1. Phisalema 15:1-5 i nga ri thusa hani?

 KHA thero yo fhiraho, ro guda uri vhashumeli vha Yehova vho ḓiṋekedzaho vha nga vha vhaeni denndeni ḽawe ḽa pfanyisedzo nga u vha na vhushaka ha tsini nae. Fhedzi ndi mini zwine zwa ṱoḓea uri ri vhe vhaeni vhawe? Hu na zwinzhi zwine ra nga zwi guda kha Phisalema 15 nga ha enea mafhungo. (Vhalani Phisalema 15:1-5.) Yeneyi Phisalema i ri vhudza zwine ra tea u ita uri ri vhe khonani dza Yehova.

2. Davida a nga vha o vha a tshi khou humbula nga ha mini musi a tshi amba nga ha dennde ḽa Yehova?

² Phisalema 15 i thoma nga u ri: “Iwe Yehova, ndi nnyi ane a nga vha mueni denndeni ḽau? Ndi nnyi ane a nga dzula thavhani yau khethwa?” (Ps. 15:1) Musi Davida a tshi amba nga ha ‘dennde,’ a nga vha o vha a tshi khou humbula nga ha dennde ḽikhethwa ḽe ḽa vha ḽi Gibeoni lwa tshifhinganyana. Davida o dovha a amba nga ha ‘thavha khethwa’ ya Yehova, khamusi a tshi khou ambela kha Thavha ya Tsioni ngei Yerusalema. Davida o vha o atha dennde khiḽomithara dzi ṱoḓaho u vha fumi tshipembe ha Gibeoni uri a vhee mbulungelo ya mulanga khaḽo u swika hu tshi fhaṱwa thembele.​—2 Sam. 6:17.

3. Ndi ngani ri tshi tea u vha na dzangalelo ḽa u guda Phisalema 15? (Sedzani tshifanyiso.)

³ Vhunzhi ha Vhaisiraele a vho ngo vhuya vha shuma denndeni ḽikhethwa nahone a si vhanzhi vhe vha dzhena he mbulungelo ya mulanga ya vha i tshi dzula hone. Fhedzi vhashumeli vha Yehova vhoṱhe vha fhulufhedzeaho vho vha vha tshi nga kona u vha vhaeni denndeni ḽa pfanyisedzo ḽa Yehova nga u vha khonani dzawe na u dzula vhe khonani dzawe. Zwenezwo ndi zwine roṱhe ra ṱoḓa. Phisalema 15 i ri vhudza uri ndi mini zwine zwa ṱoḓea uri ri dzule ri khonani dza Yehova.

 DZULANI NI TSHI FHULUFHEDZEA NA U ITA ZWO LUGAHO

4. Ri zwi ḓivha hani uri Yehova ha ṱoḓi ri tshi sokou lovhedzwa fhedzi zwa guma henefho? (Yesaya 48:1)

⁴ Kha Phisalema 15:2, khonani ya Yehova o ambiwa nga uri “ndi ane a fhulufhedzea, ane a ita zwo lugaho.” Zwenezwi ndi zwithu zwine ra tea u dzula ri tshi zwi ita. Fhedzi naa zwi a konadzea uri ri dzule ri tshi “fhulufhedzea”? Ee. Naho roṱhe ri na tshivhi, Yehova a nga ri dzhia ri tshi “fhulufhedzea” arali ra ita zwoṱhe zwine ra nga kona u itela u mu thetshelesa. Musi ri tshi ḓiṋekedzela kha Mudzimu na u lovhedzwa, zwi tou vha mathomo a lwendo lwashu na Yehova. Sa tsumbo, zwifhingani zwa Bivhili, u sokou vha Muisiraele a si zwone fhedzi zwe zwa vha zwi tshi ita uri muthu a fanelee u vha mueni nḓuni ya Yehova. Vhaṅwe Vhaisiraele vho vha vha tshi vhidzelela Yehova, fhedzi vha sa zwi iti “nga ngoho na nga zwivhuya.” (Vhalani Yesaya 48:1.) Vhaisiraele vha fhulufhedzeaho vho vha vha tshi tea u guda nga ha zwine Yehova a zwi funa na u zwi tevhedza. Nga hu fanaho, uri ri vhe na vhushaka ha tsini na Yehova ṋamusi, ri tea u ita zwo engedzeaho u fhira u lovhedzwa na u vhidzwa uri ri Ṱhanzi dzawe. Ri fanela u dzula ri tshi ita “zwo lugaho.” Zwenezwo ri nga zwi itisa hani?

