MWAHA ONTHOKORORIWA 24
ETXIPO 24 Rwaani Omwako wa Yehova
Mukhale muletto a Yehova mahiku ootheene!
“Yahvéh, opwanenle tani ohaya mmukotthani mwanyu?” — NSAL. 15:1.
ELE NINKELAHU OOXUTTERA
Ninrowa wiiwexexa etthu nintthuneyaahu opaka weera nivirelele okhala asinthamwene a Yehova ni moota nintthuneyaahu waathokororaka asinthamwene a Yehova.
1. Nsalmu 15:1-5 ninkela onikhavihera moota heeni?
YOOSOMA evinre, hiyo nooxuttera weera mutthu onvaherera ekumi awe wa Yehova, pooti okhala nthamwene awe ni ovolowa mu ehema awe ya nthoonyero. Mene moota heeni ninrowaahu ovirelela okhala aletto mu eheema ya Yehova? Nsalmu 15 ninnuuluma voohima sa mwaha owo. (Musome Nsalmu 15:1-5.) Nsalmu nna nniiwanyeiha etthu nintthuneyaahu opaka weera nivirelele okhalano onthamwene woolipa ni Yehova.
2. Davidi uupuwelela eheeni vaavo uulumaawe voohima sa ehema ya Yehova?
2 Yoolepa ya Nsalmu 15 empatxera ni masu ooweera: “Yahvéh, ophwanenle tani ohaya mmukotthani mwanyu? Ophwanenle tani olekela vamwako vanyu vottela?” (Nsal. 15:1) Vaavo Davidi uulumaawe sa ‘mukottha,’ wa Yehova apaale owo uupuwela sa ehema yeeyo yaakhala vakhiviru ni Giboni. Mwa etempu ele, Davidi aahuuluma-tho voohima sa ‘mwaako wootteela’ wa Muluku, onooneya weera owo aahima mwaako Siyoni yoowo waakhala oYerusalemu. Vamwaako vawo, yoowo waakhala ikilometru sintxipale sooraakamelana ni Giboni, David aaheemexa ehema weera ahelevo nivuku na nivarihano awehereraka otekiwa nipuro nenno naarowaaya okhalavo wa mahiku ootheene. — 2 Sam. 6:17.
3. Mwaha wa heeni nintthuneyaahu wiiwexexa ele Nsalmu 15 onhimaawe? (Nwehe efootu.)
3 Ekhaikhai weera, khiwaawereya Ana a Israeli antxipale ovara mu ehema, naari ovolowa nipuro nenno naakhalaayavo nivuku na nivarihano. Mene arumeyi ootheene oororomeleya a Yehova, yannaakhuleliwa okhala aletto mu ehema ya ethoonyero ya Yehova, awo yannapaka eyo evirelelaka okhala asinthamwene a Yehova. Ni eyo ti etthu ootheene hiyo nintthunaahu. Nsalmu 15, onnuuluma voohima sa mikhalelo mikina hiyo nintthuneyaahu wunnuwihera ni woonihera weera nivirelele okhala asinthamwene a Yehova.
