NHLOKOMHAKA LEYI DYONDZIWAKA YA VU 24
RISIMU 24 Tanani eNtshaveni Ya Yehovha
Tshama U Ri Muendzi Wa Yehovha Hilaha Ku Nga Heriki!
“Yehovha Xikwembu xanga, i mani la nga vaka muendzi etendeni ra wena?”—PS. 15:1.
LESWI HI NGA TA SWI DYONDZA
Hi ta bula hi leswi hi faneleke hi swi endla leswaku hi tshama hi ri vanghana va Yehovha ni ku tlhela hi kambisisa leswi a swi languteleke eka hina mayelana ni ndlela leyi hi va khomaka hayona vanghana vakwe.
1. Pisalema 15:1-5 yi nga hi pfuna njhani?
EKA nhlokomhaka leyi hundzeke, hi dyondze leswaku malandza lama tinyiketeleke eka Yehovha ma nga va vaendzi etendeni rakwe ro fanekisela hi ku va ma tikarhatela ku va ni vuxaka lebyikulu na yena. Kambe hi fanele hi endla yini leswaku hi va vaendzi vakwe? Pisalema 15 yi hlamusela swo tala hi mhaka leyi. (Hlaya Pisalema 15:1-5.) Pisalema leyi yi hi byela leswi hi faneleke hi swi endla leswaku hi va vanghana va Xikwembu.
2. I yini leswi nga ha vaka swi endle mupisalema Davhida a vulavula hi tende ra Yehovha?
2 Pisalema 15 yi sungula hi swivutiso leswi nge: “Yehovha Xikwembu xanga, i mani la nga vaka muendzi etendeni ra wena? I mani la nga tshamaka entshaveni ya wena yo kwetsima?” (Ps. 15:1) Loko mupisalema Davhida a vulavula hi ‘tende’ ra Yehovha, swi nga endleka a a ehleketa hi tabernakela leyi a yi ri eGibiyoni ku ringana nkarhi wo karhi. Nakambe Davhida u boxa ‘ntshava yo kwetsima’ ya Xikwembu leyi kumbexana a ku ri ya le Siyoni leyi nga eYerusalema. Davhida u dzime tende hi le dzongeni wa Gibiyoni laha swi tekaka tikhilomitara to hlayanyana ku ya kona leswaku a veka areka ya ntwanano yi tshama kwalaho ku fikela loko ku akiwa tempele.—2 Sam. 6:17.
3. Hikwalahokayini hi lava ku twisisa Pisalema 15? (Nakambe vona xifaniso.)
3 Vaisrayele vo tala a va nga pfumeleriwi ku tirha etabernakeleni, a ko va vanhu va nga ri vangani lava a va pfumeleriwa ku nghena laha a yi tshama kona. Kambe malandza hinkwawo ya Yehovha yo tshembeka a ma ta va vaendzi etendeni rakwe ro fanekisela hi ku tshama ma ri vanghana vakwe. Leswi hi swona hinkwerhu hi swi navelaka. Pisalema 15 yi hi byela leswi hi faneleke hi swi endla leswaku hi tshama hi ri vanghana va Yehovha.
Vaisrayele va le nkarhini wa Davhida a va swi twisisa kahle ku va munhu a ri muendzi etendeni ra Yehovha (Vona ndzimana 3)
TSHEMBEKA U TLHELA U ENDLA LESWINENE
4. Hi swi tiva njhani leswaku Yehovha a nga lavi hi khuvuriwa swi helela kwalaho? (Esaya 48:1)
4 Eka Pisalema 15:2, ku vuriwa leswaku munghana wa Xikwembu “hi loyi a tshembekaka, loyi a endlaka leswinene.” Hi fanele hi ya emahlweni hi endla swilo leswi. Kambe, xana swa koteka leswaku hi va vanhu ‘vo tshembeka’? Ina. Hambileswi hinkwerhu hi endlaka swihoxo, Yehovha u ta hi teka hi ‘tshembekile’ loko hi endla leswi hi nga swi kotaka leswaku hi n’wi yingisa. Loko hi tinyiketela eka Xikwembu ivi hi khuvuriwa, wolawo ko va masungulo yo va vanghana va Xikwembu. Hi xikombiso, emikarhini ya Bibele ku va ntsena munhu a ri Muisrayele a swi nga n’wi endli muendzi wa Yehovha. Van’wana a va khongela eka yena kambe ku nga ri “hi ntiyiso ni ku lulama.” (Hlaya Esaya 48:1.) Vaisrayele lava rhandzaka Yehovha a va fanele va dyondza hi milawu yakwe ni ku tlhela va yi yingisa. Hilaha ku fanaka, leswaku Xikwembu xi hi amukela, a swi enelanga ku va hi khuvuriwa ni ku va xiphemu xa vandlha ra Vukreste, swi lava hi endla leswi engetelekeke. Hi fanele hi nga tshiki ku ‘endla leswinene.’ Hi nga swi endlisa ku yini sweswo?
