1. მუს ბგებულენთ ფსალმუნიშ 15:1—5-შე?

 ᲛᲣᲭᲝᲗ წოხოლენ სტატიაშე გებგით, იეჰოვაშ მეძღვინელ მსახურეფს თიწკუმა ხოლოშიან ურთიერთობაშ გავითარებათ შეულებუნა, იეჰოვაშ კარავიშ სტუმარეფქ იჸუან. მუჭო შემლებუნა გუვავითარათ თეცალ ურთიერთობა იეჰოვაწკუმა? მა-15 ფსალმუნს ინოჭარილ რე კონკრეტულ მოთხოვნეფ, მუდგაშ მეჸუნა მიმეხვარებუნა, მიღუდან იეჰოვაწკუმა ხოლოშიან ურთიერთობა (წეკითხით ფსალმუნიშ 15:1—5).

2. ნამ კარავს შილებე გულისხმენდუკო დავით იეჰოვაშ კარავს?

² მა-15 ფსალმუნ თეცალ სიტყვეფით იჭყაფ: „იეჰოვა, მი მოურს სტუმარო სქან კარავშა? მი დემკვიდრებ სქან წმინდა გვალას?“ (ფსალმ. 15:1). შილებე იეჰოვაშ „კარავს“ ფსალმუნმაბირე გულისხმენდუკო თი კარავს, ნამუთ მუდგარენ პერიოდის გაბაონს დგუდჷ. ვარდა, რახანს „წმინდა გვალას“ ხოლო მიშინუანს, შილებე თი კარავს გულისხმენდუკო, ნამუთ იერუსალიმს, სიონიშ გვალას დგუდჷ. გაბაონშე თე გვალაშახ მუსხირენ კილომეტრ მეძუდ. დავითიქ თექ კარავ ქუდოდგჷ დო შეთანხმებაშ კიდობან გეგნიღ, ნამდა, ონდო ტაძარ ეშენებუდ, თექ ჸოფედუკო (2 სამ. 6:17).

3. მუშენ რე ჩქინო მნიშვნელოვან მა-15 ფსალმუნიშ გარჩიება? (ქოძირით სურათ).

³ ისრაელეფიშ უმენტაშის ვერზიებუდ საშვალება, იმსახურუკო კარავს დო მით მსახურენდუნ თინეფშე ხოლო გვალო მუსხირენს უღუდ უფლება, გემნორთუკო თი ადგილშა, სოდეთ შეთანხმებაშ კიდობან დგუდჷ. მარა იეჰოვაშ სიმბოლურ კარავშა მეულა არძა ართგურ მსახურს შეულებუდ, მით თიწკუმა ურთიერთობას გავითარენდ დო თიშ მეგობარ იჸუაფუდ. გვალო თენა ვა მოკონანო ჩქი ხოლო?! ათეშენ, მორთ მა-15 ფსალმუნშე ქობძირათ, მუ ოკო ვაკეთათ, ნამდა მარადიულო ვორდათ იეჰოვაშ მეგობრეფ.

 ᲒᲘᲚᲐᲠᲗᲘᲗ ᲑᲠᲐᲚ ᲕᲔᲒᲘᲓᲕᲘᲜᲔᲜ ᲗᲔᲨ ᲓᲝ ᲘᲠᲝ ᲗᲘᲜᲐ ᲐᲙᲔᲗᲘᲗ, ᲛᲣᲗ ᲡᲬᲝᲠ ᲠᲔ

4. სოვრეშე მიჩქუნა, ნამდა იეჰოვაწკუმა მეგობრობაშო ხვალე ნათუა ვა რე დასაბაღ? (ეს. 48:1).