Wa ana a Israeli yaakhala etempu ya Davidi, waari wookhweya wiiwexexa ele entaphulelaaya okhala muletto mu ehema ya Yehova (Nwehe eparagrafu 3)
MWEETTEKE MOOROROMELEYA NI MPAKEKE ITTHU SOOREERA
4. Ninsuwela moota heeni weera Yehova ontthuna weera nipakeke itthu ikina ohiya paahi obatiziwa? (Yesaya 48:1)
4 Nsalmu 15:2, ninhima weera nthamwene a Muluku “t’ole onètta ahipahulaka etthu, onèra sa exariya” masu ooweera ‘weetta’ ni ‘weera’ ennoonihera weera nintthuneya ovirelela opaka eyo. Mene neereke ninnawera ‘weetta moororomeleya’? Aani. Ekhaikhai weera, khaavo omalenle, mene wa Yehova hiyo ‘ninneetta moororomeleya’ vaavo nimpakaahu ele ninweraahu weera nimwiiwelele. Vaavo niivaherenraahu wa Muluku ni obatiziwa, hiyo naamweera opatxera paahi weetta ni Muluku. Mene moone weera khalayi, weerela eparte nloko na Israeli khiwaamweeriha mutthu okhala muletto a Yehova. Atthu akina yiihima omukokhorela Muluku mene khiyaapaka eyo ‘mweekhaikhai nnakhala mwa exariya.’ (Mmusome Yesaya 48:1.) Ana a Israeli yaatthuna okhala aletto a Yehova yannatthuneya oxuttera itthu Yehova aatthunaawe ni opaka itthu iyo. Moolikana ni eyo, weera naakhuleliwe ni Yehova olelo va, nintthuneya opaka itthu ikina ohiya paahi obatiziwa ni weera miyo ka Namoona a Yehova. Nintthuneya ovirelela ‘opaka itthu sooreera.’ Eyo entaphulela eheeni?
5. Ontaphulela eheeni omwiiwelela Yehova mwa itthu sootheene?
5 Vamaithoni va Yehova, ‘weetta moororomeleya’ ni ‘opaka sooreera’ khontaphulela pahi woonela mithukumano empa ya Omwene. (1 Sam. 15:22) Hiyo nintthuneya wiilipihera vantxipale omwiiwelela Yehova mwa mikhalelo sootheene sa mweekumini mwahu, ohela mpuwa emara ninkhalaahu meekhaahu. (Mir. 3:6; Koh. 12:13, 14) Tivootthuneya ovirelela omwiiwelela Yehova ni itthu seiye nnoonaahu weera khaiyene ti sootthuneya. Napaka eyo nniimoonihera weera veekhaikhai ninnamusivela Yehova, ni owo onoovirelela onisivela mwaha woopaka eyo. — Yoh. 14:23; 1 Yoh. 5:3.
6. Moovarihana ni Aheberi 6:10-12, etthu heeni yootepa otthuneya opwaha itthu nipankaahu khalayi?
6 Yehova onnavaha mwiitti itthu nipankaahu khalayi, mene hiyo khontthuneya ororomela weera nnoovirelela okhala aletto mu ehema ya Yehova mwaha wa itthu iyo nipankaahu khalayi. Eyo ennooneya nnene va Aheberi 6:10-12. (Mmusome.) Ekhaikhai weera Yehova khonrowa ottuwala itthu sooreera nipankaahu khalayi. Mene owo ontthuna weera hiyo nivireleleke omukokhorela ni murima wootheene “mpaka wokiserani.” Nave hiyo nnoorowa okhala asinthamwene awe mahiku oothene “nahòtxeyá.” — Agal. 6:9.
MUULUMEKE EKHAIKHAI VAMURIMANI
7. Ontaphulela eheeni wuuluma ekhaikhai vamurimani?
7 Mutthu ontthuna weera aakhuleliwe okhala muletto mu ehema ya Yehova, ontthuneya ‘wuuluma ekhaikhai vamurimani vawe.’ (Nsal. 15:2) Onnatthuneya opaka eyo ohiya paahi ohootha. Ohiya paahi ohima ekhaikhai emaara nnuulumaahu, nintthuneya ororomeleya mwa itthu sootheene nimpakaahu. (Aheb. 13:18) Eyo tiyootthuneya, “niwoko Yahvéh onnamuthanya mutakhali, vahera onthamwene’awe ti wa anaxariya.” — Mir. 3:32.
8. Eheeni nintthuneyaahu osepa opaka?
8 Mutthu ‘onuuluma ekhaikhai vamurimani vawe,’ khonootherera ororomeleya wa Yehova waattiwavo, mene emara emoharu ohimmwiiwelela akhala meekhaawe. (Yes. 29:13) Moovirikana ni eyo, mutthu owo onnasepa okhala oowootha. Mutthu oowootha pooti opatxera wuupuwelaka weera khaiyene ti wooreera otthara malamulo a Yehova. (Yak. 1:5-8) Owo pooti opatxera ohimwiiwelela Yehova mwa itthu seiyo sinkhala ntoko khaiyene ti sootthuneya, ni emaara yeeyo onoonaawe ehimukhumelelaka etthu mwaha woohiroromeleya wawe, owo pooti opaka itthu itokweene. Nnaamweera mutthu owo uupuwelaka weera onanvarela Muluku, Yehova khonaakhulela okokhorela wawe. (Koh. 8:11) Mene hiyo, nintthuna okhala oororomeleya mwa itthu sootheene.