5. Swi vula yini ku yingisa Yehovha eka swilo hinkwaswo?
5 Eka Yehovha, ku ‘tshembeka’ ni ku ‘endla leswinene’ i swa nkoka swinene ku tlula ku va nkarhi ni nkarhi hi katseka eka mitirho leyi endliwaka etindhawini to gandzela. (1 Sam. 15:22) Hi fanele hi tikarhatela ku yingisa Xikwembu eka swilo hinkwaswo leswi hi swi endlaka hambiloko hi ri hexe. (Swiv. 3:6; Ekl. 12:13, 14) I swa nkoka ku yingisa Yehovha hambi ku ri eka timhaka letitsongo. Loko hi endla tano, hi kombisa leswaku ha n’wi rhandza naswona sweswo swi endla a ya a hi rhandza swinene.—Yoh. 14:23; 1 Yoh. 5:3.
6. Hi ku ya hi Vaheveru 6:10-12, i yini leswi nga swa nkoka swinene ku tlula mitirho leyinene leyi hi tshameke hi yi endla?
6 Yehovha wa swi tlangela swinene leswi hi n’wi endleleke swona enkarhini lowu hundzeke. Hambiswiritano, sweswo ntsena a hi xitiyisekiso xa leswaku hi ta tshama hi ri vaendzi etendeni rakwe. Leswi swi hlamuseriwe kahle eka Vaheveru 6:10-12. (Yi hlaye.) Yehovha a nga swi rivali swilo leswinene leswi hi tshameke hi swi endla. Kambe u lava hi ya emahlweni hi n’wi tirhela hi timbilu ta hina hinkwato “ku ya fika emakumu.” U ta va munghana wa hina hilaha ku nga heriki “loko hi nga karhali.”—Gal. 6:9.
VULAVULA NTIYISO EMBILWINI YA WENA
7. Swi vula yini ku vulavula ntiyiso etimbilwini ta hina?
7 Munhu loyi a lavaka ku va muendzi etendeni ra Yehovha u fanele a “[vulavula] ntiyiso embilwini yakwe.” (Ps. 15:2) Leswi swi katsa swo tala ku tlula ku papalata ku hemba. Yehovha u lava hi tshembeka eka swilo hinkwaswo. (Hev. 13:18) Leswi i swa nkoka “hikuva Yehovha wa n’wi nyenya munhu la kanganyisaka, kambe i munghana lonkulu wa lavo lulama.”—Swiv. 3:32.
8. I mahanyelo wahi lama hi faneleke hi ma papalata?
8 Lava “vulavulaka ntiyiso embilwini [ya vona]” a va endli onge va yingisa loko va ri evanhwini kambe va tlula milawu ya Xikwembu loko va ri exihundleni. (Esa. 29:13) Va papalata ku kanganyisa. Munhu loyi a kanganyisaka a nga sungula ku tibyela leswaku mikarhi yin’wana milawu ya Yehovha a hi yinene. (Yak. 1:5-8) A nga hlawula ku nga n’wi yingisi Yehovha eka timhaka leti a vonaka ti nga vuli nchumu. Kutani loko swi vonaka onge a ku na nchumu xo biha xi endlekaka hileswi a nga yingisiki, a nga va ni xivindzi xo ya emahlweni a tlula milawu ya Xikwembu naswona hambiloko a ehleketa leswaku u gandzela Xikwembu, a xi n’wi amukeli. (Ekl. 8:11) Hambiswiritano, hina hi lava ku tshembeka eka swilo hinkwaswo.
9. Ku endleke yini loko Yesu a hlangana na Nathaniyele ro sungula naswona hi dyondza yini? (Nakambe vona xifaniso.)
9 Leswi endlekeke loko Yesu a hlangana na Nathaniyele ro sungula swi hi dyondzisa ndlela leyi swi nga swa nkoka hayona ku tshembeka. Loko Filipi a tise munghana wakwe Nathaniyele eka Yesu, ku endleke nchumu wo hlamarisa. Hambileswi Yesu a a nga si tshama a hlangana na Nathaniyele, u te: “Vonani Muisrayele loyi a nga riki na vukanganyisi.” (Yoh. 1:47) Yesu a a swi tiva leswaku vadyondzisiwa lavan’wana va tshembekile kambe Nathaniyele a a tshembeke ngopfu. Ku fana na hina, Nathaniyele a a swi endla swihoxo. Kambe a a nga ri mukanganyisi, a a tshembekile eka swilo hinkwaswo. Sweswo swi n’wi tsakisile Yesu ni ku tlhela a bumabumela Nathaniyele. Hinkwerhu hi lava leswaku Yesu a titwa hi ndlela leyi fanaka hi hina!
