1. Зәбур 15:1—5 айәтләрниң биз үчүн қандақ пайдиси бар?

 АЛДИҢКИ мақалидә өзини Йәһваға беғишлиған кишиләрниң Йәһва Худа билән йеқин достлуқ мунасивәтни күчәйтсә, Униң чедирида меһман болалайдиғанлиғини үгәндуқ. Ундақта, ениғирақ ейтсақ, Униң меһмини болуш үчүн немиләрни қилишимиз керәк? Зәбур 15-бап бу соалға җавап бериду (Зәбур 15:1—5ни оқуң). Бу баптин Худа билән техиму йеқин дост болуш үчүн немиләрни қилишимиз керәклигини үгинәләймиз.

2. Давут падиша Йәһваниң чедирини тилға алғанда, немә тоғрисида ойлиған болуши мүмкин?

² Зәбур 15-бап мундақ сөзләр билән башлиниду: «Йәһва, ким Сениң чедириңда меһман болиду? Ким муқәддәс теғиңда маканлишип яшалайду?» (Зәб. 15:1) Бу сөзләрни язған Давут падиша Йәһваниң чедирини тилға алғанда, еһтимал бир мәзгил Гибийон шәһиригә җайлашқан муқәддәс чедир һәққидә ойлиған. Яки болмиса, Давут падиша Худаниң «муқәддәс теғини» тилға алғанда, бәлким Йерусалимдики Сион теғи үстидики чедир тоғрисида ойлиған. Ибадәтхана селинғичә, Давут падиша Гибийон шәһириниң бирнәччә километр җәнубиға җайлашқан Сион теғида муқәддәс чедирни тикләп, ичигә әһдә сандуғини қойған еди (Сам. 2-яз. 6:17).

3. Немә үчүн Зәбур 15-бапни чүшиниш бәк муһим? (Рәсимгиму қараң.)

³ Әлвәттә, исраилларниң көпинчиси һечқачан чедирда хизмәт қилалмиған. Пәқәт бирнәччә кишиләр әһдә сандуғи қоюлған чедирға кирәләтти. Бирақ Йәһваниң һәммә садиқ хизмәтчилири Униң дости болуп вә шу достлуқни сақлап, Униң символлуқ чедирида меһман болалиған. Шәк-шүбһисизки, буни һәммимиз бәк халаймиз. Йәһва билән болған достлуқни сақлап қелишимиз үчүн Зәбур 15-бапта тилға елинған бәзи есил пәзиләтләрни йетилдүрүп, көрситишимиз лазим.

 НУҚСАНСИЗ ЯШАШ ВӘ ТОҒРА ИШ ҚИЛИШ

4. Немә үчүн Йәһва Худаниң дости болуш үчүн суға чөмдүрүлүш йетәрлик әмәс? (Йәшая 48:1)

⁴ Зәбур 15:2-айәттә Худаниң достини мундақ тәсвирлигән: нуқсансиз яшайдиған вә тоғра ишларни қилидиған инсан. Биз чоқум буни давамлиқ қилишимиз керәк. Бирақ растинла нуқсансиз вә тоғра иш қилип яшаш мүмкинму? Һә-ә, мүмкин. Гәрчә һечбиримиз мукәммәл адәм болмисақму, Худаға бойсунуш үчүн бар күчимизни чиқарсақ, Униң көз алдида нуқсансиз һесаплинимиз. Әгәр һаятимизни Худаға беғишлап суға чөмдүрүлсәк, биз Худаниң дости болуш үчүн биринчи қәдәмни ташлиған болимиз. Мәсилән, қедимда бир киши Исраил хәлқигә тәвә болса, бу Униң Худаниң дости болғанлиғини билдүрмигән еди. Уларниң бәзибирлириниң дуалири сәмимий болмиған (Йәшая 48:1ни оқуң). Чин жүрәктин Йәһваниң меһмини болушни халиған исраиллар Йәһваниң өлчәм-тәләплирини үгинип, уларға мас һаят кәчүрүши керәк еди. Худди шуниңға охшаш, бүгүнки күндә Йәһва Худаниң дости болуш үчүн биз пәқәт суға чөмдүрүлүштин өтүп Йәһва гувачилири дәп атилипла қоймай, давамлиқ тоғра ишларни қилишимиз керәк. Биз буни қандақ қилалаймиз?

