NGANI JAKULIJIGANYA 24
NYIMBO NA. 24 Kwende Kulitumbi lya Yehofa
Yampaka Tutende Kuti Tupitilisye Kuŵa Achalendo ŵa Yehofa
“Ŵalakwe AMBUJE, ana ŵani ŵatajinjile m’Nyumba jawo?”—SAL. 15:1.
CHAKULINGA CHA NGANIJI
Kutukamuchisya kumanyilila yampaka tutende kuti tupitilisye kuŵa paunasi wambone ni Yehofa soni yakusasaka jwalakwe kuti twatendeleje ŵakutumichila achimjetu.
1. Ana kuganichisya yayili pa Salimo 15:1-5 mpaka kutukamuchisye chamti uli?
MUNGANI jipite jila, twalijiganyisye kuti ŵandu ŵalipeleche kwa Yehofa soni ŵakusalingalinga kuti aŵe najo paunasi wambone ni ŵampaka aŵe achalendo mu chitenti chakwe chakuwanichisya. Nambo ana tukusosekwa kutenda chichi kuti tuŵe achalendo ŵa Yehofa? Mu Salimo 15 mwana yindu yejinji yampaka tutende. (Aŵalanje Salimo 15:1-5.) Salimo jeleji jikusatujiganya yejinji yampaka tutende kuti tuŵe paunasi wakulimba ni Mlungu.
2. Ana chichi chachamtendekasisye jwamasalimo Daudi kusala ya chitenti cha Yehofa?
2 Salimo 15 jatandite ni maloŵe gakuti, “Ŵalakwe AMBUJE, ana ŵani ŵatajinjile m’Nyumba jawo? Ana ŵani ŵampaka apakombole kulambila petumbi lyawo lyeswela?” (Sal. 15:1) Paŵasalaga ya “tenti” ja Yehofa, jwamasalimo Daudi jwaganichisyaga ya nyumba ja Mlungu jele kwakandaŵi jaliji ku Gibiyoni. Nambosoni Daudi pajwasalaga ya ‘litumbi lyeswela’ lya Mlungu, komboleka jwaganichisyaga ya tenti ja Mlungu jajaliji palitumbi lya Siyoni ku Yelusalemu. Litumbi lya Siyonili lyaliji pa lutando lwelewu kumwela kwa Gibiyoni. Mwamti Daudi jwataŵileko chitenti cha Mlungu muŵaŵisilemo libokosi lya chilanga pakwembecheya kuti ataŵe nyumba jisyesyene ja Mlungu.—2 Sam. 6:17.
3. Ligongo chichi tukusosekwa kupikanichisya yayili mu Salimo 15? (Alole chiwulili.)
3 Ayisalayeli ŵajinji nganakundidwaga kutumichila panyumba ja Mlungu. Nambosoni, ŵandu ŵakuŵalanjikape ni ŵaŵakundidwaga kwinjila mu chitenti cha Mlungu mumwasunjidwaga libokosi lya chilanga. Atamose kuti yaliji myoyo, ŵakutumichila ŵakulupichika wosope ŵa Mlungu mpaka aŵe achalendo mu chitenti chakwe chakuwanichisya mwakuŵa paunasi wambone ni jwalakwe. Yeleyi ni yatukusasaka wosopewe. Salimo 15, jasasile ndamo sine syatukusasosekwa kola kuti tupitilisye kuŵa paunasi wambone ni Yehofa.
Ayisalayeli ŵa mu ndaŵi ja Daudi ŵamanyililaga ngopolelo jakuŵa mlendo mu chitenti cha Yehofa (Alole ndime 3)
KWENDA MWANGALEMWA SONI KUTENDA YAKULUNGAMIKA
4. Ligongo chichi kubatisidwape nganikuŵa kumtendekasisye mundu kuŵa jwakusosekwa kwa Yehofa? (Yesaya 48:1)
4 Pa Salimo 15:2 pakusalosya kuti mundu jwali paunasi ni Mlungu “ali mundu jwakwenda mwangalemwa, jwakutenda yakulungamika ndaŵi syosope.” Maloŵe gakuti “jwakwenda” soni “jwakutenda” gakusasala ya yindu yakutamilichika soni yayikupitilisya kutendekwa. Nambo ana yili yakomboleka “kwenda mwangalemwa”? Elo. Atamose kuti tuli ŵangali umlama, Yehofa mpaka atuwoneje kuti ‘tukwenda mwangalemwa’ patukutenda yampaka tukombole pakumpikanila. Pitwagambile kulipeleka soni kubatisidwa, kwaliji kutanda kwa umi wetu wakumtumichila Mlungu. Mwachisyasyo, mundaŵi ja m’Baibulo kuŵa Myisalayeli nganikugopolelaga kuti mundujo ali mlendo jwa Yehofa. Mwamti ŵane ŵaŵilanjilaga pa lina lya Mlungu nambo ‘nganiyityochelaga mu mtima wakuwona ni wakulungama.’ (Aŵalanje Yesaya 48:1.) Mundu jwa ku Yisalayeli kuti aŵe mlendo mu chitenti cha Yehofa, jwasosekwaga kumanyilila malamusi ga Yehofa ni kugakuyaga. Mwakulandana ni yeleyi, nombe masiku agano kuti tuŵe paunasi wambone ni Yehofa, tukusasosekwa kutenda yejinji mmalo mwagamba kwikutila ni kubatisidwa soni kusongana ni Aklistu achimjetu. Kusala yisyene, tukusasosekwa “kutenda yakulungamika ndaŵi syosope.” Ana mpaka tutende chamti uli yeleyi?
