STÙDIO 24
CÀNTICO 24 Vegné al monte de Geovà!
Sìpia amigo de Geovà par sempre!
“Ò Geovà, chi che pol esser òspede nela to tenda?” — SAL. 15:1.
COSSA CHE NDAREMO IMPARAR?
Ndaremo imparar cossa che Geovà el vol che femo par seitar a esser so amighi e come che lu el speta che tratemo i so amighi.
1. Cossa che el Salmo 15:1-5 el ne giuta a capir?
NEL STÙDIO vanti, ghemo imparà che i servi dedicadi de Geovà che i ga una granda amicìssia con lu i pol ndar rento la so tenda. Ma cossa che ghemo de far par seitar a esser so amighi? El Salmo 15 el ne giuta a capir quel che ghemo de far par seitar gaver una forte amicìssia con Geovà. — Ledi Salmo 15:1-5. a
2. Cossa che Davi fursi l’era drio pensar quando el ga parlà dela tenda de Geovà?
2 El Salmo 15 el scomìnsia cossita: “Ò Geovà, chi che pol esser òspede nela to tenda? Chi che pol viver nel to santo monte?” (Sal. 15:1) Quando Davi el ga parlà sora la “tenda” de Geovà, fursi l’era drio pensar sora el tabernàcolo che ghen’era in Gibeon. Anca quando Davi el ga parlà sora el “santo monte” de Dio, fursi l’era drio pensar sora el monte Sion in Gerusalen. In quel monte, che l’era a tanti chilòmetri al sud de Gibeon, Davi el gavea metesto una tenda par la Arca del Acordo, intanto che no’l fusse fato el témpio. — 2 Sam. 6:17.
3. Parché che sarà bel studiar el Salmo 15? (Varda anca la ilustrassion.)
3 Pochi israeliti i ga laorà rento el tabernàcolo, e manco ancora i ga podesto ndar rento ndove che ghen’era la Arca del Acordo. Ma tuti i servi de Geovà i podea ndar rento la so tenda, o sia, esser so amighi. Questa la ze una roba che tuti noantri volemo. Par quela, sarà bel studiar el Salmo 15 che el parla de arquante qualità che ne ocore gaver par seitar a esser amighi de Geovà.
Par i israeliti dei giorni de Davi, l’era fàcile capir cossa che volea dir esser rento la tenda de Geovà (Varda el paràgrafo 3. )
VIVI SENSA COLPA E FÀ QUEL CHE L’È GIUSTO
4. Parché che savemo che ne ocore far de pi che sol esser batesadi? (Isaia 48:1)
4 El Salmo 15:2 dise che un amigo de Dio ‘el vive sensa colpa e el fà quel che l’è giusto’. Questo vol dir che ghemo de seitar a viver “sensa colpa” e seitar a ‘far quel che l’è giusto’. Ma sarà che noantri podemo pròpio ‘viver sensa colpa’? Si. Tuti noantri semo imperfeti, ma se femo el nostro meio par obedir a Geovà, lu el ne vede come persone “sensa colpa”. Cossita capimo che, par esser amighi de Dio, ghemo de far de pi che sol dedicarse e batesarse. Par esémpio, nel tempo dela Bìblia, le persone no le era amighe de Geovà sol parché le nassea nela nassion de Israel. Arquanti i disea che i era drio servir a Dio ma ‘sensa esser sinsieri e giusti’. (Ledi Isaia 48:1. b) E in quel tempo, i israeliti che i volea esser amighi de Geovà i gavea de imparar de Dio. Dela medèsima maniera, ancoi no basta batesarse e dir che semo Testimònie de Geovà par deventar so amighi. Invesse, ghemo de seitar ‘far quel che l’è giusto’. Come che podemo far cossita?
5. Cossa che vol dir obedir a Geovà in tute le robe?
5 Par Geovà, ‘viver sensa colpa e far quel che l’è giusto’ l’è de pi che sol ndar ale riunion nel Salon del Regno. (1 Sam. 15:22) Noantri ghemo de sforsarse de obedir a Dio in tute le robe che femo, anca quando semo noantri soli. (Pro. 3:6; Ecl. 12:13, 14) L’è importante sforsarse de obedir a Geovà, anca nele robe pi pìcole. Se femo cossita, mostremo che amemo a Geovà, e lu el ne amarà ancora de pi. — Gio. 14:23; 1 Gio. 5:3.
