1. Mazamure 15:1-5y nuna waati maaddana danddayii?

 BANTTANA Yihoowawu sheedhdhidanne aara mata dabbo gididi deˈiya asati, A dunkkaaniyan imatta gidana danddayiyogaa hagaappe kasetiya huuphe yohuwan akeekida. Shin nuuni A imattata gidanawu ay oottana bessii? Mazamure 15y hegaabaa yootees. (Mazamure 15:1-5 nabbaba.) Nuuni Xoossawu mata dabbo gidanawu oottana bessiyabaa ha mazamuree yootees.

2. Daawiti Yihoowa dunkkaaniyabaa qonccissido wode qoppidobay ayba gidana danddayii?

² Mazamure 15y hagaadan giidi doommees: “Abeet GODAU, ne dunkkaaniyaa gelanau bessiyaagee oonee? Ne geeshsha deriyan nenaara de7anau bessiyaagee oonee?” (Maz. 15:1) Mazamuraawee Daawiti Yihoowa ‘dunkkaaniyabaa’ yootido wode, Gabaaˈoona kataman amarida wodiyawu deˈida Xoossaa dunkkaaniya qoppennan aggenna. Qassi Daawiti Xoossaa “geeshsha deriya” yootido wode, Yerusalaamen Xiyone deriyan deˈiya dunkkaaniya qoppennan aggenna. Gabaaˈoona tohossaappe daro kilo meetiriya haakkidi Daawiti dunkkaaniya toliis, qassi Xoossaa garoy keexettidi wurana gakkanaashin, maachchaa taabootaa yan wottiis.—2 Sam. 6:17.

3. Mazamure 15y yootiyobaa nuuni akeekanawu koyiyoy aybissee? (Misiliyakka xeella.)

³ Israaˈeelatuppe daroti Xoossaa dunkkaaniyan haggaazi erennaageenne maachchaa taabootay deˈiyo dunkkaaniya geliyageeti amaridaageetu xalaala gidiyogee qoncce.  Shin ammanettida Xoossaa ashkkarati ubbay aara dabbotiyogaaninne ubbatoo dabbotidi deˈiyogan A dunkkaaniyan imatta gidana danddayoosona. Hegee nuuni ubbaykka koyiyoba. Yihoowa dabbo gididi deˈanawu nuuni oottana koshshiyabata Mazamure 15y yootees.

SUURE DEˈUWA DEˈA, QASSI XILLOBAA OOTTA

4. Yihooway nuuppe koyiyoy haattan muukettiyogaa xalla gidennaagaa waati eriyoo? (Isiyaasa 48:1)

⁴ Mazamure 15:2y Xoossaa dabboy “suure de7uwaa [de7iyaagaanne] xillobaa oottiyaagaa” gidiyogaa qonccissees. ‘Deˈiyagaanne’ “oottiyaagaa” giya qaalay ubbatoo oottana koshshiyabaa qonccissees. Shin nuuni tumuppe ‘suure deˈuwa’ deˈana danddayiyoo? Ee. Nuuni ubbay nagaranchcha gidikkonne, Yihoowawu azazettanawu nuussi danddayettida ubbabaa oottikko, I nuna ‘suure deˈuwa’ deˈiya asadan xeellana. Nuuni nuna Xoossawu sheedhdhidi haattan muukettido wode, Xoossaara hemettiyogaa doommida. Leemisuwawu, beni wode issi uri Israaˈeela asa gidido gishsha xallawu I Yihoowa imatta giyogaa gidenna. Amaridaageeti A xeesikkonne, “tumatettaaninne xillotettan” gidenna. (Isiyaasa 48:1 nabbaba.) Israaˈeelati Yihoowa imatta gidanawu keehi koyiyogaa bessanawu A higgeta tamaarananne kaallana koshshees. Hegaadankka, ha wodiyan Yihoowara dabbotaa minttanawu haattan muukettidi Yihoowa Markkata geetetti xeesettiyogaappe aadhdhiyabaa nuuni oottana bessees. Nuuni ubbatoo ‘xillobaa’ oottana koshshees. Shin waati oottana danddayiyoo?

