1. Pisarema 15:1-5 ingatibetsera kudini?

 MU FUNDO yadarika, takafunda kuti uya unodzipira kuna Djehovha ungakwanisa kugara shamwari yake kana kuti kupinda mu tenda rake. Asi isusu tingarumbwa kudini tiri arendo mu tenda ra Djehovha? Pisarema 15 inoreketa ngezve nyaya iyona. (Erengai Pisarema 15:1-5.) Pisarema iyona, inopanganidza kuti zvinyi zvatinodikana kuita kuti tirumbwe tino ushamwari we padhuze na Djehovha.

2. Pamweni Dhavhidhi wairangarira ngezvei paainga ecireketa ngezve tenda ra Djehovha?

² Pisarema 15 inotanga yeciti: “Djehovha, ndiani angagara murendo mu tenda renyu? Ndiani angagara mu dunhu renyu cena?” (Pis. 15:1) Paakabhuya ngezve “tenda” ra Djehovha, Dhavhidhi pamweni wainga ecirangarira ngezve tabhernakuro yaigara ku Djibhiyoni pa nguwa iyona. Dhavhidhi wakabhuyawo ngezve “dunhu cena” ra Mwari, pamweni iyena wainga ecireketa ngezve dunhu re Ziyoni raigara ku Djerusarema. Dunhu irona raigara ke makirometro akawanda katemaidumba ke Djibhiyoni, Dhavhidhi wainga awaka tenda kuti akande areka ye citenderano dakara kazowakwa mbuto yekuti arekeyo igaremo.—2 Sam. 6:17.

3. Ngei zvinokosha kuzwisisa zvinobhuiwa no Pisarema 15? (Onaiwo mufanikiso.)

³ Zviri pamhene kuti akawanda e Aisraeri, ainga asikadikani kuseenza mu tabhernakuro kana kutopinda mu tenda mainga muno areka ye citenderano. Aseenzi ese akatendeka a Djehovha, aikwanisa kugara arendo mu tenda rake rekuezanisira. Awona anoita izvona ngekugara uye nge kurumbwa ecigara shamwari dza Djehovha. Uye izvi i zviro zvekuti isusu tese tinozvida. Pisarema 15 inobhuya ngezve mawara manganani atinodikana kusakurira uye zvatinodikana kuita kuti tirumbwe tiri shamwari dza Djehovha.

 GONDEKAI KUNA MWARI UYE ITAI ZVAKANAKA

4. Tinoziya kudini kuti kuna Djehovha tinodikana kuita zvakawanda pane kubhabhatidzwa basi? (Isaya 48:1)

⁴ Pisarema 15:2, inobhuya kuti shamwari ya Djehovha ndi ‘iya inohamba nge mushobo wakagondeka uye inoita zvakanaka.’ Masoko e kuti “kuhamba” uye “kuita” anopangidza kuti tinodikana kurumbwa teciita izvona. Asi tingakwanisadi kamare kuhamba nge mushobo ‘wakagondeka kuna Mwari’ here? Honde. Kunyazi pasina munhu wakakwana, Djehovha acationa hinga anhu ‘anohamba nge mushobo wakagondeka’ kana tikaita zvese zvatinokwanisa kuti timuzwire. Patinodzipira kuna Mwari uye tobhabhatidzwa, tinonga tecitangisa kuhamba na Mwari. Asi onai kuti mu nguwa ye kare, kuita dii re dzinza re Aisraeri zvainga zvisikaiti kuti munhu atogare murendo wa Djehovha. Amweni aibhuya kuti ari kuseenzera Mwari asi ainga asikazviiti “no mwoyo wese uye no unatsi.” (Erengai Isaya 48:1.) Aya aida kugara arendo a Djehovha aidikana kufundira zvaikumbirhwa na Djehovha uye kuzviteerera. Nge mushobo umwewo, kuti titenderhwe na Djehovha nyamasi uno tinodikana kuita zvakawanda kupinda kubhabhatidzwa uye kubhuya kuti tiri Mupupuri wa Djehovha. Tinodikana kurumbwa ‘teciita zvakanaka.’ Izvona zvinoda kureyei?