9. Tiheeni yeereñye emaara Yesu aamusuwenlaawe Natanayeli, ni ninxuttera eheeni ni eyo? (Nwehe efootu.)
9 Hiyo pooti oxuttera itthu ikina woohima sa otthuneya waya okhala atthu eekhaikhai noonaka etthu yeereñye emaara yeeyo Yesu aamusuwenlaawe Natanayeli ekwaha yoopatxera. Vaavo Filipe aamusuwelinhaawe nthamwene awe Natanayeli wa Yesu, yaaheereya etthu yootikiniha. Nnaamweera Yesu ahaamusuwenle Natanayeli, owo enre: “Mmòne vá mwisraeli a ekhaikhai: mwa yowo khawamomo wotha.” (Yoh. 1:47) Ekhaikhai weera Yesu annawoona oohusera awe okhala atthu oororomeleya, mene Yesu aahoona wa Natanayeli etthu yootikiniha. Hiiha ntoko hiyo, Natanayeli aari oohimalela-tho. Mene owo khaiyene aari mutthu oowootha, owo aari oororomeleya mwa itthu sootheene. Yesu aatikiniheya ni eyo, ni aamuttottopela Natanayeli. Nyuwo khamunoona weera yaarowa okhala etthu yootepa oreera Yesu wuuluma etthu ntoko ela oohimakani nyuwo!
Filipe aamusuweliha nthamwene awe Natanayeli wa Yesu, mulopwana yoowo aari eekhaikhai ni axariya. Neereke Yesu aamuhima etthu emoharu voohima sa hiyo? (Nwehe eparagrafu 9)
10. Mwaha wa heeni nintthuneyaahu wiikosoopa ni itthu nnuulumaahu? (Yakobe 1:26)
10 Malamulo mantxipale nimphwanyaahu va Nsalmu 15, envarihana ni moota nnaathokororaahu atthu akina. Yoolepa ya Nsalmu 15:3 enhima weera muletto onkhala mu ehema ya Yehova “t’ole ohinòtha ni nlumi nawe nari ohinamwèrela sonanara mukhw’awe, nari ohinamwàluxa namwattaman’awe.” Wakhala weera hiyo nnimootha woohima sa mutthu mukina, eyo pooti omuxupa mutthu owo ni mwaha wa yeeyo Yehova pooti ohinaakhulela okhala aletto awe. — Mmusome Yakobe 1:26.
11. Wootha ti heeni, ni eheeni eneereya ni mulipa oowootha ohinttharuwa?
11 Davidi ohuuluma voohima sa wootha. Wootha ti heeni? Wootha onhela mpuwa wuuluma itthu soowootha voohima sa mutthu mukina, seiyo sinkela onanariha mikhalelo sawe. Mutthu onootha naari ommoothera mukhwaawe ahinttharuwa, khamphwanela-tho ovirelela okhala Namoona a Yehova. — Yer. 17:10.
12-13. Mwa itthu heeni naarowaahu owaaluxa murima asinthamwene ahu? (Nwehe efootu.)
12 Nave-tho Nsalmu 15:3, ninnanuupuxera weera aletto a Yehova khenaapakela itthu soonanara atthu akina naari khenwaaluxa naari owuulihiha muru asinthamwene aya. Eyo entthuna ohima eheeni?
