1. ¿Bin-utʼil ya skoltayotik te Salmo 15:​1-5?

 TA YAN artículo la jnoptik te j-abatetik yuʼun te Jehová te yichʼojikix jaʼ, ya xjuʼ ya x-ayinik ta nailpakʼ yuʼun, sok ya yamigoinxan sbaik ta lek sok te Jehová. Pero, ¿bin-utʼil ya xjuʼ ya kamigointik ta lek? Ta Salmo 15 ya skoltayotik ta stabeyel sujtib te jojkʼoyele, melel yichʼoj nojpteseletik te ya xtuun kuʼuntik yuʼun ya xnoptsajotik ta stojol te Diose (kʼopona Salmo 15:​1-5).

2. ¿Binwan yak ta snopel-a te David te kʼalal la yalbey skʼoplal te nailpakʼ yuʼun Jehová?

² Te Salmo 15, jich ya yal: «Jehová, ¿machʼa ya xhuʼ ya xnahin ta chʼul Templo awuʼun? ¿Machʼa ya xhuʼ ya xnahin ta chʼul wits awuʼun?» (Sal. 15:1). Kʼalal te David la yalbey skʼoplal te nailpakʼ yuʼun Jehová, jaʼniwan yak ta yalbeyel skʼoplal te nailpakʼ templo, te ayin jun tiempo ta Gabaón. Jaʼnix jich te David la yalbey skʼoplal te «chʼul wits» yuʼun Dios, jaʼniwan skʼoplal te wits Sion, te ay ta Jerusalén. Ta lugar-abi, ta bayal kilómetro ta sur yuʼun Gabaón, te David la spas jun nailpakʼ te banti la yakʼ te skaxaul te chapbilkʼop jaʼto te kʼalal ya yichʼ pasel te banti ya xjile (2 Sam. 6:17).

3. ¿Bin yuʼun ya skʼan te ayuk skʼoplal ta koʼtantik te bin ya yal te Salmo 15? (Jaʼnix jich ilawil te dibujo).

³ Jteb ma spisiluk te israeletik maʼyuk bin-ora abatinik ta nailpakʼ templo ni jaʼuk ochik ta nailpakʼ te banti kʼejbil te skaxaul te chapbilkʼop. Pero spisil te j-abatetik yuʼun te Jehová te toj yoʼtanik, ya xjuʼ ya x-ayinik ta nailpakʼ yuʼun teme ma xyijkitayik ta yamigoinel te Jehová. Jaʼ te bin ya jkʼantik ta jpisiltik. Ta Salmo 15, ya yalbey skʼoplal taleliletik te ya skʼan te ayuk kuʼuntik yuʼun ya yamigoinotik te Jehová.

 JUNUK AY TE KOʼTANTIK SOK JPASTIK TE BIN STOJILE

4. ¿Bin-utʼil ya jnaʼtik te ma jaʼuknax ya skʼan ya kichʼtik jaʼ yuʼun lek ya yilotik te Jehová? (Isaías 48:1).

⁴ Ta Salmo 15:2 ya yalbey skʼoplal te yamigo te Dios te jaʼ «te machʼa jun ay te yoʼtan» sok «te ya spas te bin toj». Te kʼopil stʼunel sok spasel ya skʼan ya yal te ay bin ya skʼan ya yichʼ pasel ta spisil-ora sok te bejbe yak ta yichʼbeyel yip. Pero, ¿yabal xjuʼ te jkʼaxel jun ay te koʼtantike? Yak, ya xjuʼ. Melelnix-a te jpisiltik jmulawilotik, pero teme ya jpastik tulan ta schʼuunbeyel smantal te Jehová, jich ya yil te jun ay te koʼtantike. Te yakʼel jbatik ta stojol te Dios sok te ya kichʼtik jaʼ, jaʼnax te sjajchibal. Juluk ta koʼtantik te ta namey kʼinal, ma tikʼuknax-a te yuʼun jaʼ stsʼumbal Israel ya xjuʼ ya x-och ta nailpakʼ yuʼun Jehová, melel ay machʼatik ya skʼoponik te Dios, «pero ma ba smelelil soc ma stojiluc» te bin ya yalike (kʼopona Isaías 48:1). Te machʼatik ya yalbeyik wokol ta smelelil te Diose, ya snopik te mantaliletik yuʼun te Jehová sok ya spas ta skuxlejalik. Jaʼnix jich ta ora ini, yuʼun lek ya yilotik te Diose ma jaʼuknax ya skʼan te ya kichʼtik jaʼ, sok te ya skʼan ya x-ayinotik ta jun congregación. Ya skʼan te manchuk ya kijkitaytik spasel te bin stojil. ¿Bin smakojbey skʼoplal?