⁴ ფსალმუნიშ 15:2-ს ჭარჷ, ნამდა ღორონთიშ მეგობარ „ბრალ ვეგიდვინენ თეშ გილურს“ დო „ირო თის ორთჷ, მუთ სწორ რე“. თე მუხლის მოშინაფილ სიტყვეფს „გილურს“ დო „ორთჷ“ მუდმივ მოქმედება იძირე დო ვართ ხოლო ართშა დო ჟირშა მუდგაინიშ კეთება. მარა შილებე თეცალ კითხვაქ გორჩქინდას: მართალო ქეშემლებუნანო თეშ იფცხოვრათ, ნამდა ჩქინდა ბრალ ვეგიდვინედას? ქო, შემლებუნა. მართალ რე, არასრულყოფილეფ ვორეთ, მარა, მუჟამსით ირნერო ვოცადუთ, იეჰოვას დევემორჩილათ, თიშ თოლს „ბრალ ვეგიდვინენ თეშ“ გილურთ. ღორონთშა დუდიშ მეძღვინუათ დო ნათუათ უბრალოთ იპჭყანთ თიწკუმა ართო გილულას. თაშ რდჷ ისრაელეფიშ შემთხვევას ხოლო. ხვალე თიშ გურშენ, ნამდა მიდგარენ ღორონთშა მეძღვინელ ერს ოკათუდ, თინა ავტომატურო იეჰოვაშ სტუმარო, თიშ მეგობარო, ვეგნირთუდ. მუშენდა, მუჭოთ ბიბლიაშე ბგებულენთ, ნამთინე ისრაელ „შინანდჷ“ ღორონთის, მარა თეს „ჭეშმარიტებათ დო სიმართლეთ“ ვართუდ (წეკითხით ესაიაშ 48:1). მიდგაინს იეჰოვაწკუმა მეგობრობა მთელ გურით ქაკოდ-და, ოკო ქიგეგუკო, მუს თხულენდჷ იეჰოვა თიშე დო დემორჩილუკო თის. თეშნერო, ჩქი ხოლო იეჰოვაშ მეგობრეფქ ქიპჸუათინ, ხვალე ნათუა დო თიშ ხალხ შქას რინა ვა რე დასაბაღ. ირიათო ოკო დევემორჩილათ იეჰოვას, თაშ ქოფთქუათინ, საჭირო რე, ვემვოტუათ თიშ კეთება „მუთ სწორ რე“. მუს ნიშნენს თენა?

5. მუს ნიშნენს, ირფელს ვომორჩილუდათ იეჰოვას?

⁵ იეჰოვაშ თოლს „ბრალ ვეგიდვინენ თეშ“ გილულა დო ირო თიშ კეთება „მუთ სწორ რე“, კრებაშ შეხვალამეფშა გილულაშე უმოსის ნიშნენს (1 სამ. 15:22). საჭირო რე, ვოცადუდათ, მუდგას ვა ვორთუდათინ, ირიათო დევემორჩილათ ღორონთის, თიმწკუმა ხოლო, მუჟამსით მითინ ვა მორწყენა (იგავ. 3:6;  ეკლ. 12:13, 14). აუცილებერ რე, თიცალ საკითხეფს ხოლო დევემორჩილათ იეჰოვას, ნამუთ ნაკლებო მნიშვნელოვანო იძირე. თეშნერო ვოძირანთ, ნამდა მართალო მიჸორა იეჰოვა დო თაშ მოქციება უმოსო უჸოროფუანს ჩქინ დუდის თის (იოან. 14:23; 1 იოან. 5:3).

6. მუჭოთ ებრაელეფიშ 6:10—12-ს იძირე, ხვალე ულირს კეთებულ ჯგირ საქმეეფ რენო დასაბაღ იეჰოვაწკუმა მეგობრობაშო?

⁶ იეჰოვა მანგარო აფასენს თი ირფელს, მუთ ულირს თიშ გურიშ გახარებელო მიკეთებუნა. მარა, მუჭოთ ებრაელეფიშ 6:10—12-ს ჭარჷ (წეკითხით), ხვალე ულირს კეთებულ ჯგირ საქმეეფ ვა რე დასაბაღ თიშო, ნამდა ქუდოფსქიდათ იეჰოვაშ კარავს. მუშო ოკო რაგად, ღორონთ ვა გომჭყოლიდუანა თიშო კეთებულ ჯგირ საქმეეფს, მარა თის ოკო, ბოლოშახ ართგურო ვემსახურათ. „ვა ფშურდუთ-და“, იეჰოვა დუმაჯილდოვენა დო მარადიულო თიშ მეგობრეფ იპჸუაფუთ (გალ. 6:9).

