ӨӨРЕНИР СТАТЬЯ 24
ЫРЫ 24 Иегованың даанче келиңер
Иегова-биле найыралыңар мөңгеде болзун!
«[Иегова]! Кым Сээң өргээ-майгыныңга чурттап шыдаарыл?» (ЫД. ЫР. 14:1).
КОЛ БОДАЛ
Иегованың өңнүү болуп артарынга чүү херек база ооң өңнүктеринге кандыг хамаарылга көргүзер ужурлуг бис?
1. Ырлар 14:1—5-ти сайгарары чүге ажыктыг?
ИЕГОВА өргээ-майгынынче аңаа чуртталгазын бараалгадып, ооң-биле найыралын үнелээр кижилерни чалап турарын эрткен статьяга көрген бис. Бурган-биле чоок харылзааны канчаар сайзырадып, кадагалаарыл? Аңаа биске 14-кү Ыры дузалыг. (Номчуптуңар: Ырлар 14:1—5.) Ол ырының шүлүк бүрүзүн сайгарып, Иегова өңнүктеринден чүнү күзээрин билип алыылы.
2. Иегованың өргээ-майгынын чугаалап тура, Давид чүнүң дугайында бодаан чадавас?
2 14-кү Ыры мындыг сөстер-биле эгелээн: «[Иегова]! Кым Сээң өргээ-майгыныңга чурттап шыдаарыл? Кым Сээң ыдыктыг дааңга турумчуп чурттаарыл?» (Ыд. ыр. 14:1). Давид Иегованың «өргээ-майгынын» чугаалап тура, кезек када Гаваонга турган өргээ-майгынны бодаан боор. А «ыдыктыг дааң» дээни-биле Иерусалимде Сион дагны чугаалаан чадавас. Аңаа Гаваоннүң мурнуу чүгүнде каш километр ыракта черге, Давид өргээ-майгынны тургускаш, «Иегованың аптаразын» эккээрин айыткан (2 Хаан. 6:17, Чаа делегей). Ол аптара өргээ туттунарга чедир аңаа турган.
3. 14-кү Ыры биске Иегова-биле найыралывысты кадагалаарынга канчаар дузалаар? (Чурукту база көрүңер.)
3 Израильчилерниң хөй кезии ыдыктыг өргээ-майгынга кажан-даа бараалгаваан болгай. Ыдыктыг аптара турар черже чүгле санныг кижилер кирер-даа болза, шупту бердинген бараалгакчылар Иегованың доора уткалыг өргээ-майгынынга аалчылап болур турган. Бис база Бурган-биле өңнүктер болуксаар бис! Иегова-биле найыралды кадагалаар дээш, канчаар алдынарын 14-кү Ырыда бижээн.
Давидтиң үезинде израильчилерге Иегованың өргээ-майгынынга аалчы болурун сагыштаалаары белен турган (абзац 3).
ШЫНЧЫ БОЛГАШ ТӨЛЕПТИГ АЛДЫНЫҢАР
4. Сугга суктурары дээрге Иегова-биле найыралга чүгле чаңгыс негелде эвес деп кайыын билир бис? (Исайя 48:1).
4 Ырлар 14:2-де Иегованың өңнүүн «чүгле арыг шынчы оруктар-биле чоруур, чөптүг чүүлдер кылыр» дээн. Ынчалза-даа бачыттыг улус чөптүг-шынныг болуп шыдаар бе? Ийе. Бурганга бар шаавыс-биле дыңнангыр болзувусса, ол бисти чөптүг-шынныг деп санаар. Чуртталгазын бараалгадып, сугга суктурары — оруктуң чүгле эгези. Иеговага кезээде шынчы артар ужурлуг бис. Чижээ, Израиль Бурганның бараалгаткан чону-даа болза, олар шуптузу Иегованың аалчылары болбаан. Чүге? Чамдыктарының алдынары «чөптүг-шынныг чоруктан» ырак болган (Номчуптуңар: Исайя 48:1, 2.) Иегованың аалчылары болуп артыксаар израильчилер ооң негелделерин билип алгаш, сагыыр ужурлуг турган. Бөгүн база ындыг: анаа-ла сугга суктуруп алгаш, Иегованың Херечизи деп адаттырары чедишпес. Билиглеривисти чуртталгага ажыглаар ужурлуг бис. Чөптүг ажыл-херек кылыр дээрге чүү дээни ол?