6. De acordo con Ebrei 6:10-12, cossa che ghemo de far se volemo seitar esser amighi de Geovà?
6 Geovà el dà tanto valor a tuto quel che ghemo fato par lu nel passà. Ma Ebrei 6:10-12 mostra che sol saremo so amighi par sempre se seitemo a far el nostro meio par lu. (Ledi. c) L’è vera che Geovà no’l se desmentega dele robe bone che ghemo fato nel passà. Ma lu el vol che seitemo a adorarlo con tuto el cuor “fin el fin”. Lu el sarà el nostro amigo par sempre “se no desanimemo”. — Gàl. 6:9.
PARLA LA VERITÀ NEL TO CUOR
7. Cossa che vol dir parlar la verità nel cuor?
7 Quei che i vol esser amighi de Geovà i ga de ‘parlar la verità nel so cuor’. (Sal. 15:2) Sarà che parlar la verità nel cuor vol dir sol no contar busie? Nò. Invesse, Geovà el vol che se sforsemo de esser sempre sinsieri in quel che femo e parlemo. (Ebr. 13:18) Parché che ghemo de far cossita? ‘Parché Geovà el òdia quei che i ze falsi, ma el ga una forte amicìssia con quei che i ze giusti’. — Pro. 3:32.
8. Cossa che mai ghemo de far?
8 Quei che i “parla la verità nel so cuor” i obedisse a Geovà anca quando i ze lori soli. (Isa. 29:13) Quei che i obedisse a Geovà sol quando i altri i li vede le ze persone false. Una persona cossita la scomìnsia a pensar che obedir ale lege de Geovà no l’è mia la meio roba de far. (Tia. 1:5-8) Una persona falsa la desobedisse a Geovà in robe che no ghe par importante. Quando la vede che no ghe sucede gnente, ela la scomìnsia a far robe ancora pedo. Anca se ela la pensa che la ze drio servir a Dio, Geovà no’l aceta quel che la fà par lu. (Ecl. 8:11) Invesse, noantri volemo esser sinsieri in tuto quel che disemo e giusti in quel che femo.
9. Cossa che te ghè imparà dela prima volta che Gesù el se ga catà con Natanael? (Varda anca la ilustrassion.)
9 L’è tanto importante parlar la verità nel nostro cuor. Quel che ga sucedesto quando Filipe el ga convidà el so amigo Natanael par catar Gesù ne insegna pròpio questo. Gesù el ga dito: ‘Eco, questo l’è un vero israelita che no l’è falso.’ (Gio. 1:47) Gesù el savea che anca i altri dissìpoli i era sinsieri, ma Natanael l’era pi sinsiero ancora. Anca se el fusse imperfeto, lu l’era sempre sinsiero e sempre el parlea pròpio quel che el pensea. Gesù ghe ga piasesto tanto la sinsierità de Natanael e lo ga lodà. L’è sicuro che volemo che Gesù el pense cossita anca de noantri.
Quando Gesù el ga cognossesto Natanael, el ga dito che lu l’era un omo sinsiero che sempre el parlea la verità. Sarà che Gesù el vede a noantri dela stessa maniera? (Varda el paràgrafo 9.)
10. De acordo con Tiago 1:26, parché che mai ghemo de parlar busie sora i altri?
10 Nel Salmo 15, catemo come che Geovà el speta che noantri tratemo i altri. El Salmo 15:3 dise che el amigo de Geovà “no’l dise busie sora altre persone, no’l fà gnente de mal al so pròssimo e no’l parla mal dei so amighi”. Se noantri contemo busie sora i altri, podarìssino assarli tanto disgustadi e perder la nostra amicìssia sora Geovà. — Ledi Tiago 1:26. d
11. Cossa che una persona che la dise busie sora i altri la fà, e cossa che sucede se ela no la se ciama grama?
11 Nel Salmo 15, Davi anca el parla de quei che i dise busie sora altre persone. Quei che i fà questo i pol rovinar la reputassion dei altri. Se una persona che la conta busie sora i altri no la se ciama grama, ela no la pol pi esser una Testimònia de Geovà. — Ger. 17:10.
