1. Waigu rengbe Atambuahe 15:1-5 ka undo rani?

 ROGO gu kekeapai naye mbata fu gere, ani awiriki gupai nga agu aboro kpara gayo raka fu Yekova na kini kakuti gayo mbembedi pabakure na ko, ima rengba kadu ni agino rogo gako “bamburoko.” Ono ginipai si aida ani mangihe tipa kadu ni gako agino? Atambuahe 15 nasakapai tipa gipai re ni bakerehe. (Oni gedi Atambuahe 15:1-5.) Gi papara Atambuahe re nape gupai si aida ani mangihe tipa kadu ni mbembedi abakurea Mbori.

2. Ginipai rengbehe kadu nga si Davide aaberãpaha ho ko aafura ni tipa ga Yekova bamburoko?

² Atambuahe 15 natona na agu asanahe nga: “Ako Yekova, da ka sungu rogo ga bamburoko? Da ka anye ri ga kparakpara ziazia bagangara?” (Tam. 15:1) Ho gu bake papara atambuahe nga David aafura ni tipa ga Yekova “bamburoko,” si nangera wa ko aaberãpa gu banye nadu Gibona yo tipa bete regbo. Davide afura a tipa ga Mbori “kparakpara ziazia bagangara,” isoke, si rengbe kadu nga ko aafura tipa gu bagangara Siona nadu Yerusarema yo. Dungu amairo Gibona ku sudiyo, Davide ambakadi bamburoko tipa sanduki mokido tipa si du rogoyo daho i ame yekaru ni.​—2 Sam. 6:17.

3. Tipagine si aida ani gi rogo Atambuahe 15 ti ni? (Oni bi sura a.)

³ Nirengo, badungu aYisaraere aamanganga sunge banye yo te, na kina bete yo narimi ku rogo gu bamburoko i aabanda sanduki mokido rogoho. Ono ga Yekova ruru amoyambu dunduko niima rengba kadu ni agino rogo gako bamburoko nga gu narukuba kurapai ki da na ki nye ni abakureako. Gure nga gupai ani aidaha dunduko. Atambuahe 15, nafura tipa agu asino si aida ani sonosihe na gupai si aida ani mangihe tipa ka nye ni abakurea Yekova.

 ANI NITA NZUNZU NA KINI MANGI RURUPAI

4. Waigu ani aino gupai nga anga bapatiza nga gu yangarapai Yekova aidaha berani te? (Yesaya 48:1)

⁴ Rogo Atambuahe 15:2, si nasakapai tipa bakurea Mbori nga “ni nata nzunzu, ki nimangi rurupai.” Gere nga gupai si aida ani naandu kindi kumbatayo kaa mangaha. Ono ya mo ani rengbe kaa ‘ta nzunzu’? Ii. Wadu he nga boro ho du ni rengberengbe ni te, Yekova nika bi rani wa ani “nata nzunzu” ka si dunga ani namangapai na omerani dunduko tipa ka giasangbako. Ho ani akpara gaani raka ni fu Mbori na ki zi bapatiza, gere nga tonatona gaani nunguro na Mbori. Ni kpiapai, ti agu regbo i aake Baibiri ti ni, padu boro ni Yisaraere aayugonga gupai nga ni angia gino rogo ga Yekova bamburoko yo te. Aguyo aayambanga rimoko rogo “rengo yo na rurupai te.” (Oni gedi Yesaya 48:1.) Tipa aYisaraere yugu na ni nga i aaida ka da nzunzu ni ga Yekova agino, si aaida i wirikipai tipa gupai ko akpinyemuhe na kini pekefuoho. Wakina gure a, tipa kadu na mbembedi pabakure na Yekova areme, si naida ani mangipai susi gu nga ka zio bapatiza na i kini yambu rani nga boro sa dagba aDezire Yekova yo. Si naida ani naandu kumbatayo kindi kaa ‘manga rurupai.’ Waigu rengbe ani ka manga gupai re?

5. Rogo gupai yo nga ka giasangba Yekova rogo apai yo dunduko nga gine?

⁵ Bangiri Yekova, “ta nzunzu” na “ki nimangi rurupai” ayugongo kina gupai sa gbua nga kaa ndu tipa adunguratise dedede ku Bambu Kindo yo te. (1 Sam. 15:22) Si naida ani mangi ome nyanyaki tipa ka giasangba Mbori rogo agu apai yo dunduko ani amangaha. (Snz. 3:6; Batu. 12:13, 14) Si ni nyanyakipa pai kaa giasangba Yekova zavura ho ani amanga agu apai ni nangera wa nyakingo paha te. Manga gipai re nayugo gupai nga, ani ima kpinyemuko nzunzu na gipai re nika sa ko tipa ko kpinyemu rani gbe.​—Yo. 14:23; 1 Yo. 5:3.