Filipi u tise munghana wakwe Nathaniyele wanuna loyi a a nga ri na vukanganyisi eka Yesu. Xana ku nga vuriwa leswi fanaka hi hina? (Vona ndzimana 9)
10. Hikwalahokayini hi fanele hi papalata ku yi tirhisa hi ndlela yo biha nyiko yo vulavula? (Yakobo 1:26)
10 Swo tala swa swilo leswi languteriweke eka hina leswi boxiweke eka Pisalema 15, swi fambisana ni ndlela leyi hi va khomaka hayona van’wana. Pisalema 15:3 yi vula leswaku muendzi loyi a teke etendeni ra Yehovha “a nga hlevi, u khoma van’wana kahle, a nga va onhi mavito vanghana vakwe.” Loko hi hleva van’wana swi nga va twisa ku vava swinene naswona swi ta endla leswaku hi hlongoriwa etendeni ra Yehovha.—Hlaya Yakobo 1:26.
11. I yini ku hleva naswona ku endliwa yini hi vahlevi lava nga hundzukiki?
11 Hi ku kongoma Mupisalema u boxa ku hleva. I yini ku hleva? Kahlekahle, ku hleva i ku sungula mhaka leyi nga mavunwa leyi nga onhaka ndhuma ya munhu. Vahlevi lava nga hundzukiki va susiwa evandlheni ra Vukreste.—Yer. 17:10.
12-13. Hi le ka swiyimo swihi laha hi nga tikumaka hi ri ni nandzu wo onha vanghana va hina mavito? (Nakambe vona xifaniso.)
12 Pisalema 15:3 yi tlhela yi hi tsundzuxa leswaku vaendzi va Yehovha va khoma van’wana kahle naswona a va onhi vanghana va vona mavito. Hi nga va onha njhani vanghana va hina mavito?
13 Hi nga onha van’wana mavito handle ko swi xiya hi ku hangalasa timhaka leti nga riki ntiyiso hi vona. Hi xikombiso: (1) Makwerhu wa xisati u tshika ntirho wa nkarhi hinkwawo, (2) vatekani a va ha ri eBethele kumbe (3) makwerhu a nga ha ri nkulu kumbe nandza wa vutirheli. Xana swi ta va swinene ku lavalava swivangelo leswi nga ha vaka swi endle ku va ni ku cinca koloko ivi hi tlhela hi byela van’wana hi swona? Ku nga ha va ni swivangelo swo tala swa ku cinca koloko leswi hina hi nga swi tiviki. Muendzi loyi a teke etendeni ra Yehovha “u khoma van’wana kahle, a nga va onhi mavito vanghana vakwe.”
Swa olova ku hangalasa rungula leri nga tsakisiki hi van’wana naswona ku endla tano i ku hleva (Vona tindzimana 12-13)
XIXIMA LAVA CHAVAKA YEHOVHA
14. Hlamusela ndlela leyi hayona vaendzi va Yehovha va papalataka “un’wana ni un’wana la endlaka swo biha.”
14 Pisalema 15:4 yi vula leswaku munghana wa Yehovha “u fambela ekule ni un’wana ni un’wana la endlaka swo biha.” Hi nga swi endlisa ku yini sweswo? Leswi hi nga vanhu lava endlaka swihoxo, a hi swi koti ku vona loko munhu wo karhi a endla swo biha. Hikwalahokayini? Hikuva hi ntumbuluko hi nga ha rhandza vanhu vo karhi hikwalaho ka vumunhu bya vona kasi van’wana va hi siringa. Hikwalaho, hi fanele hi papalata lava Yehovha a nge va “[endla] swo biha.” (1 Kor. 5:11) Vanhu volavo va katsa lava endlaka swo biha va nga hundzuki, lava nga xiximiki tidyondzo leti hi pfumelaka eka tona kumbe lava ringetaka ku dlaya vuxaka bya hina na Yehovha.—Swiv. 13:20.
15. Hi xixima “lava chavaka Yehovha” hi ndlela yihi?
15 Nakambe Pisalema 15:4 yi vula leswaku hi fanele hi xixima “lava chavaka Yehovha.” Kutani hi lava tindlela to xixima ni ku va ni musa eka vanghana va Yehovha. (Rhom. 12:10) Hi ndlela yihi? Ndlela yin’wana leyi boxiweke eka Pisalema 15:4 hileswaku muendzi loyi a teke etendeni ra Yehovha “a nga cinci loko a tshembisile, hambiloko a langutane ni swiyimo swo tika.” Loko hi nga endli leswi hi swi tshembiseke, hi ta vavisa van’wana. (Mat. 5:37) Hi xikombiso, Yehovha u langutele leswaku vaendzi vakwe va hanya hi xihlambanyo lexi va xi endleke loko va cata. Nakambe wa tsaka loko vatswari va tikarhatela ku endla leswi va swi tshembiseke vana va vona. Ndlela leyi hi rhandzaka Xikwembu ni van’wana, yi ta endla hi tikarhatela ku endla leswi hi swi tshembiseke.