12-13. Come che podarìssino rovinar la reputassion dei altri sensa nicorderse? (Varda anca el ritrato.)
12 El Salmo 15:3 anca el ne ricorda che i amighi de Geovà no i conta busie e no i rovina la reputassion dei so amighi. Come cossita?
13 Se noantri parlemo in volta informassion sora altre persone, podemo rovinar la so reputassion sensa nicorderse. Metemo dir che (1) una sorela la se ga fermà de esser pioneira, (2) un casal no’l serve pi in Betel e (3) un fradel no l’è pi ansiano o servo ministerial. Saria tanto bruto proar indovinar parché questi fradei e sorele i ga bio de far questi cambiamenti e dir ai altri che pensemo che lori i ga fato qualcossa de sbalià. Ghemo de ricordarse che ghen’è robe che noantri no savemo. Alora, un amigo de Geovà ‘no’l ga de dir busie sora le altre persone gnanca parlar mal dei so amighi’.
Sensa nicorderse, pol esser che parlemo qualcossa de bruto sora i nostri fradei che podaria rovinar la so reputassion (Varda i paràgrafi 12 e 13.)
DAGHE ONOR A QUEI CHE I TEME A GEOVÀ
14. De chi che Geovà el vol che restemo distanti?
14 El Salmo 15:4 el dise che quel che l’è amigo de Geovà “no’l aceta quel che l’è rugno”. Ma sarà che podemo dir che una persona la ze rugna de acordo con quel che pensemo o de quel che ne piase? Sicuro che nò. Come semo imperfeti, pol esser che pensemo che qualchedun l’è rugno sol parché no ghe volemo tanto ben o parché el ne dà fastìdio. Par quela, ghemo de restar distanti dele persone che Geovà el dise che le ze ‘rugne’. (1 Cor. 5:11) Par esémpio, quei che i fà robe sbaliade e no i se ciama grami, quei che no i rispeta quel che credemo o quei che i proa rovinar la nostra amicìssia con Geovà. — Pro. 13:20.
15. Come che podemo dar onor a quei che i ama a Geovà?
15 El Salmo 15:4 el dise che ghemo de ‘darghe onor a quei che i teme a Geovà’. Cossita, ghemo de catar fora maniere de mostrarghe rispeto e bontà ai amighi de Dio. (Rom. 12:10) Come che podemo mostrar bontà e rispeto ai nostri fradei? El Salmo 15:4 el mostra che mai ghemo de ‘cambiar la nostra promessa, anca se quel che ghemo prometesto no l’è mia bon par noantri’. Se no femo quel che ghemo prometesto a qualchedun, fursi lo faremo sofrir tanto. (Mat. 5:37) Come amemo tanto a Geovà e ai altri, volemo sforsarse par sempre far quel che ghemo prometesto. Par esémpio, Geovà el speta che el omo e la dona i fae quel che i ga prometesto nel giorno che i se ga maridà. Lu anca el vol che el pare e la mare i fae quel che i promete ai so fioi.
16. Come ancora podemo darghe onor ai nostri fradei?
16 Noantri anca podemo dar onor ai nostri fradei quando ghe mostremo bontà e li convidemo par restar insieme de noantri. (Rom. 12:13) Ghemo de doperar ben el tempo che ghemo coi nostri fradei nele riunion, nela predicassion e anca in altre ore. Cossita, faremo pi forte la nostra amicìssia con lori e con Dio. E quando ghe mostremo bontà ai nostri fradei e li convidemo par restar insieme, semo drio far compagno a Geovà.
NO STÀ AMAR I SOLDI
17. Parché che Davi el ga parlà sora soldi nel Salmo 15?
17 El Salmo 15:5 el dise che i amighi de Geovà ‘no i impresta i so soldi par guadagnar sora, e no i aceta un presente par acusar el inossente’. Parché che Davi el ga parlà sora soldi nel Salmo 15? Se no stemo atenti, pol esser che i soldi i deventa pi importanti che i altri o fin pi importante che la nostra amicìssia con Geovà. (1 Tim. 6:10) Nel passà, arquanti ghe dea soldi in préstio ai so fradei poareti sol par dopo guadagnar de pi. E arquanti giuisi i acetea soldi par condanar una persona che no la gavea fato gnente de sbalià. Sicuro che Geovà el restea tanto disgustà de veder queste robe. — Eze. 22:12.
