HADGE 24
SIŊ 24 A we le ti huuli mani Jeofa no
Hay diŋ Waare Jeofa maa tum!
‘O Jeofa, wose hay ge yaŋ ɓil mburyug ɓon mo la’? —SIŊ. 15:1.
FẼN MAA KLUU ƁIL HADGE SEN LA
Maa da’ wer ne fẽn maaga naa mo joŋ ne maa lagge tum diŋ bar Jeofa, lan maa da’ wer ga de ɗeŋ maa hõn ga á gor ga naa mo joŋ see bar sen wo la mono.
1. Siŋ wora 15:1-5 kay naa na kayge là?
TI HADGE maa glogn le mono, naa laa ni ga jar maaga wo go de hã see ɓaara ne Jeofa, lan ga wo de joŋge ga saara mo hay diŋ bar ɓe mbaara de kããge maa joŋge diŋ waare maa ɓil “mburyug” ɓe no. Day naa joŋ joŋge maaga naa mo hay barge de Jeofa so là? Siŋ wora 15 wãã ti ɓe. (Jaŋ Siŋ wora 15:1-5.) Siŋ sen wãã ti fẽn maaga naa nen joŋge ɓe maaga naa mo hay diŋ bar Baa maa see ɓe maŋ mono.
2. Dafid hay ɗig diŋ ti mayse de maaga á wãã ti mburyug maa ni Jeofan mo là?
2 Siŋ wora 15 tĩĩ wer ga: ‘O Jeofa, wose hay ge yaŋ ɓil mburyug ɓon mo la? Wose hay ge yaŋ ti húulì ɓo maa bay ɗagn mo la?’ (Siŋ. 15:1) Maaga Dafid jee ‘waa siŋ wãã ti “mburyug” maa ni Jeofan mono, maapo á hay wããge diŋ ti tabernaakle maaga hay ɓaa Gabawoŋ de ngar ngeel po ta’ mono. Dafid wãã ti “húulì maa bay ɗag” maa ni Baa no, maapo se hay da wããge diŋ ti mburyug maaga hay ciŋ ti húulì Siyoŋ Jerusalem mono. Dafid joŋ mburyugn go see Gabawoŋ maa nen ɓaŋ ni wãyban nen klewmeder pur debaŋ, kaŋ komrom maa ni Baan ɓil ɓe hãã nen maaga à mo boo ngeel kaŋge ɓe maa tumn go ɗa.—2 Sam. 6:17.
3. Wer mayse ga naa de sãy laa wer ne Siŋ wora 15 ti là? (Ko foton lay.)
3 Faage hay bay de hãge ne daŋge jar Israyel wo maa joŋ joŋre ɓil tabernaaklen wa, day jar maaga hay wo de kããge maa joŋ joŋre ɓil tiŋ maaga komromn hay de kaŋge ni wo mẽ’ tu. Amaa, jar goŋ Jeofa maa de deelen wo ɓuy hay wo de kããge maaga saara joŋ jar maa ɓil mburyug ɓe no, lan maaga saara joŋ diŋ bar ɓe. Sen diŋ fẽn po maaga naa ɓuy de sãy ɓe ti. Siŋ wora 15 ngaɓ joŋre po maa de woore wo ga naa hay had ra, lan joŋ joŋre de ɓaara maaga naa mo hay joŋ diŋ bar Jeofa maa tum mono.
Jar Israyel maa ti wur maa ni Dafidn hay wo go gus maa da’ wer ne maaga à wãã ga jobo diŋ waare maa ɓil mburyug maa ni Jeofan mono (Ko paragraf 3)
SEE BAY NDAR GOGE, LAN JOŊ DIŊ FẼN MAA DE DEELE
4. Naa ko koge ga joŋge batem bay go diŋ fẽn maaga Jeofa wii do naa ɓuy mo wa là? (Esay 48:1)
4 Ɓil Siŋ wora 15:2 mono, à ngaɓ jee maaga diŋ bar Baa ni doo jee maaga “see ti faage ɓe keɗede, ga joŋ diŋ fẽn ma keɗed mono.” Wããre maaga wãã ga “seege”, lan “joŋre” da wããge diŋ ti fẽn po maaga ceɓe, lan tum lay mono. Day naa mbe de kããge maa ‘seege ti faagen keɗed’ yawlà? Ãã. Koh de maaga jee táabay maaga bay de ɓlagge see wa baywa mono, Jeofa ko naa doo “jar maa seege ti faage ɓen de deele” hayga naa dur we de ngar ẽgre naa maa hoo sug ti ɓe no. De maaga naa hã see naa go ne Baa nen tosge, lan naa joŋ batem go mono, sen diŋ tõõge wer seege wer ɓe ɗa. Ɓil Bible mono, á hay bay diŋ ga ndo yaŋ diŋ jee Israyel tu no, ndo joŋ diŋ jee maaga Jeofa ɗe mo le tu wa. Jar maa po hay wo ɗege ɓe bay “ti cwãy wa lay, bay ti faage ɓe wa lay”. (Jaŋ Esay 48:1.) Jar Israyel maaga hay wo de sãy goŋ Baa ti de hay ko wo fẽẽre maaga á da ra mono, lan de hay maŋ wo blam ɓe. Doo sen no lay, maaga naa mo hay wara diŋ bar Jeofa maa ti ngeel ɓe mono, naa mo hay joŋ bay diŋ batem, lan hay sa’ see naa see tayge maa ni Jeofan tawa wa. Naa mo hay tum “joŋge diŋ fẽn maa ti ngeel ɓe no.” Naa joŋ doo sen no na de ɗeŋ maa hõn ne?