5. U thetshelesa Yehova kha zwoṱhe zwi katela mini?

⁵ Kha Yehova u “fhulufhedzea” na u “ita zwo lugaho” zwi amba zwi fhiraho u ya miṱanganoni Holoni ya Ṱhanzi dza Yehova. (1 Sam. 15:22) Ri fanela u lwela u dzula ri tshi thetshelesa Yehova kha zwoṱhe zwine ra zwi ita musi ri sa vhonwi nga vhaṅwe. (Mir. 3:6; Muh. 12:13, 14) Ndi zwa ndeme uri ri dzule ri tshi thetshelesa Yehova na kha zwithu zwiṱuku. Musi ri tshi ita nga u ralo, ri ḓo vha ri tshi khou sumbedza uri ri a funa Mudzimu zwa vhukuma. Zwenezwo zwi ḓo ita uri na ene a ri fune nga ho engedzeaho.—Yoh. 14:23; 1 Yoh. 5:3.

6. U ya nga Vhahevheru 6:10-12, ndi mini zwine zwa vha zwa ndeme u fhira zwithu zwavhuḓi zwe ra zwi ita tshifhingani tsho fhiraho?

 ⁶ Yehova u a takalela zwe ra mu itela zwone tshifhingani tsho fhiraho. Fhedzi uri ro ita zwithu zwavhuḓi tshifhingani tsho fhiraho, a zwi ambi uri ri ḓo dzula ri vhaeni denndeni ḽa Yehova. Zwenezwi zwi bviselwa khagala nga zwine zwa vha kha Vhahevheru 6:10-12. (Vhalani.) Yehova ha hangwi zwithu zwavhuḓi zwe ra mu itela zwone tshifhingani tsho fhiraho. Fhedzi u ṱoḓa uri ri mu shumele nga mbilu dzoṱhe “u swika vhufheloni.” Arali ra dzula ri tshi ita zwo lugaho, u ḓo vha khonani yashu lwa tshoṱhe “arali ri sa neti.”​—Vhagal. 6:9.

AMBANI NGOHO MBILUNI YAṊU

7. U amba ngoho mbiluni dzashu zwi katela mini?

⁷ Muthu ane a ṱoḓa u vha mueni denndeni ḽa Yehova u tea u “amba ngoho mbiluni yawe.” (Ps. 15:2) Hezwi a zwi kateli fhedzi u sa zwifha. Yehova u ṱoḓa ri tshi fhulufhedzea kha zwoṱhe zwine ra amba na u ita. (Vhahev. 13:18) Zwenezwi ndi zwa ndeme “ngauri Yehova u vhenga wa vhufhura, fhedzi u vha khonani ya tsini-tsini na o lugaho.”​—Mir. 3:32.

8. Ndi vhuḓifari vhufhio vhune ra tea u vhu iledza?

⁸ Ane a “amba ngoho mbiluni yawe” ha ḓiiti u nga u thetshelesa Yehova musi e vhathuni, ngeno a sa tevhedzi milayo yawe musi e eṱhe. (Yes. 29:13) U iledza u vha na vhufhura. Muthu ane a vha na vhufhura a nga thoma u humbula uri a si tshifhinga tshoṱhe hune milayo ya Yehova ya vhuyedza. (Yak. 1:5-8) A nga thoma u sa thetshelesa Yehova kha zwithu zwine a vhona zwi si zwa ndeme. Zwi nga vhonala zwi tshi nga a hu na masiandoitwa a zwithu zwo khakheaho zwine a khou zwi ita nahone zwenezwo zwi nga ita uri a thome na u ita zwithu zwivhi nga ho kalulaho. Naho a tshi khou humbula uri u khou shumela Yehova, u vha a tshi khou ḓiḓodza museṱo maṱoni. (Muh. 8:11) Fhedzi riṋe ri ṱoḓa u fhulufhedzea kha zwoṱhe zwine ra ita.