16. Hi yihi ndlela yin’wana leyi hi nga xiximaka vanghana va Yehovha?
16 Ndlela yin’wana yo xixima vanghana va Xikwembu i ku va ni malwandla. (Rhom. 12:13) Loko hi dzumba ni vamakwerhu hi tiyisa vuxaka bya hina na vona ku katsa na Yehovha. Ku engetela kwalaho, loko hi ri ni malwandla hi tekelela Yehovha.
U NGA RHANDZI MALI
17. Hikwalahokayini Pisalema 15 yi vulavula hi mali?
17 Hi hlaya leswaku muendzi wa Yehovha “a nga lombisi mali yakwe hi ntswalo, a nga pfumeli ku xaviwa leswaku a lwa ni loyi a nga riki na nandzu.” (Ps. 15:5) Hikwalahokayini pisalema leyi yo koma yi vulavula hi mali? Hikuva loko hi rhandza mali ngopfu yi nga va ya nkoka swinene eka hina ku tlula vanhu na Xikwembu. (1 Tim. 6:10) Emikarhini ya Bibele, van’wana a va dyelela vamakwavo lava nga swisiwana hi ku va hakerisa ntswalo loko va va lombe mali. Nakambe vaavanyisi van’wana a va pfumela ku xaviwa kutani va avanyisa munhu la nga riki na nandzu hi ndlela yo biha. Yehovha wa swi nyenya swilo leswi.—Ezek. 22:12.
18. Hi swihi swivutiso leswi nga hi pfunaka hi kambisisa langutelo ra hina hi mali? (Vaheveru 13:5)
18 I swinene ku kambisisa langutelo leri hi nga na rona hi mali. Tivutise: ‘Xana ndzi tshamela ku ehleketa hi mali ni leswi ndzi lavaka ku swi xava? Loko ndzi lombe mali, xana ndza hlwela ku yi tlherisa hikuva ndzi tibyela leswaku loyi a ndzi lombeke a nga na xilaveko xa yona? Xana ndzi titwa ndzi ri wa nkoka loko ndzi ri na mali kambe swi ndzi tikela ku hanana? Xana ndzi teka vamakwerhu va rhandza rifuwo ntsena hileswi va nga na mali? Xana ndzi tiendla munghana wa swigwili ivi ndzi fambela ekule ni swisiwana?’ Hi nyikiwe xirhambo xa nkoka swinene xo va vaendzi va Yehovha. Hi nga tshama hi ri vaendzi va Yehovha loko hi nga rhangisi mali. Loko hi endla tano, Yehovha a nge pfuki a hi tshikile!—Hlaya Vaheveru 13:5.
YEHOVHA U RHANDZA VANGHANA VAKWE
19. Hikwalahokayini Yehovha a lava hi endla swilo hinkwaswo leswi boxiweke eka Pisalema 15?
19 Pisalema 15 yi gimeta hi xitshembiso lexi: “Un’wana ni un’wana la endlaka swilo leswi a nge pfuki a tsekatsekisiwile.” (Ps. 15:5) Laha mupisalema u hlamusela leswi endlaka Yehovha a lava hi endla hinkwaswo leswi vuriweke eka pisalema leyi. Yehovha u lava hi tsaka. Hikwalaho, u hi lerisa ku endla swilo leswi nga ta hi tisela mikateko ni ku endla hi sirheleleka.—Esa. 48:17.
20. Vaendzi va Yehovha va nga langutela yini?
20 Vaendzi va Yehovha lava a va amukelaka va nga langutela ku va ni vumundzuku lebyinene. Vahlawuriwa vo tshembeka va ta nyikiwa “tindhawu to tala to tshama” leti Yesu a va lunghiseleleke tona etilweni. (Yoh. 14:2) Lava nga ni ntshembo wo hanya emisaveni va nga langutela ku vona switshembiso leswi nga eka Nhlavutelo 21:3 swi endleka. Entiyisweni, hinkwerhu hi titwa hi endliwe vanhu ku kuma xirhambo xa Yehovha xo va vanghana vakwe, xo va vaendzi hilaha ku nga heriki etendeni rakwe!
RISIMU 39 Tiendlele Vito Lerinene Ni Xikwembu
