ARTÍCULO NEMA NATALIKGALHTAWAKGA 24
TAKILHTLIN 24 Katakxtuw kxalanka xsipi Jehová
Katamakgxtakgwi kxchik Jehová
«Oh, Jehová, ¿tiku tlan natamakgxtakga kminchik?» (SAL. 15:1).
TUKU NAʼAKXILHAW
Naʼakxilhaw tuku kinkaskiniyan Jehová xlakata chuntiya xʼamigos nalitaxtuyaw chu la lakaskin pi nakalikatsiniyaw tiku xʼamigos litaxtukgo.
1. ¿La kinkamakgtayayan Salmo 15:1-5?
KXAPULANA artículo katsiniw pi kskujnin Jehová tiku tamakamastanikgonita, tanukgo kxchik akxni tsukukgo talalinkgo. Pero ¿tuku tlan natlawayaw xlakata lu tlan natalalinaw Jehová? Salmo capítulo 15 kinkamakgtayayan natekgsaw xatakgalhtin xlakata kinkalitachuwinanan tuku nakinkamakgtayayan tlakg natalakatsuwiniyaw Dios (kalikgalhtawakga Salmo 15:1-5).
2. ¿Tuku max xlakapastakma David akxni lichuwinalh xchik Jehová?
2 Wa uma tuku litsuku Salmo capítulo 15: «Oh, Jehová, ¿tiku tlan natamakgxtakga kminchik? ¿Tiku tlan nalatama kxasanto misipi?» (Sal. 15:1). Akxni David lichuwinalh “xchik” Jehová, max xlakapastakma tabernáculo, nema milh kilhtamaku xwi kʼGabaón. David na lichuwinalh “xasanto xsipi” Dios, nema max xkilhchanima Sion nema xwi kJerusalén. Anta kJerusalén, nema xwi akglhuwa kilómetros ksur Gabaón, David kaxtlawalh akgtum aktsu chiki xlakata anta xwililh arca xla talakkaxlan xlakata nina xtlawakan templo (2 Sam. 6:17).
3. ¿Tuku xlakata lu katsiniputunaw tuku kinkamasiyaniyan Salmo capítulo 15? (Na kaʼakxilhti dibujo).
3 Xlikana pi lhuwa israelitas nikxnila skujkgolh ktabernáculo, chu na nila xtanukgo kʼaktsu chiki niku xmakikanit arca xla talakkaxlan. Pero tlan xtanukgo kxchik Jehová komo xʼamigos xlitaxtukgolh. Chu wa uma tuku putum akinin lakaskinaw. Salmo capítulo 15 lichuwinan makgapitsi tayat nema kilikgalhitkan xlakata chuntiya xʼamigos Jehová nalitaxtuyaw.
Israelitas xalak xkilhtamaku David, ni tuwa xʼakgatekgskgo pi Jehová wi tiku xmakgamakglhtinan kxchik (Kaʼakxilhti párrafo 3).
NI KAMAKGXTAKGNAW CHU KATLAWAW TUKU XAʼAKGSTITUM
4. ¿Tuku xlakata wanaw pi ni kajwatiya talakaskin natamunuyaw xlakata xʼamigos Jehová nalitaxtuyaw? (Isaías 48:1).
4 Salmo 15:2 wan pi xʼamigo Dios wa «tiku ni makgxtakgnan» chu «tiku tlawa tuku xaʼakgstitum». Uma wamputun pi xaliʼankgalhin chuna natlawayaw chu ni kaj makgtum. Pero ¿xlikana tlan ankgalhin natlawayaw «tuku xaʼakgstitum»? Chuna. Maski putum akinin makglakgalhinanin, Jehová nakinkaliʼakxilhan chuna la «tiku tlawa tuku xaʼakgstitum» komo lu naliskujaw nakgalhakgaxmataw. Akxni tamakamastaniw Dios chu tamunuw, aku xtsukumaw skujnaniyaw. Kalakapastakwi pi makgasa ni kajwatiya xtalakaskin pi israelita xlitaxtuka xlakata tlan xtamakgxtakgka kxchik Jehová. Makgapitsin israelitas xmapakuwikgo xtukuwani Dios, pero kaj “xʼakgskgawinankgo chu ni xaʼakgstitum tuku xtlawakgo” (kalikgalhtawakga Isaías 48:1). Tiku xlikana xʼamigos Jehová xlitaxtukgo xlikatsinitkan xwanit xlimapakgsin chu xlimakgantaxtitkan xwanit. Nachuna kitaxtu la uku, xlakata tlan xʼamigos Dios nalitaxtuyaw ni kajwatiya talakaskin natamunuyaw chu namakgtapakgsiyaw kʼakgtum congregación. Talakaskin chuntiya natlawayaw «tuku xaʼakgstitum». ¿Chu tuku kilhchanima uma?