9. Ri guda mini kha zwe zwa itea kha Nathanaele musi Yesu a tshi ṱangana nae lwa u tou thoma? (Sedzani tshifanyiso.)

⁹ Ndi zwa ndeme u vha muthu ane a “amba ngoho mbiluni yawe.” Zwenezwi ri zwi vhona musi Filipo a tshi ḓa na Nathanaele kha Yesu lwa u tou thoma. Naho Yesu o vha a sa athu vhuya a ṱangana na Nathanaele, o ri: “Vhonani Muisiraele ane a si vhe na vhufhura.” (Yoh.  1:47) Yesu o vha a tshi zwi ḓivha uri na vhaṅwe vhafunziwa vhawe vho vha vha tshi fhulufhedzea, fhedzi u fhulufhedzea ha Nathanaele ho vha ho khethea. Nathanaele o vha a tshi khakha u fana na riṋe, fhedzi o vha e si na muhoyo. Nṱhani hazwo, o vha a tshi fhulufhedzea kha zwithu zwoṱhe. Yesu o takalela zwenezwo kha Nathanaele nahone a mu khoḓa. Zwi tou pfala uri roṱhe ri a ṱoḓa Yesu a tshi ḓipfa nga u ralo nga ha riṋe.

10. Ndi ngani ri tshi tea u iledza u tshinya vhaṅwe dzina? (Yakobo 1:26)

¹⁰ Zwithu zwinzhi zwo ambiwaho nga hazwo kha Phisalema 15 zwi tshimbidzana na nḓila ine ra tea u fara ngayo vhaṅwe vhathu. Phisalema 15:3 i amba uri muthu ane a vha mueni denndeni ḽa Yehova ha ‘tshinyi vhaṅwe dzina nga lulimi lwawe, ha iteli muhura wawe vhuvhi, ha tshinyi khonani dzawe dzina.’ Musi ri tshi tshinya vhaṅwe dzina, zwi nga vha vhaisa nga maanḓa nahone zwa ita uri Yehova a si tsha ri tendela u vha vhaeni denndeni ḽawe.​—Vhalani Yakobo 1:26.

11. Hu nga itea mini kha muthu ane a tshinya vhaṅwe dzina arali a sa rembuluwa?

¹¹ Muphisalema o amba nga ha u tshinya vhaṅwe dzina. Muthu a nga tshinya vhaṅwe dzina nga u amba mazwifhi nga havho na u vha isedzela phungo mmbi. Vhane vha tshinya vhaṅwe dzina nahone vha si rembuluwe vha ḓo bviswa tshivhidzoni.​—Yer. 17:10.

12-13. Ndi kha vhuimo vhufhio hune ra nga wela tshikwekweni tsha u tshinya khonani yashu dzina? (Sedzani tshifanyiso.)

¹² Phisalema 15:3 i dovha hafhu ya ri humbudza uri vhathu vhane vha vha vhaeni denndeni ḽa Yehova a vha iteli vhahura vhavho vhuvhi nahone a vha tshinyi khonani dzavho madzina. Ri nga tshinya hani khonani yashu dzina?

¹³ Ri nga tshinya muṅwe dzina ri songo ḓiimisela nga u amba mafhungo a si avhuḓi nga hae. Humbulani nga ha vhuimo vhu tevhelaho: (1) wahashu wa tshifumakadzini ha tsha vha muvulanḓila wa tshifhinga tshoṱhe, (2) vhavhingani vho ṱuwa Bethele, kana (3) wahashu ha tsha vha muhulwane kana mushumeli. Naa zwi  nga vha zwavhuḓi u humbulela uri ndi ngani ho itwa dzenedzo tshanduko na u vhudza vhaṅwe mahumbulele ashu? Hu nga vha hu na zwiitisi zwinzhi zwine ri si zwi ḓivhe zwa uri hu vhe na dzenedzo tshanduko. Nahone ri tea u humbula uri mueni denndeni ḽa Yehova ha ‘iteli muhura wawe vhuvhi, na u tshinya khonani yawe dzina.’

