1. Ndzimo 15:1-5 yi nga hi phasa kharini?

 GA NDRIMA yi vbindridego, hi hevbude gu khethu vale va hendzeledzago womi wawe ga Jehovha va bwe va simama ni wupari nyo tiye naye, va nga khala vapfhumba vaye omu nya “litendra” laye. Ganiolu, ginani hi yedego gu gira gasi hi simama gu khala vapfhumba vaye? Ndzimo 15, ya gu ganeya khu mahungu yaya. (Leri Ndzimo 15:1-5.) Ndzimo yeyi, ya gu hi embeya esi hi yedego gu gira gasi hi manega ni wupari nyo tiye ni Nungungulu.

2. Ginani egi Dhavhidhe a nga ba a gi pimisa tepo a ga ba a ganeya khu litendra la Jehovha?

² Ndzimo 15 ya gu pheya khu malito ma gu khayo: “[Jehovha], khu mani a yelago gu beya nyumbani gwago? Khu mani a dzi kodzago gu vbanya gigomoni gwago nya gu age?” (Ndzi. 15:1) Na gu ganeya khu ‘nyumba’ ya Jehovha mwendro litendra, muembi nya dzindzimo Dhavhidhe a di gu thula tabhernakeli yi nga ba yi romo Ghibheyoni khu tepo yoyo. Dhavhidhe a di ganeya gambe khu ‘gigomo nya guage’ gya Nungungulu na gu thula Siyoni gu nga ba gu khala Jerusalema. Ga gigomo gyogyo gi nga ba giri ni dzikilometru nya dzingi kala Ghibheyoni, Dhavhidhe a di gu vbahide litendra gasi gu vega ngasa nya gidzumeledzwano kala yi vbahwa nyumba nya yadi. — 2 Sam. 6:17.

3. Khu ginani hi vbwetago gu pwisisa Ndzimo 15? (Wona fotu.)

³ Lisine gu, Vaisrayeli nya vangi kha va nga ba va yede gu thuma umo nya tabhernakeli ambari kamu gu beya omu nya litendra gu nga ba yi romo ngasa nya gidzumeledzwano. Ganiolu, satshavbo sithumi nyo tumbege sa Jehovha si di hadzi gu khala vapfhumba omu nya litendra laye nyo fananise khu gu simama gu khala dzipari dzaye. Nigu isoso, khiso hatshavbo hi si vbwetago. Ndzimo 15  ya gu ganeya khu makhalelo nyo khaguri hi yedego gu ma haguleya ni gu ma yeyedza gasi hi simama gu khala dzipari dza Jehovha.

SIMAMA GU MANEGA NI MAVBANYELO NYO LULAME U BWE U GIRA ESI NYA SADI

4. Hi nga dziti kharini gu khethu gu bhabhatiswa khandri satshavbo esi Jehovha a si vbwetago avbo gwathu? (Isaya 48:1)

⁴ Ndzimo 15:2, ya gu ganeya gu khiyo pari ya Nungungulu khu yile yi gu na ni ‘mavbanyelo nya gululame yi girago esi si gu sadi.’ Livhesi leli, la gu ganeya khu silo hi yedego gu simama gu gira. Ganiolu, ‘ina si ngu kodzega gu manega ni mavbanyelo nya gululame?’ Ina. Lisine gu hatshavbo kha ha vbeleya, ganiolu Jehovha a na hi wona na hi gu na ni ‘mavbanyelo nya gululame’ ha gu gira satshavbo hi si kodzago gasi gu mu engisa. Tepo hi dzi hendzeledzago hi bwe hi bhabhatiswa, ha gu pheya gu gimbiya ni Nungungulu. Khu giyeyedzo, dziteponi nya gu lowe nya Bhibhiliya, khu gu ba muthu ari Muisrayeli kha sa nga ba si thula gu khiso a diri pfhumba wa Jehovha. Vambe Vaisrayeli va di gu ganeya gu khavo va gu thumeya Nungungulu, ganiolu “nasiri khu lisine ni gululama.” (Leri Isaya 48:1.) Vaisrayeli va di gu yeyedza gu khavo va diri vapfhumba va Nungungulu khu gu hevbula maningano ni gugola gwaye va bwe va vbanya khugo. Khu ndziya nyo fane, hi ngu tsaka khu gu khala vapfhumba va Nungungulu muhuno, ganiolu isoso kha si hegeyi basi avbo nya gu bhabhatiswe ni gu khala Fakazi ya Jehovha. Hi yede gu simama gu gira “esi si gu sadi.” Hi nga si gira kharini isoso?

