ILYO ba William baleimba umufoolo wa Panama mu 1907, balikutikeko ku lyashi ilyalandile ba Isaiah Richards abali abasambi ba Baibolo, e fyo baleita Inte sha kwa Yehova kale. Ilyashi ba Richards balandile lyafumine pa fikope ifyo baleita abati, “Chart of the Ages,” ifyalelondolola imifwaile ya kwa Yehova. Ilyo line fye ba William balisumine icine kabili balibwelelemo ku Jamaica ku kusambilishako banyina na ba nkanshi yabo. Nabo bene mu kuya kwa nshiku balisambilile icine.

Pa nshita imo ba Brown balebombela mu musumba wa Panama mu calo ca Panama. Ilyo ba Evander J. Coward, abali bakangalila benda aba Basambi ba Baibolo baile ku Panama mu kulandako amalyashi, e lyo bamonene na ba Brown. Ba Coward bali ni bakalanda aba maka abalelanda bwino sana, kabili abantu abengi baleya mu kulakutikako. Ilyo bamwene ukuti ba William baali abacincila mu cine, balibebele ukuti bakaye nabo mu kushimikila ku Trinidad.

 Ukucila pa myaka 10, ba William balyendele icalo conse ica West Indies, balebomba bupainiya no kukoselesha amabumba ya bantu ayanono. Mu 1920, baupile ba Antonia, ba nkashi abali abakosa mu mulimo. Pa numa ya nshiku shibili ilyo baupene, ba William na ba Antonia baile ku ka cishi aka ku Montserrat mu Leeward Islands, balisendele ne lyashi lya fikope ilya kuti “Photo-Drama of Creation,” ilyakwete ifipande fine ifya fikope ifya mu Baibolo. Balishimikiile na pa fishi pamo nga, Barbados, Dominica, na pa Grenada. Baliipakishe nga nshi ukutandala muli ishi ncende ilyo balebombela Yehova.

Pa numa ya myaka ibili, ba William balembeele ba Joseph F. Rutherford kalata, abaleyangalila umulimo wa Nte sha kwa Yehova pali ilya nshita abati: “Pa mulandu wa kwafwa kwa kwa Yehova, ninshimikila sana ku bantu abengi aba mu fishi fya Caribbean kabili nimpangamo abasambi. Bushe ningile ukulabwelelamo na kabili?” Mu nshiku fye shinono, ba Rutherford balyaswike abati: “Kabiye ku Sierra Leone, pamo no mwina mobe no mwana.”

Mu myaka 27 iyo Munyinefwe Brown no mwina mwakwe babombeele ku West Africa, talefwaya ukubombela mu ofeshi. Atemenwepo ukulaya mu kushimikila. Pa mulandu wa kuti alekomaila pa fyo Baibolo yacindama, abantu balemwita abati “Bible” Brown.

Mu 1950 ilyo ba William baali ne myaka 71, balibweleleemo na benamwabo ku Jamaica mu kubomba bupainiya. Ba William balitwalilile ukuboma bupainiya mpaka ilyo bapwile umulimo wabo pe sonde mu 1967. Ala balitemenwe sana bu painiya! Balemona ukuti bupainiya nabo lishuko ilikalamba sana ilyo umuntu engakwata.