5. Zvinoreyei kuzwira Djehovha pa zviro zvese?

⁵ Mu madziso a Djehovha, ‘kuhamba nge mushobo wakagondeka’ uye ‘kuita zvakanaka,’ zvinoreya zvakawanda kudarika kupinda basi misangano mu Nyumba ye Umambo. (1 Sam. 15:22) Tinodikana kupeta masimba akakura kuti tizwire Djehovha mu mishobo yese ye upenyu wedu, kutobatanidzawo patinonga tiri tega. (Zvie. 3:6; Mup. 12:13, 14) Zvinokosha kurumbwa tecipeta masimba kuti tizwire Djehovha kunyazi pa zviro zviya zvinoita hingana zvisikakoshi. Kana isusu tikaita izona, tinopangidza kuti zvezvirokwazvo tinoda Djehovha  uye iyena acatunhudzira kutida.—Juau 14:23; 1 Juau 5:3.

6. Maererano na Ahebheru 6:10-12, cinyi cinonyanya kukosha kupinda zviro zvakanaka zvatakaita kare?

⁶ Djehovha anokoshesa maningi zviya zvatakamuitira kare. Kunyazi zvakadaro, zviro zvatakaita kare basi, azvitigondesi kuti isusu ticarumbwa tiri arendo mu tenda ra Djehovha. Izvona zvinogara pamhene mu bhuku ra Ahebheru 6:10-12. (Erengai.) Izvirokwazvo kuti Djehovha aakanganwi zviro zvakanaka zvatakaita kare. Asi iyena anoda kuti tirumbwe tecimunamata no mwiya wese “dakara kumugumo.” Uye isusu ticakwanisa kugara shamwari dzake nokusikaperi kana “tikatama kuremba.”—Aga. 6:9.

REKETAI COKWADI MU MWOYO MENYU

7. Zvinoreyei kureketa cokwadi mu mwoyo?

⁷ Munhu unoda kugara murendo wakatenderhwa mu tenda ra Djehovha, unodikana “kureketa cokwadi mu mwoyo make.” (Pis. 15:2) Izvi zvinoreya zvakawanda kudarika kutama kunyepa basi. Pane kutendeseka basi patinoreketa, tinodikanawo kutendeseka pa zviro zvese zvatinoita. (Aheb. 13:18) Uye izvona zvinokosha ngekuti “Djehovha anozonda munhu unonyepa, asi ano ushamwari we padhuze no akagondeka.”—Zvie. 3:32.

8. Zvinyi zvatisikadikani kuita?

⁸ Uya ‘anoreketa cokwadi mu mwoyo’ aanyepedzeri kuzwira Djehovha pakadzara anhu uye nge dii rimweni ecitama kuzwira Mwari paanonga ari ega. (Isa. 29:13) Pane kudaro, munhu iyena unoita zviri zvese kuti asagare munyepi. Munhu unonyepa ungatanga kurangarira kuti anguwadzesepi yekuti yakanaka kuzwira mutemo ya Djehovha. (Tig. 1:5-8) Iyena ungatanga kusama kuzwira Djehovha pa nyaya dzinoita hingana adzikoshi. Uye paanoona kuti apana ciro caitika nge kutama kuzwira, iyena unotanga kuita zviro zvakakurisisa kupinda zviya. Kunyazi iyena ecirangarira kuti uri kuseenzera Mwari, Djehovha aatenderi kunamata kake. (Mup. 8:11) Asi isusu tinoda kugara takatendeseka pa zviro zvese.

9. Cinyi cakaitika Djesu paakaziya Natanieri uye tingafundei? (Onaiwo mufanikiso.)

⁹ Isusu tingafundira zvakawanda ngezve kukosha ke kugara anhu e cokwadi nge kuona  zvakaitika Djesu paakaziya Natanieri kekutanga. Firipi paakapangidza shamwari yake kuna Djesu, pakaitika zviro zvinokosha. Kunyazi Djesu ainga asikazii Natanieri, iyena akati: “Uwo ndiye Muisraeri we zvirokwazvo, asina ucengedzi.” (Juau 1:47) I cokwadi kuti Djesu, aiona afundi ake amweni hinga anhu akatendeseka, asi Djesu akaona kuti Natanieri wainga ari munhu wakatendeseka nge mushobo unoshamisa. Kuitawo hingana isusu, Natanieri wainga ari munhu asikazi kukwana. Asi wainga asiripi munhu mucengedzi, iyena wainga akatendeseka pa zviro zvese. Djesu, akashamisika nazvo uye akamusimba. Amuoni kuti zvaizonga zvakanaka maningi kana Djesu akabhuya zviro zvakadai hinga izvi nge zvenyu?

