UKUFUMA fye na ku bwaice bwandi, nali uwalemana ukufuma mu musana ukuyashinta na ku molu. Naleikala na bamayo mu Freetown ku ncende ukwaleikala abapiina sana. Mu myaka 18 iyo naikele muli iyi ncende, nailepo fye ku ncende imbi umuku umo pantu naletiina ukusekwa ne fyo abantu bambi bengatontonkanya pali ine.

Ilyo nali ne myaka 18, ba Pauline Landis, bamishonari, balishile uko twaleikala, banjebele ukuti balefwaya ukulansambilisha Baibolo. Ilyo nabebele ukuti nshaishiba ukulemba no kubelenga, ba Pauline batile kuti bansambilisha, kabili nalisumine.

Ifyo nasambilile muli Baibolo fyalinsansamwishe nga nshi. Bushiku bumo, naipwishe ba Pauline nga kuti nasangwako ku kulongana ukwalebela mu ng’anda mupepi na po twaleikala. “Nabebele nati nkaya fye ndekalafuka.”

Ilyo ba Pauline baishile mu kunsenda, bamayo na bena mupalamano balisakamene. Nabuulile ifyaba nga mapulanga  ifyo nalekalafukilapo. Awe e fyo naile ndekalafuka. Ilyo naleya mu lubansa, abena mupalamano bandi bakalipile ba Pauline abati: “Ulemucusha fye. Alyeshapo ukwenda lelo alifilwa.”

Ba Pauline banjipwishe abati: “Jay, bushe ca cine ulefwaya ukuya mu kulongana?”

Nabaswike nati, “Ee, ndefwaya.”

Abena mupalamano bandi batalele fye tondolo ilyo nalepalamina ku geti. Ilyo nafumine, balitemenwe ni cikanga batoloke ku nsansa.

Ala ukulongana kwaliweme! Icakonkelepo nalefwaisha ukuya ku Ng’anda ya Bufumu. Pa kuyafika ku Ng’anda ya Bufumu, nali no kuya ukwa kuninina motoka, e lyo pa numa, bamunyinane bali no kunjimya pa kuninika ulupili ulutali. Lyonse nalefika fye ninamba, kabili nalefwala ifya kufwala fimbi nga twafika pa Ng’anda ya Bufumu. Pa numa nkashi uwa ku Switzerland antumine incinga ya kwendelapo abalemana iyo natampile ukulaendelapo ukwabula ukulaumfwa insoni.

Ukubelenga amalyashi ya ba Nte bambi abalemana kwalingafwa ukufwaya ukulabombela sana Yehova. Eco mu 1988, nalitendeke bupainiya bwa nshita yonse. Nalipepele kuli Yehova ukuti angafwe ukufikilisha ubuyo bwandi, ubwa kwafwa lupwa wandi e lyo no muntu umbi mu cifulo naleshimikilamo ukuba Nte. Lesa alyaswike amapepo yandi pantu alingafwile ukusambilisha abepwa bandi babili icine no mwanakashi uo nakumenye ilyo naleshimikila mu musebo.

Pali ino nshita amaboko yalinakuka, kanshi abantu e bankunkulusha fye pa ncinga. Kabili nkalipwa fye umo shacela. Lelo nasanga ukuti ukusambilisha abantu pali Yehova kulacefyako ubukali. Insansa nkwata shilalenga limo nalabako na ku bucushi pantu Yehova alingafwa kabili nomba nalikwata ne subilo line line.