5. Ana kumpikanila Yehofa mu yindu yosope kukusapwatikapo chichi?
5 Yehofa jwangayiwonaga kuti mundu jwakusasimanikwa pamisongano jachiklistu ndaŵi syosope, nikuti ‘akwenda mwangalemwa’ soni “akutenda yakulungamika ndaŵi syosope.” (1 Sam. 15:22) Myoyo, tukusasosekwa kumpikanila Mlungu ndaŵi syosope atamose patuli kwajika. (Mis. 3:6; Jwak. 12:13, 14) Yili yakusosekwa kuti tumpikanileje Yehofa atamose payindu yakuwoneka yamwanamwana. Patukutenda yeleyi, tukusalosya kuti tukusamnonyela mnope Yehofa, soni yikusamtendekasya jwalakwejo kuti atunonyeleje mnope.—Yoh. 14:23; 1 Yoh. 5:3.
6. Mwakamulana ni Ahebeli 6:10-12, ana ni chindu chapi chakusosekwa mnope kupunda yindu yambone yatwatesile munyuma pakumtumichila Mlungu?
6 Yisyene kuti Yehofa akusayamichila mnope yindu yatwatesile munyumamu pakumtumichila. Nambope, kukulupichika kwatwalosisye munyumamu pakumtumichila Yehofa nganikuŵa kututendekasisye apano kuti tupitilisye kuŵa achalendo mu chitenti chakwe chakuwanichisya. Mfundo jeleji tukusajipata pa Ahebeli 6:10-12. (Aŵalanje.) Yehofa jwangaliŵalilaga yindu yambone yatwamtendele munyumamo. Nambope jwalakwe akusasaka kuti tupitilisyepe kumtumichila mwakulupichika mnope “mpaka kumbesi.” Mwamti tuchiŵa najo paunasi ŵambone mpaka kalakala “naga ngatukupela.”—Agal. 6:9.
TUŴECHETEJE YAKUWONA NDAŴI SYOSOPE
7. Ana kuŵecheta yakuwona mu mtima mwetu kukusagopolela chichi?
7 Mundu jwakusaka kuti Yehofa amjitichisye kuŵa mlendo mu chitenti chakwe, akusasosekwa ‘kuŵechetaga yakuwona mu mtima’ mwakwe. (Sal. 15:2) Yeleyitu yikugopolela kutenda yejinji kupunda kwamba kuŵambala unami wamtundu uliwose. Yehofa akusasaka kuti ndaŵi syosope tutendeje soni kuŵecheta yindu mwakuwona mtima. (Aheb. 13:18) Yeleyitu yili yakusosekwa mnope, “Ligongo [Yehofa] akusaŵengana ni mundu jwakusakala, nambo ŵandu ŵakulungama akusiŵaŵika m’likuga lya ŵandu ŵakwe ŵakusiŵakulupilila.”—Mis. 3:32.
8. Ana tukusosekwa kuŵambala ndamo japi?
8 Ŵandu ‘ŵakusaŵecheta yakuwona mu mtima’ mwawo ŵangapikanilaga malamusi ga Mlungu pali pagulu ja ŵandu nambo ni kugakasaga pali kwajika. (Yes. 29:13) Jemanjaji akusaŵambala kutenda yindu mwangakulupichika. Mundu jwangakulupichika mpaka atande kayichila naga malamusi gane ga Yehofa gali gakamuchisya. (Yak. 1:5-8) Mwamti mundu jweleju mpaka atande kasa mfundo sya Yehofa syakusiwona kuti nganisiŵa syakusosekwa mnope. Kaneko, pakuyiwona kuti pangali yakuyichisya yakogoya yampaka yipagwe ligongo lya yindu yakutendayo, mundujo mpaka atande kasa malamusi gane ga Mlungu yampaka yitendekasye kuti Yehofa akajitichisyaga utumiki wakwe. (Jwak. 8:11) Myoyo, tukusosekwa kulingalinga kuŵaga ŵakuwona mtima mu yosope.