5. Ubbaban Yihoowawu azazettiyogaa giyogee woygiyogee?

⁵ Yihoowa sinttan, ‘suure deˈuwa deˈiyogaanne xillobaa oottiyogaa’ giyogee ubbatoo  shiiquwawu Shiiquwa Addaraashaa biyogaa xalla gidenna. (1 Sam. 15:22) Nuuni oottiyo ubbaban, haray atto nurkka deˈiyo wodekka Xoossawu azazettanawu wozanappe baaxetana koshshees. (Lee. 3:6; Era. 12:13, 14) Guutta milatiya allaalletunkka nuuni Yihoowawu azazettanawu baaxetiyogee keehi koshshiyaba. Yaatiyogee nuuni A tumuppe siiqiyogaa bessees; qassi hegee I nuna loytti siiqanaadan oottees.—Yoh. 14:23; 1 Yoh. 5:3.

6. Ibraawe 6:10-12y yootiyogaadan, nuuni kase oottido loˈˈobaappe aaruwan koshshiyabay aybee?

⁶ Yihooway nuuni kase awu oottidobaa keehi nashshees. Shin nuuni kase loˈˈobaa oottido gishsha xallawu, Yihoowa dunkkaaniyan imatta gididi deˈoos giyogaa gidenna. Ibraawe 6:10-12y hegaa loytti qonccissees. (Nabbaba.) Yihooway nuuni kase oottido loˈˈobaa mule dogenna. Gidoppe attin, “wurssettai gakkanaassi” nuuni kumetta wozanan ubbatoo awu haggaazanaadan I koyees. “Nuuni azallennan aggikko,” merinawu A dabbo gidana.—Gal. 6:9.

NE WOZANAN TUMUBAA HAASAYA

7. Nu wozanan tumaa haasayiyogaa giyogee woygiyogee?

⁷ Yihoowa dunkkaaniyan imatta gidanawu koyiya uri ubbatoo, ‘ba wozanan tumaa haasayana’ koshshees. (Maz. 15:2) Hegee worddotennan aggiyogaa xalla gidenna. Yihooway nuuni haasayiyonne oottiyo ubbaban ‘tumanchcha’ gidanaadan koyees. (Ibr. 13:18, NW) Hegee keehi koshshiyaba; “Aissi giikko, GODAI iitaa oottiyaageeta ixxees; shin suuretuyyo i ulottees.”—Lee. 3:32.

8. Nuuni naagettana koshshiya eeshshay aybee?

⁸ ‘Bantta wozanan tumaa haasayiyageeti’ hara asi eta beˈiyo wode xalaalan gidennan, banttarkka deˈiyo wodekka Xoossawu azazettoosona. (Isi. 29:13) Eti cimmiya asa gidokkona. Cimmiya uri Yihoowa higgetuppe amaridaageeti loˈˈo gidokkona giidi qoppiyogaa doommana danddayees. (Yaaq. 1:5-8) Keehi koshshennabata giidi I qoppiyo allaalletun Yihoowawu azazettennan aggana danddayees. I azazettennan ixxiyo wode iitabay A gakkennaba milatikko, hanttaaraba oottiyogaa  doommana danddayees. I Xoossawu haggaaziiddi deˈiyabadan qoppikkokka A goynuwa Yihooway ekkenna. (Era. 8:11) Shin nuuni ubbaban tumanchcha gidanawu koyoos.

9. Yesuusi Naatinaaˈeelaara koyro gayttido wode hanidabaappe nuuni ay tamaarana danddayiyoo? (Misiliyakka xeella.)

⁹ Tumanchcha gidiyogee nuussi keehi koshshiyogaa Yesuusi Naatinaaˈeelaara koyro gayttido wode hanidabaappe tamaarana danddayoos. Piliphphoosi ba laggiya Naatinaaˈeela Yesuusakko ehiido wode maalaalissiyabay haniis. Yesuusi Naatinaaˈeelaara kase gaytti erana xayikkokka hagaadan giis: “Hagee an malttee baynna tumu Israaˈeela asa.” (Yoh. 1:47) Yesuusi bana kaalliya harata tumanchchadan xeellidoogee qoncce; shin Naatinaaˈeela haratuppe aaruwan tumanchchadan xeelliis. Nuugaadan Naatinaaˈeelikka nagaranchcha. Shin I ubbaban tumanchchappe attin, cimmiya asa gidenna. Yesuusi hegaa akeekidi Naatinaaˈeela galatiis. Nuuni ubbaykka Yesuusi nuna hegaadan gaanaadan koyiyogee qoncce!