5. ¿Bin ya skʼan ya yal te ay machʼa jun yoʼtan ya yakʼ sba ta stojol te Jehová sok te ya spas te bin leke?

⁵ «Te machʼa jun ay te yoʼtan» sok «te ya spas te bin toj» ya yil te Diose, ma jaʼuknax te machʼa spisil-ora ya xbajt yichʼ ta mukʼ te Dios ta sNail Tsoblej (1 Sam. 15:22). Te j-abatotik yuʼun te Dios ya skʼan ya jpastik tulan yuʼun ya jchʼuunbeytik smantal te Dios ta spisil jkuxlejaltik, jaʼnix jich manchukme jtukel ayotik (Prov. 3:6; Ecl. 12:​13, 14). Mukʼ skʼoplal te yakuk jpastik tulan ta schʼuunbeyel smantal te Jehová, manchukme maʼyuk skʼoplal yilel te bin ya jpastike. Kʼalal jich ya jpastik, ya kakʼtik ta ilel  te kʼux ta koʼtantik sok lek ya yilotik (Juan 14:23; 1 Juan 5:3).

6. Jich bitʼil ya yal Hebreos 6:​10-12, ¿bin yuʼun ma tikʼuknax-a te jun koʼtan la kakʼ jbatik ta namey?

⁶ Te Jehová bayal skʼoplal ta yoʼtan te bin jpasojtik ta stojole. Pero ma tikʼuknax-a te jun koʼtantik la kakʼ jbatik ta namey yuʼun ya x-ayinotik ta nailpakʼ yuʼun Jehová, jich bitʼil ya yal Hebreos 6:​10-12 (kʼopona). Manchukme te Jehová ma xchʼay ta yoʼtan te bintik lek jpasojtik, jaʼ ya skʼan te ya x-abatinotik sok spisil jkuxlejaltik «kʼalalto ta slajibal». «Teme maba ya xlujbotike» ya smajtantesotik sok ya kamigointik ta sbajtelkʼinal (Gál. 6:9).

SMELELILUK TE BIN YA YAL TE KOʼTANTIKE

7. ¿Bin ya skʼan ya yal te melel te bin ya yal te yoʼtane?

⁷ Te Salmo 15:2 ya yal te machʼa ya yikʼ ochel ta nailpakʼ yuʼun Jehová jaʼ te machʼa «melel bin ya yal te yoʼtane». Te Jehová ma jaʼuknax ma skʼan te ya kaʼiytik lot, jaʼ ya skʼan te jun koʼtantik sok te toj spisil te bin ya jpastike (Heb. 13:18). Mukʼ skʼoplal ini, «como Jehová ya yihlay te machʼa chopol yoʼtan, pero jun yoʼtan sba soc te machʼatic toj yoʼtan» (Prov. 3:32).

8. ¿Bin talelil ya skʼan ya jpʼajtik?

⁸ Te machʼa «melel bin ya yal te yoʼtane» maba jaʼuknax ya yakʼ ta ilel ta komonsitil te ya schʼuun te mantaliletik yuʼun te Dios, pero te ya skʼaxuntay mantal te kʼalal stukel ay (Is. 29:13). Ma lek te jich ya yichʼ pasel, sok ya skʼan te ya jpʼajtik. ¿Bin-utʼil ya xyal jtul ants winik ta pejtsʼ-abi? Yaniwan xjajch snop ta yoʼtan te ay ma jichuk te mantaliletik yuʼun te Jehová (Sant. 1:​5-8). Yaniwan skʼaxuntay mantal te kʼalal ay bin ma mukʼuk skʼoplal ya skuy, pero te kʼalal la yil te ma la sta swokol yuʼune, yaniwan xjajch spas te bin jkʼaxel ma lekuke. Te kʼalal ay machʼa jich ya spase, ma stojilukix te bin-utʼil ya yichʼ ta mukʼ te Diose (Ecl. 8:11). Te joʼotik ya skʼan te junuk koʼtantik sok te stojiluk spisil te bin ya jpastike.

