NKHANI YAKUSAMBIRA YA NAMBALA 24
SUMU 24 Zani ku Phiri Laku Yehova
Lutirizgani Kuja Mlendu Waku Yehova Mpaka Muyaya!
“Yimwi Yehova, ndiyani yo wangaŵa mulendu muhema linu?” —SALIMO 15:1.
FUNDU YIKULU
Tiziŵengi vo tikhumbika kuchita kuti tilutirizgi kuja pa ubwezi ndi Yehova. Tiwonengi so vo iyu wakhumba kuti tichitiyengi mabwezi ngaki.
1. Kumbi lemba la Salimo 15:1-5 lingatiwovya wuli?
MU NKHANI yajumpha tingusambira kuti ateŵeti akujipereka aku Yehova, aja alendu muhema laki lakuyeruzgiya, asani ŵe pa ubwezi wakukho ndi iyu. Kweni kumbi tingachita wuli kuti tije alendu ŵaki? Salimo 15 likamba vinandi vakukwaskana ndi nkhani yeniyi. (Ŵerengani Salimo 15:1-5.) Salimo lenili likonkhoska vo titenere kuchita kuti tije pa ubwezi wakukho ndi Chiuta.
2. Kumbi ntchinthu wuli cho chitenere kuti chinguchiska Davidi kuzumbuwa hema laku Yehova?
2 Salimo 15 litamba ndi mazu ngakuti: “Yimwi Yehova, ndiyani yo wangaŵa mulendu muhema linu? Ndiyani yo wangaja muphiri linu lakupaturika?” (Salimo 15:1) Davidi wachikamba va hema laku Yehova watenere kuti waŵanaŵaniyanga chihema chakukumanaku cho kwa kanyengu chenga ku Gibiyoni. Davidi wangukamba so za ‘phiri lakupaturika,’ laku Chiuta ndipu watenere kuti waŵanaŵaniyanga za Phiri la Ziyoni ku Yerusalemu. Wenuwu wenga mtunda wa makilomita nganandiku, cha kumwera kwa Gibiyoni ko Davidi wangujintha hema ndipu wanguŵikamu bokosi la phanganu mpaka pa nyengu yo nyumba yakusopiyamu yinguzengeke.—2 Samu. 6:17.
3. Ntchifukwa wuli tikhumbika kulivwisa umampha Salimo 15? (Wonani so chithuzi.)
3 Mbuneneska kuti Ayisirayeli anandi azomerezekanga cha kuteŵete pachihema chakukumanaku, ndipu Ayisirayeli amanavi ukongwa ndiwu azomerezekanga kusere mukati mo mwenga bokosi la phanganu. Kweni ateŵeti wosi akugomezgeka aku Yehova ŵenga alendu ŵaki muhema laki lakuyeruzgiya, asani aja ndipuso alutirizga kuja mabwezi ngaki. Venivi ndivu tosi tikhumba. Salimo 15, likonkhoska mijalidu yinyaki yo tikhumbika kuja nayu kweniso kuyilongo kuti tilutirizgi kuja mabwezi ngaku Yehova.
