1. Кыӵе пайда ваёз 14-тӥ псаломез эскерон?

 КЫЛЕМ статьяысь ми тодӥмы, соос, кинъёс улонзэс Иеговалы сӥзизы, Инмарлэн куноосыз но матысь эшъёсыз луыны быгато шуыса. Нош мар милемлы кароно, азьланяз но Иеговалэн куноосыз луон понна? Та сярысь вераське 14-тӥ псаломын. (Лыдӟе Псалтирез 14:1—5.) Ойдолэ сое пыр-поч эскеромы но тодомы, мае Иегова возьма аслаз эшъёсызлэсь.

2. Мар сярысь малпаз, вылды, Давид, Иеговалэн улон интыез сярысь веракуз?

² Тани кыӵе кылъёсын кутске 14-тӥ псалом: «Кузё-Инмаре, Тынад улон интыяд кинлэн улэмез луоз? Тынад святой гурезяд кинлэн интыяськемез луоз?» (Пс. 14:1). Куке Давид вераз Инмарлэн «улон интыез» сярысь, со малпаз, вылды, скиния сярысь, кудӥз кӧня ке дыр ӵоже Гаваонын вал. Озьы ик куке Давид вераз «святой гурезь» сярысь, со малпаз, вылды, Иерусалимысь Сӥон гурезь сярысь. Отын, Гаваонлэсь лымшор пала ог 10 иськем кемын, Давид скинияез пуктӥз но отчы Кузё-Инмарлэсь ковчегзэ вайыны косӥз (2 Экс. 6:17). Ковчег отын улӥз храмез пуктытозь.

3. Малы милям пыр-поч эскереммы потэ 14-тӥ псаломез? (Озьы ик учке суредэз.)

³ Израиль калык пӧлысь тросэз скинияын ужаса-тыршыса ӧз улэ. Куд-огъёсыз гинэ пыраны быгатӥзы отчы,  кытын Инмарлэн ковчегез сылӥз. Но Иеговалэн котькуд оскымон ужась-тыршисез быгатэ вал солэн эшез, куноез луыны. Милям но сыӵе ик мылкыдмы вань! 14-тӥ псаломын вераське, мар милемлы кароно, азьланяз но Иеговаен эшъяськон понна.

СЬӦЛЫКАТЭК УЛЭ НО ШОНЕРЛЫКО УЖЪЁС ЛЭСЬТЭ

4. Кытысь ми тодӥськомы, Иеговаен эшъяськон понна, пылатӥськыны гинэ тырмыт ӧвӧл шуыса? (Исаия 48:1).

⁴ Псалтирьын 14:2 вераське, Иеговалэн эшез «сьӧлыкатэк улэ, шонерлыко уж лэсьтэ» шуыса. Нош быгато-а тырбыдэстэм адямиос сьӧлыкатэк улыны? Быгато. Иегова лыдъялоз, ми сьӧлыкатэк улӥськомы шуыса, лэсьтӥмы ке ваньзэ, мае быгатӥськомы, солэсь кылзӥськон понна. Озьы котьку улыны тыршоно. Сӥзиськон но пылатӥськон — кутсконэз гинэ. Милемлы азьланяз но Иеговалы оскымонэсь луоно. Кылсярысь, израиль калык Инмарлы сӥземын вал. Но со уг возьматы вал, израиль калык пӧлысь ваньзы Иеговалэн куноосыз вал шуыса. Малы? Малы ке шуоно куд-огъёсыз вань сюлмысьтызы ӧз вӧсяське но ужъёсынызы Инмарез сантэмазы. (Лыдӟе Исаиялэсь 48:1.) Соос, кинъёслэн Иеговаен эшъяськемзы потэ вал, солэн курон-косонъёсыз сярысь тодыны но соосъя улыны кулэ вал. Туннэ но озьы ик: пылатӥськыны но Иеговалэн Адӟись-Ивортӥсеныз нимаськыны гинэ тырмыт ӧвӧл. Со понна шонер ужъёс лэсьтоно. Мар со пӧлы пыре?

5. Кызьы милям возьматэммы луэ, Иеговалэсь котьку кылзӥськиськомы шуыса?