10. Nuuni haasayiyoban naagettana koshshiyoy aybissee? (Yaaqooba 1:26)

¹⁰ Mazamure 15n odettidabatuppe daroti nuuni haratuyyo oottana koshshiyabata. Mazamure 15:3y Yihoowa dunkkaaniyan deˈiya imattay “hara asa sunttaa moorennaagaa, ba lagge bolli iitabaa oottennaagaa, ba shooro zigirennaagaa” yootees. Nuuni haratu sunttaa moorikko, hegee eta keehi qohees; qassi nuuni Yihoowa dunkkaaniyan imatta gididi deˈana danddayokko.—Yaaqooba 1:26 nabbaba.

11. Sunttaa mooriyogaa giyogee woygiyogee, qassi hara asaa sunttaa mooridi ba nagaran zilˈˈetti laamettibeenna uri waananee?

¹¹ Mazamurawee sunttaa mooriyogaabaa qoncciyan yootiis. Sunttaa mooriyogaa giyogee woygiyogee? Hegee issi ura sunttaa moorana danddayiya worddo haasayaa. Issi uri hara asaa sunttaa mooridi, ba nagaran zilˈˈetti  laamettana xayikko, Kiristtaane galchchaappe bohettees.—Erm. 17:10.

12-13. Nuuni akeekennan nu laggeta zigirana danddayiyo amarida hanotati awugeetee? (Misiliyakka xeella.)

¹² Mazamure 15:3y Yihoowa imattati bantta shoorotu bolli iitabaa oottennaagaanne bantta laggeta zigirennaagaakka nuna hassayissees. Zigiriyogaa giyogee woygiyogee?

¹³ Nuuni issi uraabaa iitabaa hara asawu yootiyogan erennan he uraa zigirana danddayoos. Leemisuwawu: (1) issi michchiya ubba wode haggaazuwa aggaasu, (2) issi azinaynne machchiya Beeteeleppe kiyidosona, woy qassi (3) issi ishay cima woy galchchawu oottiyagaa gidiyogaa aggiis. He ishanttinne michchontti mooridobay deˈennan aggenna, qassi hegaa gaasuwan eta hanotay laamettiis giidi etabaa haasayiyogee qohiyaba. Eta hanotay laamettanaadan oottida nuuni erenna daro gaasoy deˈana danddayees. Hegaa bollikka, Yihoowa dunkkaaniyan deˈiya imattay ‘ba laggiya bolli iitabaa oottennanne ba shooruwa zigirenna.’

YIHOOWAYYO YAYYIYAGEETA BONCHCHA

14. Yihoowa imattati ‘Xoossay ixxiyo asatuppe’ waani haakkiyakko qonccissa.

¹⁴ Mazamure 15:4y Yihoowa dabbo gidida uri ‘Xoossay ixxiyo asata kariyogaa’ yootees. Nuuni hegaa mala asaa waati erana danddayiyoo? Nu qofan issi uri Xoossay ixxiyo asakkonne kuuyana danddayokko. Aybissi? Nuuni nagaranchcha gidiyo gishshawu, laggetanawu metennaageeta giidi nuuni qoppiyo asaa siiqidi, nuna yiilloyiya asaa ixxana danddayoos. Yaatiyo gishshawu, nuuni Yihooway ‘ixxiyo asatu’ xalaalappe haakkana koshshees. (1 Qor. 5:11) Hegeeti iitabaa oottiyogaa aggidi bantta nagaran zilˈˈettidi laamettibeennaageeta, nu ammaniyobaa bonchchennaageetanne nuuni Yihoowara dabbotido dabbotaa mooranawu baaxetiyageeta.—Lee. 13:20.

15. “GODAU yayyiya asata” bonchchiyo issi ogee aybee?

¹⁵ Mazamure 15:4y kaallidi nuuni “GODAU yayyiya asata” bonchchana koshshiyogaa yootees. Hegaa gishshawu nuuni Yihoowa dabbotussi kehatettaanne bonchchuwa bessiyo ogeta koyoos. (Roo. 12:10) Waatidi? Hegaadan oottiyo issi ogee Mazamure 15:4n qoncciis; Yihoowa dunkkaaniyan deˈiya imattay ‘ba caaqqidobay ay deexxinkka polees.’ Nuuni gelido qaalaa polennaagee harata qohiyogee qoncce. (Mat. 5:37) Leemisuwawu, Yihooway aqo laggeti aqo oyqqiyo wode gelido qaalaa naaganaadan koyees. Yelidaageeti bantta naatussi gelido qaalaa polanawu baaxetiyo wodekka I ufayttees. Nuuni Xoossaanne harata siiqiyo gishshawu, nu gelido qaalaa polanawu nuussi danddayettida ubbabaa oottoos.

