1. Bila mbi tulenda bakila mamboti beto tadila mambu momo madi mu Minkunga 15:1-5?

 MU DISOLO dio diviokidi, tulongukidi ti bisadi bio bikiveni kuidi Yehova bilenda tedusu mu nzo’andi yi ngoto bawu yonzula nguizani yingolo ayi niandi. Vayi mbi tulenda tula muingi tuba nguizani yimboti ayi niandi? Minkunga kapu 15 mitubidi mambu mawombo mu diambu beni. (Tanga Minkunga 15:1-5.) Nkunga beni wutuveni malongi mo malenda kutusadisa tuba pfika pfika kuidi Nzambi.

2. Mbi bituma Davidi katubila nzo yi ngoto yi Yehova?

² Minkunga 15 mitonini mu ziphova ziazi: “O Yehova, nani wulenda vuanda mu nzo’aku yi ngoto? Nani wulenda zinga ku mongo’aku wunlongo?” (Nku. 15:1) Mu thangu keba tubila “nzo yi ngoto” yi Yehova, bulendakana nsoniki wu minkunga Davidi wuyindula tabernakle yoyi yiba ku Ngiboni mu mua thangu. Davidi wutubila phe “mongo wunlongo,” thangu zinkaka weba yindulanga nzo yi ngoto yoyi yiba ku mongo Sioni, ku Yelusalemi. Ku sudi yi Ngiboni, ko kuidi kielo ki zikilometre ziwombo, kuawu Davidi katungila nzo mosi yi ngoto muingi balundila kesi yi luwawanu tuamina bayitungila buangu ki phundulu kioki yifueti lundimina mvimba mvimba.​—2 Sa. 6:17.

3. Bila mbi tufueti tudila thalu mu mambu mo madi mu Minkunga 15? (Tala phe foto.)

³ Bukiedika, bana ba Iseli bawombo basi baka ko luve lu kuesadila mu tabernakle, ayi mu buela, basi baka ko diluaku dikota ku khati nzo yi ngoto, koko kueba lundiminanga kesi yi luwawanu. Vayi bisadi bioso bikuikama bi Yehova biba na diluaku ditedusu ku nzo’andi yi ngoto yi mbonosono mu ba ayi mu tatamana ba bakundi bandi. Diawu diambu beto boso tueta tomba. Minkunga  15, yitumonisini bikadulu bio tufueti yonzula ayi bio tufueti monisa muingi tutatamana ba bakundi ba Yehova.

DIATILA MU KAMBU TSEMBOLO AYI VANGA MAMBU MA BUSONGA

4. Bue tuzabidi ti mbotama yisi ko kaka diambu dio Yehova kakututomba? (Yesaya 48:1)

⁴ Mu Minkunga 15:2, nkundi Nzambi kafueti ba ‘mutu wun’diatilanga mu kambu tsembolo, wumvanganga mambu ma busonga.’ Ziphova “diatila” ayi “vanga,” madi mambu mo tufueti tatamana vanga. Vayi bukiedika tulenda ‘diatila mu kambu tsembolo’? Ninga. Kadiambu ko, kuisi ko mutu wuduka, Yehova makatutadila banga batu “ban’diatila mu kambu tsembolo” enati tulembo tudi ngolo mu kuntumukina. Thangu tukiveni kuidi Nzambi ayi tubeki mbotama, yawu yikala kuandi thonono yi luzingu yi nguizani ayi Nzambi. Simba ti mu thangu thama, ba mu dikanda di Iseli yawu ko yeba tulanga ti mutu kathumu kikununu kuidi Yehova. Bankaka beba kunsambidilanga ko mu “bukiedika ayi mu busonga.” (Tanga Yesaya 48:1.) Bana ba Iseli bakuikama bafuana mu tomba zaba minsiku mi Yehova ayi kumikikinina. Bobuawu phe lumbu kiaki, muingi Nzambi katuyangalala, tulendi ko kaka sukila mu baka mbotama voti mu kutakananga mu zikhutukunu zi kimvuka. Tufueti tatamana “vanga mambu ma busonga.” Bue tulenda kubutudila?

5. Tumukina Yehova mu mambu moso, mbi kueta tombana?

⁵ Va meso ma Yehova, “diatila mu kondo tsembolo” ayi “vanga mambu ma busonga” yisi sukila ko kaka mu kutakananga thangu ka thangu mu zikhutukunu zi kimvuka. (1 Sa. 15:22) Tufueti tula ngolo mu tumukina Nzambi mu mambu moso ma luzingu lueto buba va beto veka tuidi. (Zin. 3:6; Mpo. 12:13, 14) Yidi diambu dimfunu tutula ngolo mu tumukina Yehova buba mu bina bi mambu bifioti fioti. Beto kubutudila, yawu mayi monisa ti tueti kun’zola, yawu mayitula ti niandi phe katuzola.​—Yow. 14:23; 1 Yow. 5:3.