5. Hooge sug ti Jeofa ti fẽẽren ɓuy da wããge ga hãylà?
5 Nen Jeofa mono, “Seege ti faage ɓe keɗede” lan “joŋge joŋre ma keɗed” bay da wããge ga naa mo hay woge ti taygeti wo ɓuy tawa wa. (1 Sam. 15:22) Naa hay dur go ɓuy maa hoo sug ti Jeofa nen seele naan wo ɓuy, koh naa mo hay ba go boŋ. (Jõõ. 3:6; Ekl. 12:13, 14) Á de el maaga naa mo hay hoo sug ti Jeofa, koh ti fẽẽre maa mẽ’ mẽ’ wo. Doo sen no kay, se ɓo’ nen go ga naa da ne cwãy, se joŋ ga á da naa debaŋ lay.—Jaŋ 14:23; 1 Jaŋ 5:3.
6. Doo maaga Hebre wo 6:10-12 wãã no mono, fẽn maa dedaŋ fẽẽre maaga naa joŋ le go ɓaa de deele diŋ mayse là?
6 Ɓil Jeofa go ne naa ti feh debaŋ ti fẽn maaga naa joŋ le ne hẽn ɓaa mono. Amaa, á bay diŋ ga naa joŋ fẽẽre maa de el le ɓaa ga naa joŋ ɓil mburyug maa ni Jeofan tu na wa. Naa da’ sen ɓil Hebre wo 6:10-12. (Jaŋ ne.) Jeofa bay go yõõ ti ti joŋre naa maaga naa joŋ ne hẽn ɓaan wo wa. Amaa, á da ga naa mo hay tum goŋ sege go de jiili naa ɓuy, ‘hãã go ti tawge ti.’ Naa joŋ ge yaŋ de bosa’ ti, diŋ bar ɓe maa tum “hayga naa laa doo naa we go gà no.”—Gal. 6:9.
WÃÃ DIŊ CWÃY DOO MAAGA Á LE ƁIL ƁO NO LAY NO
7. Wããge cwãy doo maaga á le ɓil naa nono da wããge ga hãylà?
7 Jee maaga de sãy joŋge diŋ jee maa ɓil mburyug maa ni Jeofan “wãã diŋ cwãy doo maga á le ɓil [ɓe] no lay no” (Siŋ. 15:2) Sen da wããge ga á mo caa gete’ wa tawa tu. Jeofa da ga naa mo hay de deele nen wããre naa wo, lan nen joŋre naa wo ɓuy. (Heb. 13:18) Sen de woore debaŋ werga “je hãyhãyn hor see ne Jeofa, á da ɓen diŋ jar maa de deelen wo.”—Jõõ. 3:32, NWT.
8. Joŋre maa hõn ga naa hay men go là?
8 Jar maaga wãã wo cwãy de ɓil ɓaara ɓuy hoo wo sug ti jag liŋgi maa ni Jeofan diŋ de maaga à de ko rage mo tawa ga, day joŋ wo ɓlagge de maaga saara yaŋ go de see ɓaara tawa ga lay. (Esa. 29:13) Á ɗee go see fẽẽre maa de ɓlagge wo. Jee maaga bay joŋge doo sen no wa maapo ya’ ge ɓod faare ti jag liŋgi maa po wo ga Jeofa hã ra mono. (Jag 1:5-8) Maapo á ɓo’ jag Jeofa go ti fẽẽre po maaga se ɗig ga bay wo de el nen se debaŋ wa mono. Blam ɓe mokay, á yaŋ koge ga fẽn po bay da’ sege de ɓlagge ti maaga se bay hoo sug wa no, maapo se tõõ joŋ fẽẽre maaga wo de ɓlagge debaŋ. Jeofa joŋ ge de ɓe ga so, koh de maaga se ɗig mbe ga Jeofa yãã ge goŋge sen mono. (Ekl. 8:11) Day naa ɓuy de sãy maaga naa mo hay de deele ti.
