1. ¿Xi zucaa Salmo 15:​1-5 laanu gúninu?

 LU ARTÍCULO ni gudiʼdiʼ ca bizíʼdinu zanda chuʼ ca xpinni Jehová ni maʼ guyuunisa ndaaniʼ yoo de lari stibe pa gaca amistad ni napanécabe Jehová nadipaʼ. Peru ¿ximodo zanda gácani nadipaʼ yaʼ? Salmo capítulo 15 racané laanu gánnanu ximodo, purtiʼ luni zeeda caadxi cosa ni zacané laanu guidxíñanu jma gaxha de Dios (biindaʼ Salmo 15:​1-5).

2. ¿Xi zándaca caníʼ ique David ora guniʼbe yoo de lari stiʼ Jehová?

² Sicaríʼ ruzulú Salmo 15: «Jehová, Dios stinneʼ, ¿tu laa zanda chuʼ ndaaniʼ yoo de lari stiluʼ? ¿Tu laa zanda cueza lu dani nayá stiluʼ?» (Sal. 15:1). Ora bicaa David Salmo riʼ ne guniʼbe de «yoo de lari» stiʼ Jehová zándaca caníʼ íquebe de tabernáculo stiʼ Dios dxi guyuuni Gabaón. Laaca bizeeteʼ David de «dani nayá» stiʼ Dios, zándaca raríʼ cuzeetebe de Sión ni nuu Jerusalén. Raqué, chupa chonna kilómetru ladu gueteʼ de Gabaón, bicuí David ti yoo de lari para chuʼ arca stiʼ acuerdu stiʼ Jehová laga cuí ti lugar ra guiaana ni (2 Sam. 6:17).

3. ¿Xiñee galán guiníʼ íquenu ni zeeda lu Salmo 15? (Biiyaʼ imagen ca).

³ Tiempu que, stale de ca israelita qué ñanda ñúnicaʼ dxiiñaʼ ndaaniʼ tabernáculo que, laxa peʼ chúʼcabe ndaaniʼ yoo de lari ra riaapaʼ Arca stiʼ acuerdu que. Peru guiráʼ ca ni naca fiel Jehová zanda gaca xhamígucaʼ laabe, nga riníʼ casi ñaca ñuucabe ndaaniʼ yoo de lari stibe. Ne ngaca nga ni racaláʼdxinu gúninu. Lu Salmo 15 riete caadxi cualidad ni caquiiñeʼ gápanu para cadi gusaana de gaca xhamígunu Jehová.

 GUIBÁNINU SIN DONDA NE GÚNINU NI JNEZA

4. ¿Ximodo nánnanu cadi caquiiñeʼ si chuʼnísanu para chuulaʼdxiʼ Jehová ni rúninu? (Isaías 48:1).

⁴ Lu Salmo 15:2 riete, ti xhamigu Dios la? naca ti binni «ni nabani sin donda, ni runi ni jneza». Ca diidxaʼ nabani ne runi caníʼcani de tuuxa ni cayuni stipa ne qué rusaana de guni xiixa. Peru ¿ñee zanda guibáninu «sin donda» la? Zanda pue. Neca guiranu nácanu binni ruchee, zanda guʼyaʼ Jehová laanu casi binni ni nabani sin donda pa gúninu stipa pur guzúʼbanu stiidxabe. Ne ruzulú ruuyaʼ Jehová laanu casi binni ni nabani sin donda ora gudiʼnu xpídanu laabe ne chuʼnísanu. Cadi guiaandaʼ laanu, tiempu gucuá Biblia, cadi tisi naca tuuxa israelita riníʼ nga naca xhamigu Jehová. Guyuu tu laa rucaa ridxi Dios neca cadi cayuni ni de guidubi ladxidóʼ ne cadi cayuni ni jneza (biindaʼ Isaías 48:1). Ca ni dxandíʼ xhamigu Jehová la? riziidicaʼ ca ley stibe ne rinanda cani. Ne ngaca nga ni rizaaca yanna: para chuulaʼdxiʼ Jehová ni rúninu la? cadi caquiiñeʼ si chuʼnísanu ne chuʼnu ndaaniʼ xquidxi Jehová. Caquiiñeʼ cadi gusaananu de gúninu «ni jneza». Peru ¿xi caquiiñeʼ gúninu para cadi gusaana de gúninu ni yaʼ?