5. Иеговага бүгү тала-биле дыңнангыр болурунуң утказы кандыг?
5 Төлептиг алдынып, «чөптүг чүүлдер кылыр» дээш, чүгле чыыштар кээри чедишпес (1 Хаан. 15:22). Кым-даа көрбейн турда безин, чүнү-даа кылып тургаш, Иеговага шынчы боор ужурлуг бис (У. ч. 3:6; Эккл. 12:13, 14). Хензиг чүүлге-даа Иеговага дыңнангыр болуру чугула. Ынчалдыр аңаа ынакшылывысты көргүзер бис, а ол биске оон-даа ынак апаар (Ин. 14:23; 1 Ин. 5:3).
6. Еврейлерге 6:10—12-ден алырга, Иегованың өргээ-майгынынга артар дизе, чүгле эрткен үениң херектери чүге чедишпес?
6 Иегова бистиң аңаа кылган бүгү чүүлүвүстү үнелээр. Ынчалза-даа чүгле эрткен үеде кылган эки ажыл-херектер дээш, ооң аалчызы болуп артары болдунмас деп Еврейлерге 6:10—12-ден көскү (номчуптуңар). Бүгү сеткиливистен «эчизинге чедир» бараалгаарын ол бистен күзээр. Сула салдынмас болзувусса, күжениишкиннеривис шаңнаттырар, Иегова-биле найыралывыс мөңгеде уламчылаар (Гал. 6:9).
ЧҮРЭЭҢЕРГЕ ШЫННЫ ЧУГААЛАҢАР
7. Чүрээнге шынны чугаалаары дээрге кандыг уткалыг?
7 Иегованың аалчызы болуксаар кижи, «сеткилиниң ханызындан шынны чугаалаар» ужурлуг (Ыд. ыр. 14:3). Ол дээрге мегелевезинден аңгыда, долузу-биле шынчы болур дээн уткалыг (Евр. 13:18). Ол чүүл чугула, чүге дизе «мегечи кижи Иеговага бужар болгай, а чөптүг-шынныг улуска Бурган — чоок өңнүк» (У. ч. 3:32, Чаа делегей).
8. Канчаар алдынары шын эвес?
8 Сеткил-чүрээнден шынчы кижи ийи чуртталгалыг болбас. Улус мурнунга-даа, чааскаан тургаш-даа Бурганның хоойлуларын шынчы сагыыр (Иса. 29:13). Оон башка ийи арынныг болу бээр. Кижи канчаар ийи арынныг апаар? Эгезинде чамдык библейжи негелделерниң шынныынга чигзиниг тыптып кээр (Иак. 1:5—8). Чамдык айтырыгларны чугула деп санавайн, кижи Иегованы дыңнавастап эгелээр. А дыңнангыр эвезиниң түңнелин көрбейн баргаш, Бурганның хоойлуларын оон-даа дидим үрээр (Эккл. 8:11). Ынчалдыр ооң бараалгалы ажык чок апаар. А бис бүгү тала-биле шынчы болуксап турар бис.
9. Иисус Нафанаилге чүге таарзынган база ында биске кандыг кичээл бар? (Чурукту база көрүңер.)
9 Чүрээнге шынны чугаалаары дыка чугула. Филипп эжи Нафанаилди эдертип эккелген таварылгадан ол чүүл көскү. Иисус Нафанаилди танывыс-даа болза, ону: «Ынай-даа оп-меге чок, ёзулуг израильчи» — дээн (Ин. 1:47). Иисус шупту өөреникчилерин шынчы деп санап турган. Ынчалза-даа Нафанаилдиң ол шынары ылаңгыя көскү болган. Бис ышкаш тергиин эвес-даа болза, аңаа бичии-даа авыяас, меге чаң турбаан. Иисус ону магадааш, ол дээш мактаан. Бис база Иисустуң мурнунга шак ындыг болуксаар бис!
Филипп кажар бодал чок эжи Нафанаилди Иисуска эккелген. Биске хамаарыштыр ынчаар чугаалап болур бе? (абзац 9).