HULISANI VHANE VHA OFHA YEHOVA

14. Ṱalutshedzani uri vhaeni vha Yehova vha landula hani “a nengisaho.”

¹⁴ Phisalema 15:4 i amba uri khonani ya Yehova i “landula a nengisaho.” Ri zwi ḓivha hani arali muṅwe muthu a tshi nengisa? Sa vhathu vha re na tshivhi, a ri ho kha vhuimo vhune ra nga amba uri muṅwe muthu u a nengisa. Ndi ngani? Zwi nga itea ra funa vhaṅwe vhathu nga nṱhani ha zwine vha vha zwone kana ra vhenga vhaṅwe ngauri ri sokou pfa vha tshi ri dina kana ra sokou pfa ri sa vha takaleli. Ndi ngazwo ri tshi tea u landula vhane Yehova a wana vha tshi ‘nengisa.’ (1 Vhakor. 5:11) Zwenezwi zwi katela vhathu vhane vha ita zwivhi vha sa rembuluwi, vhane vha nyadza zwine ra tenda khazwo kana vhane vha lingedza u tshinya vhushaka hashu na Yehova.​—Mir. 13:20.

15. Ndi ifhio iṅwe nḓila ine ra nga hulisa ngayo “vhane vha ofha Yehova”?

¹⁵ Phisalema 15:4 i dovha ya amba uri ri hulise “vhane vha ofha Yehova.” Ngauralo, ri ṱoḓa nḓila dza u sumbedza khonani dza Yehova vhuthu na ṱhonifho. (Vharoma 12:10) Nga nḓila-ḓe? U ya nga Phisalema 15:4, iṅwe nḓila ine ra nga zwi ita ngayo ndi nga u ‘ita zwe ra fhulufhedzisa, naho zwi tshi konḓa.’ Musi ri sa iti zwe ra fhulufhedzisa, zwi vhaisa vhaṅwe. (Mat. 5:37) Sa tsumbo, Yehova u lavhelela uri vhaeni vhawe vho vhinganaho vha ite zwe vha fhulufhedzisa musi vha tshi vhingana. Zwiṅwe hafhu, Yehova u a takala musi a tshi vhona vhabebi vha tshi lingedza nga nungo dzoṱhe u ita zwe vha fhulufhedzisa vhana vhavho. Ngauri ri funa Mudzimu na vhahura vhashu, ri ḓo ita zwoṱhe zwi re maanḓani ashu uri ri ite zwoṱhe zwe ra fhulufhedzisa.

16. Ndi ifhio iṅwe nḓila ine ra nga hulisa ngayo khonani dza Yehova?

¹⁶ Iṅwe nḓila ine ra nga hulisa ngayo khonani dza Yehova ndi nga u ṱanganedza vhaeni na u vha na mafunda. (Vharoma 12:13) Musi ri tshi fhedza tshifhinga ri tshi khou ḓimvumvusa na vhahashu zwi ri thusa u khwaṱhisa vhukonani hashu navho na u khwaṱhisa vhukonani hashu na Yehova. Zwiṅwe hafhu, musi ri tshi ṱanganedza vhaeni ri vha ri tshi khou edzisa Yehova.

