1. Ukẹcha vọ yen obo rehẹ Une rẹ Ejiro 15:​1-5 sa vwọ kẹ avwanre?

 VWẸ uyono rọ wanre na, avwanre yonori nẹ idibo ri Jihova re vwomakpahotọ sa dia erhorha vwẹ utughẹ rọyen re vwo ru udje na, womarẹ ayen vẹ Jihova vwo vwo uvi rẹ oyerinkugbe rọ kpẹkpẹre. Ẹkẹvuọvo, die yen e se ru a vẹ ọyen se vwo vwo uvi rẹ oyerinkugbe? Une rẹ Ejiro 15 vuẹ avwanre obo ro fori nẹ e ru. (Se Une rẹ Ejiro 15:​1-5.) Une rẹ Ejiro na ta ota kpahen erọnvwọn sansan rẹ avwanre se ru e se vwo sikẹrẹ Ọghẹnẹ vrẹ obo ri jovwo.

2. Die yen a sa tanẹ ẹwẹn ri Devid djẹ ra ọke rọ vwọ ta ota kpahen utughẹ ri Jihova?

² Une rẹ Ejiro 15 tonphiyọ vẹ enọ nana: ‘E Ọrovwohwo ono re sa dia utughẹ wẹn na? Eyẹ kono re sa dia enu rẹ ugbenu ọfuanfon wẹn na?’ (Un 15:1) Ọke rẹ ọbuine na vwọ ta ota kpahan ‘utughẹ ri Jihova,’ ọ sa dianẹ ẹwẹn rọyen djẹ kpo itabanako rọhẹ Gibeọn vwẹ ọke yena. Devid ji ta ota kpahen “ugbenu ọfuanfon” rẹ Ọghẹnẹ, ọ sa dianẹ ugbenu ri Zayọn vwẹ Jerusalẹm yen ọ rionbo ra. Gibeọn rọ vwẹ iroko buebun vwo sheri kẹ Jerusalẹm vwẹ obọrhen ọnre, yen Devid da vwẹ utughẹ vi vwọ kẹ okọ rẹ ọphọ na bẹsiẹ ra ke bọn uwevwin rẹ ẹga na.​​—2Sa 6:17.

3. Diesorọ o vwo fo avwanre vwo vwo ẹruọ rẹ obo rehẹ Une rẹ Ejiro 15? (Ni uhoho na.)

³ Vwọrẹ uyota, ọ dia ihwo rẹ Izrẹl eje yen a rhọnvwe kẹ nẹ e ga vwẹ itabanako naa, yẹrẹ ro evunrẹ utughẹ na rọ dia asan re muẹ okọ rẹ ọphọ na phiyọọ. Ẹkẹvuọvo idibo ri Jihova eje  re fuevun sa dia erhorha vwẹ utughẹ rọyen re vwo ru udje na, rẹ ayen vwọ dia igbeyan rọyen ọkieje. Ọnana yen oborẹ avwanre eje guọnọre. Une rẹ Ejiro 15 djunute iruemu evo ro fori nẹ e vwo ji djephia a sa vwọ dia igbeyan ri Jihova ọkieje.

DIA OHWO RO VWO ABEE RO RUẸ OBO RI SHEPHIYỌ

4. Mavọ yen avwanre ru riẹn nẹ ọ dia omaebrophiyame ọvo yen obo ri Jihova guọnọ mie avwanree? (Aizaya 48:1)

⁴ Vwẹ Une rẹ Ejiro 15:​2, a reyọ ugbeyan rẹ Ọghẹnẹ vwo dje “ohwo ro vwo abe-e, ro ruẹ obo ri shehọ.” Eta na ‘o vwo abe-e’ kugbe ‘re vwo ruẹ’ mudiaphiyọ obo re che ru ọkieje. Kẹ e ghini se jẹ abe evwo? E. Dede nẹ o vwo ohworakpọ vuọvo rọ gbaree, siẹrẹ avwanre da davwẹngba rẹ avwanre eje vwo nyupho rọyen, Jihova ko che ni avwanre kerẹ ‘ihwo ri vwo abee.’ Ghwe vwo nẹ ọke rẹ avwanre vwọ vwomakpahotọ kẹ Ọghẹnẹ ji bromaphiyame nu, yen oyerinkugbe rẹ avwanre vẹ ọ ri Jihova vwọ tonphiyọ. Jokaphiyọ nẹ vwẹ Baibol na, ọ dia ohwo da ghwa dia ohwo rẹ Izrẹl nure kọyen ọ vwọ dia ọrhorha ri Jihovaa. Ihwo evo rhọnvwe odẹ rọyen “ẹkẹvuọvo o dia uyota vẹ ọsoso-o.” (Se Aizaya 48:1.) Ihwo rẹ Izrẹl re guọnọ dia erhorha ri Jihova, che yono kpahen iwan rọyen ji ru nene ayen. Ọtiọyen ọ je hepha nonẹna nẹ, a da guọnọ vwo aroesiri rẹ Ọghẹnẹ, e che ru vrẹ re di vwo bromaphiyame je vwomaba ukoko na. Ofori nẹ avwanre “ruẹ obo ri shehọ.” Mavọ yen e se vwo ru ọtiọyen?

