1. Buku la Tipisalema 15:1-5 li nga hi pfunisa ku yini?

 KA DJONDZO leyi nga hundza hi swi vonile swaku vanhu lava va tirhelaka Yehovha va nga va vanghanu va yena va tlhela va va vapfhumba ka tende la yena. Kambe hi nga yendla yini swaku hi tama hi va vapfhumba ka tende la Yehovha? Tipisalema ndzima 15 yi vulavula hi mhaka yoleyo. (Lerha Tipisalema 15:1-5.) Ndzima leyi, yi hi tlhamusela kahle leswi hi nga swi yendlaka swaku hi tama hi va vanghanu vavakulu va Yehovha.

2. I yini leswi Davhida a a pimisa hi swona loko a vulavula hi tende la Yehovha?

² Tipisalema 15 loko yi sungula yi vula leswi: “Yehovha Xikwembu xanga, i mani lweyi a nga vaka mupfhumba ka tende la wena? I mani lweyi a nga tshamaka ka ntshava ya wena ya ku kwetsima?” (Ps. 15:1) Loko Davhida a vulavula hi tende la Yehovha swi nga yendleka a pimise hi tabernakela leyi a yi kumeka Gibiyoni ka nkama wolowuya. Davhida a tlhele a vulavula hi “ntshava ya ku kwetsima” ya Xikwembu. Swi nga yendleka a a vulavula hi ntshava ya Siyoni leyi a yi kumeka aYerusalema. Ka ntshava leyi, leyi a yi kumeka kule ni sul ka Gibiyoni, Davhida a yake tende swaku a veka a areka ya ntwananu na wa ha nyimela a ndhawu yayinene. — 2 Sa. 6:17.

3. Hi mhaka muni swi li swa lisima ku twisisa leswi Tipisalema 15 yi vulaka swona? (Vona mufoto.)

³ I ntiyiso swaku Vayisrayele va vanyingi a va nga fanelanga va tirha ka tabernakela hambi hi ku nghena ka tende lani a ku ni areka ya ntwananu. Kambe hinkwavu lava va tirhelaka Yehovha hi ku tshembeka va nga va vapfhumba ka tende la yena funtshi va yendla leswo hi ku va vanghanu va yena. Phela hi leswo leswi hinkwerhu hi swi lavaka. Tipisalema 15 yi vulavula hi wumunhu lin’wani leli hi faneleke  hi va na lona leswaku hi tama hi va vanghanu va Yehovha.

TAMA U TSHEMBEKA U YENDLA SWASWINENE

4. Hi swi tivisa ku yini swaku ka Yehovha a swi yenelanga kuva munhu a tsakamisiwa? (Esaya 48:1)

⁴ Tipisalema 15:2 yi vula leswaku munghanu wa Yehovha ‘hi lweyi a tshembekaka ni lweyi a yendlaka swaswinene.’ Leswi swi vula swaku hi fanele hi tama hi swi yendla leswo. Kambe swa koteka kuva hi va vanhu va ku tshembeka? Ina, swa koteka. I ntiyiso swaku hina a hi hetisekanga, kambe Yehovha a hi vona na hi li vanhu va ku tshembeka loko hi yendla hinkwaswu leswi hi nga swi kotaka leswaku hi mu yingisa. Nkama hi tinyiketelaka ka Yehovha hi tlhela hi tsakamisiwa hi sungula a wuxaka la le kusuhi na Yehovha. Kambe ka nkama wa Vayisrayele ku va munhu a lumba a lixaka la Vayisrayele a swi nga yenelanga swaku Yehovha a mu yamukela tanihi mupfhumba ka tende la yena. Van’wani lava a va vula leswaku va mu tirhela Yehovha a va nga mu tirheli hi “ntiyiso ni ku lulama.” (Lerha Esaya 48:1.) Vayisrayele lava a va lava ku va vapfhumba ka tende la Yehovha, a va fanele va djondza leswi Yehovha a swi nyimelaka ka vapfhumba va yena va tlhela va hanya hi swona. Hilani ku fanaka, leswaku na hina hi yamukeliwa ka tende la Yehovha a swi yenelanga swaku hi tsakamisiwa hi vitaniwa Timboni ta Yehovha, kambe hi fanele hi tama hi yendla swilo swaswinene. Leswo swi lava ku vula yini?