10. Ngei tecidikana kungwarira pa zviro zvatinoreketa? (Tiyago 1:26)

¹⁰ Zviro zvakawanda zviri pana Pisarema 15, zvinocokuita no mushobo watinobata anhu amweni. Pisarema 15:3 inobuya kuti murendo mu tenda ra Djehovha “aaseenzesi rurumi rake kuti areye amweni, aaitiri zvakashata mudoni wake uye aabararasi masoko akashata kana kupsverusa shamwari dzake.” Kana isusu tikareya, kana kunyepa ngezve munhu zvingakwanisa kurhwadzisa anhu amweni uye nge ndaa yazvo Djehovha aazotitenderi hinga arendo ake.—Erengai Tiyago 1:26.

11. Kureya i cinyi uye cinyi cinoitika no munhu unoreya amweni kana akatama kucinyuka?

¹¹ Dhavhidhi wakanyasa kupanganidza ngezve kureya amweni. Kureya amweni i cinyi? I kubararisa masoko ekunyepa ngezve munhu uye zvingakwanisa kukuwadza unhu we munhuwo. Munhu unoreya kana kuti unonyepa ngezve amweni, asikacinyuki aadikani kugara Mupupuri wa Djehovha.—Djer. 17:10.

12-13. Migariro ipi yekuti pamweni tingabararisa masoko akashata ngezve shamwari dzedu? (Onaiwo foto.)

¹² Pisarema 15:3 inotiedzurira kuti arendo a Djehovha, aaiti zvakashata ku amweni uye aabararise masoko kana kuti kupsverusa shamwari dzawo. Izvona zvinoda kureyei?

 ¹³ Pamweni tisikadi, tingatanga kupsverusa munhu nge kubararisa masoko akashata ngezve amweni. Rangarirai ngezve miezaniso dzinoteera: (1) hanzvadzi yasiya kugara mupiyonera, (2) kazado yasiya kuseenza ku Bheteri, kana kuti (3) hama aiciripi kuseenza hinga mukuru kana kuti hinga mubati unoseenzera. Zvaizonga zvakashata kana tikagara tecireketa kuti hama idzi pamweni dzaita zviro zvakashata, ndiyo ndaa izvona zvaitika kaari. Pamweni patorino zvikonzero zvakawanda zvekuti pamweni isusu atitozvizii. Hino murendo mu tenda ra Djehovha “aaitiri zvakashata mudoni wake, uye aabararisi masoko akashata ngezve shamwari dzake.”

REREMEDZAI AYA ANOTHYA DJEHOVHA

14. Panganidzai kuti arendo a Djehovha “angaramba kudini anhu anoita zvakashata.”

¹⁴ Pisarema 15:4 inobhuya kuti shamwari ya Djehovha “inozonda aya anoita zviro zvakashata.” Tingaziya kudini kuti munhu uu unoita zvakashata? Sezvo tiri anhu asikazi kukwana, atikwanisi kuona kuti munhu uu anozwisisa here kana kuti haiwa. Ngei? Nge ndaa ye kutama kukwana kedu, tingakwanisa kutanga kupfarira aya anotidakadza uye totama kupfarira aya ekuti pamweni anotinyangadza. Zvezvirokwazvo, isusu tinodikana kuzonda aya anozwi na Djehovha anoita zviro “zvakashata.” (1 Ako. 5:11) Izvi zvinobatanidza aya anoita zviro zvakashata uye asikacinyuki, aya asikareremedzi zviya zvatinotenda uye aya anoedza kutirembesa pa ushamwari wedu na Djehovha.—Zvie. 13:20.

15. Tingareremedza kudini “anhu anothya Djehovha”?

¹⁵ Ngo dii rimweni, Pisarema 15:4 inobhuya kuti tinodikana kureremedza aya “anothya Djehovha.” Kuti tiite izvona, tinopsvaka mushobo we kupangidza unaki uye rureremedzo ku shamwari dza Djehovha. (Aro. 12:10) Tingazviita kudini? Umwe we mushobo uri pana Pisarema 15:4, inoti murendo mu tenda ra Djehovha “aadikani kupika osama kuzviita, kunyazi izvona zvecizoita kuti iyena abatane no matambudziko.” Patinosiya kudzadzisa mhiko yedu, tingakwanisa kurhwadzisa anhu amweni. (Mat. 5:37) Ngo muezaniso, Djehovha anoetsera kuti mwamuna kana mukadzi adzadzise mhiko yawo yaakaita ku umwe na umwe wawo paakacata. Djehovha anopfarawo kana abereki akapeta masimba kuti adzadzise mhiko yaanoitira ana awo. Nge ndaa ye rudo ratinozwa kuna Djehovha uye ku amweni, ticaita zviri zvese zvatinokwanisa kuti tidzadzise mhiko dzedu.