5. Die yen o churobọ si re vwo nyẹme ri Jihova vwẹ kẹdia kẹdia vwẹ akpeyeren?

⁵ Vwẹ ẹro ri Jihova, ra vwọ dia “ohwo ro vwo abe-e” kugbe re vwo “ruẹ obo ri shehọ,” vrẹ e di vwo kpo uyono ọkieje vwẹ Ọguan Ruvie. (1Sa 15:22) Ofori nẹ avwanre davwẹngba vwo nyẹme ri Jihova vwẹ kẹdia kẹdia vwẹ akpeyeren, ọ da tobọ dianẹ avwanre ọvo yen herọ. (Isẹ 3:6; Agh 12: 13, 14) Ọyen obo re ghanre avwanre vwo nyupho ri Jihova vwẹ erọnvwọn re niri nẹ i fi emuọvoo. E de ru ọtiọyen, jẹ avwanre djephia nẹ e ghini vwo ẹguọnọ rọyen, ọnana cha nẹrhẹ oma rẹ avwanre vwerhọn.​​—Jọ 14:23; 1Jọ 5:3.

6. Vwo nene obo rehẹ Hibru 6:​10-​12, die yen ma ghanre vrẹ erhuvwu rẹ avwanre ru vwẹ obuko re?

⁶ Jihova vwo ọdavwaro kpahen oborẹ avwanre ru kẹ vwẹ obuko re. Ẹkẹvuọvo, ọ dia erhuvwu rẹ avwanre ru kẹ vwẹ obuko re ọvo yen cha nẹrhẹ avwanre dia erhorha vwẹ utughẹ rọyeen. E dje ọnana phephẹn vwẹ Hibru 6:​10-​12. (Se.) Erhuvwu rẹ avwanre ru vwẹ obuko re chọrẹ Jihova ẹroo. Ẹkẹvuọvo, ọ guọnọre nẹ avwanre vwẹ ẹga ọsoso vwọ kẹ ọyen “re duvwun oba.” Avwanre vẹ ọyen ki che vwo uvi rẹ oyerinkugbe bẹdẹ “siẹrẹ oma rha rhọ avwanre-e.”​​—Ga 6:9.

TA UYOTA NẸ OTỌ RẸ UBIUDU WẸN RHE

7. Die yen o mudiaphiyọ ra vwọ ta uyota nẹ otọ rẹ ubiudu rhe?

⁷ Ohwo rọ guọnọ dia ọrhorha vwẹ utughẹ ri Jihova cha dia ohwo “rọ ta uyota nẹ otọ rẹ udu rọye cha.” (Un 15:2) Ọnana vrẹ ra de vwọ kẹnoma kẹ ofian ẹvwọrọn. Jihova guọnọre nẹ avwanre ta uyota vwẹ kẹdia kẹdia. (Hib 13:18) Ọnana ghanre mamọ, “kidie ohwo ọchọchọ ẹgua kẹ Ọrovwohwo oma, ẹkẹvuọvo ọ vwẹ ẹro sua ohwo rọ dia ọvwata.”​​—Isẹ 3:32.

8. Uruemu vọ yen ofori nẹ a kẹnoma kẹ?

⁸ Ọ dia azagba ọvo yen ihwo re ta uyota nẹ otọ rẹ udu cha de ruẹ oborẹ Ọghẹnẹ guọnọree, ayen ji ruẹ ọtiọyen vwẹ odjahọn. (Aiz 29:13) Ayen kẹnoma kẹ obo re chọre. Ohwo ọchọchọ se vwo ẹwẹn ivivẹ kpahen irhi ri Jihova evo. (Jem 1:​5-8) O se gbe urhi ri Jihova ku vwẹ erọnvwọn evo ro niri nẹ i ghwe fiemuu. Ọtiọyena o de no nẹ emu vuọvo nẹ obuko rẹ obo ro ruru na rhee, ọ sa nẹrhẹ o gbe irhi ri Jihova efa ku, ẹga rọyen kọ cha dia ọ rẹ omeru. (Agh 8:11) Eriyin na, avwanre guọnọ dia ihwo re ta uyota vwẹ kemu kemu.   