9. Mayse hres de maaga Yeso tõõ yiŋgi de Nataniyel taŋgu tu mo là, day se had mayse ne naa là? (Ko foton lay.)
9 Á de el debaŋ maaga naa mo hay diŋ jobo maa ‘wãã cwãy go de jiili naa ɓuy’. Naa ko sen diŋ see fẽn maaga hres de maaga Filip ɗe bar ɓe Nataniyel le maa age yiŋgi de Yeso mono.” Koh de maaga Yeso hay ko mbe Nataniyel ti boŋ ga mo laybla no, de maaga á kon le seege no kay tu, se raw wããge ti ɓe ga: “Ko je Israyel ma cwãyn mo caw so no, bag ge bii jar bay ɓil ɓe me’ wa hase” (Jaŋ 1:47). Yeso hay ko jar maa wer ɓe maa lan wo diŋ jar po maaga wãã wo cwãy lay, amaa, se wo koge ga Nataniyel diŋ jobo maaga daŋgo ti wããge cwãy debaŋ. Nataniyel hay de mnaysee doo naa no lay, amaa, bagge bii jar hay bay ɓil ɓe wa, á hay go keɗed ti fẽẽren ɓuy. Ɓil Yeso hay go feh ne Nataniyel ti ti maaga á hay doo sen no mono, lan se kee Nataniyel wer joŋre se de woore no. Sen go tinoo tu ga naa ɓuy naa da ga Yeso mo wãã ti naa de maŋ sen lay!
Filip de ngaɓ bar ɓe Nataniyel ne Yeso. Á diŋ jobo maaga bagge bii jar bay ɓil ɓe mẽ’ wa. Jeofa wãã mbe sen yaŋ ti naa lay yawlà? (Ko paragraf 9)
10. Wer mayse ga naa mo joŋ hayya ne see naa ti wããre maaga naa wããn mo là? (Jag 1:26)
10 Daŋge Jag liŋgi maaga naa da’ ra ɓil Siŋ wora 15 wãã wo diŋ ti fẽẽre maaga naa joŋ jar lan wo de ɓaara mono. Siŋ wora 15:3 wãã ga jee maaga le de ɗege ɓil mburyug maa ni Jeofan “wãã ɓlagge ti jobo de jag ɓe gà, á joŋ kan ɓe de ɓlagge gà, day mbuɗ sõõre jar ma ti jeŋ ɓen wo gà.” Hayga naa yaŋ caa gete’ ne jar lan wo see no, á ce ra debaŋ, day maapo ga naa joŋ ge diŋ jar maa ɓil mburyug maa ni Jeofan ga so lay.—Jaŋ Jag 1:26.
11. Caage gete’ diŋ mayse là, day à joŋ jee maaga bay men wãã ɓlagge ti jar wa joŋge là?
11 Jee ‘waa siŋ wãã debaŋ diŋ ti caage gete’e. Day caage gete’ diŋ maylà? Á diŋ mopo maaga naa wãã ne ti jobo ga bay diŋ cwãy wa, ga se ce ne debaŋ day se dem ɗuu ɓe. Jar maaga caa wo gete’ ne jar see, ga bay wo cooge wa wo nen sa’ge.—Jer. 17:10.
12-13. Diŋ nen re maa hõn wo ga naa mbe de kããge maa mbuɗ sõõre jobo là? (Ko foton lay.)
12 Siŋ wora 15:3 fer ɓo’ sug naa ga jee maa ɓil mburyug maa ni Jeofan joŋ kan ɓe de ɓlagge ga, day mbud sõõre jar maa ti jeŋ ɓen wo ga lay. Naa mbud sõõre jobo na de ɗeŋ maylà?