13 Apaale moohilakela hiyo pooti opatxera omwaaluxa mutthu nihimaka itthu seethiru voohima sa mutthu owo. Muupuwele itthu iya: (1) murokora mmoha ohiñye okhala pioneira, (2) ntheli nimoha nikhumme oBetheli, naari (3) munna ohiñye okhala mutokweene a mmulokoni ni murumeyi ookhavihera. Waamurowa okhala woonanara wakhala weera hiyo naamukhala nuulumaka weera asinna ala apaale yookhala etthu epankaaya yoonanara, mwaha wa yeeyo yohaakhumelela etthu eyo. Moohihovela, sookhala itthu sintxipale nihinsuwelaahu. Tivawonto, muletto a Yehova toole “ohinamwèrela sonanara mukhw’awe, nari ohinamwàluxa namwattamanan’awe.”
Moohisuwela hiyo pooti opatxera ohima itthu soowootha voohima sa atthu akina, opatxera okhala atthu oowootha nave pooti opatxera owoothera asinna (Nwehe eparagrafu 12-13)
MWAATTITTIMIHEKE ALE EMMOOVA YEHOVA
14. Muthalihe moota muletto a Yehova onrowaawe omusepa ‘mutthu oophweela.’
14 Nsalmu 15:4, ninhima weera nthamwene a Yehova ‘onnamusepa mutthu oophweela.’ Moota heeni ninsuwelaahu weera mutthu toophweela? Mwaha wookhala oohimalela, hiyo khinaanono owera woohima weera mutthu ola toophweela naari hooye. Mwaha wa heeni? Mwaha wooweera hiyo khanimalenle, pooti osiveliwa ni mutthu nintthekulaahuno naari ohisiveliwa ni atthu ale enninyoonyiha. Mweekhaikhai, hiyo paahi nintthuneya waasepa ale Yehova onhimaawe weera ‘toophweela.’ (1 Akor. 5:11) Eyo enaahela mpuwa atthu ale empaka itthu soonanara ni ehinttharuwa, ale ehinttittimiha ele ninroromelaahu ni ale eneerera onanariha onthamwene ahu ni Yehova. — Mir. 13:20.
15. Mwa mukhalelo heeni nnaattittimihaahu ‘ale anamoova Yehova’?
15 Mwa mukhalelo mukina, Nsalmu 15:4 ninhima weera hiyo ninnatthuneya waattittimiha ‘ale anamoova Yehova.’ Weera nipake eyo, ontthuneya waasaasera mikhalelo sa woonihera oreera murima ni nttittimiho wa asinthamwene a Yehova. (Arom. 12:10) Moota heeni? Mukhalelo mmoha woopaka eyo, onnahimmwa va Nsalmu 15:4, weera muletto mu ehema ya Yehova “alipelá ahawaka, khantxentxa olipenlaiye.” Emaara hiyo nihinkwaniheraahu ele nlaihenraahu, ninnaavoreiha atthu akina. (Math. 5:37) Mwa ntakihero, Yehova onweherera weera mulopwana oothela ni muthiyana ootheliwa, emukwanihere natiri empankaaya wa mukina ni mukhwaawe emaara yaathelanaaya. Yehova tho onnahakalala vantxipale vaavo asitiithi eniilipiheraaya weera emukwanihere natiri empankaaya wa anamwane aya. Mwaha wa nsivelo nraahuno ni Yehova ni atthu akina, hiyo onnatthuneya wiilipihera weera nikwanihere itthu sootheene nilaihenraahu.
16. Mwa mukhalelo heeni mukina hiyo nnaattittimihaahu asinthamwene a Yehova?
16 Mukhalelo mukina nneeraahu noonihere waattittimiha asinthamwene a Muluku, tivaavo ninsuwelaahu owaakhela nnene aletto ni okhala oovaha. (Arom. 12:13) Oviriha etempu ni asinna ni asirokora ohiya paahi emaara ya mithukumano ni muteko woolaleera, onoonikhavihera olipiha onthamwene ahu naawo ni Yehova. Opwaha mwa yeeyo, emaara ninnwaakhelaahu nnene aletto, ninnamutakiha Yehova.