5. Kxlakatin Jehová, ¿«tiku ni makgxtakgnan» chu «tlawa tuku xaʼakgstitum»?
5 Kxlakatin Jehová, chatum «tiku ni makgxtakgnan» chu «tiku tlawa tuku xaʼakgsitum», ni wa kilhchanima tiku putum kilhtamaku an niku kakninanikan (1 Sam. 15:22). Kstalaninanin Cristo kiliskujatkan xlakata nakgalhakgaxmataw Dios xliputuminika tuku tlawayaw kkilatamatkan, asta akxni kiʼakstukan wilaw (Prov. 3:6; Ecl. 12:13, 14). Lu xlakaskinka nakgalhakgaxmataw Jehová kxliputuminika tuku tlawayaw, asta maski lakpuwanaw pi ni lu xlakaskinka. Komo chuna natlawayaw, nalimasiyayaw pi paxkiyaw Jehová chu xla na nakinkapaxkiyan (Juan 14:23; 1 Juan 5:3).
6. Maski makgasa ni makgxtakgwi Jehová, ¿tuku chuntiya talakaskin natlawayaw chuna la wan Hebreos 6:10-12?
6 Jehová lu xtapalh liʼakxilha putum tuku tlawanitaw xpalakata. Pero maski makgasa ni makgxtakgwi Jehová, ni kajwatiya uma talakaskin xlakata chuntiya natamakgxtakgaw kxchik (kalikgalhtawakga Hebreos 6:10-12). Maski Jehová nikxni patsankga putum tuku tlan tlawayaw, xla lakaskin pi chuntiya kaskujniw xliputum kinakujkan «asta kxlisputni». «Komo ni natlakgwanaw», nakinkamaxkiyan talakaskin pi tlan xʼamigos nalitaxtuyaw putum kilhtamaku (Gál. 6:9).
KALICHUWINAW TUKU XAXLIKANA NEMA WI KKINAKUJKAN
7. ¿Tuku kilhchanima pi nawanaw tuku xaxlikana nema wi kkinakujkan?
7 Salmo 15:2 wan pi tiku Jehová makgamakglhtinan kxchik wa tiku «wan tuku xaxlikana nema wi kxnaku». Uma ni kajwatiya kilhchanima pi ni nawanaw taʼakgsanin. Jehová lakaskin pi xliputum tuku natlawayaw ni naʼakgskgawinanaw (Heb. 13:18). Uma lu xlakaskinka, «xlakata Jehová ni kaʼakxilhputun tiku katsinikgo akgskgawinankgo, pero lu tlan katalalin tiku xaʼakgstitum» (Prov. 3:32).
8. ¿Tuku tayat kililakgmakganatkan?
8 Tiku «wan tuku xaxlikana nema wi kxnaku» ni wa tiku kaj limasiya kxlakatinkan amakgapitsin pi kgalhakgaxmata xlimapakgsin Dios chu nichuna tlawa akxni xʼakstu wi (Is. 29:13). Tiku chuna likatsi kaj akgskgawinama, chu akinin nichuna litaxtuputunaw. ¿Pero tuku max xtlawalh pi chatum lataman chuna xtsukulh likatsi? Max xapulana tsuku lakpuwan pi pulaktum xlimapakgsin Jehová ni lu makgtayanan (Sant. 1:5-8). Max ni kgalhakgaxmata xlimapakgsin Jehová akxni wi tuku tlawa nema ni lu xlakaskinka lakpuwan. Alistalh, komo akxilha pi tuku nitlan tlawalh ni lipatinan, max tsuku tlawa tuku tlakg nitlan. Putum uma tlawa pi xtakaknin uma lataman kaj taʼakgsanin nalitaxtu (Ecl. 8:11). Akinin nichuna likatsiputunaw, wata xliputum tuku tlawayaw limasiyaputunaw pi ni akgskgawinanaw.