6. Ringbisihe kuti AEbere 6:10-12, ginipai nyakipaha kisusi agu apai ani amangihe mbata kusayo?

 ⁶ Yekova na bakere ngbarago tipa agu apai ani amangihe mbata kusayo fuko. Ono tie, anga kina pa manga ani weneapai kusayo nisaha nayugo gupai nga ani nika nye rogo gako bamburoko yo te. Ani nabi gipai re gbaiga rogo AEbere 6:10-12. (Oni gedihe.) Bangiri Yekova agonga ti gu weneapai ani amangihe mbata kusayo te. Ono ko naida ani nye kaa irisoko kindi na kpotoraniyo dunduko “dati kina digida rame.” Ko nika du ni bakurearani nyeanye kindi “ka he amáka nga rani ya” watadu ka omerani abatanga ya.​—Gara. 6:9.

ONI NIGUMBA RENGO KPOTORONIYO

7. Rogo gupai yo nga kaa pe rengo kina boro kpotoraniyo nga gine?

⁷ Gu boro naida kadu ni gino rogo ga Yekova bamburoko du wa ka “nigumba rengo kpotoni yo.” (Tam. 15:2) Gipai re nayugo gupai nga kura apai kinaho si akodaha susi gu nga ka zanga pe ziree. Yekova naida ani naagumba rengo rogo agu apai yo dunduko ani apehe na kini mangihe. (Eb. 13:18) Gupai re na nyanyakipaha, “bambiko irakeretu nga kere gbegberẽ boro bangiri Yekova; ono ruru boro du rogo gako pa du zukazuka.”​—Snz. 3:32.

8. Gini mangapai si aida ani nehe?

⁸ Agu aboro ‘nagumba rengo kpotoyo yo’ amanganga tiyo nga i nagiasangba ho du aboro ni na kini kuo ga Mbori andiko rogo gbuko yo te. (Yes. 29:13) I nane mangapai ni biriki. Irabiriki ima rengba ka tona kaa berã gupai nga ga Yekova arugute ti aregbo dunduko ni wenehe te. (Yak. 1:5-8) Ni ima rengba ka basasangba Yekova rogo agu apai ni abihe nga nyakingo paha te. Sidu, ka si du nga gbegberẽpai ho mangi ho ni abasasangba Mbori ni te, ni ima rengba ka tona manga agu apai du ni kere gbegberẽhe kisusi gure. Wa vura duhe nga ni naberãha nga ni nairiso Mbori, Yekova aidanga na gani iriso te. (Batu. 8:11) Ono tie, ani naida kadu ni rururani rogo apai dunduko.

9. Ginipai namangi ho Yesu agbia Natanaere ni ti bambata regbo, na ginipai si ayugoho furani? (Oni bi sura a.)

⁹ Si ni nyanyakipa pai tipa boro naape rengo kpotoniyo. Ani rengbe ka bi gipai re ti gupai namangi ho Firipo ayambu bakureako  ni nangia Natanaere ko gbia Yesu. Wa vura duhe nga Yesu aagbianga Natanaere mbata te, ko aya: “Oni ngére ndikidi Yisaraere, biriki ti ko te!” (Yo. 1:47) Yesu aima ino gupai nga kura gako abawiriki aima du ni ruruyo, ono Natanaere aima du ni ruruko ngba kparakpara gene. Wakina rani, Natanaere angia kpakpa boro. Ono ko aangianga irabiriki te, kuba gure, ko adu ni ruruko rogo apai yo dunduko. Gupai re aima ngba ti Yesu na ko ki tambua Natanaere tipaha. Nirengo, ani dunduko naida Yesu du na kina gu bangisa bipai re tipa rani!

10. Tipagine si aida ani du ti ni na rubangirise na gupai ani agumbaha? (Yakoba 1:26)

¹⁰ Badungu agu apai si aidaha berani i natangaraha rogo Atambuahe 15 nabipa wai rengbe ani ka mangapai na kura aboro. Atambuahe 15:3 nape gupai tipa gu boro du nga gino rogo ga Yekova bamburoko yo nga ni “agbarasa nga rimo boro ya, amanga nga kurani gbigbita ya, agumba nga gbigbitapai kuti rimo kurani a ya.” Ka ani aape ziree kuti akuarani, si ima rengba ka imisa yo nikerehe na ka ani anyenga berewe ni ga Yekova agino tii gako bamburoko yo ya.​—Oni gedi Yakoba 1:26.