NI SONGO FUNA TSHELEDE

17. Ndi ngani Phisalema 15 i tshi amba nga ha tshelede?

¹⁷ Kha Phisalema 15, ri vhala uri mueni wa Yehova ha ‘hadzimisi tshelede u itela u wana nzwalelo, ha ṱanganedzi tshanḓanguvhoni musi ho hwelelwa a si na mulandu.’ (Ps. 15:5) Ndi ngani yeneyi Phisalema i tshi amba nga ha tshelede? Ndi ngauri u vha na mavhonele a songo linganyiselwaho nga ha tshelede zwi nga vhaisa vhaṅwe na u tshinya vhushaka hashu ha Mudzimu. (1 Tim. 6:10) Zwifhingani zwa Bivhili, vhaṅwe vho vha vha tshi fara vhahavho vha shayaho nga nḓila i si yavhuḓi nga u ṱoḓa nzwalelo musi vha tshi vha hadzimisa tshelede. Na vhaṅwe vhahaṱuli vho vha vha tshi ṱanganedza tshanḓanguvhoni, vha haṱula vhathu vha si na mulandu nga nḓila i songo teaho. Musi vhathu vha tshi ita zwithu zwo raloho, Yehova u a zwi vhenga.​—Hesek. 22:12.

18. Ndi mbudziso dzifhio dzine dza nga ri thusa u ṱolisisa nḓila ine ra dzhia ngayo tshelede? (Vhahevheru 13:5)

¹⁸ Ndi zwavhuḓi u ṱolisisa nḓila ine na ḓipfa ngayo nga ha tshelede. Ḓivhudziseni uri: ‘Naa tshifhinga tshinzhi ndi ḓiwana ndi tshi khou humbula nga ha tshelede na zwine nda nga renga? Arali ndo hadzimiwa tshelede, naa ndi a lenga u i badela murahu ngauri ndi vhona u nga  muthu we a nkhadzima yeneyo tshelede u na tshelede nnzhi? Naa u vha na tshelede zwi ita uri ndi ḓipfe ndi wa khwine kha vhaṅwe? Naa zwi ita uri zwi nkonḓele u vha na mafunda? Naa ndi vhona u nga wahashu a re na tshelede nnzhi u funesa tshelede u fhira Yehova? Naa ndi konana fhedzi na vhathu vho pfumaho nda litsha vhashai?’ Ndi zwa ndeme u ḓivhudzisa dzenedzi mbudziso ngauri ro rambiwa u vha vhaeni vha Yehova. Arali ra ita vhungoho ha uri a ri funi tshelede, ri nga kona u dzula ri vhaeni vha Yehova. Arali ra ita nga u ralo, Yehova a nga si vhuye a ri ṱutshela.​—Vhalani Vhahevheru 13:5.

YEHOVA U FUNA KHONANI DZAWE

19. Ndi ngani Mudzimu a tshi ṱoḓa ri tshi ita zwithu zwo ambiwaho kha Phisalema 15?

¹⁹ Phisalema 15 i fhedzisela nga u fhulufhedzisa uri: “Ane a ita zwenezwi zwithu ha nga vhuyi a dzinginyea.” (Ps. 15:5) Henefha muphisalema u ṱalutshedza uri ndi ngani Yehova a tshi ṱoḓa ri tshi ita zwenezwi zwithu zwe zwa ambiwa kha yeneyi phisalema. Yehova u ṱoḓa ri tshi takala. Musi ri tshi ita zwenezwi zwithu zwine Mudzimu a funa, u ḓo ri fhaṱutshedza na u ri tsireledza.​—Yes. 48:17.

20. Vhaeni vha Yehova vha nga lavhelela mini?

²⁰ Vhaeni vha Yehova vho lavhelela vhumatshelo havhuḓi. Vhaḓodzwa vha fhulufhedzeaho vha ḓo wana “vhudzulo vhunzhi” he Yesu a vha fhulufhedzisa hone ngei ṱaḓulu. (Yoh. 14:2) Vhane vha vha na fhulufhelo ḽa u tshila tshoṱhe kha ḽifhasi vho lavhelela u vhona hu tshi itea zwi re kha Nzumbululo 21:3. Ri pfa ro huliswa zwihulu nge Yehova a ri ramba uri ri vhe khonani dzawe na uri ri vhe vhaeni denndeni ḽawe lwa tshoṱhe.