⁵ Сьӧлыкатэк улон понна но шонерлыко ужъёс лэсьтон понна, кенешлэн пумиськонъёсаз ветлыны гинэ тырмыт ӧвӧл (1 Экс. 15:22). Милемлы котьку Иеговалэсь кылзӥськоно, соку но, куке милемыз нокин уг адӟы (Мад. 3:6; Екк. 12:13, 14).  Чыры-пыры ужъёсын но Иеговалэсь кылзӥськоно. Озьы ми возьматомы, Инмарез яратӥськомы шуыса. Нош со милемыз эшшо но зол яратоз (Иоанн 14:23; 1 Иоанн 5:3).

6. Малы, Иегова дорын куноын улон понна, азьвыл лэсьтэм ужъёсмы гинэ тырмыт ӧвӧл? (Еврейёслы 6:10—12).

⁶ Иегова дунъя ваньзэ, мае ми со понна лэсьтӥмы. Но ми ум быгатӥське со дорын куноын улыны азьвыл лэсьтэм ужъёсмы понна гинэ. Та сярысь вераське Еврейёслы 6:10—12 (лыдӟе). Иеговалэн потэ, ми солы «пумозяз» вань сюлмысьтымы мед ужаломы-тыршомы шуыса. Кимес ӧм лэзе ке, Иегова милемыз бакель кароз — пырак дауръёс ӵоже милемын эшъяськоз (Гал. 6:9).

«ЧЫЛКЫТ СЮЛМЫН УЛЭ»

7. Мар кароно, «чылкыт сюлмын» улон понна?

⁷ Иеговалэн куноез луон понна, «чылкыт сюлмын» улоно (Пс. 14:2). Со понна пӧяськытэк улыны гинэ тырмыт ӧвӧл, нош котьмар ласянь шонер улыны тыршоно (Евр. 13:18). Со туж кулэ, малы ке шуоно пӧяськисьёс «Кузё-Инмар азьын юрӟым адӟисько, нош шонер улӥсьёсын Со кусып возе» (Мад. 3:32).

8. Кызьы асьмеды возёно ӧвӧл?

⁸ Куд-ог адямиос калык азьын Инмарлэсь кылзӥськем каро, нош куке огназы кылё, солэсь уг кылзӥсько. Нош соос, кинъёс чылкыт сюлмын уло, асьсэды озьы уг возё (Ис. 29:13). Нош малы адямиос асьсэды озьы возьыны кутско? Нырысь соослэн малпанзы кылдэ, Иеговалэн куронъёсыз туж ик шонересь ӧвӧл шуыса (Иак. 1:5—8). Собере соос Инмарлэсь куд-ог куронъёссэ тӥяны кутско. Нош куке соос уг адӟо, кылзӥськымтэзы урод бервылъёсы вуттэ шуыса, соос эшшо но трос Иеговалэсь законъёссэ тӥяло (Екк. 8:11). Соку Инмарлы йыбыртъямзы нокыӵе пайда уг вайы ни. Нош милям котьмар ласянь чылкыт сюлмын улэммы потэ.

9. Мар понна Иисус Нафанаилэз ушъяз но малы со милемыз дышетэ? (Озьы ик учке суредэз.)

⁹ Чылкыт сюлмын улыны туж кулэ. Та  адӟиське учырысь, куке Филипп Иисус доры Нафанаил эшсэ вайиз. Солэсь азьвыл Иисус Нафанаилэн тодмо ӧй вал ке но, со шуиз: «Тани зэмос Израиль адями, солэн кескич сямыз ӧвӧл» (Иоанн 1:47). Иисус тодэ вал, вань дышетскисьёсыз пӧськытэк уло шуыса. Нош Нафанаил эшшо но тырше вал чылкыт сюлмын улыны. Нафанаил, ми кадь ик, сьӧлыко адями вал ке но, со котьмар ласянь ассэ шонер возьыны тыршиз. Соин ик Иисус сое ушъяз. Туж потэ, Иисус милемыз но со понна ик мед ушъялоз шуыса!

10. Малы милемлы кыл вӧлдыса ветлоно ӧвӧл? (Иаков 1:26).

¹⁰ Тросэз куронъёс, кудъёсыз 14-тӥ псаломын гожтэмын, герӟаськемын соин, кызьы ми асьмеды мукетъёсыныз возиськомы. Псалтирьын 14:3 вераське, Иеговалэн куноез «кыл вӧлдыса уг ветлы, эшезлы урод уж уг лэсьты, матысь муртсэ кылыныз вӧсь уг кары» шуыса. Ми кылмес пинь сьӧрамы ӧм возе ке, мукетъёсызлы бадӟым изъян вайыны быгатомы. Соку ми Иеговалэн куноез луыны ум быгатэ ни. (Лыдӟе Иаковлэсь 1:26.)