16. Mushobo upizve umweni watingareremedza shamwari dza Djehovha?

¹⁶ Umwe we mushobo we kureremedza shamwari dza Mwari nge we kutambira arendo zvakanaka uye kugara no rupo. (Aro. 12:13) Kupedza nguwa no hama no hanzvadzi dzedu mumasure me misangano uye mu basa re kuparidzira, zvicatibetsera kuti tibambise ushamwari wedu nawo uye na Djehovha. Kusiya izvona, paya patinotambira arendo zvakanaka tinonga teciteedzera Djehovha.

MUSADISISE MANINGI MARE

17. Ngei Pisarema 15 inoreketawo ngezve mare?

¹⁷ Pana Pisarema 15:5 tinoerenga kuti murendo wa Djehovha “aafiyarisi mare no juru uye aatendi kudyekerhwa kuti aphanice munhu asina ndaa.” (Pis. 15:5) Ngei Dhavhidhi wakasangura kureketa ngezve mare pa Pisarema ii doko? Ngekuti kana isusu tikakoshesa maningi mare, iyona ingapedzesera yagara ciro cinokosha maningi katiri kupinda anhu amweni kutobatanidzawo na Djehovha. (1 Ti. 6:10) Kareko, anhu amweni aikhorovhera hama dzawo dzainga dziri arombo ngo kuafiyarisi mare no juru yakawanda maningi yekuti awona ainga asikakwanisi  kuiripa. Kusiya izvona, atongi amweni aitenda kudyekerhwa kuti atonge anhu asina ndaa nge mushobo usina unatsi. Asi Djehovha anozonda anhu anoita zviro zvakadaro.—Ezek. 22:12.

18. Mibvunzo dzipi dzatingadziita kuti tione maonero edu panocokuita no mare? (Ahebheru 13:5)

¹⁸ Zvakanaka maningi kuti tiongorore maonero edu panocokuita no mare. Dzvibvunzisei kuti: ‘Kodi ndinogara ndecirangarira ngezve mare uye zvandaizotenga kudai ndino mare yakawanda? Kana munhu akandifiyarisi mare, ndinonoka kumuhwirinzira ndecirangarira kuti munhuwo aasati aakuida mareyo here? Kodi ndinozwa hingana kuti ndinokosha maningi kupinda amweni ngekuti ndine mare yakawanda here? Ndino cinetso cekupangidzira amweni rupo here? Kodi inini ndinoona munhu umweni hingana anodisa zviro zve kunyama ngokuti uno mare here? Inini ndinoshamwaridzana maningi no anhu akapfuma uye ndokoshesa padoko anhu arombo here?’ Tese isusu tino makomborero akakura e kupikwa kuti tigare arendo a Djehovha. Asi kana tecida kurumbwa tiri arendo a Djehovha, tinodikana kungwarira kuti tisade maningi mare. Kana tikada maningi Djehovha kupinda mare, iyena aazombotisii!—Erengai Ahebheru 13:5.

DJEHOVHA ANODA SHAMWARI DZAKE

19. Ngacipi cinangwa cikuru cinoita kuti Djehovha atikumbire zviro zvakawanda zvokuita?

¹⁹ Pisarema 15 inopedzesera yecipasa gondeso ii: “Munhu wese unoita kudaro aazombozununguswi.” (Pis. 15:5) Apa, Dhavhidhi unobhuya cinangwa cikuru cinoita kuti Djehovha atikumbire zviro zvakawanda. Djehovha anoda kuti isusu tipfare. Ndiyo ndaa, paya patinoita zviya zvatinokumbirhwa na Mwari, isusu tinogara no upenyu wakanaka uye iyena anotidziirira.—Isa. 48:17.

20. Arendo a Djehovha anoetserei mune ramangwana?

²⁰ Arendo a Djehovha ano kariro yakanaka mune ramangwana. Akristu akadzodzwa akatendeka, acapikwa kuti agare mu “mbuto dzakawanda” dze kugara dzaakagadzirirhwa na Djesu kudenga. (Juau 14:2) Aya ano kariro ye kurarama pasi pano ari kuetsera kudzadzika ke cipikirhwa ciri pana Zvakapangidzwa 21:3. I makomborero akakura kupikwa na Djehovha kuti tigare shamwari dzake uye kuti tigare arendo mu tenda rake nokusikaperi!