5. Һаятимизниң һәрқайси саһалирида Худаға бойсунуш немиләрни өз ичигә алиду?

⁵ Йәһваниң көз алдида нуқсансиз яшаш вә тоғра ишларни қилиш пәқәт Ибадәт жиғилишлириға дайим берип қоюшла әмәс, йәнә көпирәк ишларни өз ичигә алиду (Сам. 1-яз. 15:22). Биз һаятимизниң һәрқайси саһалирида, һәтта башқилар бизни көрмисиму, пүтүн күчимиз билән Худаға бойсунушимиз керәк (Пәнд н. 3:6; Вәз 12:13, 14). Һәтта анчә муһим әмәстәк көрүнгән ишлардиму биз Йәһва Худаға бойсунуш үчүн тиришишимиз муһим. Әгәр шундақ қилсақ, биз һәқиқәтән Йәһва Худани сөйидиғанлиғимизни көрситимиз вә Униң бизгә болған сөйгү-муһәббити техиму күчийиду (Йоһ. 14:23; Йоһ. 1-х. 5:3).

6. Ибранийларға 6:10—12 айәтләргә асасланғанда, қайси иш өтмүштә қилған ишлиримиздин муһимирақ?

 ⁶ Йәһва Худа өтмүштә Униң үчүн қилған ишлиримизни бәк қәдирләйду. Лекин Йәһваниң чедирида Униң меһмини болуп қелиш үчүн пәқәт өтмүштә қилған тоғра ишлиримиз йетәрлик әмәс. Ибранийларға 6:10—12 (оқуң) айәтләр буни ениқ чүшәндүрүп бериду. Йәһва Худа өтмүштә қилған тоғра ишлиримизни һәргизму унтумайду. Бирақ Йәһва бизниң пүтүн вуҗудимиз билән ахирғичә Униңға хизмәт қилишимизни халайду. Яхшилиқ қилиштин бошишип қалмисақ, мәңгү Йәһваниң дости болалаймиз (Гал. 6:9).

ЧИН ҚӘЛБТИН ҺӘҚИҚӘТНИ СӨЗЛӘШ

7. Чин қәлбтин һәқиқәтни сөзләш немини өз ичигә алиду?

⁷ Киши Йәһваниң чедирида Униң меһмини болушни халиса, чин қәлбидин һәқиқәтни сөзлиши керәк (Зәб. 15:2). Бу пәқәт ялған ейтмаслиқни өз ичигә алмайду. Йәһва Худа һәммә гәп-сөзлиримиз билән иш-һәрикәтлиримиздә растчил болушимизни халайду (Ибр. 13:18). Бу бәк муһим, чүнки Йәһва «үчүн сахта адәм жиркиничликтур, ақкөңүлләргә, әксичә, У йеқин Досттур» (Пәнд н. 3:32).

8. Биз қандақ иш-һәрикәтләрдин жирақ турушимиз керәк?

⁸ Чин қәлбидин һәқиқәтни сөзләйдиған кишиләр башқиларниң көз алдида Худаға бойсунуп, ялғуз қалғанда йошурунчә Худаниң қанунлирини бузмайду (Йәшая 29:13). Улар сахтипәзлик қилмайду. Сахтипәз адәм Йәһваниң бәзи қанунлирини әқилгә мувапиқ әмәс дәп гуманлинишқа башлиши мүмкин (Яқуп 1:5—8). У анчә муһим әмәс дәп көрүнгән бәзи ишларда Йәһва Худаға бойсунмаслиғи мүмкин. Кейин итаәтсизликниң һечқандақ ақивәтлирини көрмисә, бәзи техиму яман ишларни қилишқа башлиши мүмкин. Нәтиҗидә бундақ кишиниң ибадитини Йәһва қобул қилмайду (Вәз 8:11). Лекин биз һәммә ишларда растчил болушимизни халаймиз.