18. Che domande ghemo de farse sora i soldi? (Ebrei 13:5)
18 Alora, l’è tanto importante pensarghe sora come vedemo i soldi. Par esémpio, proa domandarte: ‘Seito a pensar sora i soldi e cossa che ancora posso comprar? Se mi ciapo soldi in préstio de qualchedun, ghe meto una mùcia de tempo par pagarghe parché penso che no ghe ocore mia? Se go soldi, penso che son pi importante che i altri? Sarà che me fà fadiga doperar quel che go par mostrar bontà ale persone? Sarà che penso che i fradei e le sorele che i ga capital i ama de pi i soldi che a Geovà? Sarà che vui esser amigo de quei che i ze siori e ghe dao poco valor ai poareti?’ Le risposte a queste domande le ndarà mostrarne se volemo pròpio seitar a esser amighi de Geovà. Se mai amemo i soldi, Geovà el sarà sempre con noantri! — Ledi Ebrei 13:5. e
GEOVÀ EL AMA I SO AMIGHI
19. Parché che Geovà el vol che ghe obedimo?
19 Nel fin del Salmo 15, Geovà el fà la promessa: “Quel che el fà queste robe restarà sempre firme.” (Sal. 15:5) Questo versìcolo el mostra parché che Geovà el vol che femo quel che ghemo imparà in questo stùdio. Lu el vol che semo felici! Cossita, quando ghe obedimo, lu el ne benedisse e el ne protege. — Isa. 48:17.
20. Che bela speransa i amighi de Geovà i ga par el futuro?
20 I amighi de Geovà i ga una bela speransa par el futuro. Par esémpio, i untadi i ga la speransa de viver in cielo e governar insieme a Gesù. (Gio. 14:2) E quei che i ga la speransa de viver nela Tera i ze premosi de veder suceder quel che dise in Apocalisse 21:3. Sicuro che tuti noantri restemo tanto contenti de esser rento la tenda de Geovà e esser so amighi par sempre!
CÀNTICO 40 De chi che ti te sì?
a (Salmo 15:1-5) Ò Geovà, chi che pol esser òspede nela to tenda? Chi che pol viver nel to santo monte? 2 Quel che el vive sensa colpa, che el fà quel che l’è giusto e che el parla la verità nel so cuor. 3 Lu no’l dise busia sora altre persone, no’l fà gnente de mal al so pròssimo e no’l parla mal dei so amighi. 4 Lu no’l aceta quel che l’è rugno, ma el dà onor a quei che i teme a Geovà. No’l càmbia la so promessa, anca se quel che el ga prometesto no l’è mia bon par lu. 5 No’l impresta i so soldi par guadagnar sora, e no’l aceta un presente par acusar el inossente. Quel che el fà queste robe restarà sempre firme.
b (Isaia 48:1) Ò casa de Giacò, scolté. Valtri che ve ciamé par el nome de Israel e che vegné de Giudà. Valtri che giuré par el nome de Geovà e domandé aiuto al Dio de Israel, ma no sì mia sinseri e gnanca giusti.
c (Ebrei 6:10-12) Dio no l’è mia ingiusto par desmentegarse del vostro laoro e del amor che gavé dimostrà par el so nome, par servir i santi e par continuar a servirli. 11 Ma volemo che tuti valtri seité a sforsarve del bon par esser pròpio sicuri dela vostra speransa fin el fin. 12 Cossita, no sìpie pegri, ma fé compagno de quei che con fede e passiensa i riceve le promesse.
d (Tiago 1:26) Se qualchedun el cata che el adora a Dio ma no’l tende la so léngua, lu l’è drio imbroiar el so pròpio cuor e la so maniera de adorar no la val gnente.
e (Ebrei 13:5) La vostra maniera de viver la ga de mostrar che no amé mia i soldi. Sté contenti cole robe che valtri gavé. Parché lu el ga dito: “Mi mai vao assarte e mai vao abandonarte.”