9. ¿Tuku kinkamasiyaniyan tuku lalh akxni Jesús lakgapasli Natanael? (Na kaʼakxilhti dibujo).
9 Tuku lalh akxni Jesús lakgapasli Natanael, kinkalimasiyaniyan pi lu xlakaskinka nawanaw tuku xaxlikana nema wi kkinakujkan. Akxni Felipe lilh Natanael kxlakatin Jesús xlakata xlakgapasli, wi tuku lalh nema lu kaks malakawaninan. Maski Jesús nikxni xʼakxilhnit Natanael, wa: «Kaʼakxilhtit, xlikana pi chatum israelita tiku ni akgsaninan» (Juan 1:47). Maski Jesús xkatsi pi amakgapitsi kstalaninanin ni xʼakgskgawinankgo, Natanael tlakg xlitalakgapasa pi ni xʼakgskgawinan. Maski Natanael na makglakgalhina xwanit chuna la putum akinin, ni xʼanan atanu tiku xtachuna xwanit chuna la xla nema ni xʼakgskgawinan. Jesús lu xlakgati uma xatlan xtayat chu wa xlakata wanilh laktlan tachuwin. ¿Ni xlikana pi akgtum lanka talakgalhaman pi Jesús nachuna xwa kimpalakatakan?
Akxni Felipe lilh Natanel kxlakatin Jesús, Jesús wa pi uma chixku ni xʼakgskgawinan. ¿Na tlan chuna xwa kimpalakatakan? (Kaʼakxilhti párrafo 9).
10. ¿Tuku xlakata kuenta kilitlawatkan la limaklakaskinaw kisimakgatkan? (Santiago 1:26).
10 Tipalhuwa tuku Salmo capítulo 15 lichuwinan wa xlakata la nakalikatsiniyaw amakgapitsin. Salmo 15:3 wan pi tiku Jehová makgamakglhtinan kxchik wa tiku «ni limaklakaskin ksimakgat xlakata nalimawakanan tuku nitlan, ni tlawani tuku nitlan xtalataman chu ni wan tuku nitlan xpalakata xʼamigos». Komo ni liwana xmaklakaskiw kisimakgatkan, ni kajwatiya xkalitlawaniw tuku nitlan amakgapitsin, wata na xtlawalh pi Jehová nialh xkinkamakgamakglhtinan kxchik (kalikgalhtawakga Santiago 1:26).
11. ¿Tuku kaʼakgspula tiku kalimawakakgo amakgapitsin tuku nitlan chu ni makgxtakgkgo uma ni xatlan tayat?
11 Salmista lichuwinan tiku kalimawaka tuku nitlan amakgapitsin. Wan taʼakgsanin xlakata nitlan nakalichuwinankan. Tiku chuna tlawakgo chu ni makgxtakgkgo uma ni xatlan tayat, tlan nakatamakxtukan kcongregación (Jer. 17:10).
12, 13. ¿Tuku kilhtamaku max xtsukuw nitlan kalichuwinanaw kiʼamigoskan? (Na kaʼakxilhti dibujo).
12 Salmo 15:3 na kinkamalakapastakayan pi tiku Jehová makgamakglhtinan kxchik wa tiku «ni tlawani tuku nitlan xtalataman chu ni wan tuku nitlan xlakata xʼamigos». ¿Pero tuku max xtlawalh pi nitlan tuku xwaw xpalakata kiʼamigoskan?