9. Ana tukulijiganya chichi payindu yayatendekwe Yesu ali asimene kandanda ni Nataniyele? (Alole chiwulili.)
9 Yayatendekwe Yesu ali asimene kandanda ni Nataniyele mpaka yitujiganye kusosekwa kwakuŵa mundu jwakuwona mtima. Pandaŵi jine Filipo ali amjigele jwalakwe kuti akawonegane ni Yesu, patendekwe chindu chinechakwe changaliŵalichika. Atamose kuti keleka kaliji kandanda kuti Yesu asimane ni Nataniyele, nambo Yesu jwaŵechete kuti: “Aju ni Myisalayeli jusyesyene jwele mwa jwalakwejo mwangali chinyengo.” (Yoh. 1:47) Yesu jwamanyililaga kuti ŵakulijiganya ŵakwe ŵane ali ŵakuwona mtima, nambo jwalakwe jwayiweni kuti Nataniyele jwaliji jwakuwona mtima yisyesyene. Yisyene kuti Nataniyele jwaliji jwangali umlama mpela mwatuŵelele uweji. Nambope jwalakwe jwaliji jwangali chinyengo soni jwaliji jwakuwona mtima mu yindu yosope. Mwamti Yesu jwayiweni yeleyi soni jwamyamichile. Kusala yisyene, wosopewe mpaka tusache kuti Yesu atuwoneje mpela mwaŵamwonelaga Nataniyele!
Filipo jwapite kwa Yesu ni Nataniyele, jwele Yesujo jwasasile kuti ali mundu jwangali chakulemwa chilichose. Ana mwelemu ni mwayiŵelelesoni ni uweji? (Alole ndime 9)
10. Ligongo chichi tukusosekwa kuŵambala kukamulichisya masengo pakamwa petu mwakulemwecheka? (Yakobo 1:26)
10 Mfundo syejinji syasikusasimanikwa mu Salimo 15 sikusasalaga yatukusosekwa kwatendela ŵandu ŵane. Pa Salimo 15:3 pakusasalaga yindu yakusosekwa kutenda mundu jwali mlendo mu chitenti cha Yehofa. Palilembali pakusati, mundu jweleju ‘jwangatenda yakusinjilila. Jwangakumtendela yangalumbana mjakwe kapena jwangakuŵecheta mbili jachabe ja mjakwe.’ Kukamulichisya masengo mwakulemwecheka pakamwa petu mmatala gelega mpaka kumtendekasye mundu kuti akaŵa jwakuŵajilwa kuŵa mlendo mu chitenti cha Yehofa.—Aŵalanje Yakobo 1:26.
11. Ana kwasinjilila ŵane chili chichi, nambi mundu jwakwasinjilila ŵane jwangakupitikuka mtima mpaka chimtendechele chichi?
11 Jwamasalimoju jwasasile mwangapita mumbali yandamo jakwasinjilila ŵane. Ana kwasinjilila ŵane kuli kutenda chichi? Kwasinjilila ŵane kuli kuŵecheta yindu yawunami yakwamba mundu jwine yampaka yijonanje mbili jakwe. Mundu jwakwasinjilila ŵandu ŵane jwangakupitikuka mtima ni kuleka ndamo jakweji akusatyosyedwa mu mpingo.—Yel. 17:10.
12-13. Ana mpaka tusakasye mbili ja mlongo mjetu mu yakutendekwa mpela yapi? (Alole chiwulili.)
12 Pa Salimo 15:3 pakusatusalilasoni kuti ŵandu ŵali achalendo mu chitenti cha Yehofa ŵangaŵechetaga yakusakala yakwamba achimjawo. Ana mpaka tuŵechete chamti uli yindu yakusakala yakwamba achimjetu?