5. Sa gu thula ginani gu engisa Jehovha ga satshavbo hi girago?

⁵ Ga Jehovha, gu manega ni “mavbanyelo nya gululame” gumogo ni gu ‘gira esi si gu sadi’ kha si thuli basi gu hongola mitshanganoni, Salawuni nya Mufumo. (1 Sam. 15:22) Hi yede gu dzi garadza gasi gu engisa Nungungulu ga satshavbo hi girago ambari ho ba hi ri honga. (Mav. 3:6; Muh. 12:13, 14) Nigu, si na ni lisima gu hi dzigaradza gasi gu engisa Jehovha ambari ga silo nya sidugwana. Ha gu gira isoso, hi na  yeyedza gu khethu hi ngu haladza Jehovha nigu uye a na engedzeya gu hi haladza. — Joh. 14:23; 1 Joh. 5:3.

6. Guya khu Vahebheru 6:10-12, ginani gi gu na ni lisima gu vbindra mithumo nya yadi hi giridego gale?

⁶ Jehovha a ngu tsaka khesi hi si giridego gale. Ambari ulolo, silo nya sadi hi si giridego gale kha si yeyedzi gu khiso hi na simama na hiri vapfhumba umo nya litendra la Jehovha. Isoso si ngu tshamusedwa gwadi omu ga Vahebheru 6:10-12. (Leri.) Jehovha kha divali mithumo yathu nya yadi hi yi giridego gale. Ganiolu, uye a gu vbweta gu khuye hi simama gu mu thumeya khu monyo wathu watshavbo “kala mahegiso.” Uye a na simama gu khala pari yathu kala gupindruga “ha gu mba vbeya tshivba.” — Gal. 6:9.

GANEYA LISINE MONYONI GWAGO

7. Gu ganeya lisine monyoni gwathu sa gu pata ginani?

⁷ Oyu a vbwetago gu khala pfhumba wa Jehovha umo nya litendra laye, a yede gu ‘ganeya lisine monyoni gwaye.’ (Ndzi. 15:2) Isoso sa gu pata silo nya singi gu vbindra gu lipha basi. Jehovha a gu vbweta gu khuye hi tumbega ga satshavbo hi ganeyago ni gu gira. (Hebh. 13:18) Isoso si na ni lisima, kholu “[Jehovha] kha goli va nya gu vbivbedwa khu monyo, aholu a gu tsakiswa khu va nya gu lulama.” — Mav. 3:32.

8. Silo muni hi yedego gu si potsa?

⁸ Vale ‘va ganeyago lisine monyoni gwawe,’ kha va giri gu khatshi va gu engisa Jehovha va ba va romo ni vambe, khu tepo yayimweyo va gira silo nyo vivbe va ba vari vonga. (Isa. 29:13) Wulangani nya isoso, avo va gu potsa gu khala vapfhadzedzeyi. Muthu nya gu pfhadzedzeye, a nga pheya gu pimisa gu khuye khandri tepo yatshavbo hi yedego gu engisa milayo ya Jehovha. (Jak. 1:5-8) Uye a nga pheya gu mba engisa Jehovha ga silo a si wonago gu khatshi si mwalo ngudzu lisima. Khu gu landreya, a gu wona gu khuye gi mwalo gilo nyo vivbe gi mu giregeyago khu gu ba a si engisi, uye adzina a nga pheya gu gira silo nyo vivbe ngudzu. Ambari olu a pimisago gu khuye a gu thumeya Nungungulu, Jehovha kha na nga dzumeya wukhozeyi waye. (Muh. 8:11) Ganiolu, ethu ha gu vbweta gu tumbega ga silo satshavbo.