Ayisirayeli a mu nyengu yaku Davidi asuzgikanga cha kuvwisa vo vang’anamuwanga kuja mulendu muhema laku Yehova (Wonani ndimi 3)
MUYENDENGI KWAMBULA KUNANGISA KWENISO MUCHITENGI CHO NTCHAMAMPHA
4. Kumbi tiziŵa wuli kuti Yehova wakhumba ŵaka kuti tibatiziki cha? (Yesaya 48:1)
4 Pa Salimo 15:2 mubwezi waku Chiuta wakonkhoskeka kuti “ndi mweniyo watenda kwambula kunangisa, yo wachita cho ntchamampha.” Mazu ngakuti “watenda” kweniso “wachita” ngalongo kuti munthu yo wachita vinthu vo nyengu zosi ndipuso waleka cha kuvichita. Kweni kumbi vingachitika nadi ‘kwenda kwambula kunangisa’? Hinya. Chinanga kuti palivi munthu wakufikapu, kweni Yehova watitiwona kuti ‘titenda kwambula kunangisa’ asani tichita vosi vo tingafiska kuti timuvwiyi. Asani tajipereka kwaku Chiuta ndi kubatizika, tija kuti tayamba ŵaka ulendu widu wakwenda ndi Chiuta. Mwakuyeruzgiyapu, mu nyengu yakali kuja ŵaka Myisirayeli vang’anamuwanga cha kuti munthu yo ndi mulendu waku Yehova. Anyaki amudananga “kweni mu uneneska ndi mu urunji cha.” (Ŵerengani Yesaya 48:1.) Ayisirayeli a mtima wamampha akhumbikanga kusambira vo Yehova wakhumba kuti achitengi kweniso kuvigwiriskiya ntchitu. Mwakuyanana ŵaka kuti Chiuta wakondwengi nasi mazuŵa nganu, pe vinandi vo tikhumbika kuchita kuluska ŵaka kubatizika kweniso kuwungana ndi mpingu. Tikhumbika kulutirizga ‘kuchita cho ntchamampha.’ Kumbi tingachita wuli venivi?
5. Kumbi kuvwiya Yehova pa vinthu vosi kusazganjipu?
5 Kwaku Yehova ‘kwenda kwambula kunangisa’ kweniso ‘kuchita cho ntchamampha,’ kung’anamuwa vinandi kuluska ŵaka kusanirika pa maunganu nyengu zosi. (1 Samu. 15:22) Tikhumbika kuyesesa kuvwiya Chiuta pa chechosi chinanga mphanyengu yo te tija. (Nthanthi 3:6; Waku. 12:13, 14) Tikhumbika kuyesesa kuvwiya Yehova chinanga mphatinthu timanatimana. Asani tichita viyo, tilongo kuti titimuyanja nadi ndipu venivi vichitiska kuti nayu watiyanjengi ukongwa.—Yoha. 14:23; 1 Yoha. 5:3.
6. Mwakukoliyana ndi Aheberi 6:10-12, kumbi chakukhumbika ukongwa ntchinthu wuli kuluska vinthu vamampha vo tikuchitapu kali kuvuli?
6 Yehova wakondwa ukongwa ndi vo tikumuchitiyapu kuvuli. Kweni ŵaka pakuti tikuchitapu vinthu vamampha kuvuli ving’anamuwapu cha kuti tilutirizgengi kuja alendu muhema laku Yehova. Ndipu venivi ndivu vikonkhoskeka umampha pa Aheberi 6:10-12. (Ŵerengani.) Yehova waluwa cha vinthu vamampha vo tikuchitapu kuvuli. Kweni wakhumba kuti tilutirizgi kumuteŵete ndi mtima wosi “mpaka pakumaliya.” Iyu walutirizgengi kuja mubwezi widu mpaka muyaya “asani taleka kuvuka.”—Aga. 6:9.
MULONGORONGI UNENESKA MUMTIMA MWINU
7. Kumbi kulongoro uneneska mumtima mwidu kung’anamuwanji?
7 Munthu yo wakhumba kuti wazomerezeki kuja mulendu waku Yehova muhema laki, watenere ‘kulongoro uneneska mumtima mwaki.’ (Salimo 15:2) Venivi visazgapu vinandi kuluska ŵaka kuleka kukamba boza. Yehova wakhumba kuti tichitengi vinthu mwauneneska pa vosi vo tikamba ndi kuchita. (Ahe. 13:18) Venivi vakukhumbika “pakuti Yehova waseruka nayu munthu muryarya, kweni waja pa ubwezi wakukho ndi munthu wakunyoloka.”—Nthanthi 3:32.
