1. Intembauzyo 15:​1-5 itugwasya biyeni?

 MUCHIIYO chakayinda, twakayiya kuti bakombi baJehova bakalipeda kulinguwe balakonzya kuba beenzu mutente lyakwe lyakukozyanisya kwiinda mukuba aabweenzinyina busimide anguwe. Pesi, niinzi nzitweelede kuchita kuti tube beenzu baJehova? Intembauzyo chaandaano 15 yaambuula atala ankani eeyi. (Bala Intembauzyo 15:​1-5.) Intembauzyo eeyi yaamba zintu nzitweelede kuchita kuti tube beenzinyina baLeza.

2. Kweelede kuti Davida wakali kuyeeyaanzi naakaamba atala atente lyaJehova?

² Intembauzyo chaandaano 15 isaanguna aamibuzyo yakuti: “O Jehova, ino nguni uukonzya kuba mweenzu mutente lyako? Ino nguni uukonzya kukkala mucilundu cako cisalala?” (Int. 15:1) Chiindi sintembawuzyo Davida naakaamba atala ‘atente’ lyaJehova, kulakonzeka kuti wakali kwaamba tente lyakukombela lyakali kuGibbiyoni muchiindi eecho. Alubo Davida wakaambuula atala ‘acilundu [chaLeza] cisalala,’ amwi wakali kuyeeya atala aCilundu chaZiyoni chakali kuJerusalemu. Davida wakayaka tente lyakubikkila bbokesi lyachizuminano aafwiifwi akuGibbiyoni nkwiili kumusanza naakachili kulindila kuti kuyakwe tempele.—2 Sam. 6:17.

3. Lugwalo lwa Intembauzyo chaandaano 15 lupa kuti tuchiteenzi? (Langa chifanikisyo.)

³ Ma-Israyeli biingi teebakali kuzumizigwa pe kuti babelekele aatente lyakukombela, pesi bache biyo mbabo bakali kuzumizigwa kuti banjile mutente oomo mwakali bbokesi lyachizuminano. Bakombi baJehova boonse basyomeka bakali kukonzya kuba beenzu mutente lyaJehova kwiinda mukuba beenzinyina akukkala kabali beenzinyina. Eezi nzizyo  nzituyanda toonse. Intembauzyo chaandaano 15, yakaamba bumwi buntu mbutweelede kubaabo akubutondeezya kuchitila kuti tukkale katuli beenzinyina baJehova.

YENDA KUTAKWE KABATA ALUBO CHITA ZILULEME

4. Tuzizi biyeni kuti kubbabbatizigwa teenkuko pe akulikke Jehova nkwayanda kuti tuchite? (Isaya 48:1)

⁴ Muli Intembauzyo 15:​2, mweenzinyina waLeza upandululwa kuti ngooyo “weenda kanyina kampenda, uucita zintu ziluleme.” Bbala lyakuti “weenda” aliti “uucita” ligwisya muzeezo wakuti tukkala katuchita chimwi chintu. Pesi zilakonzeka na kuti ‘tweende katutakwe kabata’? Iiyi zilakonzeka. Taakwe muntu uumaninide pe, Jehova ulatubona katutakwe kabata kuti twabeleka changuzu kuti tumuswiilile. Chiindi nitulipeda kuli Jehova akubbabbatizigwa, nga twasaanguna kweenda katutakwe kabata. Muchikozyano, muchiindi chakalembwa Bbayibbili, kuba mu-Israyeli teekwakali kwaamba kuti muntu ooyo waba mweenzu waJehova. Bamwi bakali kumwiita Jehova pesi teebakali kumwiita “munzila yakasimpe ayabululami.” (Bala Isaya 48:1.) Ma-Israyeli bakali kuyanda kuba beenzu baJehova bakayiya zintu Jehova nzyaakali kuyanda kuti bachite akuzitobelezya. Mbukubede amazubaano, kuti tutambulike kuli Jehova, nzyiingi nzitweelede kuchita kutali kubbabbatizigwa akunjila miswaangano kupela. Tweelede kukkala ‘katucita zintu munzila iiluleme.’ Tulazichita biyeni?