5. Para Jehová, ¿xi runi ti binni ni nabani sin donda ne runi ni jneza?

⁵ Para Jehová la? ti binni ni «nabani sin donda» ne ni «runi ni jneza», cadi rié si reunión guiráʼ semana (1 Sam. 15:22). Laanu ca xpinni Cristu, naquiiñeʼ gúninu stipa pur guzúʼbanu stiidxaʼ Dios lu guiráʼ ni gúninu lu xquendanabáninu, dede né ora nuunu stúbinu (Prov. 3:6; Ecl 12:​13, 14). Nabé risaca gúninu stipa pur guzúʼbanu stiidxaʼ Jehová dede lu ca cosa jma nahuiiniʼ. Pa gúninu zacá, zuluinu nadxiinu laabe ne laabe laaca zannaxhiibe laanu (Juan 14:23; 1 Juan 5:3).

6. Neca qué huaxélenu de Jehová casi ná Hebreos 6:​10-12, ¿xiruʼ caquiiñeʼ gúninu?

 ⁶ Guizáʼ rusisaca Jehová ni maʼ bíninu pur laa. Peru neca qué huaxélenu de Jehová, cadi ngasi nga caquiiñeʼ para cadi guireʼnu de ndaaniʼ yoo de lari stibe o cadi gusaana de gaca xhamígunu laabe casi ná Hebreos 6:​10-12, (biindaʼ ni). Neca qué rusiaandaʼ Jehová nin tobi de ca cosa ni rúninu, racaláʼdxibe cadi gusaana de gúninu ni nabe de guidubi xhiálmanu «dede dxi gueeda fin». «Pa qué guidxáganu» la? qué ziuu dxi gusaana de gaca xhamígube laanu ne nga nga ti premiu ni chigudiibe laanu (Gál. 6:9).

GUININU NI DXANDÍʼ DE NDAANIʼ LADXIDOʼNO

7. ¿Xii nga guininu ni dxandíʼ de ndaaniʼ ladxidoʼno?

⁷ Lu Salmo 15:2 riete, ca binni ni runi invitar Jehová para chuʼ ndaaniʼ yoo de lari stiʼ nga ca ni «riníʼ ni dxandíʼ de ndaaniʼ ladxidóʼ». Qué riníʼ si ni cadi gusiguiinu. Ni racalaʼdxiʼ Jehová nga guininu ni dxandíʼ ne gácanu honradu lu guiráʼ cosa (Heb. 13:18). Ne guizáʼ risaca ndiʼ purtiʼ «ribixhilaʼdxiʼ Jehová ca binni riuulaʼdxiʼ guni cosa malu, peru guizáʼ xhamígube ca ni runi ni jneza» (Prov. 3:32).

8. ¿Xi cadi naquiiñeʼ gúninu?

⁸ Ti binni ni «riníʼ ni dxandíʼ de ndaaniʼ ladxidóʼ» qué rinanda ca ley stiʼ Dios ora si cayuuyaʼ binni laa ne ora nuu stubi maʼ qué rulabi cani (Is. 29:13). Ca binni si ni rusiguii nga runi zacá, peru laanu qué racaláʼdxinu gácanu casi laacabe. ¿Ximodo riaba tuuxa lu trampa riʼ yaʼ? Ora ruzulú riníʼ íquebe cadi guiráʼ diʼ ca ley stiʼ Jehová zanda gacané laabe (Sant. 1:​5-8). Zándaca qué ruzuubabe stiidxaʼ Jehová lu ca cosa ni rábibe jma huaxiéʼ risaca. Peru, pa bíʼyabe qué nizaacabe gastiʼ ra bíʼnibe ti cosa malu, zándaca despué zúnibe xcaadxi cosa jma malu. Ora runi tuuxa sicaríʼ, maʼ cadi dxandíʼ cayuni adorar Dios de guidubi ladxidóʼ (Ecl. 8:11). Peru laanu la? racaláʼdxinu guininu ni dxandíʼ ne gácanu honradu lu guiráʼ cosa.