13 Naa joŋ sen diŋ de wãã fẽn maaga bay wo maa wããge wa ti jobo. Naa ko ba saɓlaŋ po ɗa: (1) mãygeman naa po bay joŋ joŋre doo piyoniyẽ no wa so, (2) Blo po wo de wãy ɓe bay wo joŋ joŋre ti Betel wa so, noga (3) hẽnbe po bay diŋ jee kay jar maa peel tayge wa so, noga bay jee maa peel tayge wa so. Á bay de el maaga naa mo wãã ne jar ga hẽẽrebe sen joŋ wo fẽn maa ni naŋ ga, wersen ga, á bay wo ti joŋre maaga á hay wo joŋge ɓe wa so mono wa. Maapo ga fẽẽre po hres wo debaŋ ga naa bay de ko rage wa, day ga joŋ wo ga á mo hay wo ti joŋre sen wa so. Ni pa mono, jee maaga le de ɗege ɓil mburyug maa ni Jeofan “joŋ kan ɓe de ɓlagge gà, day mbuɗ sõõre jar ma ti jeŋ ɓen wo gà.”
Á go gus maaga naa mo dus wããre maaga bay woo ni naŋ wa ti jare, day wããre sen maapo kol wo go diŋ gete’e (Ko paragraf wo 12-13)
HOO SUG TI JAR MAAGA JOŊ WO HẼẼNE DO JEOFA MONO
14. Naa wer maaga jee maaga Jeofa ɗen le ɗee go see jar maaga wo go de mbuɗ foo mo ɗa.
14 Siŋ wora 15:4 wãã ga jee maaga diŋ bar Jeofa “srog je maga go de mbuɗ foo nen ɓe wo go see ɓe.” Naa ko jee maa de mbuɗ foon na koge là? Werga naa diŋ jar téebeere maa de mnaysee so mono, naa bay de kããge maa koge ga jobo mo caw nen mbuɗ foo yawla wa. Wer may ne? Werga naa ɗig ga jar maaga jag naa de laage de kããra wo de ele, day jar maaga jag naa bay laage de kããra wa wo de ɓlagge. Amaa, naa mo hay ɗee go diŋ see jar maaga Jeofa ko ra nen mbuɗ foo mo tawa tu. (1 Kor. 5:11) Yoo jar sen wo mono, jar maaga bay wo mbuɗ faale go ne ɓlagge ɓaaran wa, jar maaga bay wo hoo sug ti fẽẽre maaga naa hã ɓil ti ɓaara wa, lan jar maaga hẽg wo caa holaŋ naa go de Jeofa mono.—Jõõ. 13:20.
15. Ɗeŋ maa boŋ maaga naa hoo sug ti jar maaga “joŋ wo hẽẽne [do Jeofa]” diŋ maa honlà?
15 Ni pa mono, Siŋ wora 15:4 wãã ne naa ga naa mo hoo sug ti jar maaga “joŋ wo hẽẽne [do Jeofa] mono.” Wersen, naa hay hoo sug ti jar maaga goŋ wo Jeofa mono, lan joŋ yaŋ see ɓaara lay. (Rom. 12:10) De ɗeŋ maa hõnlà? Ɗeŋ po boŋ maaga naa joŋ sen ɓil Siŋ wora 15:4 diŋ ga, hayga jee maa ɓil mburyug maa ni Jeofan “hay haʼ we ti gùr no, á coo wããre maga se hay wãã go mo gà.” Hayga naa bay we hoo sug ti wããre maaga naa hay wããn go wa no, jar lan joŋ wo bone. (Mat. 5:37) Ba doo maaga Jeofa da ga jee twar wo de wãy mo hoo wo sug ti ha’ge maaga á hay ha’ wo ti wur maaga á da wo kããra mono. Ɓil Jeofa go feh de maaga pããrebe dur wo go de ẽgre ɓaara ɓuy maa hoo sug ti fẽẽre maaga á wãã wo ga saara joŋ yaŋ ne weere ɓaara wo mono. Werga naa da Jeofa wo de jar maa ti jeŋ naan wo so mono, naa dur go ɓuy maa hoo sug ti fẽn maaga naa hay wããn go mono.
16. Ɗeŋ maa tigriŋ ga naa hoo sug ti bar Jeofa wo diŋ mayse là?
16 Ɗeŋ maaga naa hoo sug ti jar maaga wo diŋ bar Baa diŋ ga naa mo hay de yaŋ see ɓaara, lan yãã waare ɓaara lay. (Rom. 12:13) De maaga naa yaŋ iggi see hẽẽre naa wo no, sen kay naa maa ya’ holaŋ naa see kããra, lan maa ya’ holaŋ naa see kẽẽ de Jeofa. Naa yaŋ yãã waare jar no, ni naa de joŋge doo Jeofa no lay.