13 Mpaka tusakasye mbili ja ŵandu ŵane mwangamanyilila mwakuwandisya ngani syakulemwecheka syakwamba jemanjajo. Mwachisyasyo: (1) mlongo ajimi pautumiki wakwe wandaŵi syosope, (2) liŵasa lijimi pautumiki wawo wa pa Beteli, kapena (3) m’bale alesile kutumichila mpela jwamkulungwa jwa mumpingo kapena jwakutumichila jwakamuchisya. Kusala yisyene, mpaka kuŵe kulemwa kwasalilaga ŵandu ŵane kuti komboleka abale ni alongoŵa ŵajimi m’ma utumiki gawoga ligongo lyakuti ŵatesile chakulemwa chinechakwe. Komboleka mpaka paŵe magongo gejinji gele m’weji nganituŵa tumanyilile gagatendekasisye kuti papagwe kuchenga kweleku. Ndaŵi syosope tukumbuchileje kuti mundu jwali mlendo mu tenti ja Yehofa ‘jwangamtendela yangalumbana mjakwe kapena jwangaŵecheta mbili ja chabe ja mjakwe.’
Yikusaŵa yangasawusya kuŵecheta yindu yakusakala yakwamba ŵandu ŵane yampaka yiŵe kwasinjilila (Alole ndime 12-13)
TWACHIMBICHISYEJE ŴANDU ŴAKUSAMJOGOPA YEHOFA
14. Ana ŵandu ŵali achalendo mu chitenti cha Yehofa mpaka aŵambale chamti uli kukamulana ni “ŵandu ŵakumkana Mlungu”?
14 Pa Salimo 15:4 pakusasala kuti ŵandu ŵali paunasi ni Yehofa ŵangakamulana ni “ŵandu ŵakumkana Mlungu.” Ana mpaka tutende chamti uli yeleyi? Ŵandu ŵangali umlamawe, nganituŵa tukombwele kumanyilila naga mundu ali jwakumkana Mlungu kapena iyayi. Ligongo chichi tukuŵecheta yeleyi? Mwachipago mpaka tukamulaneje ni ŵandu ŵane ligongo lyakuti tukusapikangana nawo, nambo ni ngakamulanaga ni ŵandu ŵane ligongo lyakuti akusatukuŵasya. Nambope ŵandu ŵatukusosekwa kwaŵambala ali ŵandu ŵele pewo Yehofa akusiŵawona kuti akwete ndamo syakusakala. (1 Akoli. 5:11) Ŵandu ŵeleŵa ali ŵandu ŵakusatamila kutenda ndamo syakusakala, ŵangakusachimbichisya chikulupi chetu, kapenasoni ŵakusatutendekasya kuti tukaŵa paunasi wakulimba ni Yehofa.—Mis. 13:20.
15. Ana ni litala limpepe lyapi lyampaka tulosye “kwachimbichisya ŵandu ŵakusamjogopa Yehofa”?
15 Pa Salimo 15:4 pakusatusalilasoni kuti ‘Twachimbichisyeje ŵandu ŵakusapikanila AMBUJE.’ Myoyo, mpaka tutende chenene kusosasosa matala gakwalosya chinonyelo nambosoni kwachimbichisya ŵandu ŵali paunasi wambone ni Yehofa. (Alo. 12:10) Ana mpaka tutende chamti uli yeleyi? Litala limo lyakutendela yeleyi alisasile pa Salimo 15:4. Palilembali pakusasala kuti mundu jwali mlendo mu chitenti cha Yehofa akusasosekwa ‘kuyitenda yatesile chilanga, atamose yipweteche chamti uli.’ Kusala yisyene, kukasa chilanga chatwatesile mpaka kwapweteche ŵane. (Mat. 5:37) Yehofa akusasaka kuti ŵandu ŵali achalendo mu chitenti chakwe aŵeje ŵakulupichika ku chilanga chaulombela chiŵatesile. Jwalakwe akusasangalalasoni pakwawona achinangolo ali mkutenda yakomboleka kuti akwanilisye yilanga yakusatenda ni ŵanache ŵawo. Kumnonyela Mlungu soni kwanonyela ŵandu ŵane mpaka kututendekasye kuti ndaŵi syosope tukwanilisyeje yilanga yatutesile.
16. Ana ni litala line lyapi lyampaka twachimbichisye ŵandu ŵali paunasi ni Yehofa?
16 Litala line lyampaka tulosye kuti tukwachimbichisya ŵandu ŵali paunasi wambone ni Yehofa lili kwapochela chenene msimangwetu nambosoni kuŵa ŵakoloŵa magasa. (Alo. 12:13) Kupata ndaŵi jakunguluchila yimpepe ni Aklistu achimjetu kukusatukamuchisya kuti tuŵe nawo paunasi wambone soni kukusamsangalasya Yehofa. Konjechesya pelepa, patukwapochela chenene achimjetu msimangwetu tukusaŵa tuli kumsyasya Yehofa.