9. Һәзрити Әйсаниң биринчи қетим Натаниялни көргәндә, қилған сөзлиридин немиләрни үгинәләймиз? (Рәсимгиму қараң.)

⁹ Һәзрити Әйса биринчи қетим Натаниял билән көрүшкән чағдики сөһбитидин сәмимий болушниң муһимлиғини чүшинип йетәләймиз. Филип дости Натаниялни Әйсаниң алдиға елип кәлгәндә, әҗайип бир вақиә йүз бәргән. Гәрчә һәзрити Әйса Натаниялни һечқачан көрмигән болсиму, Әйса: «Мана, бу  ичидә қилчә һейлә-микри йоқ һәқиқий бир исраиллиқ»,— деди (Йоһ. 1:47). Әлвәттә, Әйса өз шагиртлирини сәмимий кишиләр дәп қариған. Бирақ у Натаниялниң алаһидә сәмимийлигини көргән. Гәрчә Натаниял бизгә охшаш намукәммәл болған болсиму, у иккиүзлүк болмиған. Әксинчә, һәммә ишларда растчил болған. Һәзрити Әйса Натаниялниң сәмимийлигидин мәмнун болуп, уни махтиған. Шәк-шүбһисизки, һәммимиз Әйса Мәсиһниң бизгиму шундақ сөзләрни қилишни халаймиз.

10. Немә үчүн гәп-сөзлиримизни тизгинләш керәк? (Яқуп 1:26)

¹⁰ Зәбур 15-баптики тәләпләрниң көпинчиси бизниң башқиларға қандақ муамилә қилишимизға бағлинишлиқ. Зәбур 15:3-айәттә Йәһваниң чедирида меһман болған киши һәққидә мундақ йезилған: «У төһмәт қилмайду, башқисиға зиян кәлтүрмәйду вә достини қарилимайду». Әгәр гәп-сөзлиримизни тизгинлимисәк, башқиларға зиян йәткүзүп, Йәһваниң чедирида меһман болуш һоқуқидин айрилишимиз мүмкин (Яқуп 1:26ни оқуң).

11. Төһмәт дегән немә вә төһмәт қилған киши товва қилмиса, ақивети қандақ болиду?

¹¹ Зәбур язғучиси төһмәт дегән сөзгә алаһидә диққәт қилған. Төһмәт дегән немә? Адәттә төһмәт адәмниң нам-абройиға дағ тәккүзидиған күпүрлүк сөзләрдур. Әгәр бирси башқиларға төһмәт қилип, қилғанлириға товва қилмиса, у Йәһва гувачилириниң җамаитидин чиқирилиду (Йәр. 17:10).

12, 13. Қайси вәзийәтләрдә ойлимай достлиримизниң нам-абройиға дағ тәккүзүшимиз мүмкин? (Рәсимгиму қараң.)

¹² Зәбур 15:3-айәт Йәһваниң меһманлири өз хошнилириға яманлиқ қилмайдиғанлиғи вә өз достлириниң нам-абройиға дағ тәккүзмәйдиғанлиғини есимизгә салиду. Достлиримизниң нам-абройиға қандақ дағ тәккүзишимиз мүмкин?

¹³ Әгәр бири һәққидә сәлбий гәп-сөзләрни тарқатсақ, мәхсәтсиз униң нам-абройиға дағ тәккүзишимиз мүмкин. Үч вәзийәт тоғрисида ойлап беқиң. 1) Бир қериндаш өз пионерлиқ хизмитини тохтатти. 2) Бир җүп  әр-аялниң Бәйтәлдә хизмәт қилиши тохтап қалди. 3) Бир бурадәр әнди ақсақал яки хизмәт ярдәмчиси болуп хизмәт қилмайду. Шуниң билән биз уларниң вәзийити өзгәргәнлигиниң сәвәплирини вә шуларға болған өз көзқаришимизни башқиларға ейтип бериш тоғриму? Әмәлийәттә, уларниң вәзийити өзгәргәнлигиниң нурғун сәвәплирини билмәймиз. Буниңдин ташқири, Йәһваниң чедирида меһман болған киши башқиларға һечқандақ яманлиқ қилмас вә У достлирини һақарәт қилмас.