8. Kumbi titenere kukhwecha jalidu nili?
8 Ŵanthu wo ‘alongoro uneneska mumtima mwawu’ apusikiziya cha kuvwiya marangu ngaku Chiuta asani ŵanthu anyaki atiŵawona, mbwenu kumphepeti atuswa marangu ngaku Chiuta. (Yesa. 29:13) Yiwu achita vinthu mwauryarya cha. Munthu muryarya wangayamba kukayikiya kuti marangu ngaku Yehova ngakovya. (Yako. 1:5-8) Iyu wangaleka kuvwiya Yehova pa nkhani zo watiziwona kuti zimana kwaku iyu. Pavuli paki asani wawona kuti palivi chiheni cho chichitika asani iyu waleka kuvwiya, wangayamba kuchita vinthu vinyaki viheni ukongwa. Kweni chinanga kuti iyu wangaŵanaŵana kuti wateŵete Chiuta, Yehova wangazomereza cha kusopa kwaki. (Waku. 8:11) Kweni isi tikhumba kuchita vinthu mwauneneska pa chechosi.
9. Kumbi tisambiranji pa vo vinguchitika Yesu wati wakumana kakwamba ndi Nataniyeli? (Wonani so chithuzi.)
9 Tingasambira kukhumbika kwakuja ndi mtima wamampha kutuwa kwaku Yesu, pa nyengu yo wangukumana kakwamba ndi Nataniyeli. Filipu wati waza ndi mubwezi waki Nataniyeli kuti wazikumani ndi Yesu, panguchitika chinthu chinyaki. Chinanga kuti Yesu wenga wechendakumanepu ndi Nataniyeli kweni wangukamba kuti: “Wonani Myisirayeli chayiyu yo mwaku iyu mulivi chinyengu.” (Yoha. 1:47) Mbuneneska kuti Yesu waziŵanga kuti akusambira ŵaki achitanga vinthu mwauneneska, kweni wanguwona kuti Nataniyeli wachitanga vinthu mwauneneska ukongwa. Nge isi Nataniyeli nayu wenga wambula kufikapu. Kweni wenga muryarya cha ndipu wachitanga vinthu mwauneneska pa chechosi. Yesu wangukhorwa ndipu wangumulumba Nataniyeli. Vingaja vakukondwesa ukongwa kuti Yesu watikambi kuti te ŵanthu aviyo!
Filipu wanguluta ndi mubwezi waki Nataniyeli kwaku Yesu ndipu Nataniyeli mwenuyu wenga munthu wambula chinyengu. Kumbi wangakamba so viyo asani wawona isi? (Wonani ndimi 9)
10. Ntchifukwa wuli titenere cha kuyigwiriskiya ntchitu mwambula kwenere mphasu yakulongoro? (Yakobe 1:26)
10 Fundu zinandi zo zikonkhoskeka mu Salimo 15 zikamba va mo isi tichitiya vinthu ndi anyidu. Lemba la Salimo 15:3 likamba kuti mulendu yo we muhema laku Yehova “ndi lilimi laki, wakamba vinthu viheni cha va anyaki, munyaki watimuchitiya vinthu viheni cha, ndipu abwezi ŵaki watiŵalengesa cha.” Asani tikamba vinthu viheni vakukwaskana ndi anyidu vingaŵapweteka ukongwa ndipu tingazomerezeka cha kuja mulendu muhema laku Yehova.—Ŵerengani Yakobe 1:26.
11. Kumbi kukamba vinthu viheni va ŵanthu anyaki kung’anamuwanji, nanga ntchinthu wuli cho chichitika asani munthu wakamba vinthu viheni va ŵanthu anyaki kweni walapa cha?
11 Yo wakulemba buku la Masalimo wazumbuwa munthu yo wakamba vinthu viheni va anyaki. Kumbi kukamba vinthu viheni va ŵanthu anyaki kung’anamuwanji? Nkhukamba vinthu vaboza vo vingananga mbiri ya munthu munyaki. Ŵanthu wo akamba vinthu viheni vakukwaskana ndi anyawu wo alapa cha asezgeka mumpingu Wachikhristu.—Yere. 17:10.
12-13. Kumbi tingangalengesa wuli mabwezi ngidu kwambula kuziŵa? (Wonani so chithuzi.)
12 Lemba la Salimo 15:3 lititikumbusa so kuti alendu a muhema laku Yehova atiŵachitiya vinthu viheni cha anyawu kweniso kulengesa abwezi ŵawu. Kumbi tingaŵalengesa wuli anyidu?