5. Swi vula yini ku yingisa Yehovha ka swilo hinkwaswu?

⁵ Phela ka Yehovha a ku tshembeka ni ku yendla swilo swaswinene a swi vuli ntsena ku ya mintlhanganwini. (1 Sa. 15:22) Hi fanele hi yendla hinkwaswu leswi hi nga swi kotaka leswaku hi yingisa Yehovha ka swilo hinkwaswu ka wutomi la hina, ku patsa ni loko hi li hoxe. (Swiv. 3:6; Ekl. 12:13, 14) Phela i swa lisima ku va hi yendla minzamu hinkwayu leswaku hi yingisa Yehovha hambi ka minchumu leyi yi tikombaka ingaku a hi ya nchumu. Loko hi yendla leswo, hi va na hi kombisa swaku impela ha mu rhandza Yehovha naswona na yena a ta hi rhandza. — Yoh. 14:23; 1 Yo. 5:3.

6. Hi ku ya hi Vaheberu 6:10-12, i mpsini swa lisima hintamu ku tlula leswi se hi nga mu yendlela swona Yehovha?

 ⁶ Yehovha wa swi nyika lisima hintamu leswi se hi nga mu yendlela swona ka nkama lowu nga hundza. Kambe swilo leswi hi nga mu yendlela swona Yehovha a hi swona ntsena swi yendlaka swaku hi tama hi va vapfhumba ka tende la yena. Leswo swi tlhamuseliwa kahle ka buku la Vaheberu 6:10-12. (Lerha.) I ntiyiso swaku Yehovha a nga rivali leswi se hi nga mu yendlela swona. Kambe yena a lava leswaku hi tama hi mu tirhela hi wutomi la hina hinkwalu anze ku fika magamu. Hi ta tama hi va vanghanu va Yehovha hilani ku nga heliki “loko hi nga karhali.” — Gal. 6:9.

VULAVULA NTIYISO A MBILWINI

7. Swi vula yini ku vulavula ntiyiso a mbilwini?

⁷ Leswaku munhu a va mupfhumba ka tende la Yehovha swi lava “a vulavula ntiyiso ka mbilu ya yena.” (Ps. 15:2) Leswo a swo vula ku va munhu a nga hembi ntsena, swi lava a tshembeka ka leswi a swi vulaka a tlhela a tshembeka ka swilo hinkwaswu leswi a swi yendlaka. (Heb. 13:18) Leswo i swa lisima “hikusa Yehovha wa mu nyenya munhu lweyi a kanganyisaka, kambe i munghanu wamukulu wa lava ku lulama.” — Swiv. 3:32.

8. I mpsini leswi hi kalaka hi nga fanelanga hi swi yendla?

⁸ Munhu “lweyi a vulavulaka a ntiyiso ka mbilu ya yena,” a nga yendli ingi wa mu yingisa Yehovha loko a ni vanhu van’wani kuve loko a li yexe a nga mu yingisi. (Esa. 29:13) Kambe minkama hinkwayu wa tshembeka. Munhu wa ku kala a nga tshembeki a nga ha sungula hi ku pimisa swaku a hi minkama hinkwayu swi bohaka ku va a yingisa Yehovha. (Yak. 1:5-8) Munhu yelweyo a nga ha sungula hi ku va a nga mu yingisi Yehovha ka swilo swaswitsongo. Se loko a vona swaku a ku yendleki nchumu hi leswi a kalaka a nga mu yingisanga Yehovha, a nga ha sungula ku yendla swilo swa ku biha hintamu. Hambi hi leswi munhu yelweyo a pimisaka swaku wa mu tirhela Yehovha, Yehovha a nga swi yamukeli leswi a swi yendlaka. (Ekl. 8:11) Kambe hina hi lava ku tshembeka ka swilo hinkwaswu leswi hi swi yendlaka.