9. Die yen avwanre se yono vwo nẹ obo re phiare ọke ri Jesu ka vwọ mrẹ Nathaniẹl? (Ni uhoho na.)

⁹ Ọyen obo re ghanre a vwọ dia ohwo rọ ta  uyota nẹ otọ rẹ udu cha. A mrẹ ọnana vughe ọke rẹ Filip vwọ reyọ ugbeyan rọyen Nathaniẹl bru Jesu ra. Dede nẹ Jesu je mrẹ Nathaniẹl dẹvoo, ọ da ta: “Nighere, vwọrẹ uyota, ọnana ohwo rẹ Izrẹl rẹ ophiẹnvwe vuọvo hẹ oma rọye-en.” (Jọ 1:47) Vwọrẹ uyota, Jesu ni idibo rọyen ichekọ kerẹ ihwo re ta uyota, jẹ uruemu ra vwọ ta uyota ro rhe Nathaniẹl a mrẹ vwo djee. Kerẹ avwanre, Nathaniẹl ọyen ohwo rọ gbaree. Ẹkẹvuọvo o vwo uruemu rẹ omeru vuọvo vwẹ omaa. Uruemu nana yen nẹrhẹ Jesu jiri Nathaniẹl. Mavọ yen ọ vwerhen oma te ri Jesu de brọghọ ọtiọyen phiyọ avwanre oma!

10. Diesorọ o vwo fo re vwo sun ẹrenvwe avwanre? (Jems 1:26)

¹⁰ Erọnvwọn buebun re djunute vwẹ Une rẹ Ejiro 15 shekpahen oborẹ avwanre vẹ ihwo efa yerẹn wan. Une rẹ Ejiro 15:3 tare nẹ ọrhorha vwẹ utughẹ ri Jihova “vwẹ unu rọye vwo miovwẹ-ẹ, . . . o ruẹ emu umwemwu kẹ ugbeyan rọye-e.” Siẹrẹ a da vwẹ ẹrenvwe avwanre vwọ ta eta ri je fo kirobo re djunute vwẹ obenu na, ọ sa so omaẹwan kẹ ihwo efa a rha cha dia erhorha vwẹ utughẹ ri Jihovaa.​​—Se Jems 1:26.

11. Die yen o mudiaphiyọ re vwo miovwo ohwo, kẹ die yen e ruẹ kpahan ihwo ri miovwo ihwo re rhọnvwe kurhẹriẹẹ?

¹¹ Ọbuine na karunumu re vwo miovwo ohwo. Die yen o mudiaphiyọ? Ọnana ota rẹ ofian ra ta kpahan ohwo ọfa vwo miovwo oka rẹ ohwo rọ hepha. A djẹ ihwo ri miovwo ihwo efa re rhọnvwe kurhẹriẹẹ vwo nẹ ukoko na.​​—Jer 17:10.

12-13. Erhọ yen ẹdia evo avwanre de se miovwo odẹ rẹ igbeyan rẹ avwanre vwọrẹ jẹ riẹn? (Ni uhoho na.)

¹² Une rẹ Ejiro 15:3 je karophiyọ avwanre nẹ erhorha ri Jihova ruẹ emu umwemwu kẹ irivẹ rayeen, ayen ji miovwo edẹ rẹ igbeyan rayeen. Die yen ọnana se churobọ si?

¹³ Avwanre se miovwo odẹ rẹ ohwo ọfa vwọrẹ jẹ riẹn womarẹ a vwọ hrahra evuẹ rẹ  efian kpahan ohwo na. Kerẹ udje: (1) oniọvo aye dobọ rẹ iruo rẹ ọkobaro ro ruẹ ji, (2) aye gbe ọshare re rọvwọnre rha ga vwẹ Bẹtẹẹl, eyẹ (3) oniọvo ọshare rha ga kerẹ ọkpako yẹrẹ odibo rẹ owiaan. Ọyen obo re brare ra vwọ vuẹ ihwo efa nẹ iniọvo nana ruẹ obo re chọre ọyen sorọ uphẹn rẹ ẹga rayen vwọ va ayen abọ. Ọ sa dianẹ o vwo oboresorọ uphẹn rẹ ẹga rayen vwọ va ayen abọ rẹ avwanre riẹn kpaheen. Vwọba, ọrhorha vwẹ utughẹ ri Jihova ‘ruẹ obo re brare kẹ ọrivẹ rọyeen, o ji ruẹ emu umwemwu kẹ igbeyan rọyeen.’