9. Ginani hi gi hevbulago khesi si nga girega tepo Jesu a nga wonana ni Nataniyeli khu tepo nyo pheye? (Wona fotu.)

⁹ Hi nga hevbula lisima nya gu manege ni monyo nya gu tumbege khesi si giregidego tepo  Jesu a nga manana ni Nataniyeli khu tepo nyo pheye. Tepo Filipi a nga rana pari yaye Nataniyeli gasi gu ta tivana ni Jesu, gu giregide silo nyo hlamadzise. Ambari olu Jesu a nga ba a si manani ni Nataniyeli, uye a di khuye: “Oyu Muisrayeli nya lisine, oyu gwaye gu gu mwalo wukanganyisi.” (Joh. 1:47) Lisine gu, Jesu a di gu wona vambe vapizane na va tumbegide, ganiolu uye a di ganeya gu khuye Nataniyeli a di gu tumbegide khu ndziya nyo hlamadzise. Gu fana ni ethu, Nataniyeli kha nga ba a vbelede, ganiolu uye a di si pfhadzedzeyi nigu a di gu tumbegide siloni satshavbo. Jesu a hlamadzisidwe ngudzu khu isoso nigu a zundzide Nataniyeli. Khu lisine, anethu ha gu vbweta gu khethu Jesu a hi wona khu ndziya yayimweyo!

10. Khu ginani hi yedego gu dzi woneya maningano ni esi hi ganeyago? (Jakobe 1:26)

¹⁰ Sileletelo nya singi hi si manago omu ga Ndzimo 15 sa gu ganeya ngudzu khedzi hi yedego gu phara khidzo vambe. Ndzimo 15:3 NM, ya gu ganeya gu khiyo, oyu a gu pfhumba omu nya litendra la Jehovha “kha thumise lidimi laye gasi gu ganeya silo nyo vivbe, kha gireyi silo nyo vivbe muthu kwawe nigu kha ganeyi malipha khu dzipari dzaye.” Ha gu ganeya malipha khu vambe, isoso si nga va khunguvanyisa nigu kha hi na nga khala gambe vapfhumba umo nya litendra la Jehovha. — Leri Jakobe 1:26.

11. Ginani gu ganeya guvivba, nigu ginani gi giregeyago vale va ganeyago guvivba khu vambe va bwe va si dzi layi?

¹¹ Muembi nya dzindzimo, a di khumbuga gu ganeya guvivba. Ginani gu ganeya guvivba? Ga gu thudwa gu ganeya malipha khu muthu nyo khaguri, iso si girago a wonwa khu ndziya nya mba yadi khu vambe. Uye a ganeyago guvivba khu vambe a bwe a si dzi layi, a yede gu duswa umo nya libandla nya Wukristo. — Jer. 17:10.

12-13. Adzina hi nga ganeya malipha mwendro gu theya dzitshoni dzipari dzathu ga siemo muni? (Wona fotu.)

¹² Ndzimo 15:3, a gu hi dundrugisa gambe gu khuye vapfhumba va Jehovha kha va gireyi silo nyo vivbe vambe vathu mwendro gu ganeya guvivba ni gu theya dzitshoni dzipari dzawe. Isoso sa gu pata gu rini?

 ¹³ Adzina saye nya mba dzina, hi nga phalalegisa mahungu nya malipha khavo. Khu giyeyedzo: 1) ndriyathu nya nyamayi a ema gu thuma kha nga piyonera, 2) patwa wu ema gu phasedzeya Bheteli, mwendro 3) ndriyathu nya mwama a ema gu thuma kha nga lidhota mwendro muphasedzeyi nya libandla. Si na ba si vivbide gu bhuleya vambe gu khethu vandriyathu vovo va di dugeledwa khu silo soso kholu va di gi ghodhosa. Khu lisine, gu na ni sighelo nya singi si nga girago gu manega guvbindrugedza gogo hi gu mba siti. Khu kharato, vale va gu vapfhumba umo nya litendra la Jehovha, “kha va ganeyi silo nya guvivbe khu vambe vathu mwendro gu ganeya guvivba ni gu theya dzitshoni dzipari dzawe.”

