafantatse ty fiheverantika o volao? (Hebreo 13:5)

¹⁸ Soa naho mandineke ty fomba fiheverantika o volao tika. Dineho zao: ‘Mieretseretse mateteke miomba ty vola naho ty raha  azoko viliegne vao raho? Naho mitrosa vola raho, tsy ahereko aniany vao zay satria mieretseretse raho tie mbe tsy paliave i ndatỳ i vola’ey? Miheve-tegna ho ambone vao raho satria manam-bola? Matity vao raho? Mieretseretse vao raho tie tea vola i rahalahy naho rahavave manam-bola bey rey? Ty ndaty manam-bola vao ty tena teako ho namagne le ze tsy managne hejeko?’ Tena lahibey ty handinehantika o fagnonteneagne reo satria nasaegne mba ho ambahiny i Jehovah tika. Afake miaro ze tombotsoa anagnantika zay tika naho fa tsy tea vola loatse. Tsy ombia hienga antika ty Jehovah naho fa manao izay tika!​—Vakio ty Hebreo 13:5.

TENA TEÀ I JEHOVAH TY NAMA’E

19. Nagnino tika ro tea i Jehovah hagnorike i raha iaby rehafegne amy Salamo 15 ao rey?

¹⁹ Ty fampitamagne toy ty mamaragne ty Salamo 15: “Tsy mba hihondrahondra ze manao o raha rehoe.” (Sal. 15:5) Hazavae i mpanao salamoy etoa tie nagnino tika ro tean’Andrianagnahare hagnorike i raha iaby rehafegne amy Salamo 15 ao rey. Tea i Jehovah ho fale tika. Nagnomey toromareke antika areke reke mba hahazoantika fitahiagne naho fiarovagne.​—Isaia 48:17.

20. Afake mitamà ino ty ambahiny i Jehovah?

²⁰ Afake mitamà hoavy tena fanjaka ze ambahiny i Jehovah. Mitamà ty hiaigne nainai’e amy i “toeragne maro” fa nomane i Jesosy hoahy iareo an-dagnitse agney o voahosotse tsy mivalikeo. (Jaona 14:2) Ze hiaigne an-tane etoa, le mitamà ty hahatrea ty fahatanteraha ty Apokalypsy 21:3. Tena voninahitse lahibey ho antika areke tihoe asae i Jehovah hiambahiny amy i tragnolai’ey ao nainai’e!