1. Kaia e aoga ei te mafau‵fau ki pati i te Salamo 15:​1-5?

 I TE mataupu mai mua, ne tauloto tatou me i tavini tukugina atu a Ieova e mafai o fai pelā me ne mālō i tena faleie fakatusa māfai e ati aka ne latou se va fakataugasoa totino kae ‵pili mo ia. E mafai pefea o maua ne tatou te va fakataugasoa tenā? E uke a fakamatalaga e uiga ki te mataupu tenei i te Salamo 15. (Faitau te Salamo 15:​1-5.) E maua i te salamo tenei a akoakoga aoga kolā e mafai o fesoasoani mai ke gasolo o pili atu ‵tou va mo te Atua.

2. Se a te mea kāti ne fakamalosi atu ki te faisalamo ko Tavita ke faipati e uiga ki te faleie o Ieova?

² E kamata penei a pati i te Salamo 15: “Ieova, ko oi ka fai mo mālō i tou faleie? Ko oi e mafai o nofo i tou mauga tapu?” (Sala. 15:1) I te taimi ne faipati e uiga ki te “faleie” o Ieova, kāti ne mafaufau te faisalamo ko Tavita ki te faleie tapu, telā ne tu i Kipeona mō se vaitaimi. Ne faipati foki a Tavita e uiga ki te “mauga tapu” o te Atua, kāti ne fakasino atu a ia ki Siona i Ielusalema. I se fia maila ki saute o Kipeona, ne fakatu ne Tavita se faleie mō tuku te pusa o te feagaiga ke oko ki te taimi ko faite se koga ‵lei mo tuku.—2 Samu. 6:17.

3. Kaia e ‵tau ei o fia malamalama tatou i pati i te Salamo 15? (Onoono foki ki te ata.)

³ E tonu, te tokoukega o tino Isalaelu ne seki talia ke tavini i te faleie tapu, kae ne nai tino fua ne ulu ki loto i te faleie telā ne tausi i ei te pusa o te feagaiga. Kae e mafai o fai a tavini fakamaoni katoa a Ieova mo mālō i tena faleie fakatusa mai te fai taugasoa mo ia kae galue o fakatumau te va fakataugasoa tenā. E ma‵nako a tatou katoa ki te mea tenā. E fakaasi mai i te Salamo 15 a nisi uiga kolā e manakogina ke ati aka kae fakaasi  atu ko te mea ke tumau tatou i te fai pelā mo taugasoa o Ieova.

SASALE E AUNOA MO SE MEA ‵SE KAE TUMAU I TE FAI O TE MEA TONU

4. E iloa pefea ne tatou me i te papatisoga e se ko te mea fua e tasi e manako a Ieova ke fai ne tatou? (Isaia 48:1)

⁴ I te Salamo 15:​2, a te taugasoa o te Atua e taku me “ko te tino telā e sasale e aunoa mo se mea ‵se, e fai ne ia te mea tonu.” A te pati “sasale” mo te “fai” e fakaasi mai ei me i te mea tenei se mea telā e ‵tau o fai faeloa. Kae e mata, e mafai eiloa o ‘sa‵sale tatou e aunoa mo te faiga o se mea ‵se’? Ao. E tiga loa e seai se tino e ‵lei katoatoa, ka kilo mai a Ieova ki a tatou e pelā me ne tino e ‘sa‵sale e aunoa mo se mea ‵se’ māfai e fai ne tatou te ‵toe mea e mafai ke faka‵logo ki a ia. I te taimi ne fai ‵tou tukuatuga ki te Atua kae papatiso, ko kamata i konā o faima‵laga fakatasi tatou mo te Atua. Ke masaua me i aso o te Tusi Tapu, e se fakauiga i ei me kafai koe se tino Isalaelu ko mafai fua koe o fai pelā me se mālō i te faleie o Ieova. E isi ne tino ne ka‵laga atu ki a ia kae ne seki ka‵laga atu “i te munatonu mo te amiotonu.” (Faitau te Isaia 48:1.) Ne ‵tau mo tino Isalaelu fakamaoni o tauloto e uiga ki mea e manako a Ieova ke fai ne latou, ko fai ei. E penā foki i aso nei, kafai e ma‵nako tatou ke talia tatou ne te Atua, e uke a mea e manakogina ke fai ne tatou i lō te papatiso fua kae ‵kau fakatasi mo te fakapotopotoga Kelisiano. E ‵tau o tumau tatou ‘i te faiga o te mea tonu.’ E fai pefea ne tatou te mea tenā?