RUNGUDZA VALE VA NINGAGO GITHAWO JEHOVHA

14. Tshamuseya edzi vapfhumba va Jehovha va nga potsago khidzo “ava va nya gu vivba.”

¹⁴ Ndzimo 15:4 ya gu ganeya gu khiyo pari ya Jehovha yi ngu nyenya “va nya guvivba.” Hi nga mu tugula kharini muthu nyo vivbe? Khu kotani nya olu hi gu vathu nya mba vbeleya, hi mwalo makodzelo nya gu wone gu khethu muthu nyo khaguri a vivbedwe khu monyo mwendro ne. Khu ginani? Khu kotani nya olu hi nga mba vbeleya, hi nga gola muthu nyo khaguri si vbevbugago gu vbanya naye nigu hi si goli vambe, adzina saye va hi gorosago. Khu lisine, ethu hi yede gu potsa vale Jehovha a va wonago “na va vivbide.” (1 Kor. 5:11) Vathu vovo, va gu pata vale va girago silo nyo vivbe va bwe va si dzi layi, vale va gu mba ninga githawo esi hi si khodwago ni vale va zamago gu ghoha wupari wathu ni Jehovha.— Mav. 13:20.

15. Khu yevbini mweyo nya dzindziya nya gu ninge “githawo [Jehovha]?”

¹⁵ Ndzimo 15:4, ya gu hi embeya gambe gu khiyo hi yede “gu rungudza avo va ningago githawo [Jehovha].” Khu kharato, hi yede gu vbwetedzeya dzindziya gasi gu yeyedza wuwadi ni gu ninga githawo dzipari dza Jehovha. (Rom. 12:10) Khu ndziya muni? Mweyo nya dzindziya, khiyo yi seketedwago omu ga Ndzimo 15:4, yi gu khiyo: Oyu a gu pfhumba omu nya litendra la Jehovha Nungungulu, ‘kha yeli gu bweleleya hwane ga gisambanyo gyaye, ambari na gu wona gu khuye gu na gira mhango.’ Ha gu bweleleya hwane avbo nya situmbiso sathu, hi na khunguvanyisa vambe. (Mat. 5:37) Khu giyeyedzo, Jehovha a gu vireya gu khuye mwama ni ngadzi va vbanya guya khu gitumbiso gyawe nya mutshadho. Uye gambe a ngu tsaka tepo vavelegi va girago satshavbo va si kodzago gasi gu tadzisa situmbiso va giredego sanana sawe. Lihaladzo lathu khu Jehovha ni vambe, li na hi kutsa gu simama gu tadzisa situmbiso sathu.

16. Khu yevbini yimbe ndziya hi nga yi thumisago gasi gu rungudza dzipari dza Jehovha?

¹⁶ Yimbe ndziya hi nga yi thumisago gasi gu rungudza dzipari dza Nungungulu, khu gu va hakha magaya gwathu hi bwe hi va yeyedza wuwadi. (Rom. 12:13) Gu vbedza tepo ni vandriyathu hwane nya mitshangano ni thumoni nyo tshumayele, si na hi phasa gu tiyisa wupari wathu navo ni Jehovha. Gu diga isoso, ha gu hakha gwadi vapfhumba hi na ba hi pimedzeya Jehovha.