ЙӘҺВАДИН ӘЙМИНИДИҒАНЛАРНИ ҺӨРМӘТЛӘШ

14. Йәһваниң меһманлири рәзил кишиләрни қандақ рәт қилидиғанлиғини чүшәндүрүп бериң.

¹⁴ Зәбур 15:4-айәт Йәһваниң дости рәзил кишини рәт қилидиғанлиғини ейтиду. Ундақта, бириниң рәзил яки әмәслигини қандақ биләләймиз? Биз намукәммәл болғач, ким рәзил яки әмәслигини қарар қилиш һоқуқимиз йоқ. Немә үчүн? Бәлким, бәзиләр миҗәзи очуқ чиқишқақ бирини яқтуруп, өзүмизни униңға йеқин һис қилишимиз яки миҗәзи бизгә яқмайдиған биридин безәр болуп, униңдин өзүмизни елип қечишимиз мүмкин. Шуңлашқа, пәқәт Йәһваниң нәзәридә рәзил дәп қаралған кишини рәт қилишимиз керәк (Кор. 1-х. 5:11). Рәзил кишиләр — товва қилмай, яман ишларни қилидиған, етиқадимиз вә көзқаришимизни һөрмәтлимәйдиған яки Йәһва Худа билән болған достлуқ риштимизни аҗизлаштурушқа тиришидиған кишиләрдур (Пәнд н. 13:20).

15. Йәһвадин әйминидиған кишиләрни һөрмәтләшниң қандақ йоли бар?

¹⁵ Зәбур 15:4-айәт Йәһвадин әйминидиған кишиләрни һөрмәтлишимиз керәклигини ейтиду. Шуңа, Йәһваниң достлириға яхшилиқ қилиш вә һөрмәт көрситиш үчүн пүтүн күчимиз билән тиришимиз (Рим. 12:10). Қандақ қилип? Зәбур 15:4-айәтниң давамида буниң бир йоли көрситилгән — Йәһваниң чедирида меһман болған киши, һәтта өзигә зиянлиқ болсиму, қилған қәсимини бузмай өз сөзидә туриду. Әгәр өз вәдимиздә чиң турмисақ, башқиларниң көңлини ағритишимиз мүмкин (Мәт. 5:37). Мәсилән, Йәһва әр-аялниң тойда бәргән вәдисидә чиң турушини халайду. Униңдин башқа, ата-анилар өз балилириға бәргән вәдилиригә чиң турушқа тиришса, Йәһва Худа хурсән болиду. Биз Йәһвани вә башқиларни сөйгәч, вәдимиздә чиң туруш үчүн қолумиздин келишичә тиришимиз.

16. Йәһва Худаниң достлириға һөрмәт көрситишниң йәнә қандақ йоли бар?

¹⁶ Худаниң достлириға һөрмәт көрситишниң йәнә бир йоли — меһмандост вә қоли очуқ адәм болуш (Рим. 12:13). Җамаәт жиғилишлири, вәз хизмитидин башқа чағлардиму етиқатдашлиримиз билән вақит өткүзсәк, улар вә Йәһва Худа билән достлуқ риштисини күчәйтимиз. Униңдин башқа, меһмандостлуқ көрситиш арқилиқ Йәһва Худани үлгә қилимиз.

ПУЛПӘРӘСЛИКТИН НЕРИ БОЛУШ

17. Немә үчүн Зәбур 15-бапта пул тоғрисида йезилған?