5. Ne a mea e aofia i te fakalogo ki a Ieova i mea katoa?

⁵ I te kilokiloga a Ieova, a te “sasale e aunoa mo se mea ‵se” mo te faiga o “te mea tonu” e se fakauiga fua ki te kau faeloa ki nisi polokalame i te koga tapuaki. (1 Samu. 15:22) E ‵tau o taumafai tatou ke faka‵logo ki te Atua i mea katoa e fai ne tatou, faitalia foki loa me nofo tokotasi koe. (Faata. 3:6; Fai. 12:​13, 14) E tāua ‵ki ke taumafai tatou o faka‵logo ki a  Ieova ke oko foki loa ki toe mea fo‵liki. A te fai penā e fakaasi atu ei me a‵lofa tonu tatou ki a ia, kae fai ei ke fia fakapili‵pili atu tatou ki a ia.—Ioa. 14:23; 1 Ioa. 5:3.

6. E ‵tusa mo te Epelu 6:​10-12, se a te mea e sili atu i te tāua i lō so se faifaiga fakamaoni ne fai ne tatou i aso mua?

⁶ E fiafia malosi a Ieova ki mea ko oti ne fai ne tatou mō ia i aso mua. Kae ko faifaiga o te fakamaoni i aso mua e se lava ke fai ei ke tumau tatou e pelā me ne mālō i te faleie o Ieova. E lavea faka‵lei atu te mea tenei i te Epelu 6:​10-12. (Faitau.) E se mafai o puli i a Ieova a ‵tou galuega ‵gali i aso mua. Kae e manako a ia ke tumau tatou i te tapuaki atu mo te loto kātoa “ke oko eiloa ki te fakaotiga.” Ka fai a ia mo ‵tou taugasoa ki te se-gata-mai māfai “e se ‵fiu tatou.”—Kala. 6:9.

FAIPATI KI TE MUNATONU I TOU LOTO

7. Ne a mea e aofia i te faipati ki te munatonu i ‵tou loto?

⁷ So se tino e manako ke talia a ia ke fai mo mālō i te faleie o Ieova e ‵tau o “faipati ki te munatonu i tena loto.” (Sala. 15:2) Ko tena uiga, e se ‵tau fua o kalo keatea se tino mai te loi. E manako a Ieova ke fakamaoni tatou i mea katoa. (Epe. 13:18) E tāua te mea tenā, “me i a Ieova e takalialia ki te tino amio fakaloiloi, kae e pili tena va fakataugasoa mo te tino fai mea tonu.”—Faata. 3:32.

8. Ne a faifaiga e ‵tau o ‵kalo kea‵tea tatou mai i ei?

⁸ A tino kolā e ‘fai‵pati ki te munatonu i olotou loto’ e se faka‵logo fakaloi‵loi i mua o tino kae ofa lēmū ne latou a tulafono a te Atua. (Isa. 29:13) E ‵kalo kea‵tea latou mai faifaiga fakaloiloi. A te tino uiga fakaloiloi e mafai o fakalotolotolua ki tulafono a Ieova me ko toe tulafono tafasili i te ‵lei. (Iako. 1:​5-8) E mafai o ‵teke a ia ki a Ieova i mea kolā e mafaufau a ia me e se tāua. Kae kafai e foliga mai me seai ne ikuga se ‵lei o tena sē fakalogo, ko fakamalosi aka ei tena loto ke na ‵teke malosi ki tulafono a te Atua kae ka fai fakaloiloi tena tapuakiga. (Fai. 8:11) E ma‵nako tatou ke fakamaoni i mea katoa.

9. Ne a mea e mafai o tauloto ne tatou mai te taimi muamua ne fetaui ei a Iesu mo Natanielu? (Onoono foki ki te ata.)

⁹ E mafai o tauloto tatou ki te tāua ke maua se loto fakamaoni mai te fetauiga a Iesu mo  Natanielu i te taimi muamua. I te taimi ne mai ei ne Filipo tena taugasoa ko Natanielu ke fetaui mo Iesu, ne tupu se mea fakaofoofogia. E tiga loa e seki fetaui aka loa a Iesu mo Natanielu, ne fai atu a Iesu: “Kiloke, tenei eiloa te tino Isalaelu telā e seai se uiga fakaloiloi i a ia.” (Ioa. 1:47) E mautinoa me ne kilo atu a Iesu ki ana nisi soko me fakamaoni, kae ne lavea ne Iesu me tu ‵kese a te fakamaoni o Natanielu. E pelā mo tatou, e se ‵lei katoatoa a Natanielu. Kae ko ia e se uiga fakaloiloi kae e fakamaoni i mea katoa. Ne gali ki a Iesu tena uiga tenā kae fakamālō atu ki a Natanielu. Se mea gali eiloa māfai e fai mai ne Iesu a pati konā ki a tatou!