9. ¿Xi rusiidiʼ ni bizaaca dxi binibiáʼ Jesús Natanael laanu? (Biiyaʼ imagen ca).

⁹ ¿Xiñee nánnanu nabe risaca guininu  ni dxandíʼ de ndaaniʼ ladxidoʼno yaʼ? Pur ni bizaaca dxi binibiáʼ Jesús Natanael. Ora yené Felipe Natanael, xhamigu, para gunibiáʼ Jesús, bizaaca xiixa ni ridxagayaanu. Neca qué huayuu dxi guʼyaʼ Jesús Natanael, guniʼbe: «Laguuyaʼ, dxandíʼ peʼ laabe nga ti binni Israel ni qué rusiguii» (Juan 1:47). Nanna Jesús naca ca discípulo stiʼ binni ni riníʼ ni dxandíʼ, peru biiyabe jma rusihuinni Natanael cualidad riʼ purtiʼ zaqué peʼ Natanael neca naca binni ruchee casi laanu. Guizáʼ guyuulaʼdxiʼ Jesús modo naca Natanael purtiʼ riníʼ ni dxandíʼ ne pur ngue biʼniʼ felicitarbe laa. ¿Cadi dxandíʼ guizáʼ galán ñuni sentirnu pa ngueca niníʼ Jesús de laanu la?

10. ¿Xiñee caquiiñeʼ gucueezanu ruaʼnu? (Santiago 1:26).

¹⁰ Stale de ca cosa ni riete lu Salmo 15, caníʼcani de modo guni tratarnu xcaadxi. Lu Salmo 15:3 riete binni ni rudii Jehová lugar chuʼ ndaaniʼ yoo de lari stiʼ la? «qué riníʼ diidxaʼ para guniná, qué runi cosa malu para guniná binni ne qué riníʼ ni cadi dxandíʼ de ca xhamigu para gusaana laacabe mal». Ora qué rucueeza tuuxa ruaa, cadi runiná si xcaadxi binni; sínuque laaca rucueezani laa de gaca xhamigu Jehová o chuʼ ndaaniʼ yoo de lari stibe (biindaʼ Santiago 1:26).

11. ¿Xi bizeeteʼ hombre bicaa Salmo ca, ne xi rizaaca tuuxa ni qué raca arrepentir?

¹¹ Bizeeteʼ hombre bicaa Salmo ca de tuuxa ni rindisa falsu para guni biidiʼ lá xcaadxi. Rúnibe ni ra riniʼbe cosa ni cadi dxandíʼ de laacaʼ. Ora ti binni runi ni bizéʼtenu riʼ ne qué gaca arrepentir la? raca expulsar de ndaaniʼ xquidxi Jehová (Jer. 17:10).

12, 13. ¿Pora zanda gusaananu mal ca xhamígunu sin gudiʼnu cuenta? (Biiyaʼ imagen ca).

¹² Laaca rusietenalaʼdxiʼ Salmo 15:3 laanu ti binni ni maʼ nuu ndaaniʼ yoo de lari stiʼ Jehová la? «qué runi cosa malu para  guniná binni ne qué riníʼ ni cadi dxandíʼ de ca xhamigu para gusaana laacabe mal». ¿Ximodo nga zanda gusaananu mal ca xhamígunu yaʼ?