¹⁷ Муқәддәс китап Йәһваниң меһмини: «Пулини өсүмгә бәрмәйду вә гунасизға қарши пара алмайду»,— дәйду (Зәб. 15:5). Немә үчүн бу Зәбурда пул тоғрисида йезилған? Чүнки киши пулпәрәсликкә берилип кәтсә, у пулни адәмләрдин, һәтта Йәһвадин муһимирақ көрүп, нәтиҗидә башқиларға зиян йәткүзүп, өзиниң Яратқучи билән болған мунасивитигә зиян йәткүзүши мүмкин (Тим. 1-х. 6:10). Қедимий заманда, бәзиләр кәмбәғәл қериндашлириға пул қәриз берип, пулниң өсүмини елип, пайдиға еришкән. Шундақла бәзи сотчилар пара елип, бегуна кишиләр үстидин наһәқ һөкүм чиқарған. Бундақ қилмишларни Йәһва өч көриду (Әзәк. 22:12).

18. Пулға болған көзқаришимизни тәкшүрүшкә қандақ соаллар ярдәм берәләйду? (Ибранийларға 13:5)

 ¹⁸ Өзүмизниң пулға болған көзқаришимизни яхширақ тәкшүрүп көрүш бәк муһим. Өз-өзүңиздин сорап көрүң: «Мән дайим пул яки бир нәрсиләрни сетивелиш тоғрилиқ ойлинимәнму? Мән қәриз алсам, қәриз бәргән киши һазирчә бу пулға муһтаҗ әмәс дәп, қәриз қайтурушни арқиға созимәнму? Пулум болғанлиғидин өзүмни муһим киши дәп қараймәнму яки маңа сехийлиқ көрситиш қийинму? Бәзи етиқатдашларниң пули көп болса, улар пулни Йәһвадин көпирәк яхши көриду дәп ойлинимәнму? Мән бай етиқатдашларни дост тутуп, кәмбәғәлләр билән арилашмай жүримәнму?» Өз-өзүмиздин бундақ соалларни сораш муһим, чүнки биз зор шан-шәрәпкә ериштуқ, йәни Йәһва өз чедирида бизни меһман болушқа тәклип қилди. Шуңлашқа, пулпәрәсликни жүригимиздин түп йилтизи билән қомуруп ташлишимиз керәк. Шу чағда давамлиқ Йәһва Худаниң чедирида меһман болуп қалимиз вә Яратқучимиз бизни һәргизму ташлап кәтмәйду (Ибранийларға 13:5ни оқуң).

ЙӘҺВА ХУДА ӨЗ ДОСТЛИРИНИ СӨЙИДУ

19. Йәһва Худаниң тәләплириниң асасий мәхсити немә?

¹⁹ Зәбур 15-бап: «Ким шундақ иш тутудиған болса, у әбәдий-әбәт тәврәнмәйду»,— дегән сөзләр билән аяқлишиду (Зәб. 15:5). Зәбур язғучиси Худаниң тәләплириниң асасий мәхситини ашкарә қилиду. Йәһва Худа бизниң бәхитлик болушимизни халайду. Худа көрсәтмиси бойичә яшисақла, Униң һимайисигә вә бәрикитигә еришимиз (Йәшая 48:17).

20. Йәһваниң меһманлири қандақ келәчәкни төрт көзи билән күтмәктә?

²⁰ Йәһваниң меһманлири әҗайип келәчәкни төрт көзи билән күтмәктә. Майланған садиқ хизмәтчиләр һәзрити Әйса асманда тәйярлап қойған көп маканларға еришиду (Йоһ. 14:2). Йәрдә яшаш үмүти барлар Вәһий 21:3-айәттики пәйғәмбәрлик сөзләрниң әмәлгә ешишини тәқәзалиқ билән күтмәктә. Йәһва меһрибанлиқ билән һәммимизни Өзиниң достлири болуп, Униң чедирида мәңгү меһман болушқа тәклип қилип кәлмәктә. Биз бу шан-шәрәп үчүн бәк миннәтдармиз.