10. Kaia e ‵tau o ‵kalo kea‵tea tatou mai te fakaaoga ‵se a te meaalofa ko te faipati? (Iakopo 1:26)

¹⁰ A te ukega o mea i te Salamo 15 kolā e manakogina ke fai ne tatou e isi se lotou sokoga ki ‵tou faifaiga ki nisi tino. Salamo 15:3 e fai mai me i te mālō i te faleie o Ieova “e se gutu fatufatu, e seai se mea masei e fai ne ia ki tena tuakoi, kae e se fakalogo‵mae ne ia ana taugasoa.” Kafai e fatufatu ne tatou a nisi tino ka fakalogo‵mae atu te mea tenā ki a latou kae ka se talia tatou ke fai mo mālō i loto i te faleie o Ieova.—Faitau te Iakopo 1:26.

11. Se a te gutu fatufatu, kae se a te mea e fai ki tino gutu fatu‵fatu sē sala‵mo?

¹¹ E taku faka‵lei mai ne te faisalamo a te gutu fatufatu. Se a te gutu fatufatu? Ko te fai atu o se fuaiupu sē tonu telā e mafai o fakamasei ei te ata o te suā tino. A tino gutu fatu‵fatu sē sala‵mo e tapale kea‵tea mo te fakapotopotoga Kelisiano.—Iele. 17:10.

12-13. Ne a nisi tulaga e mafai o sala‵mō tatou i ei ona ko te fakalogo‵mae atu ki ‵tou taugasoa e aunoa mo te iloa ne tatou? (Onoono foki ki te ata.)

¹² E fakamasaua mai foki te Salamo 15:3 me i mālō a Ieova e se fai ne latou a mea ma‵sei ki olotou tuakoi io me fakalogo‵mae olotou taugasoa. I te auala fea e fakalogo‵mae ei ne tatou a ‵tou taugasoa?

 ¹³ E mafai o fai ne tatou e aunoa mo te iloa a pati sē ‵lei ki se tino mai te fakasalalau atu o fakamatalaga sē ‵tonu e uiga ki a ia. E pelā mo tulaga konei: (1) se tuagane ko taofi aka tena taviniga tumau, (2) se tauavaga ko se tavini atu i te Peteli, io me (3) se taina ko se fai pelā me se toeaina io me se tavini fesoasoani. E mata, se mea ‵lei ke sukesuke ne koe a pogai ne fai ei a fakama‵fuliga konei kae fakaasi atu ou manatu ki nisi tino? Kāti e isi ne pogai ‵tau ne fai ei a fakama‵fuliga konā, kolā e se iloa ne tatou. E se gata i ei, a te mālō i te faleie o Ieova “e seai se mea masei e fai ne ia ki tena tuakoi, kae e se fakalogo‵mae ne ia ana taugasoa.”

FAKAALOALO KI A LATOU KOLĀ E MA‵TAKU KI A IEOVA

14. Fakamatala mai te auala e ‵teke atu a mālō a Ieova ki “so se tino fakatauemu.”

¹⁴ E fai mai te Salamo 15:4 me i te taugasoa o Ieova “e ‵teke ne ia so se tino fakatauemu.” E iloa pefea ne tatou te tino fakatauemu? E pelā me ne tino sē ‵lei katoatoa, e se i o tatou te tiute ke fakaiku aka me tefea te tino fakatauemu. Kaia? Me e mafai o fapito tatou ki se tino ona ko olotou uiga kae takalia‵lia ki nisi tino. Tela la, e ‵tau fua o ‵teke atu tatou ki tino kolā e kilo atu a Ieova ki ei me ne “tino fakatauemu.” (1 Koli. 5:11) E aofia i ei a latou kolā e fai ne latou a amioga ma‵sei e aunoa mo te sala‵mo, e se āva ki ‵tou talitonuga, io me taumafai o fakavāivāi te ‵tou malosi faka-te-agaga.—Faata. 13:20.

15. Se a te auala e tasi e fakaaloalo atu ei “ki a latou kolā e ma‵taku ki a Ieova”?

¹⁵ I te suā feitu, e fakamolemole mai te Salamo 15:4 ko tatou ke fakaaloalo “ki a latou kolā e ma‵taku ki a Ieova.” Tela la, e ‵sala tatou ki auala ke fakaasi atu te atafai mo te āva ki taugasoa o Ieova. (Loma 12:10) E pefea la? A te auala e tasi, e ‵tusa mo te Salamo 15:​4, me i te mālō a Ieova i tena faleie “e fakataunu eiloa ne ia ana tautoga, faitalia me e se ‵lei ki a ia a mea konā.” Kafai e se tausi tatou ki ‵tou tautoga ka logo‵mae eiloa a nisi tino i ei. (Mata. 5:37) E pelā me se fakaakoakoga, e manako a Ieova ko ana mālō ke ola e ‵tusa mo olotou tautoga ne fai i te taimi ne fakaipoipo ei. E fiafia foki a ia māfai e fai ne mātua te ‵toe mea e mafai ke fakataunu olotou tautoga ne fai ki olotou tama‵liki. A te ‵tou a‵lofa ki te Atua mo tuakoi ka fakamalosi mai ki a tatou ke tausi ki ‵tou tautoga.