¹³ Zándaca sin gudiʼnu cuenta gusaananu mal tuuxa ora guininu xiixa ni cadi galán de laa. Guiníʼ íquenu chonna cosa ni zanda guizaaca: primé, bisaana ti hermana de gaca precursora, guiropa, biree ti guendaxheelaʼ de Betel ne guionna, biete lu ti anunciu maʼ cadi ancianu o siervu ministerial ti hermanu. ¿Ñee jneza nga guiníʼ íquenu biʼniʼ ca hermanu riʼ xiixa cosa malu nga runi maʼ qué gápacaʼ privilegiu sticaʼ ne gábinu ni xcaadxi la? Zándaca qué gánnanu xi peʼ nga ni bizaaca. Ne cadi guiaandaʼ laanu tuuxa ni maʼ nuu ndaaniʼ yoo de lari stiʼ Jehová «qué runi cosa malu para guniná binni ne qué riníʼ ni cadi dxandíʼ de ca xhamigu para gusaana laacabe mal».

GUSISÁCANU CA NI RIDXIBI JEHOVÁ

14. ¿Tuu nga ca binni «qué iquiiñeʼ» ni naquiiñeʼ gucáʼnanu?

¹⁴ Salmo 15:4 ruzeeteʼ, ti xhamigu Jehová la? «qué ridxaaga binni ni qué iquiiñeʼ». Peru ¿ximodo zanda gánnanu «qué iquiiñeʼ» ti binni yaʼ? Cumu binni ruchee laanu la? cadi lu nádinu nga nuu guininu tuu nga ti binni ni qué iquiiñeʼ. ¿Xiñee yaʼ? Purtiʼ pur modo naca binni, nuu tu laa ziaba laanu galán ne nuu tu laa zuchiichi laanu. Nga runi galán gucáʼnanu ca binni si ni ruuyaʼ Jehová casi binni qué iquiiñeʼ (1 Cor. 5:11). Ladecabe nga nuu ca binni ni runi xiixa pecadu ne qué raca arrepentir, ca binni ni qué runi respetar ni runi crenu ne modo runi adorarnu Dios ne ca ni racalaʼdxiʼ guxheleʼ laanu de Jehová (Prov. 13:20).

15. ¿Gunáʼ nga ti modo zanda gusisácanu «ca ni ridxibi Jehová»?

¹⁵ Sti cosa ni cuzeeteʼ Salmo 15:4 nga naquiiñeʼ gusisácanu «ca ni ridxibi Jehová». Nga runi, ruyúbinu modo gácanu nachaʼhuiʼ né ca xhamigu Dios ne runi respetarnu laacaʼ (Rom. 12:10). ¿Gunáʼ nga ti modo zanda gúninu ni yaʼ? Salmo 15:4 ná tuuxa ni nuu ndaaniʼ yoo de lari stiʼ Jehová «qué rusaana de guni ni maʼ biʼniʼ prometer neca guiree guniti». Pa qué gúninu ni maʼ biʼniʼ prometernu, zándaca guninanu xcaadxi (Mat. 5:37). Tobi de ca promesa ni ribeza Jehová guni cumplir ca xhamigu nga voto ni rúnicaʼ ora guichaganacaʼ. Ne sti cosa ni racaláʼdxibe nga guni cumplir ca padre ca promesa ni rúnicaʼ ca xiiñicaʼ. Cumu nadxiinu Dios ne binni la? zúninu guiráʼ ni nuu lu nanu para guni cumplirnu ni maʼ bidii stiidxanu.

16. ¿Xi sti modo zanda gusisácanu ca xhamigu Jehová?

¹⁶ Stiʼ modo zanda gusisácanu ca xhamigu Dios nga ora guidxaagalunu laacabe ra lídxinu ne ora rudiʼnu laacabe de ni nápanu (Rom. 12:13). Ra guni invitarnu ca hermanu stinu ora chigúninu xiixa para chuʼnu nayecheʼ, jma raca xhamígunu laacabe ne Jehová. Ne pa guidxaagalunu laacabe ra lídxinu, cayúninu casi runi Jehová.

GÁPANU CUIDADU CADI GANNAXHIINU BUELTU

17. ¿Xiñee riete de bueltu lu Salmo 15?