13 Max xtsukuw lichuwinanaw tuku ni xlikana o tuku nitlan xpalakata kiʼamigojkan. Kalilakpuwaw uma: 1) chatum tala puskat makgxtakga chuna la kskujnanima Jehová putum kilhtamaku, 2) akgtum tamakgaxtokgat nialh makgtayanankgo kBetel o 3) makatsininankan pi chatum tala nialh kgolotsin xalak congregación litaxtu o nialh siervo ministerial. ¿Xlilat natsukuyaw lilakpuwanaw tuku xlakata chuna titaxtumakgo chu natsukuyaw kalitachuwinanaw amakgapitsin tuku lakpuwanaw? Akinin ni katsiyaw putuminika tuku lama. Chu kalakapastakwi pi tiku Jehová makgamakglhtinan kxchik wa tiku «ni tlawani tuku nitlan xtalataman chu ni wan tuku nitlan xpalakata xʼamigo».
Komo ni kuenta xtlawaw, lakapala xlichuwinaw tuku nitlan xpalakatakan amakgapitsin o asta xkalimawakaw tuku nitlan (Kaʼakxilhti párrafos 12 chu 13).
KAKAMALANKIW TIKU PEKUANIKGO JEHOVÁ
14. ¿Tiku umakgolh tiku lixkajni likatsikgo nema ni nakatalalinaw?
14 Salmo 15:4 wan pi xʼamigo Jehová «ni akxtum katala tiku lixkajni likatsikgo». Pero ¿tuku nalikatsiyaw pi chatum lataman «lixkajni likatsi»? Xlakata akinin makglakgalhinanin, ni kinkalakgchanan nawanaw pi chatum lataman lixkajni likatsi. ¿Tuku xlakata? Xlakata min kilhtamaku, wi tiku ni talalinaw kaj xlakata ni lakgatiyaw la likatsi o kinkamakgasitsiyan. Wa xlakata kajwatiya kililakgmakganatkan tiku Jehová wan pi lixkajni likatsi (1 Cor. 5:11). Makgapitsi umakgolh latamanin wa tiku tlawakgo talakgalhin chu ni makgxtakgkgo, tiku ni maxkikgo kakni kintakanajlakan chu tuku masiyayaw, chu tiku tlawaputunkgo pi nialh katalaliw Jehová (Prov. 13:20).
15. ¿La nalimasiyayaw pi kamalankiyaw «tiku pekuanikgo Jehová»?
15 Nachuna, Salmo 15:4 kinkawaniyan pi xlakaskinka nakamalankiyaw «tiku pekuanikgo Jehová». Wa xlakata, lakputsayaw la tlan nakalikatsiniyaw chu nakamaxkiyaw kakni xʼamigos Dios (Rom. 12:10). ¿La tlan chuna natlawayaw? Salmo 15:4 wan pi tiku Jehová makgamakglhtinan kxchik «ankgalhin makgantaxti tuku malaknu maski nitlan nakitaxtuni». Komo ni xmakgantaxtiw tuku malaknuyaw, max nitlan xkamamakgkatsiniw amakgapitsin (Mat. 5:37). Akgtum liʼakxilhtit, Jehová lakaskin pi tiku kamakgamakglhtinanit kxchik namakgantaxtikgo tuku malaknukgolh akxni tamakgaxtokgkgolh. Na lakaskin pi natlatni namakgantaxtikgo tuku kamalaknunikgo xkamanankan. Xlakata paxkiyaw Dios chu kintalatamankan, natlawayaw putum tuku matlaniyaw xlakata namakgantaxtiyaw tuku malaknuyaw.
16. ¿Tuku atanu tlan natlawayaw xlakata nakamalankiyaw xʼamigos Jehová?
16 Atanu la nakamalankiyaw xʼamigos Dios wa pi tlan nakamakgamakglhtinanaw chu nakalimakgtayayaw tuku kgalhiyaw (Rom. 12:13). Akxni kawaniyaw natalan pi wi tuku akxtum kakinkatatlawakgon xlakata napaxuwayaw, tlakg tlan katalalinaw chu na tlakg tlan talalinaw Jehová. Akxni xatapaxuwan kamakgamakglhtinanaw amakgapitsin, tlawamaw chuna la Jehová.