16. Se a te suā auala ke fakaaloalo atu ei ki taugasoa o Ieova?

¹⁶ A te suā auala ke fakaaloalo atu ki taugasoa o te Atua ko te fakaasiatuga o te uiga talimalo mo te kaimalie. (Loma 12:13) A taimi e fakamaumau ne koe mo ou taina mo tuagane e fesoasoani mai ke fakamalosi aka ‵tou va fakataugasoa mo latou kae penā foki mo Ieova. E se gata i ei, ko fakaakoako eiloa tatou ki a Ieova māfai e fakaasi atu ne tatou a te uiga talimalo.

‵KALO KEA‵TEA MAI TE FIAFAI TUPE

17. Kaia ne sae aka ei te mataupu e uiga ki tupe i te Salamo 15?

¹⁷ Ne fai‵tau tatou me i te mālō a Ieova “e se fakakaitalafu ne ia ana tupe ke maua te pasene, kae e se talia ne ia a ‵togi fakakolekole ke ‵teke atu ki te tino e seai sena ‵se.” (Sala. 15:5) Kaia ne fakasae aka ei i loto i te salamo toetoe tenei a mea tau tupe? Me kafai e se paleni te kilokiloga a se tino e uiga ki tupe ka mafai o fakalogo‵mae atu ki nisi tino kae fakamasei ‵tou fesokotakiga mo te Atua. (1 Timo. 6:10) I taimi o te Tusi Tapu, ne seki fai faka‵lei ne nisi tino olotou taina ma‵tiva mai te faka‵lasi aka a pasene o olotou tupe ne kaitalafu.  Ke oko ki nisi famasino ne talia ne latou a tupe fakakolekole kae fakasala a tino kolā e seai ne olotou mea ‵se ne fai. A faifaiga penā e takalialia ki ei a Ieova.—Eseki. 22:12.

18. Ne a fesili e mafai o fesoasoani mai ke iloilo aka ‵tou kilokiloga totino e uiga ki tupe? (Epelu 13:5)

¹⁸ Se mea ‵lei ke iloilo ne tatou te ‵tou kilokiloga totino e uiga ki tupe. Ke fesili ifo, penei: ‘E mata, e mafaufau faeloa au ki tupe mo mea e mafai o ‵togi ki ei? Kafai e kaitalafu ne au ne tupe, e mata, e fui ‵tina ne au ona ko te mafaufau me e se manakogina fakavave ne te tino i a ia a tupe a tupe konā? E mata, e fai ne tupe ke tāua atu au i nisi tino kae ke se uiga kaimalie? E mata, e kilo atu au ki oku taina mo tuagane e pelā me e fia‵fai kope ona fua ko te mea e uke olotou tupe? E mata, e fai taugasoa fua au ki tino mau‵mea kae e se ko tino ma‵tiva?’ Ko oti ne maua ne tatou te avanoaga tafasili i te gali ke fai pelā me ne mālō a Ieova. E mafai o puipui ne tatou te tauliaga tenā mai te tumau i te kalo kea‵tea mai te fiafai tupe. Kafai e fai tatou penā, ka se tuku tiaki eiloa ne Ieova tatou!—Faitau te Epelu 13:5.

E ALOFA A IEOVA KI ANA TAUGASOA

19. Kaia e manako ei a Ieova ke fai ne tatou a mea katoa kolā e fakaasi mai i te Salamo 15?

¹⁹ Salamo 15 e fakaoti ki te tautoga tenei: “So se tino e fai ne ia a mea konei ka se mafai o malaia.” (Sala. 15:5) E fakaasi mai ne te faisalamo a te mea tāua telā e manako te Atua ki ei. E manako a Ieova ke fia‵fia tatou. Tela la, e tuku mai ne ia a fakatonuga kolā ka maua ne tatou mai i ei a fakamanuiaga mo te puipuiga.—Isa. 48:17.

20. Ne a mea e olioli ki ei a mālō a Ieova?

²⁰ E mafai o olioli a mālō a Ieova kolā e talia ne ia ki se olaga gali i aso mai mua. A te kau fakaekegina fakamaoni ka talia ke ulu atu ki “koga ‵nofo” e uke kolā ne fakatoka ne Iesu mō latou i te lagi. (Ioa. 14:2) A latou kolā e fakamoe‵moe ke ola i te lalolagi e olioli ki te fakataunuga o tautoga i te Fakaasiga 21:3. E tonu, e maua eiloa ne tatou se lagonaga me taulia tatou ke maua se ‵kamiga mai i a Ieova ke fai mo ana taugasoa, ke fai mo ana mālō tumau i tena faleie!