U NGA GOLI DZITSAPAWU

17. Khu ginani Ndzimo 15 yi ganeyago khu dzitsapawu?

¹⁷ Hi ngu hevbula gu khethu pfhumba wa Jehovha ‘kha fiyarisi dzitsapawu khu gu vbweta dzijuru, kha dzumeleyi gu rengeledwa khu dzitsapawu ga muthu a gu mwalo nandru.’ (Ndzi. 15:5) Khu ginani muembi nya dzindzimo a nga khumbuga dzitsapawu? Kholu ha gu mba manega ni mawonelo nya yadi khu dzitsapawu, hi nga khunguvanyisa vambe hi bwe hi ghoha wupari wathu ni Nungungulu. (1 Thim. 6:10) Gale, vambe va di gu londrola vandriyawe va nga ba vari sisiwana khu gu va fiyarisa dzitsapawu va bwe va va hengula dzijuru nya dzingi ngudzu va nga ba si si kodzi gu dzi livba. Gu diga isoso, vambe valamuli va di gu dzumeya gu rengeledwa, gasi va lamula  vathu khu ndziya nya mba yadi. Silo nya nga isoso si di gu gorosa Jehovha. — Ezek. 22:12.

18. Siwudziso muni hi yedego gu dzi gira maningano khedzi hi dzi wonago khidzo dzitsapawu? (Vahebheru 13:5)

¹⁸ Si na ba siri sadi gu hi ema hi dundrugeya khu mawonelo hi gu nawo maningano khu dzitsapawu. Dzi wudzise gu khuwe: ‘Ina nyi ngu khaleya gu pimisa khu dzitsapawu ni esi nyi nga hadzi gu renga nya gu dzi mana? A gu tshuka muthu nyo khaguri a nyi lomba dzitsapawu, ina nyi ngu hweya gu mu bweledzeya nyi pimisa gu kheni kha na nga dzi vbweta olu? Ina nyi ngu dzi wona na nyiri ni lisima ngudzu gu vbindra vambe, khu gu ba nyiri ni dzitsapawu nya dzingi? Ina si ngu nyi garadzeya gu yeyedza wuwadi vambe? Ina nya gu wona vandriyangu na va gu landriseya dzithomba khu gu ba vari ni dzitsapawu? Ina nya gu gira wupari ni vathu va nga ghanya, nyi si giri wupari ni vathu nya sisiwana?’ Si na ni lisima gu dzi gira siwudziso sesi, kholu ethu hi na ni lithomo nya likhongolo ngudzu nya gu khale vapfhumba va Jehovha. Ganiolu, hi na si kodza gu simama gu khala vapfhumba va Jehovha ha gu mba gola ngudzu dzitsapawu. Ha gu gira isoso, Jehovha gima kha na nga hi diga. — Leri Vahebheru 13:5.

JEHOVHA A NGU HALADZA DZIPARI DZAYE

19. Khu ginani Jehovha a vbwetago gu khuye hi gira satshavbo si khumbugidwego omu ga Ndzimo 15?

¹⁹ Ndzimo 15, ya gu hegisa khu gitumbiso gegi: “Oyu a girago kharati, gima kha na dhedhereka.” (Ndzi. 15:5) Avba, muembi nya dzindzimo a gu tshamuseya gu khuye khu ginani Jehovha a vbwetago gu khuye hi gira satshavbo si khunbugidwego omu nya ndzimo yeyi. Jehovha a gu vbweta gu khuye hi tsaka. Khu kharato, tepo hi girago esi Nungungulu a hi lombago gu hi gira, hi na manega ni womi nya wadi nigu a na hi vhikeya. — Isa. 48:17.

20. Vapfhumba va Jehovha va gu vireya ginani?

²⁰ Vapfhumba va Jehovha, va gu vireya wumindru nya gu tsakise. Ava va todzidwego, va na ranwa gasi gu ya vbanya ga “malanga nya mangi” ma dongisedwego khu Jesu, ndzadzini. (Joh. 14:2) Ganiolu, vale va gu na ni gutumba nya gu vbanye mafuni va gu vireya gu tadzisega nya gitumbiso gi gomogo omu ga Gutuledwa 21:3. Khu lisine, lithomo nya likhongolo ngudzu gu ranwa khu Jehovha gasi gu khala dzipari dzaye ni gu khala vapfhumba omu nya litendra laye kala gupindruga!