13 Tingalengesa munthu munyaki kwambula kuziŵa asani tiwandisa nkhani yakukwaskana ndi munthu yo. Mwakuyeruzgiyapu: (1) mzichi waleka kuchita uteŵeti wa nyengu zosi, (2) banja laleka kuteŵete pa Beteli, pamwenga (3) mubali waleka kuteŵete nge mura pamwenga mteŵeti wakovya. Kuja kunanga kukambiya ŵanthu anyaki kuti abali ndi azichi ŵenaŵa atenere kuti achita chinthu chinyaki chiheni ndichu chifukwa chaki mauteŵeti ngasintha. Pangaŵa vifukwa vinyaki vo isi tileka kuziŵa vo vachitiska kuti pawi kusintha kwenuku. Kweni mulendu yo we muhema laku Yehova “munyaki watimuchitiya vinthu viheni cha, ndipu abwezi ŵaki watiŵalengesa cha.”
Chingaja chipusu kuwandisa nkhani zakukwaskana ndi ŵanthu anyaki ndipu kuchita viyo kungaja kukamba vinthu viheni va ŵanthu anyaki (Wonani ndimi 12-13
MUTUMBIKENGI ŴANTHU WO ATOPA YEHOVA
14. Konkhoskani mo mulendu waku Yehova wangatinkhiya “weyosi yo wachita vinthu vabwekabweka.”
14 Lemba la Salimo 15:4 likamba kuti mubwezi waku Yehova “watinkha weyosi yo wachita vinthu vabwekabweka.” Kumbi tingaziŵa wuli kuti munthu uyu wachita vinthu vabwekabweka? Chifukwa chakuti te ŵanthu ambula kufikipu vingatisuzga kuziŵa asani munthu wachita vinthu vabwekabweka. Chifukwa wuli? Ve viyo chifukwa chakuti tingayanja ŵanthu wo isi tiwona kuti tisuzgika cha kuchita nawu vinthu kweni tingatinkha anyaki ŵaka chifukwa chakuti atitikondwesa cha. Mumalu mwaki isi titenere kutinkha ŵanthu wo Yehova watiŵawona kuti achita “vinthu vabwekabweka.” (1 Akori. 5:11) Ŵanthu yaŵa asazgapu wo achita vinthu viheni ndipu alapa cha, wo aleka kutumbika vo isi tigomezga pamwenga atimbanyizga ubwezi widu ndi Yehova.—Nthanthi 13:20.
15. Kumbi tingaŵatumbika wuli “ŵanthu wo atopa Yehova”?
15 Pavuli paki lemba la Salimo 15:4 likamba kuti titenere kutumbika “ŵanthu wo atopa Yehova.” Mwaviyo tiyesesa kusaniya nthowa zo tingangalongore ulemu kweniso lisungu mabwezi ngaku Yehova. (Aro. 12:10) Kumbi tingachita wuli venivi? Nthowa yimoza yikambika pa Salimo 15:4 kuti mulendu yo we muhema laku Yehova “asani walayizga, wasintha cha chinanga kuti vinthu vo vingaŵa viheni kwaku iyu.” Asani tafiska cha vo tingulayizga vingaguŵiska anyidu. (Mate. 5:37) Mwakuyeruzgiyapu, Yehova wakhaza kuti munthulumi ndi munthukazi wo akutorana asungi layizgu lawu lo angulayizgana pa nyengu yo atorananga. Iyu wakondwa so asani wawona apapi atesesa kufiska vo angulayizga ŵana ŵawu. Chifukwa chakuti titanja Chiuta kweniso ŵanthu anyaki tiyesesengi kuchita vosi vo tingachita kuti tifiski vo tingulayizga.
16. Kumbi ndi nthowa yinyaki niyi yo tingatumbikiya mabwezi ngaku Yehova?
16 Nthowa yinyaki yo tingatumbikiya mabwezi ngaku Chiuta nkhuja ndi mtima wakupaska kweniso kulonde alendu. (Aro. 12:13) Asani tisaniya nyengu yakucheze ndi abali kweniso azichi vititiwovya kuti tiyanjanengi ukongwa ndipuso tija pa ubwezi wakukho ndi Yehova. Kusazgiyapu yapa, asani tilonde alendu tiyezga Yehova.