MUHISIVELIWEKE NI MUSURUKHU
17. Mwaha wa heeni Nsalmu 15 nnuulumaaya voohima sa musurukhu?
17 Nsalmu 15:5 ninnahima weera, muletto a Yehova “khanakophiha musurukhu awe, atxaka sa anene, nari khanàkhela makhwankwa, wera amunanarihe ohitthenke.” Mwaha wa heeni Davidi uulummaawe sa musurukhu va Nsalmu nna nikhaanini? Mwaha wooweera, wakhala weera hiyo nnooxupeyaxa vantxipale ni musurukhu, owo pooti okhala wootepa otthuneya waapwaha atthu akina naari ni Yehova. (1 Tim. 6:10) Khalayi, atthu akina yannaattottela mureerelo asinnaya oohaawa weera yaakophihe musurukhu ewehereraka oliviwa voowaatxeereriwa. Opwaha mwa yeeyo, aphuki akina yannaakhulela makwankwa weera emuthorihe moohixariya mutthu axariya. Mene Yehova khonsiveliwa ni atthu empaka itthu iyo. — Ez. 22:12.
18. Makoho heeni nintthuneyaahu wiipakela voohima sa moonelo ahu voohima sa musurukhu? (Aheberi 13:5)
18 Waamukhala wooreera ootheene hiyo weemela ni wuupuwela toovi ori moonelo ahu woohima sa musurukhu. Mwiikoheke ha: ‘Keereke miyo kinnuupuwela vantxipale woohima sa musurukhu? Naari kinnuupuwela etthu kaarowaaka othuma kaarino musurukhu muntxipale? Wakhala weera mutthu ookikophiha musurukhu, neereke kinnapisa omuliva kuupuwelaka weera khanrowa ohaawela viinaano? Neereke miyo kinniisoona okhala ootepa otthuneya waapwaha atthu akina mwaha wooweera kookhalano musurukhu muntxipale? Keereke miyo onnakixupa waavaha atthu akina? Keereke miyo kinuupuwela weera mutthu mukina toosiveliwa ni itthu saweerutthuni mwaha wooweera ookhalano musurukhu? Neereke asinthamwene aka atthu a musurukhu ni nkinaaxikha atthu oohaawa?’ Oothene hiyo nookhalano eparakha yoowompwa ni Yehova ntoko aletto awe. Mene naatthunaka ovirelela okhala aletto a Yehova, onnatthuneya wiikosoopa weera nihisiveliwekexa ni musurukhu. Wakhala weera nnoomusivela vantxipale Yehova opwaha musurukhu, Yehova khonrowa oninyanyala! — Mmusome Aheberi 13:5.
YEHOVA ONNAASIVELA ASINTHAMWENE AWE
19. Etthu heeni etokweene emmweeriha Yehova onivekela opaka itthu sintxipale?
19 Nsalmu 15 ommalihera ni yoolaihera ela: “Ole onèra siso khanrowa ottikinyeya khuluwi.” (Nsal. 15:5) Va Davidi onnoonihera weera etthu etokweene emmweeriha Yehova onivekela itthu sintxipale. Yehova ontthuna weera hiyo nikhaleke oohakalala. Mwaha wa yeeyo emaara hiyo nimpakaahu itthu Yehova onnivekelaawe, ninnakhalano ekumi yooreera ni owo onnanikosoopa. — Yes. 48:17.
20. Eheeni aletto a Yehova enwehereraaya muhoolo?
20 Aletto a Yehova aakhalano itthu sootepa oreera enwehereraaya muhoolo. Ale oothanliwa enoorowa okhala “mapuro mantxipale” yaawo Yesu oreherenrawe wiirimu. (Yoh. 14:2) Ni ale erino yooweherera yookhala elapo ya vathi, ennaweherera okwanela wa Apokalise 21:3. Moohihovela, wa hiyo eparakha etokweene owompwa ni Yehova weera nikhale asinthamwene awe ni okhala aletto mu ehema awe mwa mahiku ootheene!
ETXIPO 39 Okhalana Nsina Nooloka Oholo wa Muluku