6. Mu tadila Ebelewo 6:10-12, diambu mbi dilutidi mfunu mu mambu moso mo tuvanga mu thama?

 ⁶ Yehova weta yangalala buwombo mu mambu moso momo tumvangila mu thama. Diawu, mambu mamboti momo tuvanga mu thangu thama mawu ko kaka mafueti tusadisa tutatamana ba mu nzo yi ngoto yi Yehova. Diambu beni badimonisini bumboti mboti mu Ebelewo 6:10-12. (Tanga.) Yehova kazimbakananga ko mambu mamboti mo tuvanga mu thama. Vayi tidi ti tutatamana kunsambila mu muel’eto woso “na tii kuna tsukulu.” Wela kutuvana mfutu wuba kikundi ki mvu ka mvu ayi niandi “beto bika vonga.”​—Nga. 6:9.

TUBANGA MAMBU MAKIEDIKA MU NTIM’AKU

7. Diambu mbi dieta tombana muingi mutu katubanga mambu makiedika mu ntim‘andi?

⁷ Woso mutu tidi kikununu mu nzo yi ngoto yi Yehova kafueti “tubanga kiedika mu ntim’andi.” (Nku. 15:2) Yawu yintia tuba ti kadi vunanga. Yehova tidi ti tuba batu bantubanga kiedika tii mu na zinzala. (Ebe. 13:18) Didi diambu dimfunu, ‘bila Yehova weta kakumukina batu bantubanga mayuya vayi weta ba nkundi batu bo beta vanga mambu ma busonga’.​—Zin. 3:32.

8. Kifu mbi tufueti manga?

⁸ Batu bo ‘bantubanga kiedika mu ntim’awu’ bakala ko batu bo beta monisa va n’yalu nguba ti beta tumukina minsiku mi Nzambi vayi mu kitsueki bamitumukinang’awu ko mu vanganga mambu mambimbi. (Yes. 29:13) Beta tula ngolo mu kondo zingila mu nzingulu yi mayuya. Mutu nio wuntubanga mayuya kalenda tona memata mu nduenga yi malongi mankaka ma Yehova. (Zaki 1:5-8) Kalenda kambu tumukina Yehova mu mambu mo niandi kammona ti masiandi mfunu ko. Diawu, niandi mona ti kambu kuandi kutumamana kukadi kuandi kunnatina bivonza, kalenda tatamana bue kambu tumukina minsiku mi Nzambi ayi tsambudulu’andi mayi ba yi luvunu. (Mpo. 8:11) Diawu, beto, tufueti vanganga mambu mu bukiedika.

9. Dilongi mbi tulenda baka mu khutana yitheti yi Yesu ayi Natanayeli? (Tala phe foto.)

⁹ Tulenda longuka mfunu wuba ntima wukiedika mu khutana yitheti yi Yesu ayi Natanayeli. Diambu dimosi dingitukulu disalama mu thangu Filipi kanata nkundi’andi Natanayeli kuidi Yesu. Kadiambu ko yawu yiba khumbu yitheti yo Yesu kadenganina Natanayeli, wutuba ti:  “Tala, muisi Iseli wukiedika, mu niandi mu kambulu mayuya.” (Yow. 1:47) Yesu wuzaba ti balonguki bandi babe tubanga kiedika, vayi phila yoyi Natanayeli keba tubilanga kiedika yeba yitukisanga batu bankaka. Kadiambu ko banga beto, Natanayeli wuba mutu wukambu duka. Vayi keba vanganga ko mambu mu diambu di tomba yitukisa batu voti kubavuna, wuba mutu weba tubanga kiedika mu mambu moso. Yesu weba yangalalanga buwombo kadulu beni kioki ayi weba kunniemisanga mu diambu di kiawu. Madi ba diambu di lukumu enati beto phe Yesu wutuniemisini mu diambu di kadulu beni!

10. Bila mbi tufueti mangina sadila mu phila yimbimbi dikaba dituba dio batuveni? (Zaki 1:26)

¹⁰ Mambu momo bakututomba momo madi mu Minkunga 15 nguizani phe madi mu phila yoyi tueta vangila batu bankaka mambu. Minkunga 15:3 mu diambu di mutu nioni katedisidi mu nzo’andi yi ngoto, yitubidi ti: “Katubidilanga ko batu mu ludimi luandi, kavangilanga n‘diandi mambu mambimbi ko, ayi kabivisanga n‘zitusu wu n‘diandi ko.” Sadila ziphova zieto mu phila yimbimbi, kulenda monisa batu bankaka phasi ayi kulenda kutukakidila tubika ba mu nzo yi ngoto yi Yehova.​—Tanga Zaki 1:26.