¹⁷ Lu Salmo 15 laaca riete, ti xhamigu Jehová la? «qué rutiiñeʼ bueltu para si guquixe interés ne qué rudii lugar sícabe laa para guniná tuuxa ni qué gapa donda» (Sal. 15:5). Neca huaxiéʼ diidxaʼ riete lu Salmo 15 riʼ, peru ¿xiñee riete de bueltu luni yaʼ? Purtiʼ nagueenda zanda quiteʼ bueltu laanu ne gannaxhiinu ni. Pa  gannaxhiinu bueltu la? zándaca guninanu xcaadxi ne gusaanaʼ de gaca xhamígunu Dios (1 Tim. 6:10). Tiempu gucuá Biblia, guyuu tu laa bitiiñeʼ bueltu ne guca aprovecharcaʼ de ca bíʼchicaʼ pobre ra biʼniʼ cobrarcaʼ interés. Ne laaca guyuu juez ni guzícabe laa para guniná tuuxa ni qué gapa donda. Nanalaʼdxiʼ Jehová guni binni ca cosa riʼ (Ezeq. 22:12).

18. ¿Xi naquiiñeʼ guinabadiidxanu? (Hebreos 13:5).

¹⁸ Galán guiníʼ íquenu pabiáʼ rusisácanu bueltu. Zanda guinabadiidxanu: «¿Ñee nisi bueltu maʼ cá iqueʼ ne xi nuaaʼ sieʼ la? Ora gutiiñeʼ tuuxa naa bueltu, ¿ñee rindaa para quixeʼ ni laabe purtiʼ riníʼ iqueʼ cadi caquiiñebe ni la? ¿Ñee rusisacaʼ naa purtiʼ si napaʼ bueltu la? ¿Ñee raca nagana para naa gudieeʼ de ni napaʼ la? ¿Ñee riníʼ iqueʼ guiráʼ ca hermanu ni napaʼ bueltu jma nadxiicaʼ bueltu que Jehová la? ¿Ñee jma ruyubeʼ gaca xhamiguaʼ ca ni napa bueltu ne qué ridxaagaʼ ca pobre la?». Ti ndaayaʼ naroʼbaʼ nga gaca xhamígunu Jehová o chuʼnu ndaaniʼ yoo de lari stibe. ¡Cadi gusaanaʼ de gaca xhamígunu Jehová! Nga runi, caquiiñeʼ gápanu cuidadu cadi gannaxhiinu bueltu. Pa gúninu ni la? qué ziuu dxi gusaana Jehová laanu (biindaʼ Hebreos 13:5).

NADXII JEHOVÁ CA XHAMIGU

19. ¿Xiñee canabaʼ Jehová laanu gúninu ca cosa ni riete lu Salmo 15?

¹⁹ Ndiʼ nga promesa ni riluxené Salmo 15: «Ni guni zacá qué ziuu dxi guniibi gastiʼ laa» (Sal. 15:5). Né ca diidxaʼ riʼ, cayabi hombre bicaa Salmo ca laanu canabaʼ Jehová laanu gúninu ca cosa riʼ purtiʼ racaláʼdxibe guibáninu nayecheʼ. Ora rúninu ni canábabe laanu, riguube ndaayaʼ laanu ne rápabe laanu (Is. 48:17).

20. ¿Xi ndaayaʼ cabeza ca ni nuu ndaaniʼ yoo de lari stiʼ Jehová?

²⁰ Guizáʼ galán ni cabeza ca xhamigu Jehová. Ca ni maʼ gulí Dios para cheʼ guibáʼ la? maʼ gudixhe chaahuiʼ Jesús «stale lugar» ra cuézacabe (Juan 14:2). Ne xcaadxi xpinni Cristu ni guibani lu Guidxilayú, zacaacaʼ ca ndaayaʼ ni riete lu Apocalipsis 21:3. ¡Guizáʼ galán invitación ni maʼ bidii Jehová laanu para gaca xhamígunu laa ne nácani ti ndaayaʼ guizáʼ naroʼbaʼ! ¡Zanda chuʼnu ndaaniʼ yoo de lari stiʼ Jehová sin guireʼnu ndaaniʼ ni!