10. Аксы-сөзүвүстү шүгдүнүп чорууру чүге чугула? (Иаков 1:26).
10 Өске улус-биле канчаар алдынарывыска хамаарыштыр негелделерни 14-кү Ырыда бижээн. Ырлар 14:3-те Иегованың өргээ-майгынында аалчы «аксы-дылы-биле нүгүлдевес, өске кижиге бак чүве кылбас, чанында кижини бак атка киирбес» дээн. Аксы-сөзүвүс тыртып чорбас болзувусса, өскелерге хора чедирип болур бис. Оон башка Иегованың өргээ-майгынынга артар эргевисти чидирип алыр бис. (Номчуптуңар: Иаков 1:26.)
11. Нүгүл деп чүл база нүгүл тарадыр, буруузун миннивес улусту чүү манап турар?
11 Ыр күүседикчизи Иегованың аалчызы «аксы-дылы-биле нүгүлдевес» дээн. Нүгүл деп чүл? Ол дээрге кижини бак атка киириптер меге, хоралыг информация. Нүгүл тараткаш, буруузун миннивес кижини христиан чыыштан үндүрүптер (Иер. 17:10).
12, 13. Бодувус безин билбейн, эш-өөрүвүстү бак атка канчаар киирип болур бис? (Чурукту база көрүңер.)
12 Оон аңгыда, Ырлар 14:3-те Иегованың аалчызы «өске кижиге бак чүве кылбас, чанында кижини бак атка киирбес» дээн. Эш-өөрүвүстү канчаар бак атка киирип болур бис?
13 Боттарывыс безин билбейн, өске кижини бак атка киирип болур бис. Чижээ, угбавыс эгелекчи бараалгалын соксаткан, өг-бүле улус Вефилден чоруур дээн, акывыс хуралдың удуртукчузу азы дузалакчызы эвес апарган дижик. Оларның байдалын чугаалажып, чүге ынчалган деп даап бодаары шын эвес. Шупту чылдагааннарны билбес болгай бис. Иегованың аалчызы «өске кижиге бак чүве кылбас, чанында кижини бак атка киирбес» деп сактыр бис.
Өске улус дугайында багай чүве чугаалааш, белени-биле нүгүлчү апарып болур (абзац 12, 13).
ИЕГОВАДАН КОРГАР УЛУСКА ХҮНДҮТКЕЛДИГ БОЛУҢАР
14. Иегованың өңнүктери ооң «тооп көрбээн улузун» канчаар тодарадып ап болур? Тайылбырлаптыңар.
14 Ырлар 14:4-те Иегованың өңнүү «Бурганның тооп көрбээн улузу-биле» эдеришпес. Оларны канчаар тодарадырыл? Тергиин эвес болгаш, ол айтырыгга хамаарыштыр минниишкиннерге, күзелдерге чагыртпас ужурлуг бис. Ынчангаш чамдык улус-биле эдержир, а өскелеринден анчыгзынар бис. Ооң бараалгакчылары кым-биле харылзашпазын чүгле Иегова шиитпирлээр эргелиг, түңнел үнелелди ол бээр (1 Кор. 5:11). Бачыды дээш буруузун миннивес, бүзүреливисти хүндүлевес база Бурган-биле найыралывысты үрээр улус-биле харылзашпас бис (У. ч. 13:20).
15. Иеговадан «коргар улуска» хүндүткелди канчаар көргүзер бис?
15 Ооң соонда Ырлар 14:4-те Иеговадан «коргар улуска» хүндүткел көргүзер ужурлуувусту чугаалаан. Ынчангаш Иегованың өңнүктери-биле хүндүткелдиг, чылыг-чымчак алдынарын кызар бис (Рим. 12:10). Ону канчаар илередир? Ырлар 14:4-те Иегованың аалчызы «бодунга хора чедирги дег-даа даңгырак бергеш, аксы-сөзүн ээлээр» дээн. Берген сөзүвүс күүсетпес болзувусса, өскелерни балыглап болур бис (Мф. 5:37). Иегова өңнүктеринден өг-бүле туткан даңгыраанга шынчы болурун манаар. Ада-иези ажы-төлүнге берген аазаашкыннарын күүседирге, ол өөрүүр. Иеговага база чанывыста улуска ынак болзувусса, аазаашкыннарывыска шыңгыы хамаарылгалыг болур бис.