11. Kibuezi muna mbi, ayi tumbu mbi mutu nioni weta tula kibuezi ayi mengi balula ntima kela baka?

¹¹ Nsoniki wu Minkunga monisini bumboti mboti tsundu yi kibuezi. Kibuezi muna mbi? Nduka nduka yinsundula tubidila mutu mu phila yi mayuya yo yilenda bebisa lukumu luandi. Batu bo bantulanga kibuezi ayi bamengi balula ntima balenda bimusu mu kimvuka ki Bukristu.​—Yel. 17:10.

12-13. Mambu mbi malenda tula ti tubebisa lukumu lu ban‘dieto mu kondu kuzaba? (Tala phe foto.)

¹² Minkunga 15:3 yitubambudi diaka moyo ti batu bo Yehova katedisidi kuidi niandi bavangilanga ko ban‘diawu mambu mambimbi ayi babebisanga ko lukumu lu ban‘diawu. Bue tulenda bakinina mu ntambu wutubidila ban‘dieto?

¹³ Mu kondu zaba tulenda tubidila mutu mu tembikisa zitsangu zimbimbi mu diambu di  niandi. Mu kifuani: 1) khomba mosi wunketo bikidi kisalu ki thangu ka thangu, 2) bakala dimosi ayi nketo’andi bakadi bue sala ku Beteli, voti 3) khomba mosi wubakala kasiedi ko nkulutu voti sadi mu kisalu. Madiba diambu dimbimbi mu kue tubi kuidi batu bankaka ti bakhomba beni ba babakala ayi ba baketo nanga diambu dimbimbi bavengi diawu mambu ma luzingu luawu mame balukila. Kulenda ba na mambu mankaka matudidi ti luzingu luawu lubaluka, mo katuisi zaba ko. Mu buela, mutu nio tedusulu mu nzo yi ngoto yi Yehova “kavangilanga ko n‘diandi mambu mambimbi, ayi kabebisanga ko lukumu lu n‘diandi.”

ZITISA BATU BO BETA KINZIKA YEHOVA

14. Sudikisa phila yoyi batu bo Yehova katedisidi kuidi niandi beta mangina “batu bo beta vanga mambu mambimbi.”

¹⁴ Minkunga 15:4 mu diambu di bakundi ba Yehova mitubidi ti: ‘Manga mutu nio weti vanga mambu mambimbi.’ Bue tulenda kubutudila? Bo tuidi batu bakambu lunga, tuisi ko bafuana mu zengila mutu nkanu ti widi mutu wumbimbi. Bila mbi? Tulenda yangalala batu bankaka mu tadila bikadulu biawu voti bumutu buawu vayi tulenda phe kambu yangalala batu bankaka. Diawu, tufueti manga kaka batu bobo Yehova keta mona ti badi “batu bambimbi.” (1 Ko. 5:11) Batu beni badi batu bo beta manga balula mavanga mawu mambimbi, bo bakambulu luzitu mu minu kieto ayi mambu mo tueta wilukila, voti bo beta tomba vonda kipheve kieto.​—Zin. 13:20.

15. Phila mbi tufueti zitisila batu bo “beta kinzika Yehova”?

¹⁵ Mu ndambu yinkaka, Minkunga 15:4 yikutulomba tukinzika “bo beta zitisa Yehova.” Diawu, tufueti tomba maluaku ma monisa buphombo ayi luzitu kuidi bakundi ba Yehova. (Lom. 12:10) Mu phila mbi? Yimosi yi ziphila ziozi zidi mu Minkunga 15:4 yidi ti mutu nioni batedisidi mu nzo yi ngoto yi Yehova, ‘enati veni tsila mu diambu dimosi, weta kuyidukisa buba ti yilenda kuntotudila ziphasi.’ Beto kambu dukisa zitsila zieto, tulenda lueka batu bankaka. (Mat. 5:37) Mu kifuani, Yehova weta lomba batu bo katedisidi kuidi niandi badukisa ndevi’awu yi dikuela. Weta mona phe khini mu thangu bambuta batudidi zingolo zikiedika mu dukisa zitsila zio baveni bana bawu. Luzolo lueto mu diambu di Nzambi ayi mu diambu di ban’dieto malu tupusa mu dukisa mambu mo tutubidi mu tadila maluaku meto.