NAA MO MEN DAGE SOLAY GO
17. Wer mayse ga à wãã ti suŋgu ɓil Siŋ wora 15 là?
17 Naa jaŋ ga jee maaga Jeofa ɗen le “taa solay ɓe ne jobo de bii wer gà, day á yãã mandekoɗ doo jobo ma yee jobo maga bay de joŋ mopo wa maga kiida mo baa ne gà lay.” (Siŋ. 15:5) Wer mayse ga Siŋ sen wãã ti suŋgu là? Werga naa yaŋ da solay no, se kol go nen naa dedaŋ bar naa wo, hay ba Jeofa dra’a. (1 Tim. 6:10) Ti wur maaga á yer Bible mono, jar maapo hay wo joŋ bon hẽẽre ɓaara maaga wo de coo coo de taa suŋgu ne hara ti de bii were. Ni pa mono, jar caa kiida maa po hay wo yãã suŋgu do jare, maa joŋ bon jar maaga hay bay wo de joŋ mopo de ɓlagge wa mono. Joŋre maa de maŋ sen wo mokay bay wo de cõõre jag Jeofa wa.—Ese. 22:12.
18. Wiigi jag maa hõn kay wo naa maa koge ga naa da suŋgu debaŋ yawla là? (Hebre wo 13:5)
18 Á de el maaga naa mo ɗig ti maaga naa ko solay na koge la mono. Wii jag see ɓo ga: ‘Ndi ɗig seɓaa ti suŋgu wo de fẽẽre maaga ndi yee ra de ɓe deɓaŋ yawlà? Hayga ndi taa suŋgu we do jobo no, ndi poɗn gus ga werga ndi ɗig ga jee ɓen joŋ bay de sãy ɓe ti wa ɗa yawlà? Maaga ndi yaŋ de suŋgu debaŋ ndi ko see ɓi dedaŋ jar lan wo yawlà? Á gaali see ɓi maaga ndi mo hay de yaŋ ɓil yawlà? Ndi ɗig ti hẽẽrebe maaga wo de solay ga á da wo solay debaŋ dedaŋ Jeofa werga á wo de suŋgu do yawlà? Ndi da joŋ barge de jar maaga wo de ẽgre, lan bay da re jar maaga wo de coo debaŋ wa yawlà?’ Á de el maaga naa mo wiɗ jag see naa ti wiigi jag sen wo mo deŋ no, werga á diŋ da’ge ti maaga Jeofa ɗe naa le mono. Amaa, naa joŋ ge diŋ jar maa ɓil mburyug maa ni Jeofan diŋ ga naa dur we maaga naa mo hay da solay wa no. Hayga naa joŋ we doo sen nono, Jeofa men naa go ti boŋ ga hase!—Jaŋ Hebre wo 13:5.
JEOFA DA BAR ƁEN WO
19. Wer mayse ga Jeofa wãã ne naa ga naa mo joŋ fẽẽre maaga se wãã ra ɓil Siŋ wora 15 ɓuy là?
19 Siŋ wora 15 ɓo’ jag ɓe go de wããge ga: “Je maga joŋ doo kay no mono, kãã ma ma’ ɓaale ge gà.” (Siŋ. 15:5) Jee ‘waa siŋ sen ngaɓ ne naa ga wer mayse ga Jeofa da ga naa mo joŋ fẽẽre maaga wo de ngaɓge ɓil Siŋ wora la mono. Sen diŋ werga Jeofa da ga naa mo hay de fruygi. Hayga naa joŋ fẽẽre maaga Baa wii ga naa mo joŋ ra we no, naw naan joŋ yaŋ de woore, lan se koɗ naa yaŋ lay.—Esa. 48:17.
20. Mayse de gor jar maaga Jeofa ɗe ra le wo ti naw maa peeln là?
20 Jar maaga Jeofa ɗe ra le wo de kããge maaga naw ɓaara maa peeln joŋ de woore debaŋ. Jar maaga Baa sreŋ ra de nenterse ɓen lag ge wo yaŋ wo ciŋ ti “ngeel [maa] lagge debaŋ” maaga Yeso ‘wũy ne hara mono. (Jaŋ 14:2) Jar maaga joŋ ge wo ɓaaran gesiŋ la wo de gor bagge jag wããre maa ɓil Naage nene 21:3 lay. Cwãy tu, naa ɓuy naa ko see naa de raa ɗuu ti maaga Jeofa ɗe naa le maaga naa mo hay diŋ jar maa ɓil mburyug ɓen mono!
SIŊ 39 Une bonne réputation auprès de Dieu