16. Иегованың өңнүктерин оон ыңай канчаар хүндүлээр бис?
16 Бурганның өңнүктерин бажыңывысче чалап, эки хамаарылга көргүзүп, хүндүткеливисти илередир бис (Рим. 12:13). Акы-угбалар-биле харылзаавыс чүгле чыыштар, бараалгал-биле кызыгаарлаттынмас ужурлуг. Хостуг үевисти кады эрттирер болзувусса, Иегова-биле болгаш бот-боттарывыс-биле найыралывыс быжыгар. Аалчыларга экииргек хамаарылгавыс-биле Иегованы өттүнер бис.
АКША-ТӨГЕРИККЕ ЫНАКШЫЛДАН ОВААРНЫҢАР
17. 14-кү Ырыда чүге акша-төгерик айтырыын көдүрген?
17 Иегованың аалчызы «акша-мөңгүнүн чээлиге бергеш, ажык-кончаа дилевес, буруу чок кижиге удурланыр дээш хээли албас» (Ыд. ыр. 14:5). Ындыг кыска ырыда чүге акша темазын сайгарган? Чүге дизе акша дугайында хөлүн эрттир боданыр болза, ол биске кижилерден, безин Бурган-биле найыралдан чугула апаар (1 Тим. 6:10). Библейжи үелерде чамдык улус ажык-кончаа сүрүп, ха-дуңмазынга хуу алыр дээш, акша чегдирер турган. Шииткекчилер саттынып, актыг улусту буруудадыр турган. Ындыг ажыл-херекке Иегова хөңнү чок (Иез. 22:12).
18. Акшага хамаарылганы хынанырынга кандыг айтырыглар биске дузалаар? (Еврейлерге 13:5).
18 Акшага хамаарылганы хынаныр болза эки. Бодуңардан айтырыңар: «Акша дугайында база ооң-биле чүнү садып ап болурун үргүлчү бодаар мен бе? Өремни үезинде бээр мен бе? Чегдирген болганда, ол кижи акша хереглевес дээш эгидерин шөйүп турар мен бе? Акша-төгерик мени турамык, чазый кылыпкан бе? Бир акый азы угбай хөй орулгалыг болза, ону акшаже дүлнү берген деп бодаар мен бе? Бөдүүн улусту эскербейн, чүгле шыдалдыг улус-биле эдержип турар мен бе?» Иегова ооң аалчызы болур дыка улуг алдар-хүндүнү биске көргүскен. Ол бисти кажан-даа кагбас деп аазаан. Бурган-биле найыралды хумагалап, акша-хөреңгиден оваарныр ужурлуг бис. (Номчуптуңар: Еврейлерге 13:5.)
ИЕГОВА ӨҢНҮКТЕРИНГЕ ЫНАК
19. Иегова бистен 14-кү Ырыда ышкаш алдынарын чүге манаар?
19 «Ынчаар чурттап чоруур кижи кезээ мөңгеде тендиш дивес» — деп аазаашкын-биле 14-кү Ыры доозулган (Ыд. ыр. 14:5). Бо ырыда сөстерге дыңнангыр болурувусту Иегова чүге күзээрин ыр күүседикчизи тайылбырлаан. Чүге дизе ынчан аас-кежиктиг болур бис. Бурганның удуртулгазын дыңнаар болзувусса, ооң йөрээлдерин болгаш камгалалын алыр бис (Иса. 48:17).
20. Иегованың аалчыларының келир үези кандыг?
20 Иегованың аалчыларының келир үези кайгамчык эки. Ооң чагдырган бараалгакчылары Иисустуң өрү дээрде белеткээн черинге чурттаар (Ин. 14:2). А чер кырынга чурттаар идегелдиг улус Ажыдыышкын 21:3-те аазаашкынның күүсеттинерин манап турар. Иегова кезээ мөңгеде ооң өргээ-майгынынга өңнүктери болуп, аалчылаар алдар-хүндүнү биске көргүскен!
ЫРЫ 37 Иеговага бүгү сеткилиңден бараалга