9. ¿Bin ya yakʼ jnoptik te bin kʼot ta pasel kʼalal te Jesús la snaʼbey sba te Natanael? (Jaʼnix jich ilawil te dibujo).

⁹ Mukʼ skʼoplal te junuk koʼtantik, jich ya  kiltik te kʼalal te Jesús la snaʼbey sba te Natanael. Kʼalal te Felipe la yikʼ bael te yamigo Natanael yuʼun ya snaʼbey sba te Jesús ay bin chajpnax kʼot ta pasel. Manchukme te Jesús maʼyuk bin-ora yiloj-a te Natanael, jich la yal: «Ilawil, ta melel jaʼ jtul lekil israel-winik te ma snaʼ loʼlaywaneje» (Juan 1:47). Melelnix-a te Jesús ya snaʼ te jun yoʼtanik te jnopojeletik yuʼune, pero kʼaxtoxan jich la yil-a ta stojol te Natanael, manchukme jmulawil te Natanael jich bitʼil te joʼotike, la yakʼ ta ilel jun oʼtanil sok ma loʼlaywan. Te Jesús lek la yil te bitʼil jun yoʼtan sok la yutsilkʼoptay. ¡Kʼax lek te jichuknix ya kichʼtik albeyel yuʼun te Jesuse!

10. ¿Bin yuʼun ya skʼan te ya jkom te kakʼtike? (Santiago 1:26).

¹⁰ Jteb ma spisil te bin ya yal te Salmo 15 snitojbey sba skʼoplal sok te bin-utʼil ya skʼan ya kiltik te yantike. Ta Salmo 15:3 ya yal te machʼa ya x-och ta nailpakʼ yuʼun Jehová, «ha te machʼa ma sle cʼop, te mayuc bin chopol ya spasbe te spat-xuhc, soc te ma ba ya sbohlobtesbe scʼoblal». Teme maba ya jnaʼtik skomel te kakʼtik ma jaʼuknax ya kakʼbeytik swokol te yantik, jaʼnix jich ma xjuʼ ya x-ochotik ta nailpakʼ yuʼun Jehová (kʼopona Santiago 1:26).

11. ¿Bin-a te leel ta kʼop sok bin ya xkʼot ta stojol te machʼa ya xleawan ta kʼop teme maba ya sujtes yoʼtane?

¹¹ Te salmista jaʼ la yalbey skʼoplal te leel ta kʼop. ¿Bin-a te leel ta kʼope? Jaʼ te ay bin ya yichʼ alel te maba smeleliluk ta stojol jtul ants winik yuʼun ma lekuk skʼoplal ya xkʼot. Te machʼatik ya xleawanik ta kʼop te maba ya sujtes yoʼtanik ya yichʼik lokʼesel ta congregación (Jer. 17:10).

12, 13. ¿Bintik-utʼil ya xjuʼ ya jbolobtesbeytik skʼoplal te kamigotaktike? (Jaʼnix jich ilawil te foto).

¹² Te Salmo 15:3 ya sjultes ta koʼtantik te machʼa ya x-ayin ta nailpakʼ yuʼun Jehová, jaʼ te machʼa «mayuc bin chopol ya spasbe te spat-xuhc, soc te ma ba ya sbohlobtesbe scʼoblal». ¿Bin-utʼil ya xjuʼ ya jbolobtesbeytik skʼoplal te kamigotaktik?

 ¹³ Maniwan jichuk ya skʼan koʼtantik, pero ayniwan bin ya xjuʼ ya kaltik te bin ma lek ta stojol te yantike. Jnop kaʼiytik ta swenta ini: 1) jtul hermana ya yijkitay te abatinel ta tiempo completo, 2) jtul hermano sok yinam ya xlokʼik ta Betel, 3) ya yichʼ alel ta jun anuncio te jtul hermano ma jaʼukix anciano o siervo ministerial. ¿Yabal xjuʼ ya jojkʼoytik te bin yuʼun jich kʼot ta pasel sok ya kalbeytik te yantik te bin ya jnoptik ta swenta-abi? Maniwan jnaʼtik ta lek te bin yuʼun jich kʼot ta pasel. Juluk ta koʼtantik te machʼa ya x-ayin ta nailpakʼ yuʼun Jehová jaʼ te machʼa «mayuc bin chopol ya spasbe te spat-xuhc, soc te ma ba ya sbohlobtesbe scʼoblal».

