ITI panagtrabaho ni Wiliam iti Panama Canal idi 1907, nalabsanna iti suli ti kalsada nga agpalpalawag ni Isaiah Richards a maysa nga Estudiante ti Biblia, kas awag idi kadagiti Saksi ni Jehova. Imbasar ni Richards ti palawagna iti “Chart of the Ages,” maysa a tsart a maus-usar a pangilawlawag kadagiti panggep ti Dios. Dagus nga inawat ni William ti kinapudno ken nagawid idiay Jamaica tapno ipakaammona dayta iti ina ken kabsatna a babai. Idi agangay, nagbalinda met nga Estudiante ti Biblia.

Iti sumagmamano a tiempo, nagserbi ni Brother Brown iti Panama City, Panama. Naam-ammona sadiay ni Evander J. Coward nga agdaldaliasat a pannakabagi dagiti Estudiante ti Biblia a simmarungkar iti Panama tapno mangiparang kadagiti palawag. Nabiag ken napintas ti panagpalpalawag ni Brother Coward, ket adu dagiti umay dumngeg kenkuana. Idi nakitana ti regta ni William iti kinapudno,  inawisna a kumuyog iti panagdaliasatna a mangasaba iti Trinidad.

Iti simmaganad a 10 a tawen wenno nasursurok pay, sinursor ni William ti intero a West Indies, a nagpaypayunir ken nangparparegta kadagiti babassit a grupo. Idi 1920, inkasarna ti maysa a matalek a Kristiano a ni Antonia. Dua nga aldaw kalpasan ti kasarda, naglayagda ken Antonia a napan iti bassit nga isla ti Montserrat iti Leeward Islands. Intugotda ti “Photo-Drama of Creation”—ti uppat ti pasetna a pabuya nga addaan kadagiti motion picture ken slides a naibatay iti Biblia. Nangasabada met kadagiti isla ti Barbados, Dominica, ken Grenada. Naragsak daydi a honeymoon bayat nga agserserbida ken Jehova.

Dua a tawen kalpasanna, nagsurat ni William ken ni Joseph F. Rutherford, a mangidadaulo idi iti trabaho ti ili ni Jehova. Kinunana: “Iti tulong ni Jehova, nakasabaak ti kaaduan a paset ti Caribbean Islands ket adu ti nagbalin nga adalan. Subliak kadi manen ida?” Iti sumagmamano nga aldaw, nagsubalit ni Brother Rutherford: “Inka idiay Sierra Leone, West Africa. Ikuyogmo ni baketmo ken ti anakyo.”

Iti 27 a tawen a panagserbi ni Brother Brown ken ti pamiliana iti West Africa, kaykayatna ti rummuar a mangasaba ngem ti agtrabaho iti opisina. Gapu ta impaganetgetna ti kinapateg ti Biblia, inawagan dagiti tattao iti “Bible” Brown.

Idi 1950, idi agtawen ni William Brown iti 71, nagawidda a nagpayunir ken baketna idiay Jamaica. Nagtultuloy a payunir ni William agingga a naturposna ti biagna ditoy daga idi 1967. Impategna ti panagpayunir! Imbilangna dayta a maysa kadagiti kasayaatan a pribilehio a magun-od ti maysa a tao.