11. Ginihe nga gumbarimo, na ginipai rengbe ka manga ka si dunga boro nandu kindi kumbatayo na gumbarimo?

¹¹ Bake papara atambuahe fura tipa gbarasa rimo boro watadu gumbarimo. Ginihe nga kere gumbarimo? Dedede, si nga gumba aziree nga gu rengbe ka gbarasa gu wene rimo du boro na ni. Ka boro agumbarimo kura aboro na ka ni asanga berãni ya, i ima rengba ka kusa ni kusayo rogo gu dungurati nga ga aDezire Yekova.​—Yere. 17:10.

12-13. Gini ngbatunga abangiriba rengbe ani rogoho ka gumba gbegberẽpai kuti rimo akuarani zanga ani inihe aino? (Oni bi sura a.)

¹² Atambuahe 15:3 natingida rani a na gupai nga, ga Yekova agino nga agu aboro amanganga akurayo gbegberẽ ya, agumbanga gbigbitapai kuti rimo akurayo a ya. Ginipai rengbe gupai re ka kodaha?

¹³ Ani ima rengba ka gbarasa rimo boro nipe  ani agu apai angbanga ya tipa ni. Oni berẽnga kurii agi akpiapai re: (1) wirina ni dee zorõ tingba mangasunge Kindo ti aregbo dũ, (2) arogotise amanganga sunge berewe Betere yo te, watadu (3) wirina ni kumba amanganga sunge berewe ni bakumba watadu ni moundo abaakumba te. Si rengbe kadu ni gbegberẽpai kaa pe gupai fu kura aboro nga, si wa ka i ya pai kinaho agi awirina re namangihe ni gbegberẽhe na si du nga ndu gupai apai naˈaria ti ni fuyo. Ono tie, si rengbe kadu nga gu ariapai re mangi mbiko dungu nduapai ani ainongo pai tipaha ya. Kurigure, gu boro nga gino rogo ga Yekova bamburoko ni gu boro “amanga nga kurani gbigbita ya, agumba nga gbigbitapai kuti rimo kurani a ya.”

ONI YUGU IRISA FU AGU ABORO NAGUNDE TI YEKOVA

14. Ginipai si ayugoho ka ká “bamangi gbegberẽpai”?

¹⁴ Atambuahe 15:4 nape gupai tipa bakurea Yekova nga “ni napayasi bamangi gbegberẽpai ni bangirini.” Waigu rengbe ani ka manga gupai re? Ani arengbanga ka inoho singia boro namanga gbegberẽpai watadu ni amanganga ha te ringbisihe kuti gaani abipai watadu gupai ani aidaha te. Tipagine? Bambiko ani nga kpakpa aboro, ani ima rengba ka ida na agu aboro duhe furani taata tipa ani mbedi na yo, na kini sogo aguyo naba gberãrago tirani. Ani naká kina agu aboro sa Yekova aya i nga ‘gbegberẽ aboro.’ (1 Kor. 5:11) Gere nakoda agu aboro asanga berãyo ti manga gupai du ni gbegberẽhe ya, adunga na irisa tipa gaani idapase na gaani aida ya, watadu agu aboro naˈasada ka gbarasa gaani pabakure na Yekova.​—Snz. 13:20.

15. Gini kura gene duho rengbe ani ka yugo irisa ngbaha fu agu “aboro nagunde ti Yekova”?

¹⁵ Fuo gure, Atambuahe 15:4 nape gupai nga ani nairisa agu yo “nagunde ti Yekova.” Sidu, ani nangera tipa agene ka yugo weneringise na irisa fu abakurea Yekova. (Rom. 12:10) Ngba gini gene? Gene sa dagba agu akuraha yo du mburuhe ri Atambuahe 15:4 nga, gu gino du rogo ga Yekova bamburoko yo, “ni nazunga he ka si vura mbusa ni, ni asa nga ha te.” Ka ani aadigisongo gaani akidohe ya, ani nika ba gberãrago ti kura aboro. (Mt. 5:37) Ni kpiapai, Yekova naida kumbakuadee na dereakumba kakuti gu gayo mozunga i amangihe ho i aamanga rogatise ni. Ko na ngbarago a ho ko abi avunguagude ni i ni kakuti agu akidohe i amangihe fu awiriyo. Mbiko gupai nga ani ima kpinyemu Mbori na kura aboro, ani nika manga gupai rengbe omerani na ni ka kakuti gaani akidohe.