LUTIRIZGANI KULEKA KWANJA NDALAMA
17. Ntchifukwa wuli lemba la Salimo 15 likamba nkhani ya ndalama?
17 Lemba la Salimo likamba so kuti mulendu waku Yehova “ndalama zaki wakongolesa kuti wasaniriyepu zapachanya cha, ndipu wakana kulonde chinyeda pa mulandu wa munthu wambula kunanga.” (Salimo 15:5) Ntchifukwa wuli Salimo lenili likamba nkhani ya ndalama? Chifukwa asani tileka kuwona ndalama mwakwenere tingaguŵiska anyidu ndipu tinganaga ubwezi widu ndi Chiuta. (1 Timo. 6:10) Mu nyengu yakali ŵanthu anyaki aryiyanga masuku pa mutu abali ŵawu wo ŵenga akavu mwakuŵatchaja ndalama zapachanya asani aŵabwerekesa. Kusazgapu yapa, akweruzga alondiyanga vinyeda ndipu ŵanthu ambula kunanga aŵayeruzganga mwambula urunji. Vinthu venivi Yehova waseruka navu.—Ezeki. 22:12.
18. Kumbi ndi mafumbu nanga ngo ngangatiwovya kuti tijifufuzi pa nkhani ya mo tiwone ndalama? (Aheberi 13:5)
18 Tingachita umampha kujifufuza kuti tiziŵi mo isi tiwone ndalama. Jifumbengi kuti: ‘Kumbi ndijaliya ŵaka kuŵanaŵaniya nkhani ya ndalama kweniso vinthu vo ndingagula? Asani ndabwereka ndalama, kumbi ndiswera kuweza ndichiŵanaŵana kuti yo wandibwerekesa ngwandalama kali? Kumbi nditijiwona kuti nde wapachanya kuluska anyangu chifukwa chakuti nde ndi ndalama? Kumbi nde mukaka kupaskaku anyangu ndalama zangu? Kumbi ndiyeruzga abali ndi azichi kuti atanja ukongwa vinthu vakuliŵavu ŵaka pakuti ŵe ndi ndalama? Kumbi nditanja ukongwa abali ndi azichi akukhupuka kuphara akavu?’ Te ndi mwaŵi wapade ukongwa wakuja alendu aku Yehova. Tingavikiliya mwaŵi wenuwu asani tilutirizga kuleka kwanja ndalama. Asani tichitengi viyo Yehova watilekengi cha!—Ŵerengani Aheberi 13:5.
YEHOVA WATANJA MABWEZI NGAKI
19. Ntchifukwa wuli Yehova wakhumba kuti tichitengi vinthu vosi vo vakambika mu Salimo 15?
19 Salimo 15 limaliza ndi layizgu lakuti: “Weyosi yo wachita vinthu venivi wazamusukunyika cha.” (Salimo 15:5) Pa lemba ili wamasalimo uyu wakonkhoska chifukwa cho Chiuta wakhumbiya kuti isi tichitengi vinthu vosi vo vakambika mu Salimo lenili. Yehova wakhumba kuti isi tikondwengi. Ndichu chifukwa chaki watitipaska ulongozgi wo utitivikiliya kweniso wo ungatiwovya kuti tisaniyi vitumbiku.—Yesa. 48:17.
20. Kumbi alendu aku Yehova akhazanji kunthazi?
20 Alendu aku Yehova akhaza vinthu vamampha ukongwa kunthazi. Akhristu akusankhika wo mbakugomezgeka amuja kuchanya ko kwe “malu nganandi ngakujamu” ko Yesu wakuŵanozge. (Yoha. 14:2) Ndipu wo azamuja pacharu chapasi akhaza kuziwona malayizgu ngo ngakambika pa Chivumbuzi 21:3 ngachifiskika. Kukamba uneneska ndi mwaŵi ukulu ukongwa kuti Yehova wakutidana kuti tije mabwezi ngaki, kuti tije alendu muhema laki kwamuyaya.
SUMU 39 Tije ndi Zina Lamampha Kwaku Chiuta