16. Phila mbi diaka yinkaka tulenda zitisila bakundi ba Yehova?

¹⁶ Phila yinkaka yi zitisila bakundi ba Nzambi yidi yibanga kadulu kiyamba banzenza ayi kadulu kikaba. (Lom. 12:13) Viokisa thangu ayi bakhomba zieto ba babakala ayi ba baketo kueta tusadisa tuyedisa nguizani’eto na bawu ayi Yehova. Mu buela, beto monisa kadulu kiyamba banzenza, matu sokudila Yehova.

KADI BA NZOLU MBONGO

17. Bila mbi mambu matedi zimbongo matubulu mu Minkunga 15?

¹⁷ Tutengi ti mutu nio Yehova katedisidi kuidi niandi “katombanga ndandu ko va yilu zimbongo zio kadevisa, ayi kakikininanga ko makaba mu diambu di bedisa mutu kambulu zaba diambu.” (Nku. 15:5) Bila mbi batubidi zimbongo mu nkunga beni wowo wukhufi? Bila beto tadila zimbongo mu phila yi kambu fuana, kulenda lueka batu bankaka ayi bebisa kikundi kieto ayi Nzambi. (1 Tim. 6:10) Mu thangu thama, batu bankaka beba dilanga mu nzila yi bakhomba ziawu mimputu mu kubadevisa zimbongo ayi kubafutisa ziawu ayi ndandu. Mu buela, minsambisi minkaka mieba kikininanga dianga voka ayi yawu yeba tulanga ti basambisa batu bo bakondolo bila mu phila yimbimbi. Mavanga ma phila yoyi mayangidikanga ko Yehova.​—Yeh. 22:12.

18. Biuvu mbi bilenda tusadisa wumosi mosi mu beto tuzaba phila yo tueta tadila zimbongo? (Ebelewo 13:5)

 ¹⁸ Didi diambu dimboti wumosi mosi mu beto katadilanga phila yoyi keta muena zimbongo. Wukiyuvula: ‘Ndieta viokisa thangu mu lembo yindulanga zimbongo ayi bima biobi ziawu zilenda sumba? Minu deva zimbongo, ndivika futanga ko, mu yindula ti mutu nio wundefisidi ziawu kasi’andi ko phuila mu ziawu? Ba zimbongo ziwombo kueta kuthula ndikimona ti minu ndutidi mfunu ayi batu bankaka, ayi kueta kukhakidila ndibika ba kadulu ki kaba? Ndieta tadila bakhomba ziama ba babakala ayi ba baketo badi batu beta zola bima bi nza mu bila kioki badidi zimbongo? Ndieta luta viokisa thangu ayi batu bo badi busila ayi ndiviokisanga ko thangu na batu bo bakambulu zimbongo?’ Diluaku dinneni tubeki mu ba batu bo Yehova katedisidi kuidi niandi. Tulenda tanina diluaku beni diodi mu tula ti luzingu lueto lubika ba nzolu mbongo. Beto kubutudila, Yehova kalendi ko kutuyekula!​—Tanga Ebelewo 13:5.

YEHOVA WETA ZOLA BAKUNDI BANDI

19. Bila mbi Yehova katididi ti tusadila mambu moso madi mu Minkunga 15?

¹⁹ Minkunga 15 yimanini mu tsila yayi: “Woso wumvanganga mambu momo kalendi nikunu ko.” (Nku. 15:5) Vava nsoniki wu Minkunga wutumonisini lukanu lu mambu mo Nzambi kakutulomba. Yehova katidi ti tuba mu zikhini. Diawu, wutuveni lutuadusu lo lukutunatina mamboti mandi ayi lutanunu luandi.​—Yes. 48:17.

20. Mambu mbi batu bo Yehova katedisidi kuidi niandi balenda vingila?

²⁰ Batu bo Yehova kakikinini ayi katedisidi kuidi niandi balenda vingila luzingu lumboti mu bilumbu binkuiza. Bisadi bikuikama bio bitulu mafuta mu kipheve bela baka “bibuangu biwombo” bio Yesu kabakubikila ku diyilu. (Yow. 14:2) Bobo badi vuvu ki zinga va mbata ntoto balembo vingila mu phuila yoso lungana ku Tsongolo 21:3. Bukiedika, beto boso tuidi na lukumu lunneni lutedusu mu luzolo loso kuidi Yehova muingi tuba bakundi bandi ayi ba batu bobo katedisidi mvimba mvimba mu nzo’andi yi ngoto!