11. Мар со сыӵе кыл вӧлдон но мар возьма соосты, кинъёс кыл вӧлдо но уг ӧпкелё?

¹¹ Псаломъёсты гожъясь вера, Иеговалэн куноез «кыл вӧлдыса уг ветлы» шуыса. Мар со сыӵе кыл вӧлдон? Со зэмос луисьтэм иворез веран, кудӥз кинлэсь ке ӟеч нимзэ саптаны быгатэ. Адями кыл вӧлдэ но уг ӧпкельы ке, сое христиан кенешысь потто (Иер. 17:10).

12, 13. Кызьы ми, асьмеос но валатэк, эшъёсмес кылынымы вӧсь карыны быгатӥськомы? (Озьы ик учке суредэз.)

¹² Озьы ик Псалтирьын 14:3 вераське, Иеговалэн куноез «эшезлы урод уж уг лэсьты, матысь муртсэ кылыныз вӧсь уг кары» шуыса. Кызьы ми эшъёсмес кылынымы вӧсь карыны быгатӥськомы?

 ¹³ Асьмеос но валатэк, ми мукетъёсызлэсь ӟеч нимзэс саптаны быгатӥськомы. Кылсярысь, пуктэ син азяды таӵе учыръёсты: 1) сузэр пионер луыса ужамысь-тыршемысь дугдэ; 2) кузпалъёс Вефильысь кошко; 3) агай тӧро яке кенешлы юрттӥсь луыса ужамысь-тыршемысь дугдэ. Шонертэм луысал малпаськыны, малы сыӵе ужпумъёс кутэмын вал, но со сярысь мукетъёсыныз вераськыны. Ми вань мугъёсты ум тодӥське, вылды. Но ми тодамы возиськомы, Иеговалэн куноез «эшезлы урод уж уг лэсьты, матысь муртсэ кылыныз вӧсь уг кары» шуыса.

«КУЗЁ-ИНМАРЛЭСЬ КЫШКАНЭН УЛӤСЬЁСТЫ СӤЛЫ КАРЕ»

14. Кин ужпум кутэ, кыӵе адямиез синазькыль кароно? Валэктэ.

¹⁴ Псалтирьын 14:4 гожтэмын, Иеговалэн эшез «кескич-йӧнтэм адямиез синазькыль каре» шуыса. Кин ужпум кутэ, кыӵе адямиез синазькыль кароно? Ми ужпум кутыны ум быгатӥське, малы ке шуоно ми сьӧлыкоесь. Соин ик адями сярысь шонертэм малпанэ вуны быгатӥськомы. Иегова гинэ ужпум кутыны быгатэ, адямиез синазькыль кароно но солэсь палэнсконо шуыса (1 Кор. 5:11). Сыӵе адямиос пӧлы пыро соос, кинъёс уг ӧпкеле, осконмес уг гажало яке Иеговаен кусыпъёсмес сӧрыны тыршо (Мад. 13:21).

15. Кызьы милям возьматэммы луэ, «Кузё-Инмарлэсь кышканэн улӥсьёсты сӥлы» кариськомы шуыса?

¹⁵ Собере Псалтирьын 14:4 вераське, милемлы «Кузё-Инмарлэсь кышканэн улӥсьёсты сӥлы» кароно шуыса. Соин ик ми тыршиськомы Иеговалэн эшъёсыныз асьмеды лякытэн но гажаса возьыны (Рим. 12:10). Кытысь со адӟиськоз? Псалтирьын 14:4 гожтэмын, Иеговалэн эшез сётэм кылызлэсь ноку уг куштӥськы шуыса. Ми сётэм кылмес ӧм ке быдэстэ, мукетъёсты вӧсь карыны быгатомы (Матф. 5:37). Кылсярысь, Иегова эшъёсызлэсь возьма, соос кузпалъяськыкузы сётэм кылзэс быдэстозы шуыса. Озьы ик Инмар шумпотэ, куке анай-атайёс нылпиоссылы сётэм кылзэс быдэсто. Ми Иеговаез но матысь адямиосмес яратӥськомы ке, соку сётэм кылмес кутыны тыршомы.