9. Hi nga djondza yini ka leswi swi nga yendleka nkama Yesu a nga tiva Nataniyeli? (Vona mufoto.)

⁹ Hi nga djondza minchumu yin’wani ya lisima ka mhaka ya ku tshembeka mbilwini loko hi vona leswi swi nga yendleka nkama Yesu a nga tiva Nataniyeli.  Nkama Filipi a nga komba Yesu munghanu wa yena, ku yendleke minchumu ya ku tsakisa. Hambileswi Yesu a a nga mu tivi Nataniyeli, a te: “Vonani Muyisrayele wa ntiyiso, lweyi a kalaka a nga kanganyisi.” (Yoh. 1:47) I ntiyiso swaku Yesu a a swi tiva swaku a vadjondzisiwa va yena van’wani a va tshembeka, kambe Nataniyeli a a tshembeka swi huma mbilwini. Ku fana na hina, Nataniyeli a a nga hetisekanga; hambileswo a a tshembeka ka swilo hinkwaswu. Phela leswo swi mu hlamalisile Yesu a tlhela a mu khensa hi swona. A swi ta xonga hintamu loko Yesu a o vula swa ku fana hi hina.

10. Hi mhaka muni hi fanele hi pimisa kahle hi leswi hi swi vulaka? (Yakobe 1:26)

¹⁰ Tipisalema 15 yi vulavula hintamu hi ndlela leyi hi faneleke hi va khoma hi yona vanhu van’wani. Tipisalema 15:3 yi vula swaku lweyi a nga mupfhumba ka tende la Yehovha “a nga va wonhi vito van’wani, a va khoma kahle van’wani, a nga va danisi vanghanu va yena.” Loko hi wonha vito vanhu van’wani kumbe hi va hembela va nga ha vaviseka, naswona hi mhaka ya leswo Yehovha a nge hi pfumeleli leswaku hi va vapfhumba va yena. — Lerha Yakobe 1:26.

11. Swi vula yini ku wonha van’wani vito naswona ku nga yendleka yini loko munhu a nga tisoli?

¹¹ Davhida a vulavule hi ku wonha vanhu vito. Kasi i yini ku wonha van’wani vito? Ku wonha van’wani vito swi vula ku vulavula swilo swa ku kala swi nga li ntiyiso hi munhu mun’wani leswaku u chimisa kumbe u wonha a ndhuma ya munhu yelweyo. Phela loko munhu a wonha vanhu van’wani vito a tlhela a va hembela kambe a nga tisoli, hambi bandleni a nga susiwa. — Yer. 17:10.

12-13. Hi swihi swiyimu leswi swi nga hi yendlaka hi vulavula ku biha hi vanghanu va hina? (Vona mufoto.)

¹² Tipisalema 15:3 yi hi khumbukisa swaku vapfhumba va Yehovha a va va yendleli swa ku biha vanhu van’wani naswona a va va hembeli kumbe ku danisa vanghanu va vona. Leswo swi lava ku vula yini?

¹³ Swi nga yendleka na hi nga swi lavi, hi sungula ku vulavula swa ku biha hi munhu mun’wani hi  ku va hi hangalasa minchumu ya ku kala yi nga li yinene hi yena. Pimisa hi leswi: 1) Makwerhu wa xisati lweyi a kalaka a nga ha li mupfuli wa ndlela, 2) nuna na nsati lava va nga nyima ku tirha Betele, kumbe 3) makwerhu wa xinuna lweyi a nga nyima ku va doda kumbe mupfunisi wa bandla. A swi ta va swi bihile loko hi tshamela ku vula swaku vamakwerhu volavo va luze mintirho ya vona hileswi va nga yendla minchumu ya ku biha. Swi nga yendleka ku ni swivangelo swa swinyingi leswi swi nga yendla va nga ha yi yendle mintirho yoleyo, leswi hina hi kalaka hi nga swi tivi. Hi mhaka leyo, lweyi a nga mupfhumba ka tende la Yehovha a nga fanelanga a va yendlela swa ku biha vanhu van’wani kumbe ku danisa vanghanu va yena.