ᲭᲔᲨᲛᲐᲠᲘᲢᲔᲑᲐ ᲘᲩᲘᲗ ᲗᲥᲕᲐᲜ ᲒᲣᲠᲡ

7. მუს ნიშნენს, ჭეშმარიტება იფჩუათ ჩქინ გურს?

⁷ იეჰოვაშ კარავიშ სტუმარეფქ ქიპჸუათინ ქუმოკონან-და, ჭეშმარიტება ოკო იფჩუათ ჩქინ გურს (ფსალმ. 15:2). თენა ხვალე თის ვა ნიშნენს, ნამდა ტყურა ვა ფთქუათ. იეჰოვა ჩქინდე ითხინს, ირფელს პატიოსნურო იფქციებუდათ (ებრ. 13:18). თენა მნიშვნელოვან რე, მუშენდა, მუჭოთ ბიბლიაშე ბგებულენთ, „იეჰოვას ჯოგჷ აფერისტ კოჩ, მარა მართალეფწკუმა მეგობრენს“ (იგავ. 3:32).

8. მუნერ საქციელს ოკო ეუჩილითუათ დუდ?

⁸ მუნერ რე კოჩ, ნამუთ „ჭეშმარიტებას იჩიებ მუშ გურს“? თეცალ კოჩ ტყობაშე ვაშენს დო ხვალე თიმწკუმა ვემეჸუნს ღორონთიშ კანონეფს, მუჟამსით შხვეფ ორწყენა (ეს. 29:13). თინა აფერისტულო ვექციებ. აფერისტ კოჩ დუდშე თიშ ფიქრის იჭყანს, ნამდა იეჰოვაშ არძა კანონ ვა რე ჭკვერულ (იაკ. 1:5—8). შილებე თეცალ კოჩიქ ვედემორჩილას ღორონთიშ კანონეფს თიცალ საკითხეფს, ნამუთ მუს ნაკლებ მნიშვნელოვანო მიორჩქ. თინა დაუმორჩილებლობაშ გურშენ გლახა შედეგეფს ვემიღენს-და, შილებე უმოს უფრაშო ხოლო მიქცუას, მუდგაშ შედეგო, თიშ მსახურებას ღორონთიშ თოლს მუთუნ ფას ვაღვენუ (ეკლ. 8:11). მუშო ოკო რაგად, ვა მოკონა თექ ქუმაღოლან, ათეშენ ირნერო ვოცადუთ, ირფელს პატიოსნურო იფქციებუდათ.

9. მუს ბგურაფლენთ ნათანაელიშ შემთხვევაშე? (ქოძირით სურათ).

 ⁹ ნათანაელიშ შემთხვევაშე ჯგირო მიკორჩქინდჷ, მუშმადიდა მნიშვნელობა უღჷ სიალალეს. მუჟამსით ფილიპექ მუშ მეგობარ ნათანაელ იესოს გაჩინებაფუ, საინტერესო მუდგარენქ მოხვად. თიშ უმკუჯინუო, ნამდა იესო ნათანაელს პირველო ორწყედ, თიშ გურშენ თქუ: „თენა რე ნამდვილ ისრაელ, ალალ კოჩ“ (იოან. 1:47). მუშო ოკო რაგად, იესოშ თე სიტყვეფ ვა ნიშნენდჷ, ნამდა თის შხვა მოწაფეეფ ალალ კათათ ვემიორჩქუდ, მარა ნათანაელს გვალო შხვანერ სიალალე ახვილუ. ნათანაელ ჩქინცალო არასრულყოფილ რდჷ, მარა აფერისტულო დო შხვაშ ოძირაფალო მუთუნს ვართუდ. იესოს მანგარო მეწონ თექ დო ქაცქუ ნათანაელს. მუშმადიდა პატი იჸუაფუდ, იესოს თე სიტყვეფ ჩქინდე ხოლო ქარაგადედასინ!

10. მუშენ ოკო დევეკვირათ ჩქინ ჩიებას? (იაკ. 1:26).