16. Кызьы эшшо ми Иеговалэсь эшъёссэ сӥлы кариськомы?

¹⁶ Озьы ик ми Инмарлэсь эшъёссэ сӥлы кариськомы, соосты куно карыса но соослы шырыт сяммес возьматыса (Рим. 12:13). Пумиськонъёсын но тодытон ужын гинэ агайёсын но сузэръёсын адӟиськем интые, ми соосын мукет дыръя но дырмес ортчытъямы ке, ми ог-огенымы но Иеговаен кусыпъёсмес юнматомы. Со сяна, мукетъёсты куно карыса, ми Инмарлэсь адӟем кариськомы.

КОНЬДОНЭЗ ЭН ЯРАТЭ

17. Малы 14-тӥ псаломын коньдон сярысь вераське?

¹⁷ Иеговалэн куноез «азвесьсэ мултэсмытон понна уг сёты, янгыштэм муртлы пумит мыныса, кузьымъёс уг окты» (Пс. 14:5). Малы та вакчи псаломын коньдон сярысь вераське? Малы ке шуоно ми со сярысь трос малпаськимы ке, со милемлы адямиослэсь но Инмарен эшъяськемлэсь дуногес потыны быгатоз (1 Тим. 6:10). Вашкала дыръёсы куд-огъёсыз вын-агайёссылы пунэмен коньдон сётъязы, барыш басьтон вылысь. Озьы ик куддыръя судьяослы взятка сётказы, соос янгыштэм муртъёсты янгыше мед уськытозы шуыса. Сыӵе ужъёс Иеговалы юрӟым пото (Иез. 22:12).

18. Кыӵе юанъёс юрттозы милемлы эскерыны коньдон шоры учкеммес? (Еврейёслы 13:5).

 ¹⁸ Умой луысал эскерыны, кызьы ми коньдон шоры учкиськомы. Юалэ асьтэлэсь: «Макем ӵем мон малпаськисько коньдон сярысь но со сярысь, мар солы басьтыны луэ? Берыктӥсько-а мон дырыз-дыръя пунэмаськыса басьтэм коньдонэз? Яке мон берыктыны уг дыртӥськы но малпасько, адями мыным коньдонзэ пунэмен сётӥз бере, со солы туж ик кулэ ӧвӧл шуыса? Коньдонэ ванен мон вылтӥяськись но кӧттырмостэм ӧй луы-а? Малпасько-а мон, агайёс яке сузэръёс трос коньдон басьто бере, соос со сярысь гинэ малпаськыса уло шуыса? Эшъяськисько-а мон узыръёсын гинэ, нош куанеръёс шоры уг но учкиськы?» Иегова милемлы дан сётӥз солэн куноосыз луыны. Со кылзэ сётӥз, милемыз ноку уз кельты шуыса. Но соин азьланяз но эшъяськон понна, милемлы коньдонэз яратоно ӧвӧл. (Лыдӟе Еврейёслы 13:5.)

ИЕГОВА ЭШЪЁССЭ ЯРАТЭ

19. Малы Иеговалэн потэ, ми 14-тӥ псаломын гожтэмъя мед уломы шуыса?

¹⁹ Тани мар гожтэмын 14-тӥ псаломлэн пумаз: «Тазьы лэсьтӥсь мурт пумтэм дауръёс ӵоже но уз куалекты» (Пс. 14:5). Татын валэктӥське, малы Иеговалэн потэ, ми та псаломын гожтэмъя мед уломы шуыса. Малы ке шуоно соку ми шудоесь луомы. Ми Инмарлэсь кылзӥськимы ке, со милемыз бакель кароз но утёз (Ис. 48:17).

20. Кыӵе улон азьпалан возьма Иеговалэсь кунооссэ?

²⁰ Иеговалэсь кунооссэ азьпалан туж умой улон возьма. Зырӟем ужась-тыршисьёсыз улозы инмын, кытын Иисус соослы «трос улон инты» дасяз (Иоанн 14:2). Нош музъем вылын улыны оскись адямиос туж возьмало, ку быдэсмоз азьпалзэ ивортон, кудӥз гожтэмын Усьтӥськонын 21:3. Иегова милемлы бадӟым дан сётӥз — пырак дауръёс ӵоже солэн эшъёсыз но куноосыз луыны!