KICHʼTIK TA MUKʼ TE MACHʼATIK YA YICHʼIK TA MUKʼ TE JEHOVÁ

14. ¿Bin-utʼil ya xjuʼ ya jnaʼtik te machʼa ilaybil yuʼun te Jehová sok te ya skʼan ya jpʼajtik?

¹⁴ Te Salmo 15:4 ya yal te machʼa yamigoinoj te Jehová, «ya yihlay te machʼa chopol». Pero, ¿bin-utʼil ya jnaʼtik te ay machʼa ya kilaytike? Te bitʼil jmulawilotik, ma xjuʼ ya smukʼulin koʼtantik te bin ya kaltike. ¿Bin yuʼun? Melel ta swenta te bin yilel stalelik, ay machʼatik te lek o ma lek ya kil jbatik soke. Jich yuʼun, jaʼnax ya skʼan ya jpʼajtik te machʼatik ma schʼuunbeyik smantal te Jehová (1 Cor. 5:11). Jaʼik te machʼatik ya spasik te mulwej te ma sujtes yoʼtanik, te machʼatik ma xyichʼik ta mukʼ te schʼuunel koʼtantik sok te bin jchʼuunojtike, sok te machʼatik ya skʼan ya yutsʼin te bitʼil kamigoinoj jbatik sok te Jehová (Prov. 13:20).

15. ¿Bin-utʼil ya kichʼtik ta mukʼ «te machʼatic ya yichʼic ta mucʼ te» Jehovae?

¹⁵ Ta Salmo 15:4 ya yal te ya skʼan ya kichʼtik ta mukʼ «te machʼatic ya yichʼic ta mucʼ te Jehová». Jaʼ yuʼun, ya jletik bintik-utʼil ya kakʼtik ta ilel yutsil koʼtantik sok ya kichʼtik ta mukʼ te machʼatik ya yamigoinik te Diose (Rom. 12:10). ¿Bin-utʼil ya xjuʼ ta pasel? Ta Salmo 15:4 ya yal te machʼa ya x-ayin ta nailpakʼ yuʼun Jehová, jaʼ «te machʼa ya xcʼoht ta pasel yuʼun te bin yaloj ta jamal, aunque ya sta swocol yuʼun». Teme maba ya jkʼotestik ta pasel te bin jamal kalojtike, ya xjuʼ ya kakʼbeytik swokol te yantik (Mat. 5:37). Jich bitʼil te Jehová ya skʼan te yakuk skʼotesik ta pasel te bin jamal yalojik te j-abatetik yuʼun te nujpunemike. Jaʼnix jich te meʼil tatiletik ya skʼan ya spasik tulan yuʼun ya skʼotesik ta pasel te bin jamal ya yalbey te yal snichʼnabike. Te bitʼil kʼux ta koʼtantik te Dios sok te jpatxujktike, ya jpastik tulan yuʼun ya jkʼotestik ta pasel te bin jamal kalojtike.

16. ¿Binxan-utʼil ya kichʼtik ta mukʼ te yamigotak te Jehová?

¹⁶ Yanxan te bin-utʼil ya kichʼtik ta mukʼ te yamigotak te Diose, jaʼ te ya kotsestik ta jnatik sok te ya kakʼbeytik yil slekil koʼtantik (Rom. 12:13). Kʼalal ya jkʼasestik tiempo sok te kermanotaktik ya skoltayotik yuʼun ya kamigointikxan te Jehová sok te hermanoetik. Teme ya x-otseswanotik ta jnatik, jichme ya jkʼayinbeytik stalel te Jehová.

MAME XBIKʼTAJ KOʼTANTIK YUʼUN TE TAKʼIN

17. ¿Bin yuʼun ya yalbey skʼoplal ta swenta takʼin te Salmo 15?

