SANG 1956, ginpagua sang mga utod sa Freetown ang pelikula nga The New World Society in Action. Nagreport sila:

“Gin-arkilahan namon ang pinakadaku nga tilipunan sa Freetown kag nanagtag sing 1,000 ka imbitasyon. Wala kami makahibalo kon pila ang makadto. Tunga sa oras antes magsugod ang pelikula, 25 pa lang ang tawo. Pagligad sang 15 minutos, 100 pa ang nag-abot. Wala madugay, napuno ang 500 ka pulungkuan. May 100 pa nga handa magtindog para lang makatan-aw, kag 500 pa ang ara sa gua. Mahulat ayhan sila para sa ikaduha nga pagpagua? ‘Huo,’ siling nila. Kag naghulat gid sila bisan pa nagaulan!”

Sa sulod sang mga tinuig, sobra 80,000 ang nakatan-aw sini kag sang iban pa nga pelikula sa bilog nga Sierra Leone.