¹⁰ მა-15 ფსალმუნიშ მა-3 მუხლშე მოჸუნაფილ იძირე, მუჭო ოკო ოქცუდას შხვეფს თი პიროვნება, ნამდგას ოკო, იეჰოვაშ კარავიშ სტუმარ რდასჷ. მა-3 მუხლის ჭარჷ, ნამდა იეჰოვაშ მეგობარ „ტყურას მითინს ვეკაწამენს მუშ ნინათ, გლახას ვა უკეთენს ხოლოშიანს დო მეგობარს ვა ლანძღუნს“. ჩქინ ჩიებათ შილებე მიდგაინ სერიოზულო დუვაზარალათ დო თიშ პატი ხოლო მივოდინუათ, ნამდა იეჰოვაშ კარავიშ სტუმარეფ ვორდათ (წეკითხით იაკობიშ 1:26).

11. მუ რე ტყურაშ ეკოწამება დო მუ ხვადუ, მუჟამსით პიროვნება ვა ნარღენს თეცალ საქციელს?

¹¹ ფსალმუნმაბირე მა-3 მუხლის დიო მიშინუანს ტყურაშ ეკოწამებას. თენა რე მიდგაინიშ სახელიშ გატახალო გარზახ ტყურაშ რაგად. მუჟამსით პიროვნება თაშ იქციებ დო ვა ნარღენს დაშებულს, კრებაშე ირიცხებ (იერ. 17:10).

12, 13. ნამ სიტუაციეფს შილებე გიშამირთან შხვეფიშ ლანძღუაქ? (ქოძირით სურათ).

¹² უკულ ფსალმუნმაბირე იჩიებ, ნამდა იეჰოვაშ მეგობარ „გლახას ვა უკეთენს ხოლოშიანს დო მეგობარს ვა ლანძღუნს“. მუს ნიშნენს თე სიტყვეფ?

 ¹³ შხვეფიშ გურშენ გლახაშ ჩიებათ შილებე გურუგუჩამუო თინეფიშ ლანძღუაქ გიშამირთან. წერმიბდგინათ თეცალ სიტუაციეფ: 1) დაქ მიოტუ პიონერო მსახურება. 2) ჩილ დო ქომონჯ მეტო ვა მსახურენს ბეთელს. 3) ნამდგაინ ჯიმა მეტო ვა მსახურენს უხუცესო ვარდა მომსახურეთ. ქიჸუაფუდუო სწორ, იფიფქრათ, ნამდა თე და დო ჯიმალეფს მუდგაინ აჸინა დაშებულ დო თიშენ მოხვად თაშ დო უკულ შხვეფწკუმა ხოლო ვარჩუათ თინეფიშ ამბე? თე ცვლილებეფს შილებე ბრელ თიცალ მიზეზ უღუდას, მუდგაშ აზრის შურო ვა ვორეთ. ათეშენ, ონდო მუდგაინს თქუანდათ, რშუდან, იეჰოვაშ სტუმარ „გლახას ვა უკეთენს ხოლოშიანს დო მეგობარს ვა ლანძღუნს“.

ᲞᲐᲢᲘ ᲪᲘᲗᲷ ᲘᲔᲰᲝᲕᲐᲨ ᲛᲝᲨᲘᲨᲔᲤᲡ

14. მუშ მიხედვით ოკო გინოპჭყვიდათ, მი რე „ურგებელ“?

¹⁴ ფსალმუნიშ 15:4 იჩიებ, ნამდა იეჰოვაშ მეგობარ „ოჭიშის ურთინუანს ურგებელ კათას“. საინტერესო რე, მუჭო ოკო მეფხვადათ, მი რე „ურგებელ“? თე საკითხის ჩქინ შეხედულებეფშა ვენდებე, მუშენდა არასრულყოფილეფ ვორეთ დო შილებე თე ამბე თიშ მიხედვით გეგნოპჭყვიდათ, მიწკუმა ურთიერთობა მაფუნა გემუან დო მი მაღიზიანენა. ათეშენ, ხვალე თინეფს ოკო ურთინუათ ოჭიშ, მიდგაშ საქმეეფს იეჰოვა მირჩქინანს „ურგებელო“ (1 კორ. 5:11). მაგალთო, თინეფ, მით ვა ნარღენა დაშებულს, მით პატის ვა ცენა ჩქინ რწმენას დო თინეფ, მით ოცადუნა, ჩქინ სულიერობას ეცილან (იგავ. 13:20).