¹⁷ Ta Salmo 15 ya yal te machʼa ya x-ayin ta nailpakʼ yuʼun Jehová, jaʼ te machʼa «ya yacʼ ta majanel staqʼuin te ma scʼambe sjol, soc ma ba ya stsac smahtan-taqʼuin yuʼun scontrahinel te machʼa mayuc smul» (Sal. 15:5). ¿Bin yuʼun ya yalbey skʼoplal ta swenta takʼin te salmo ini? Melel ya xjuʼ ya xchʼay ta koʼtantik te bintik stojil sok  ya xbikʼtaj koʼtantik yuʼun te takʼine. Teme jich ya xkʼot ta jtojoltik, ya xjuʼ ya kakʼbeytik swokol te yantik sok ya xjuʼ ya xchʼay te bitʼil kamigoinoj jbatik sok te Diose (1 Tim. 6:10). Ta namey kʼinal ay machʼatik te yakʼbey swokol te yermanotak ta skʼanbeyel sjol te takʼin la yakʼik ta majanele. Jaʼnix jich ay juecetik te ya stsakik majtan takʼin yuʼun ya skontrainik te machʼa maʼyuk smule. Te Jehová ya yilay spisil ini (Ezeq. 22:12).

18. ¿Bintik jojkʼoyeletik ya skʼan ya jpasbey jbatik? (Hebreos 13:5).

¹⁸ Mukʼ skʼoplal te ya skʼan ya jnaʼtik bin yilel ya kiltik te takʼine. Jojkʼoybey jbatik ini: «¿Spisilbal-ora ay ta koʼtan snopel ta swenta takʼin sok te bin ya jman-ae? Teme ay machʼa ya yakʼbon ta majanel stakʼin, ¿yabal xjalajon ta sutbeyel sok ya jnop te ma xtuun yuʼune? ¿Mukʼbal jkʼoplal ya kaʼiy jba ta skaj te ay jtakʼine? ¿Wokolbal ya kaʼiy yakʼel ta ilel slekil koʼtan? ¿Yabal jnop te ay sbikʼtal yoʼtanik yuʼun biluketik te hermanoetik te ay stakʼinike? ¿Jaʼnaxbal ya jmulan yamigoinel te machʼatik ay stakʼinik sok ya jpʼaj te machʼatik maʼyuk yuʼunike?». Jaʼ jun mukʼul majtanil te ya x-ayinotik ta nailpakʼ yuʼun Jehová. ¡Mame kijkitaytik! Mame xbikʼtaj koʼtantik yuʼun te takʼin. Teme jich ya jpastike, te Jehová maʼyuk bin-ora ya spijtesotik (kʼopona Hebreos 13:5).

TE JEHOVÁ KʼUX TA YOʼTAN TE YAMIGOTAK

19. ¿Bin yuʼun ya yakʼbotik mantaliletik te Jehová ta Salmo 15?

¹⁹ Te Salmo 15, jich ya yal ta slajibal: «Te machʼa hich ya spas, mayuc bin ora ya xyahl» (Sal. 15:5). Jich bitʼil la kiltikix, te salmista la yakʼ jnaʼtik te bin ya skʼanbotik te Jehová yuʼun ya jtatik stseʼelil koʼtantik. Ya yakʼ jnaʼtik te bin-utʼil ya xjuʼ ya jtatik te bendición sok te kanantayel yuʼune (Is. 48:17).

20. ¿Bin majtanil ya staik ta pajel chaʼbej te machʼatik ayik ta nailpakʼ yuʼun Jehová?

²⁰ Te machʼatik ayik ta nailpakʼ yuʼun Jehová te jun yoʼtan ayik, ay bin tʼujbil ya smaliyik ta pajel chaʼbej. Te machʼatik tsabilik te ya xbajtik ta chʼulchan, ayik ta maliyel yuʼun te Jesús te banti schajpanoj awilaletik te banti ya xnainik (Juan 14:2). Te yantik jchʼuunjeletik ya xbajt smulanik te bendicionetik ta Balumilal te ya yalbey skʼoplal te Apocalipsis 21:3. ¡Kʼax tʼujbil ya kiltik te la yikʼotik ta yamigo te Jehová! ¡Ya xjuʼ ya x-ayinotik ta nailpakʼ yuʼun Jehová ta sbajtelkʼinal!