5. Chaambaanzi kuswiilila Jehova muzintu zyoonse?

⁵ Kuli Jehova, ‘kweenda kutakwe kampenda, akucita zintu ziluleme’ kwaamba kuchita zyiingi kutali kukkala katunjila miswaangano kuNg’anda yaBwaami kupela. (1 Sam. 15:22) Tweelede kubeleka changuzu kuti tuswiilile Leza muzintu zyoonse nzituchita mubuumi bwesu nikuba katuli aatulikke. (Tus. 3:6; Muk. 12:​13, 14) Kulayandikana kuti  tweezye kuswiilila Jehova nikuba muzintu zibonekaanga nziniini. Kuchita oobu kutondeezya kuti tulamuyanda Jehova alubo kupa kuti anguwe atuyande.—Joh. 14:23; 1 Joh. 5:3.

6. Kweendelana aMahebberu 6:​10-12, niinzi chiyandikana loko kwiinda zintu zibotu nzitwakachita chiindi?

⁶ Jehova ulabotelwa azintu nzitwakamuchitila chiindi. Nikuba oobo, zintu zibotu nzitwakachitila Jehova chiindi azilikke tazipi kuti tukkale katuli beenzu mutente lyakwe. Tulazibona eezi muli Mahebberu 6:​10-12. (Bala.) Jehova tazilubi pe zintu zibotu nzitwakamuchitila chiindi. Pesi, uyanda kuti tukkale katumukomba amoyo woonse ‘kusikila kumamanino.’ Jehova ulaba mweenzuma kusikila kumamanino “kuti teetwakatala.”—Gal. 6:9.

AMBA KASIMPE MUMOYO WAKO

7. Kwaamba kasimpe mumyoyo yesu kuswaanizyaanzi?

⁷ Muntu uuyanda kuba mweenzu mutente lyaJehova, weelede ‘kwaamba masimpe mumoyo wakwe.’ (Int. 15:2) Kutaamba kasimpe kuswaanizya zintu zyiingi. Jehova uyanda kuti tusyomeke muzintu zyoonse nzitwaambuula anzituchita. (Heb. 13:18) Eezi zilayandikana, “nkaambo muntu mumpelenge ncisesemyo kuli Jehova, pele balulami mbabajisi cilongwe ciyumu anguwe.”—Tus. 3:32.

8. Niinzi nzituteelede kuchita?

⁸ Aabo ‘baamba kasimpe mumyoyo yabo’ tabaswiilili milawu yaLeza nibali aabantu kupela, pesi balayiswiilila nikuba nibali aabalikke. (Is. 29:13) Balasyomeka muzintu zyoonse. Muntu uutasyomeki uyeeya kuti imwi milawu yaJehova tayigwasyi pe. (Jak. 1:​5-8) Ulakonzya kutaswiilila Jehova muzintu nzyabonaanga nziniini. Kuti taatebula zintu zibi akaambo kakutaswiilila, nga waba aachibindi chakutyola iimwi milawu yaLeza. Nikuba kuti ulakonzya kubonaanga ulikubekela Leza pesi bukombi bwakwe nga tabuchitambuliki pe kuli Jehova. (Muk. 8:11) Nikuba oobo, iswe tuyanda kusyomeka muzintu zyoonse.

9. Jesu wakatyeni naakasaanguna kubonana aaNataniyeli alubo twiiyaanzi? (Langa chifanikisyo.)

⁹ Tulakonzya kwiiya chiiyo chiyandikana kuzwa kuli Jesu chiindi naakabonana aaNataniyeli kakusaanguna. Chiindi Filipi naakatamba  mweenzinyina Nataniyeli kuti azoobonane aaJesu, kuli chimwi chintu chigambya chakachitika. Nikuba kuti Jesu takayinabonana aaNataniyeli, Jesu wakaamba kuti: “Ngoyu mu-Israyeli wachoonzyo uutakwe lweeno.” (Joh. 1:47) Jesu wakalizi kuti bamwi basikwiiya bakwe bakali kusyomeka, pesi wakabona chintu chibotu loko muli Nataniyeli. Nataniyeli wakali aachibi mbuli ndiswe. Pesi taakali kuupawupa pe, wakali kusyomeka muzintu zyoonse. Jesu wakamuyanda Nataniyeli akaambo kabuntu oobu alubo wakamulumbayizya. Toonse tuyanda kuti Jesu atubone mbuli Nataniyeli.

