NAGDAKU ako nga lupog halin sa hawak paubos. Nagaistar kami ni Nanay sa isa ka compound sa Freetown upod ang iban nga pigado nga pamilya. Bangod sa kahuya kag kahadlok sa isiling sang mga tawo, kaisa lang gid ako makagua sa compound sa sulod sang 18 ka tuig.

Sang 18 anyos ako, ang Saksi nga misyonera nga si Pauline Landis nagduaw sa amon compound kag nagtanyag sa akon sing pagtuon sa Biblia. Ginsilingan ko sia nga indi ako kabalo magbasa ukon magsulat, pero nagsabat sia nga luyag niya ako tudluan. Gani nagpasugot ako.

Nalipay gid ako sa akon natun-an sa Biblia. Isa ka adlaw, ginpamangkot ko si Pauline kon puede ako makatambong sa miting sang kongregasyon sa isa ka balay sa pihak nga bloke sang compound. “Lakton ko lang paagi sa akon mga bloke nga kahoy,” siling ko.

Pagsugat sa akon ni Pauline, nabalaka gid si Nanay pati ang amon mga kaingod. Gin-uyatan ko sing maayo ang duha ka bloke nga kahoy kag ginbutang ini sa duta sa unhan sang akon lawas.  Dayon gin-alsa ko ang akon lawas kag ginhabyog paabante. Pag-abot ko sa ugsaran, ginsinggitan sang amon mga kaingod si Pauline: “Ginapabudlayan mo lang sia. Gintilawan na niya ina sang una pero napaslawan lang sia.”

“Ti Jay, maupod ka pa sa akon?” mainayuhon nga pamangkot ni Pauline.

“Huo e!” sabat ko. “Desidido na ako.”

Nagasunod ang mga mata sang akon mga kaingod samtang nagapalapit ako sa geyt. Sang nakagua na ako sa compound, nalipay sila kag namalakpak.

Daku gid ang akon kalipay sa sina nga miting! Dayon, gusto ko gid makatambong sa Kingdom Hall. Pero kinahanglan ko nga “maglakat” asta sa punta sang karsada, magsakay sa taxi, kag magpabulig sa mga utod nga hakwaton ako sa taklaron. Pag-abot ko sa tilipunan, sa masami basa na ako kag lutakon, gani nagailis ako. Sang ulihi, ginpadal-an ako sang isa ka sister sa Switzerland sang wheelchair para indi ako mabudlayan.

Ang pagbasa sa mga eksperiensia sang mga Saksi nga may kasablagan nagpalig-on sa akon nga dugangan pa gid ang akon pag-alagad kay Jehova. Gani sang 1988, nagregular payunir ako. Nangamuyo ako kay Jehova nga malab-ot ang akon tulumuron nga may mabuligan ako sa akon pamilya kag sa amon teritoryo nga mangin alagad niya. Nasabat ang akon pangamuyo sang nabuligan ko ang akon duha ka hinablos nga lalaki nga matun-an ang kamatuoran, kag ang isa ka babayi nga akon napanaksihan sa kalye.

Karon, maluya na ang akon mga kamot, gani nagasalig na lang ako sa iban nga magtulod sa akon. Nag-antos man ako sing tuman nga kasakit sa pisikal. Pero ang isa sa mga bulong ko sa sakit amo ang pagtudlo sa iban parte kay Jehova. Bangod sa kalipay nga akon nabatyagan, nagakalipatan ko ang sakit kag makapaumpaw nga mahibaluan nga ginabuligan ako ni Jehova. Subong may katuyuan na ang akon kabuhi.