MUỌGHỌ KẸ IHWO RI VWO OSHỌẸDJẸ RI JIHOVA

14. Idjerhe vọ yen erhorha ri Jihova vwọ kẹnoma kẹ “ohwo rọ jẹ ihwo fia”? Djekpahọn.

¹⁴ Une rẹ Ejiro 15:4 tare nẹ ugbeyan ri Jihova kẹnoma kẹ “ohwo rọ jẹ ihwo fia.” Mavọ yen avwanre se vwo vughe ohwo rọ jẹ ihwo fia? Kerẹ ihwo re gbaree, avwanre che se vughe ohwo rọ jẹ ihwo fiaa. Diesorọ? Avwanre vẹ ihwo evo sa dia kpẹkpẹkpẹ kidie iruemu rayen je avwanre, ji sherabọ kẹ efa rẹ iruemu rayen je avwanree. Ọtiọyena, ihwo ri Jihova niri nẹ eyen ihwo re “jẹ ihwo fia” ọvo yen a cha kẹnoma kẹ. (1Kọ 5:11) Ọnana ji churobọ si ihwo re vwẹ arogba vwo ruẹ obo re brare, ri muọghọ kẹ oborẹ avwanre segbuyotaa, yẹrẹ davwẹngba vwo miovwẹ oyerinkugbe rẹ avwanre vẹ Jihova vwori.​​—Isẹ 13:20.

15. Ọrhọ yen idjerhe ọvo avwanre se vwo muọghọ kẹ “ihwo re djẹ oshọ rẹ Ọrovwohwo”?

¹⁵ Une rẹ Ejiro 15:4 je tanẹ avwanre muọghọ kẹ “ihwo re djẹ oshọ rẹ Ọrovwohwo.” Ọtiọyena, ofori nẹ avwanre gbẹn idjerhe sansan re se vwo muọghọ ji dje uruemuesiri kẹ igbeyan ri Jihova. (Ro 12:10) Mavọ yen e se vwo ru ọtiọyen? E se ru ọtiọyen siẹrẹ e de nene odjekẹ rọhẹ Une rẹ Ejiro 15:​4, ọ tare nẹ o “duvwu iyori kẹ omobọ rọye ọ da dia obo re miavwọ dede o gbi se kuẹ rhẹriẹ-ẹ.” Avwanre rhe ru nene oborẹ avwanre veri kẹ ihwo efaa, aphro herọọ nẹ ọ sa so ọmiaovwẹ kẹ ayen. (Mt 5:37) Kerẹ udje, Jihova guọnọre nẹ aye gbe ọshare re rọvwọnre ru nene ive rẹ orọnvwe rayen. Oma je vwerhọn ọ da mrẹ esẹ vẹ ini re davwẹngba rayen vwo ruẹ nene oborẹ ayen ve kẹ emọ rayen. Kidie nẹ avwanre vwo ẹguọnọ rẹ Ọghẹnẹ kugbe irivẹ rẹ avwanre, ọnana muẹ avwanre vwọ davwẹngba avwanre eje vwo ruẹ oborẹ avwanre veri.

16. Ọrhọ yen idjerhe ọfa avwanre se vwo muọghọ kẹ igbeyan ri Jihova?

¹⁶ Idjerhe ọfa re se vwo muọghọ kẹ igbeyan rẹ Ọghẹnẹ yen e vwo vwo uruemu ra vwọ ghọ erhorha je kokẹ ghwologhwolo. (Ro 12:13) Siẹrẹ avwanre vẹ iniọvo na da nabọ ghwọrọ ọke kuẹgbe, ọnana nẹrhẹ avwanre vẹ ayen vwo uvi rẹ oyerinkugbe, ọ je nẹrhẹ oyerinkugbe rẹ avwanre vẹ Jihova ganphiyọ. Ọtiọyena, avwanre vwẹrokere Jihova siẹrẹ e de vwo uruemu re vwo dede erhorha.