10. Nkamboonzi nitweelede kuchenjelela zintu nzitwaambuula? (Jakkobo 1:26)

¹⁰ Zintu zyiingi zyaambidwe muli Intembauzyo chaandaano 15 zili achakuchita ambutubajata bamwi. Intembauzyo 15:3 yaamba kuti mweenzu mutente lyaJehova “kunyina nabejelezya muntu amulaka wakwe, kunyina nacitila mweenzinyina cintu cibi, alimwi kunyina nasampaula beenzinyina.” Kuti twabajelezya bamwi, tulabachisya moyo alubo nga tatuchili beenzu pe mutente lyaJehova.—Bala Jakkobo 1:26.

11. Kubejelezya nkuchitaanzi alubo niinzi chichitika kumuntu uubejelezya bamwi katasanduki?

¹¹ Sintembawuzyo wakaambuula atala akubejelezya. Kubejelezya nkuchitaanzi? Nkwaamba makani aakubeja aapa kuti umwi abe aampuwo mbi. Basikubejelezya batasanduki balagwisigwa mumbungano yachiKkristu.—Jer. 17:10.

12-13. Nziizili zyiimo zikonzya kutusunka kuti tusampawule beenzuma katutayeeyeli pe? (Langa chifanikisyo.)

¹² Intembauzyo 15:3 ituyeezya kuti beenzu mutente lyaJehova tabachitili bamwi zintu zibi alubo tabasampawuli beenzinyina. Pesi nga zyachitika biyeni kuti tuzoolibone twaabusampawula bamwi?

¹³ Tulakonzya kusampawula bamwi katutayeeyeli kwiinda mukwaambuula makani atali  kabotu atala ambabo. Yeeya atala azyiimo eezi: (1) kuti muchizi wayimikila kuba payona wachiindi choonse, (2) bakwetene bayimikila kubeleka aaBbeteli, naakuti (3) mukwesu wayimikila kubeleka kali mwaalu naakuti mubelesi wambungano. Takuli kabotu pe kuti tubuzye bamwi kuti bakwesu abachizi aaba kuli zintu zibi nzibakachita akuti zintu eezyo nzizyo zyakapa kuti basiye milimu eeyi. Kulakonzeka kuti kuli twaambo ntututazi pe twakapa kuti zyiimo zyabo zichinche. Mukuyungizya, mweenzu mutente lyaJehova “kunyina nacitila mweenzinyina cintu cibi, alimwi kunyina nasampaula beenzinyina.”

LEMEKA AABO BAYOOWA JEHOVA

14. Pandulula beenzu baJehova mbubakonzya kukaka “muntu uuli woonse uusesemya.”

¹⁴ Intembauzyo 15:4 yaamba kuti mweenzinyina waJehova “ulamukaka muntu uuli woonse uusesemya.” Nga tulaziba biyeni kuti umwi muntu ulasesemya? Mbuli bantu bali aachibi, tatukonzyi pe kubona kuti umwi muntu ulasesemya na naakuti pe. Nkamboonzi? Nkaambo tulakonzya kuyanda bantu bali aabuntu mbutuyanda mpawo tuzonde aabo bali aabuntu butubbowa. Pesi, tweelede kukaka bantu aabo Jehova mbabona kuti ‘balasesemya.’ (1 Kor. 5:11) Bantu aaba baswaanizya bantu batasanduki pe kuzintu nzibachita, batazilemeki pe zintu nzitusyoma naakuti bayanda kuti tube aabweenzuma butali kabotu pe aJehova.—Tus. 13:20.

15. Njiili nzila njitubalemekaayo aabo “ibayoowa Jehova”?

¹⁵ Intembauzyo 15:4 iyungizya aamajwi aakuti tulemeke aabo “ibayoowa Jehova.” Nkinkaako, tuyanduula nzila zyakubafwida luzyalo akubalemeka beenzinyina baJehova. (Rom. 12:10) Biyeni? Imwi nzila iijanika muli Intembauzyo 15:4 njakuti mweenzu uli mutente lyaJehova “tacinci mizeezo ikuti wasyomezya, nokuba kuti zintu tiizyamweendela kabotu.” Kuti teetwachita kweendelana azisyomezyo zyesu, zilabachisa bamwi. (Mt. 5:37) Muchikozyano, Jehova uyanda kuti beenzu bakwe bapone kweendelana achikonke chabo chalukwatano. Alubo Jehova ulabotelwa kuti bazyali beezya kuzuzikizya zisyomezyo nzibasyomezya bana babo. Kuyanda Leza abamwi kupa kuti tuzuzikizye zisyomezyo zyesu.