NI KAPAXKIW TUMIN
17. ¿Tuku xlakata lichuwinan tumin Salmo capítulo 15?
17 Salmo capítulo 15 na kinkawaniyan pi tiku Jehová makgamakglhtinan kxchik, «akxni masakwaninan xtumin ni matajinan xaskgata chu ni masta talakaskin naxokgonikan xlakata natlawani tuku nitlan tiku ni lin kuenta» (Sal. 15:5). ¿Tuku xlakata lichuwinan tumin uma salmo? Xlakata komo ni kuenta xtlawaw, xtsukuw paxkiyaw tumin. Komo chuna xkinkaʼakgspulan max xkatlawaniw tuku nitlan amakgapitsin chu nialhla xtalaliw kiDioskan (1 Tim. 6:10). Makgasa, makgapitsin lu nitlan xkalikatsinikgo xnatalankan tiku lakglimaxkgenin xwankgonit xlakata akxni xkamasakuanikgo tumin xkamatajikgo xaskgata. Na xwilakgo jueces tiku xkaxokgonikan xlakata xkamalakgaxokgekgolh tiku ni xlinkgo kuenta. Jehová xkajni putum umakgolh tayat (Ezeq. 22:12).
18. ¿Tuku takgalhskinin kililakpuwanatkan? (Hebreos 13:5).
18 Xlakaskinka nalilakpuwanaw la akxilhaw tumin. Kalilakpuwaw: «¿Ankgalhin klilakpuwan tumin chu tuku ktamawaputun? Komo wi tiku kimasakuani tumin, ¿ni lakapala kmaspitni xlakata klakpuwan pi xla ni maklakaskima? ¿Klakpuwan pi xlakaskinka klitaxtu xlakata kkgalhi tumin? ¿Tuwa kmakgkatsi nakkalimakgtaya amakgapitsin tuku kkgalhi? ¿Klakpuwan pi putum natalan tiku kgalhikgo tumin paxkikgo tumin? ¿Klakgati kkatalalin tiku kgalhikgo tumin pero ni kkatalalin tiku ni kgalhikgo?». Akinin kgalhiyaw lanka talakgalhaman pi Jehová kinkamakgamakglhtinanitan kxchik. ¡Kuenta katlawaw uma! Ni kapaxkiw tumin. Komo natlawayaw tuku Jehová lakgati, xla nikxni kintikamakgxtakgni (kalikgalhtawakga Hebreos 13:5).
JEHOVÁ KAPAXKI XʼAMIGOS
19. ¿Tuku xlakata Jehová kinkawaninitan kSalmo capítulo 15 tuku kilitlawatkan?
19 Salmo capítulo 15 liʼakgasputa umakgolh tachuwin: «Tiku chuna likatsi ankgalhin tliwakglh nataya» (Sal. 15:5). Umakgolh tachuwin limasiya pi Jehová kinkawaniyan tuku kilitlawatkan xlakata lakaskin pi kapaxuwaw. Wa xlakata kinkamasiyaniyan tuku kilitlawatkan xlakata nakgalhiyaw xtasikulunalin chu nakinkakuentajtlawayan (Is. 48:17).
20. ¿Tuku lu tlan namakgamakglhtinankgo xʼamigos Jehová kkilhtamaku nema aku mima?
20 Xʼamigos Jehová tiku nikxni namakgxtakgkgo lu tlan tuku namakgamakglhtinankgo kkilhtamaku nema aku mima. Tiku xatalaksakni nakamakgamakglhtinankan kʼakgapun, niku Jesús kalakkaxwilininit “niku tlan natawilakgo” (Juan 14:2). Amakgapitsin kstalaninanin Cristo namakgamakglhtinankgo kKatiyatni tasikulunalin nema lichuwinan Apocalipsis 21:3. ¡Akgtum lanka talakgalhaman pi xʼamigos Jehová litaxtuyaw! ¡Tlan natamakgxtakgaw kxchik putum kilhtamaku!
TAKILHTLIN 39 Lu tlan tukuwani nak xlakatinDios