15. მუ რე ართ-ართ საშვალება, მუდგათ შემლებუნა პატი ფცათჷ „იეჰოვაშ მოშიშეფს“?

¹⁵ ფსალმუნიშ 15:4 მირაგადუნა, ნამდა პატი ოკო ფცათჷ „იეჰოვაშ მოშიშეფს“. ათეშენ, ირნერო ვოცადუთ, ჯგირ უკეთათ დო პატიცემათ მივექცუათ იეჰოვაშ მეგობრეფს (რომ. 12:10). თეშ კეთებაშ ართ-ართ საშვალება კინ მა-4 მუხლის რე ინოჭარილ, სოვრეშეთ ბგებულენთ, ნამდა იეჰოვაშ კარავიშ სტუმარ „ვეგნურთანს დოდვალირ სიტყვას, დეზარალასინ ხოლო“ (ფსალმ. 15:4). მაგალთო, იეჰოვა მუშ მსახურეფშე ითხინს, შეასრულან ქორწინებაშ დროს დოდვალირ აღთქმა. ღორონთის თიშ ძირაფა ხოლო უხარენს გურს, ნამდა მშობლეფ სქუალეფშა მეჩამილ სიტყვას ირო ასრულენა. მუჟამსით მიდგაინს სიტყვას ვარზენთ დო უკულ ვა ვასრულენთ, თეთ გურს ალვოჭუანთ თე ადამიანს (მათ. 5:37). ათეშენ, ღორონთიშ დო ადამიანეფიშ ჸოროფაშ გურშენ ირნერო ოკო ვეცადათ, ნამდა სიტყვას ქუდობდვანთინ, აუცილებერო შევასრულათ.

16. ხოლო მუჭო შემლებუნა პატი ფცათჷ იეჰოვაშ მეგობრეფს?

¹⁶ ხოლო ართ საშვალება, მუდგათ იეჰოვაშ მოშიშეფს პატის ფცენთჷ, სტუმარიშ ჸოროფაშ დო გურხვეობაშ გიმორჩქინა რე (რომ. 12:13). მუჟამსით და დო ჯიმალეფს თავისფალ დროს ხოლო უთმენთ დო ხვალე თის ვეგებჯერდუთ, ნამდა კრებაშ შეხვალამეფს დო მსახურებას ვორწყეთ, ქოთ თინეფწკუმა დო ქოთ იეჰოვაწკუმა მეგობრობას ვამანგარენთ. თეწკუმა ართო, სტუმარიშ ჸოროფაშ გიმორჩქინათ იეჰოვაშ მაგალითის მეპჸუნთ.

ᲕᲐᲘᲸᲝᲠᲓᲐᲜ ᲤᲐᲠᲐ

17. მუშენ რე ფარაშ საკითხ მოშინაფილ მა-15 ფსალმუნს?

¹⁷ მა-5 მუხლის პკითხულენთ, ნამდა იეჰოვაშ სტუმარ „ფარას მუშ სამოგებოთ ვა გასხენს დო ქრთამს ვეჭოფუნს ბრალ ვა უღუნ ფერ კოჩიშ წინააღმდეგ“ (ფსალმ. 15:5). მუშენ რე თე ჭიჭე ფსალმუნს მოჩამილ მოთხოვნეფ შქას ფარაშ საკითხ მოშინაფილ? ფარა ქომიჸორა დო ჩქინო თინა ირფელიშ უმოს მნიშვნელოვან ქორენ-და, მუთუნ ვა მაჸინა თიშ გურშენ კოჩიშ წყინაფა დო იეჰოვაწკუმა ურთიერთობას ხოლო მივოდინუანთ (1 ტიმ. 6:10). ბიბლიურ დროს გაჭირებულს ნამთინე მოგებაშ მიოღებელო მიესხენდჷ ფარას დო აშო გასხებულშე უმოსის ირთინუანდჷ. ნამთინე მოსამართლე ფარას ეჭოფუნდჷ დო მუთუნ ბრალ ვა უღუდუნ ფერ კოჩშა უსამართლო განაჩენ  გიშუღუდ. იეჰოვას ვაძირუაფ თეცალ საქციელეფ! (ეზეკ. 22:12).