16. Njiili imwi nzila njitukonzya kubalemekaayo beenzinyina baJehova?

¹⁶ Imwi nzila njitubalemekaayo beenzinyina baLeza, nkwiinda mukubatambula akubapa zintu. (Rom. 12:13) Kujana chiindi chakubaamwi abakwesu abachizi kupa kuti tumvwanane loko akuti tumvwanane aaJehova. Alubo kuti twaba bantu batambula beenzu, nga tulikutobelezya chikozyano chaJehova.

UTAYANDISYI MALI

17. Nkamboonzi Intembauzyo chaandaano 15 niyaambuula atala amali?

¹⁷ Bbayibbili lyaamba kuti mweenzu waJehova “kunyina napa mali aakwe kumwi kalangila cinyonamucila, alimwi kunyina natambula cisinkamulomo kuti abisizye muntu uunyina mulandu.” (Int. 15:5) Nkamboonzi Intembawuzyo eeyi niyaambuula atala amali? Nkaambo kuti twayiyandisya loko mali, tulakonzya kwiibona kayiyandikana loko kwiinda bantu akuti ilakonzya kupa kuti tupambanisye bweenzuma bwesu mbutulaabo aLeza. (1 Tim. 6:10) Muchiindi chakalembwa Bbayibbili, bamwi bakali kujata bakombinyina bakali kufwaba munzila iitali kabotu kwiinda mukupa kuti babbadale mali nyingi kwiinda njibakali bakweleta. Alubo bamwi babetesi bakali kutambula zisinka mulomo akubeteka bantu bakatalikwe mulandu munzila iitali kabotu.  Zintu zili oobu zilasesemya kuli Jehova.—Ezk. 22:12.

18. Njiili mibuzyo iikonzya kutugwasya kuti tulange-lange maboneno eesu aali atala amali? (Mahebberu 13:5)

¹⁸ Kulayandikana kuti tulange-lange maboneno eesu atala amali. Libuzye kuti: ‘Ndikkala kandiyeeya atala amali na azintu nzindiyanda kuula? Kuti ndakweleta mali, ndilanonoka na kubbadala kandiyeeya kuti muntu wakandikweleta tayandi kwiibelesya chakufwambaana pe? Kuba aamali kupa kuti ndilibone kandiyandikana loko na kwiinda bamwi? Kulandiyumina na kupa bamwi? Ndibabona kuti bayandisya bunoti na bakwesu abachizi bali amali nyingi? Ndimvwanana aabantu banotede kupela na alubo kanditabayandi bafwaba?’ Kulayandikana kulibuzya mibuzyo eeyi akaambo kakuti twakapegwa chilongezyo chibotu loko chakuba beenzinyina baJehova. Pesi tulakonzya kukkala katuli beenzu baJehova kuti teetwayandisya mali. Kuti twachita oobo, Jehova tazootulekelezyi pe!—Bala Mahebberu 13:5.

JEHOVA ULABAYANDA BEENZINYINA

19. Nkamboonzi Jehova nayanda kuti tuchite zintu zyoonse zyaambidwe muli Intembauzyo chaandaano 15?

¹⁹ Intembauzyo chaandaano 15 imana aamajwi aachisyomezyo aatii: “Kufwumbwa uucita zintu eezyi takazungaanizyigwi pe.” (Int. 15:5) Muvesi eeyi sintembawuzyo wakali kutubuzya zintu zyoonse Jehova nzyayanda kuti tuchite zyaambidwe muntembawuzyo eeyi. Jehova uyanda kuti tubotelwe. Nkinkaako utupa malayilile aatugwasya kuti tupone buumi bulikabotu alubo unootukwabilila.—Is. 48:17.

20. Beenzu baJehova balangililaanzi?

²⁰ Beenzu baJehova balangilila kupona buumi bubotu kunembo. MaKkristu bananikidwe babambilidwe ndawu zyiingi zyakukkala kujulu aJesu. (Joh. 14:2) Aabo bali aabulangilizi bwakuzookkala aanyika balindila zisyomezyo zyaambidwe muli Chiyubunuzyo 21:3 kazili kuzuzikizigwa. Nchilongezyo chipati loko chakuti Jehova uyanda kuti tukkale katuli beenzu mutente lyakwe kusikila kukabe kutamani.