16. Yihoowa dabbota bonchchiyo hara ogee aybee?

¹⁶ Nuuni Xoossaa dabbota bonchchiyo hara ogee eta imatuwa mokkiyogaanne etawu kehiyogaa. (Roo. 12:13) Ishanttuuranne michchonttuura wodiya aattiyogee etaaranne Yihoowara dabbotaa minttanaadan maaddees. Qassi nuuni imattaa mokkiyo wode, Yihoowa leemisuwa kaalloos.

MIISHSHAA SIIQENNAADAN UBBATOO NAAGETTA

17. Mazamure 15y miishshaabaa yootiyoy aybissee?

¹⁷ Yihoowa imatta gidida issi uri “ba miishshaa dichchau immennaagaa, xillo asa bolli wordduwaa markkattanau mattaayiyaa ekkennaagaa” ha mazamuree yootees. (Maz. 15:5) Ha mazamuree miishshaabaa yootiyoy aybissee? Miishshaa siiqiyogee harata qohananne nuuni Xoossaara dabbotido dabbotaa moorana danddayiyo gishshataassa. (1 Xim.  6:10) Beni wode deˈida amaridaageeti hiyyeesa gidida bantta ishanttussi talˈˈido miishshawu dichchaa ekkiyogan eta naaqqidosona. Qassi amarida daannati mattaayiya ekkidi xillo asaa bolli wordduwan pirddidosona. Asay hegaa malabaa oottiyogaa Yihooway keehi ixxees.—Hiz. 22:12.

18. Nuuni miishshaara gayttidaagan qoppiyo ogiya yigganawu nuna woygi oychchana danddayiyoo? (Ibraawe 13:5)

¹⁸ Nuuni miishshaara gayttidaagan qoppiyo ogiya yiggiyogee loˈˈo. Nena hagaadan oychcha: ‘Taani darotoo miishshaabaanne hegan ta shammana danddayiyobaa qoppiyanaa? Taani miishshaa issi urappe talˈˈada, he urawu he miishshay koshshenna ga qoppada talˈˈido miishshaa zaarennan takkiyanaa? Tawu miishshay deˈiyogee taani haratuppe aadhdhiyabadan qoppanaadan oottii? Haratussi kehanawu metootiyanaa? Ta ishanttussinne michchonttussi miishshay deˈiyo gishsha xallawu, eti miishshaa siiqoosona gaada eta bolli pirddiyanaa? Taani hiyyeesata aggada, duretu xalaalaara laggetanawu koyiyanaa?’ Nuuni Yihoowa imatta gidiyo gita maataa demmida. Nuuni nu deˈuwan miishshaa siiqennaadan naagettiyogan Yihoowa imatta gididi deˈana danddayoos. Nuuni yaatikko, Yihooway nuna mulekka yeggenna!—Ibraawe 13:5 nabbaba.

YIHOOWAY BA DABBOTA SIIQEES

19. Mazamure 15n odettida ubbabaa nuuni oottanaadan Yihooway koyiyoy aybissee?

¹⁹ Mazamure 15y wurssettan hagaadan gees: “Ha yohota oottiyaagee merinaukka qaaxxenna.” (Maz. 15:5) Ha mazamuriyan odettida ubbabaa nuuni oottanaadan Yihooway koyiyoy aybissakko mazamuraawee hagan qonccissiis. Yihooway nuuni ufayttanaadan koyees. Yaaniyo gishshawu, I nuuppe koyiyobaa nuuni oottiyo wode ufayssiya deˈuwa deˈoos, qassi I nuna naagees.—Isi. 48:17.

20. Yihoowa imattati yeemuwan naagiyobay aybee?

²⁰ Yihoowa imattati ufayssiya hidootaa yeemuwan naagana danddayoosona. Tiyettidaageeti Yesuusi etawu saluwan giigissido sohuwan deˈana. (Yoh. 14:2) Saˈaa laattiyo hidootay deˈiyogeeti Ajjuutaa 21:3n odettidabay polettin beˈanawu yeemuwan naagoosona. Yihooway nuuni merinawu A dunkkaaniyan deˈanaadan shoobbidoogee nuussi gita maata!