18. ნამ კითხვეფშე დაფიქრება მოძირანა, მუნერ დამოკიდებულება მიღუნა ფარაშ მიმართ? (ებრ. 13:5).

¹⁸ ირიათო ოკო შევამოწმათ, მუნერ დამოკიდებულება მიღუნა ფარაშენ. შემლებუნა დეფიფქრათ თეცალ კითხვეფშე: ირო ფარა დო მუდგარენეფიშ ჸიდირ ხომ ვერთუ ჩქიმ დუდის? ფარას ქიფსხენქ-და, დორთინაფაწკუმა დრო ხომ ვემემზინდ თი აზრით, ნამდა მიმესხუნ თის იშენით ვასაჭირ ფარა? ფარა ქომღუნ-და, დუდ შხვეფიშ უჯგუშო ხომ ვემემიღ ვარდა ხომ ვამჭირს გურხვეობაშ გიმორჩქინა? მატერიალისტეფო ხომ ვემმორჩქ საშვალება უღუნან თი და დო ჯიმალეფ? თეშ ხომ ვა რე, ნამდა უმოს ფარა უღუნან ფერეფწკუმა მეგობრობას ვოცადუქ დო საშვალება ვა უღუნან თინეფს შურო ვემკვოჯინექ? დღას ოკო ვაგმოჭყორდან, მუშმაშხვა პატი მიღუნა — იეჰოვა მუშ კარავშა მაპატიჟენა სტუმარო. ათეშენ, ირნერო ოკო ვეცადათ, ნამდა თეშმადიდა პატი ფარაშ ჸოროფაშ გურშენ ვა ვოდინუათ. თაშ ქიმიფქციებუთ-და, შემლებუნა ბჯერდან, ნამდა იეჰოვა დღას ვემმოტენა (წეკითხით ებრაელეფიშ 13:5).

ᲘᲔᲰᲝᲕᲐᲡ ᲣᲸᲝᲠᲡ ᲛᲣᲨ ᲛᲔᲒᲝᲑᲠᲔᲤ

19. მუშენ ოკო იეჰოვას, დეფცვათ მა-15 ფსალმუნს მოჩამილ მოთხოვნეფ?

¹⁹ მა-15 ფსალმუნიშ ბოლო მუხლ მოგებაფუანა, მუშენ ოკო იეჰოვას, დეფცვათ თე ფსალმუნს მოჩამილ არძა მოთხოვნა. თე მუხლის პკითხულენთ: „მით თაშ იქციებ, ირიათო მტკიცას გერდას იჸი“ (ფსალმ. 15:5). იეჰოვას მანგარო ოკო, ბედნერეფ ვორდათ. ათეშენ, თიცალ ხემძღვანელობას მარზენა, ნამდგაშ მეჸუნა კურთხევეფს ქუმომღანა დო დოფთხილანა (ეს. 48:17).

20. მუნერ მომავალ ელუნა იეჰოვაშ სტუმარეფს?

²⁰ იეჰოვაშ სიმბოლურ კარავიშ სტუმარეფს დიდებულ მომავალ ელუნა. მაგალთო, ცხებულ ქრისტიანეფ ზეცას იჸუაფუნა, სოდეთ იესოს თინეფშო ადგილეფ აფჷ გამზადებულ (იოან. 14:2). თინეფ, მიდგას დედამიწას ცხოვრებაშ იმენდ უღუნა, მთელ გურით ელუნა გამოცხადებაშ 21:3-ს ინოჭარილ ღორონთიშ დუნაპირებუეფიშ შესრულებას. თითოულშო მანგარ დიდ პატი რე, ნამდა იეჰოვა მუშ სიმბოლურ კარავშა მაპატიჟენა დო მარზენა საშვალებას, მარადიულო თიშ მეგობრეფ ვორდათ!