HLONIPHA LAVA CHAVAKA YEHOVHA

14. Tlhamusela swaku mupfhumba wa Yehovha a swi kotisa ku yini ku fambela kule ni munhu wa ku biha.

¹⁴ Tipisalema 15:4 yi vula leswaku munghanu wa Yehovha “a fambela kule ni mun’wani ni mun’wani lweyi a yendlaka swa ku biha.” Hi nga swi tivisa ku yini swaku munhu a bihile? Tanihi vanhu va ku kala ku hetiseka, a hi nge swi koti ku tiva swaku munhu a bihile kumbe nada. Hi mhaka muni hi vula leswo? Leswi hi kalaka hi nga hetisekanga, hi tolovela ku rhandza vanhu lava yendlaka swilo leswi hi swi rhandzaka ivi hi nga va rhandzi lava yendlaka swilo leswi swi hi nyenyentsaka. Ku vula ntiyiso ko va Yehovha ntsena lweyi a nga vulaka swaku munhu a bihile kumbe nada. (1 Ko. 5:11) Leswo swi patsa vanhu lava yendlaka swilo swa ku biha va tlhela va nga tisoli, lava kalaka va nga hloniphi leswi Bibele li swi vulaka ni lava va zamaka ku wonha wunghanu la hina na Yehovha. — Swiv. 13:20.

15. Hi nga swi kombisa ku yini swaku ha va hlonipha “lava chavaka Yehovha”?

¹⁵ Tipisalema 15:4 yi tlhela yi vula swaku hi fanele hi “hlonipha lava chavaka Yehovha.” Leswaku hi swi kota ku yendla leswo, swi lava hi lava tindlela ta ku komba vanhu van’wani wunene hi tlhela hi hlonipha vanghanu va Yehovha. (Rom. 12:10) Hi nga swi yendlisa ku yini leswo? A buku la Tipisalema 15:4 li kombisa ndlela yin’wani leyi hi nga kombisaka ha yona leswo. Phela a mupfhumba ka tende la Yehovha a nga txintxi leswi a nga swi tshembisa hambiloko swi mu karhatela ku swi yendla. Phela loko hi nga hetisisi leswi hi nga swi tshembisa swi nga va vavisa vanhu van’wani. (Mat. 5:37) Hi xikombiso, Yehovha a nyimela swaku nsati na nuna va hetisisa xitshembiso lexi va nga xi yendla nkama va nga chada. Yehovha a tlhela a tsaka swinene loko vapsali va yendla hinkwaswu leswi va nga swi kotaka swaku va hetisisa leswi va swi tshembisaka ka vana va vona. Leswi hi mu rhandzaka hintamu Yehovha hi tlhela hi rhandza vanhu van’wani, hi ta yendla hinkwaswu leswi hi nga swi kotaka leswaku hi hetisisa switshembiso swa hina.

16. Hi yini ndlela yin’wani leyi hi nga hloniphaka vanghanu va Yehovha ha yona?

¹⁶ Ndlela yin’wani ya ku hlonipha vanghanu va Yehovha i ku va hi rhandza ku yamukela van’wani hi lirhandzu hi tlhela hi rhandza ku nyika. (Rom. 12:13) Ku heta nkama ni vamakwerhu van’wani na hi nga li ka mintlhanganu kumbe ka ntirho wa ku chumayela, swi ta hi pfuna swaku hi ya hi va vanghanu vavakulu va vona hi tlhela hi kulisa wunghanu la hina na Yehovha. Funtshi loko hi yendla leswo, hi ta tekelela Yehovha Xikwembu xa hina.