KẸNOMA KẸ ẸGUỌNỌ RẸ IGHO

17. Diesorọ a vwọ ta ota kpahen igho vwẹ Une rẹ Ejiro 15?

¹⁷ Avwanre sere vwẹ Baibol na nẹ ọrhorha ri Jihova “momo igho kẹ ihwo nẹ o suo-o, ọ ria udi vwo brorhiẹ hwẹ ọ rọ re ase-e.” (Un 15:5) Diesorọ a vwọ ta ota kpahen igho vwẹ Une rẹ Ejiro 15? Kidie avwanre rha vwẹ ẹro abavo vwo ni ighoo, ọnana sa so ọmiaovwẹ kẹ ihwo efa ji miovwo oyerinkugbe avwanre vẹ Ọghẹnẹ. (1Ti 6:10) Vwẹ Baibol na, ihwo evo vwẹ igho vwo sun igho rẹ ayen momo kẹ iniọvo rayen kidie ayen igbere. Ayen je jẹ udi kẹ iguẹdjọ evo, rọ nẹrhẹ ayen brorhiẹn rẹ eku hwe ihwo evo. Enana iruemu ẹgua vwẹ obaro ri Jihova.​​—Izi 22:12.

18. Enọ vọ yen a cha vwọ fuẹrẹn oma avwanre kpahen ẹro re vwo nẹ igho? (Hibru 13:5)

 ¹⁸ O yovwin avwanre da fuẹrẹn oma rẹ avwanre kpahen ẹro rẹ avwanre vwo nẹ igho. Nọ oma wẹn: ‘Ọkieje yen mi vwo roro kpahan igho kugbe obo re me sa reyọ vwọ dẹ? Mi de momo igho, ọ reyọ ọke me ke hwa, ji roro nẹ ohwo ro momo uvwe igho na vwo obo rọ cha vwẹ igho ruu? Igho ri mi vwori nẹrhẹ mi no nẹ mi yovwin vrẹ ihwo efa, je nẹrhẹ ọ bẹn kẹ vwẹ mi vwo ruẹse kẹ ayen? Me vwẹ iniọvo mẹ guẹdjọ nẹ ayen vwọ tua ekuakua rẹ akpeyeren kidie nẹ ayen vwo igho? Me vwẹ ugbeyan vwo mu edafe, me me rha reyọ ẹro ri phovwin vwo nẹ ivwiogbere?’ Ọyen okpuphẹn ra vwọ dia erhorha ri Jihova, ọtiọyena e jẹ e ni uphẹn nana ghanghanre a kenoma kẹ ẹguọnọ rẹ igho. E de ru ọtiọyen, o vwo ọke vuọvo ri Jihova cha vwọ yanjẹ avwanre vwoo!​​—Se Hibru 13:5.

JIHOVA VWO ẸGUỌNỌ RẸ IGBEYAN RỌYEN

19. Diesorọ Jihova vwọ guọnọ nẹ avwanre ruẹ erọnvwọn eje ra ta ota kpahen vwẹ Une rẹ Ejiro 15?

¹⁹ Une rẹ Ejiro 15 kuphiyọ vẹ ive nana: “Ohwo ro ru imu nana e gbi se ghwie-e.” (Un 15:5) Ọbuine na vuẹ avwanre oboresorọ ro vwo fo nẹ avwanre ruẹ erọnvwọn eje ra ta ota kpahen vwẹ Une rẹ Ejiro 15. Jihova guọnọre nẹ oma vwerhen avwanre. Ọtiọyena, ọ kẹ avwanre odjekẹ rọ cha ghwa ebruphiyọ vẹ ochọnvwe rhe avwanre.​​—Aiz 48:17.

20. Die yen erhorha ri Jihova se rhẹro rọyen?

²⁰ Erhorha ri Jihova se rhẹro rẹ omamọ rẹ akpọ vwẹ obaro na. Ihwo ra jẹreyọ na cha dia odjuvwu rọ dia “asan” ri Jesu rhuẹrẹ phiyọ vwọ kẹ ayen. (Jọ 14:2) Ihwo ri vwo iphiẹrophiyọ re vwọ dia otọrakpọ na rhẹro rẹ ivẹ rọhẹ Ẹvwọphia 21:3. Vwọrẹ uyota, ọghọ rode yen Jihova bruphiyọ avwanre oma, ro vwo durhie avwanre nẹ a dia erhorha vwẹ utughẹ rọyen bẹdẹ!