TUŴAMBALEJE KUNONYELA MBIYA
17. Ligongo chichi mu Salimo 15 ŵakolasile ngani ja mbiya?
17 Pa Salimo 15:5 tukusaŵalanga kuti mundu jwali mlendo mu chitenti cha Yehofa ‘jwangakongosya chipanje chakwe kuti apate chakonjechesya soni jwangapochela chapachisyepela kuti amlagasye mundu jwangalemwa.’ Ligongo chichi ngani ja mbiyaji ajikolasile mu Salimo jeleji? Yili myoyo ligongo lyakuti naga tukusinonyela mnope mbiya mpaka yitutendekasye kuti twatendeleje ŵandu ŵane yindu yangali chilungamo, yampaka yisokonasye unasi wetu ni Mlungu. (1 Tim. 6:10) Mundaŵi ja m’Baibulo, ŵandu ŵane ŵatendelaga achimjawo ŵakulaga yindu yangali chilungamo mwakwakongosya mbiya kuti pakuwusya chapeleche japenani pakwe. Nambosoni, ŵandu ŵakuwelusya magambo ŵane ŵapochelaga mbiya ni chakulinga chakuti ŵawelusye mwangali chilungamo ŵandu ŵangalemwa. Ndamo syelesi sikusamsakalisya mnope Yehofa.—Esek. 22:12.
18. Ana ni yiwusyo yapi yampaka yitukamuchisye kumanyilila mwatukusasiwonela mbiya? (Ahebeli 13:5)
18 Jwalijose mpaka atende chenene kuganichisya mwakusasiwonela mbiya. Akusosekwa kuliwusya kuti, ‘Ana ngusatamila kuganichisya ya mbiya nambosoni yindu yampaka sume? Ana panjasime mbiya, ngusachelewa kuwusya paganisya kuti mundu jwanamjasimejo ngakusisaka? Ana kola mbiya kukusandendekasya kuliwona kuŵa mundu jwakusosekwa mnope, nambo nikulepelaga kwakamuchisya ŵandu ŵane? Ana ngusinawona abale ni alongo ŵane kuti ali ŵakunonyela yindu yakuchilu ligongo lyakuti akwete mbiya? Ana ngusakamulana mnope ni ŵandu ŵakwete mbiya ni kwaŵambalaga ŵandu ŵakulaga?’ Yili yakusosekwa mnope kuliwusya yiwusyo yeleyi ligongo lyakuti tukwete upile wakuŵa achalendo mu chitenti cha Yehofa. Myoyo, naga tukusaka kupitilisya kuŵa achalendo mu chitenti cha Yehofa, tukusosekwa kuŵambala kusinonyela mnope mbiya. Naga tukutenda yeleyo, Yehofa ngasatuleka.—Aŵalanje Ahebeli 13:5.
YEHOFA AKUSIŴANONYELA ŴANDU ŴALI NAJO PAUNASI
19. Ana chakulinga cha mfundo syatusalile Yehofa mu Salimo 15 chili chichi?
19 Salimo 15 jikusamalisya ni chilanga chakuti: ‘Mundu jwakutenda yinduyi pangali chindu chilichose chitichimtenganya.’ (Sal. 15:5) Palilembali jwamasalimo jwasasile ligongo lyekulungwa lyalikusamtendekasya Yehofa kutuŵenda kuti tutendeje yindu yosope yayikolasile mu Salimo 15. Jwalakwe akusasaka kuti tuŵeje ŵakusangalala. Myoyo, naga tukutenda yindu yosope yatusalile Yehofa tuchikola umi wambone apano soni jwalakwe chachituchenjela.—Yes. 48:17.
20. Ana ŵandu ŵali achalendo mu chitenti cha Yehofa akwembecheya chichi?
20 Ŵandu ŵele Yehofa ŵajitichisye kuti aŵe achalendo mu chitenti chakwe akwembecheya kola sogolo jambone. Aklistu ŵasagulwe akwete upile wakola “malo gejinji gakutama” gele Yesu ŵalinganyichisye kwinani. (Yoh. 14:2) Ŵandu ŵakwete chembecheyo chakutama pachilambopa akwembecheya kukwanilichikwa kwa maloŵe gagakusimanikwa pa Chiwunukuko 21:3. Kusala yisyene, tukusawuwona kuŵa upile wekulungwa mnope kuŵilanjidwa kuti tuŵe paunasi wambone ni Yehofa nambosoni kuŵa achalendo mu chitenti chakwe chakuwanichisya mpaka kalakala.
NYIMBO NA. 39 Kola Lina Lyambone kwa Mlungu