U NGA RHANDZI MALE

17. Hi mhaka muni Tipisalema 15 yi vulavula hi male?

¹⁷ Tipisalema 15:5 yi vula swaku mupfhumba ka tende la Yehovha “a nga lombisi male ya yena hi majuru, a nga pfumeli ku xaviwa swaku a lwa ni lweyi a kalaka a nga na nandzu.” Hi mhaka muni Davhida a vulavule hi male ka Tipisalema leyi ya ku koma? Hikusa loko hi karhateka hintamu hi ku lavetela male, swi nga yendla leswaku ku va yona ya lisima hintamu ka wutomi la hina ku tlula vanhu hambi hi yena Yehovha. (1 Tm. 6:10) A khale vanhu van’wani a va xolola vamakwavu va vona lava a va li swisiwana hi ku va lomba male na va  nyimela ku tlheliseliwa male ya vona ni majuru ya manyingi lawa a va nga ta swi kota ku ma hakela. Naswona a vayavanyisi van’wani a va pfumela ku xaviwa swaku va yavanyisa vanhu lava a va nga na nandzu hi ndlela ya ku biha. Kambe Yehovha wa swi nyenya loko a vona vanhu va yendla swa ku fana ni leswo. — Eze. 22:12.

18. Hi swini swivutiso leswi nga hi pfunaka ku kambela leswi hi yi vonisaka xiswona male? (Vaheberu 13:5)

¹⁸ Swi nga va swinene loko hi kambela ndlela leyi hi yi vonisaka xiswona male. Tivutisi leswi: ‘Ni tshamela ku pimisa hi male ni leswi a ni ta swi xava loko a ni ni male ya ku tlula leyi ni nga na yona swoswi? Loko va ni txeneka male, na hlwela ku hakela, hi ku pimisa leswaku lweyi a nga ni txeneka a nga se yi lava? Ni titwa ni li wa lisima ku tlula van’wani hileswi ni nga ni male? Swa ni karhatela ku nyika van’wani swilo swa mina ku patsa ni male? Ni vona vanhu lava nga ni male na va li vanhu lava rhandzaka male? Ni rhandza ku va ni vanghanu lava nga ni male ku tlula lava nga swisiwana?’ Hinkwerhu hi ni nkateko wa ku rhambiwa hi Yehovha swaku hi va vapfhumba va yena. Kambe leswaku hi tama hi va vapfhumba va yena hi fanele hi tivonela leswaku hi nga rhandzi male. Loko hi rhandza Yehovha ku tlula male, yena a nga ta hi tshika! — Lerha Vaheberu 13:5.

YEHOVHA WA VA RHANDZA VANGHANU VA YENA

19. Hi mhaka muni Yehovha a lava leswaku hi yendla swilo hinkwaswu leswi nga ka Tipisalema 15?

¹⁹ A buku la Tipisalema 15 li gama hi xitshembiso lexi: “Hinkwavu lava yendlaka swilo leswi, a va nge tshuki va tsekatsekisiwile.” (Ps. 15:5) Davhida a tlhamusela swaku hi mhaka muni Yehovha a lava swaku hi yendla swilo hinkwaswu leswi nga tsaliwa ka Tipisalema 15. Phela Yehovha a lava leswaku hi tsaka ka wutomi la hina; hi mhaka leyo, loko hi yendla swilo hinkwaswu leswi Yehovha a hi kombelaka swona, wutomi la hina li ta tsakisa funtshi Yehovha a ta hi vhikela. — Esa. 48:17.

20. Hi wini ntshembo wa ku tsakisa lowu vapfhumba va Yehovha va wu nyimelaka?

²⁰ Vapfhumba va Yehovha va swi nyimele hi ku tsaka ku hetiseka ka ntshembo lowu va nga na wona. Lava va nga totiwa va nyimela ku yamukeliwa “ka tindhawu ta ku tshama” ka tona leti Yesu a nga ti lulamisela matilweni. (Yoh. 14:2) Lava va nga ni ntshembo wa ku hanya lani misaveni va swi nyimele hi ku tsaka ku hetiseka ka leswi nga ka Nhlawutelo 21:3. Ha tiyiseka leswaku i nkateko wawukulu ka hina hinkwerhu ku va hi rhambiwile hi Yehovha swaku hi va vanghanu va yena hi tlhela hi va vapfhumba va yena hilaha ku nga heliki.