16. Gini kura gene ani ayugo irisa ngbaha fu abakurea Yekova?

¹⁶ Gu kura gene ani ayugo irisa fu abakurea Mbori ngbaha nga, ni dia ani yo kugume na ki ngia aboro gamahe. (Rom. 12:13) Dia regbo na awirinarani angianga kina ti regbo adunguratise na tungusapai sa ya, ima rengba ka nyakasa gaani pabakure na yo gbiati Yekova. Kurigure, ho ani adia aboro ni kugume, gure nga ani nawirika Yekova.

KA ONI DU NGA NA BAKERE NYEMU MARÃ YA

17. Tipagine Atambuahe 15 afura ti ni tipa marã?

¹⁷ Ani nageda gupai nga ga Yekova gino, ‘aunda nga gani marã tipa kiisa ha na gu du ku ri he te, adia nga marã mabirimo be ruru boro a te.’ (Tam. 15:5) Tipagine gi papara atambuahe re afura ti ni tipa marã? Bambiko ka ani akpinyemu marã ni bakerehe, paru ima rengba ka nyaka furani kisusi pa aboro na zavura kisusi pa Mbori. (1 Tim. 6:10) Ti agu aregbo i aake Baibiri ti ni, kura aboro aamanga agu awirinayo nangia airarungo ngba gbegberẽ gene na kini sayo i naatumo marã ni bakerehe kisusi gu  i adihe ni bape. Berewe a, kura abasapungbanga anaadia marã mobirimo na kini saringbanga ni irairaha fu aboro wenesa. Yekova nasoga agu aboro namanga ngbatunga agi apai re.​—Yeze. 22:12.

18. Gini asanahe nika undo rani ani ini gaani bipai tipa marã? (AEbere 13:5)

¹⁸ Si ni wenepai furani tipa ani berẽkurii gaani bipai tipa marã. Mo sananga tiro nga: ‘Ya mo mi naaberã dedede tipa marã na pa guhe rengbe mi ka ngbehe na gu marã re? Ka si du nga mi di bape marã be boro, ya mo mi nadia bakere regbo tipa ka gasaha na kini berẽ gupai nga ni aidanga ha te? Ya mo padu mi na marã nasa re mi naabi tire nga pare ima nyaka ti gu kura aboro? Ya mo si ni kpakarakpakaraha fere tipa mi gamuhe fu kura aboro? Ya mo mi naaberã gupai nga, ho du awirina ni na bakere marã beyo, gure nga i ima kpinyemu marã kisusi Yekova? Ya mo mi naazio bakure na kina airakumuko angianga airarungo ya?’ Si ni nyanyakipa pai ka sana tirani na agi asanahe re bambiko i ima fu gu nyanyakipa yambahe furani nga ga du ni ga Yekova agino. Ani rengbe ka banda gu gaani momu re ni zanga ani kpinyemu marã. Ka ani mangihe wo, Yekova ahenga undo rani wa sa te!​—Oni gedi AEbere 13:5.

YEKOVA IMA KPINYEMU ABAKUREAKO

19. Tipagine Yekova aida ani mangi agu apai ti ni dunduko ko napepa ha rogo Atambuahe 15?

¹⁹ Atambuahe 15 nadigo na gu kidohe nga: “Gu ni namanga agi apai re i awó nga ti ni wa sa te.” (Tam. 15:5) Gu bake papara atambuahe re nasakapai ane tipa ndu gupai Yekova aida ani mangi agu apai ti ni i nafura tipaha rogo gi papara atambuahe re. Yekova naida ani du na ngbarago. Sidu, ho ani amanga gupai ni Mbori aida ani amangihe, gaani raka nadu ni bawenehe na ko nikaa banda rani.​—Yes. 48:17.

20. Ginipai rengbe ga Yekova agino ka ngera kumbatayo tipaha?

²⁰ Ga Yekova agino ima rengba kadu na maabangirise tipa bawene raka kumbatayo. Ruru mbembedi aKristano nika ga ku ngbangbaturũ yo ku rogo gu “dungu banye du yo” Yesu nambakadihe tipa yo. (Yo. 14:2) Agu aboro du na gu maabangirise nga ga raka auru kpotosende nangera kumbatayo tipa gupai Yugoti 21:3 akidohe tipaha. Si ni bakerepa momu ka ino gupai nga Yekova nayamba rani ani du ni agino tii gako bamburoko yo nyeanye kindi!