NDZI kule ndzi lamarile ku sukela emasengeni ku ya fika emilengeni naswona a ndzi tshama enkomponi le Freetown swin’we ni mana wa mina ni mindyangu yin’wana yo hlayanyana leyi sweleke. Leswi a ndzi ri ni tingana ni ku chava leswaku vanhu va ta ndzi teka njhani, ndzi humele ehandle ka nkomponi ro sungula endzhaku ka malembe ya 18.

Loko ndzi ri ni malembe ya 18, Pauline Landis, loyi a nga Mbhoni leyi nga murhumiwa, u te enkomponi kutani a kombela ku dyondza na mina Bibele. Loko ndzi n’wi byela leswaku a ndzi koti ku hlaya ni ku tsala, Pauline u vule leswaku a ta ndzi dyondzisa. Kutani ndzi pfumerile.

Leswi ndzi swi dyondzeke eBibeleni swi ndzi tsakisile. Siku rin’wana ndzi vutise Pauline loko swi ta koteka ku ya eminhlanganweni ya vandlha leyi a yi khomeriwa ekaya ra vamakwerhu laha ku ya kona a swi ta lava leswaku ndzi hundza xitarata xin’we ndzi ri karhi ndzi famba hi milenge. Ndzi te: “Ndzi ta famba hi tinhonga ta mina.”

Loko Pauline a ta a ta ndzi teka, mana wa mina ni vaakelani va ndzi langutile va ri karhi va hlamala. Ndzi teke tinhonga ta mina ndzi sungula ku famba. Loko ndzi ri karhi ndzi tsemakanya exivaveni,  vaakelani va huwelele Pauline va ku: “Wa n’wi sindzisa. U tshame a ringeta ku famba kambe a tsandzeka.”

Pauline u ndzi vutise hi moya wo rhula a ku: “Jay, xana wa swi lava ku famba?”

Ndzi hlamule ndzi ku: “Ndza swi lava! Lexi i xiboho lexi ndzi tiendleleke xona.”

Vaakelani va ndzi langute va miyerile loko ndzi kongoma egedeni. Loko ndzi huma enkomponi, va ndzi yimisele mavoko va tsakile.

Hakunene ndzi tiphinile eminhlanganweni yoleyo! A ndzi tiyimiserile ku tlhela ndzi ya eHolweni ya Mfumo. Sweswo a swi katsa ku famba ndzi ya fika emakumu ka xitarata, ndzi khandziya thekisi kutani loko ndzi chika vamakwerhu va ndzi tlakula va gonya na mina xiganga. Minkarhi yo tala a ndzi fika ndzi tsakamile ndzi tlhela ndzi va ni ridaka kutani a ndzi boheka ku cinca swiambalo swa mina eholweni. Endzhakunyana, makwerhu wa xisati wa le Switzerland u ndzi rhumele xitulu xa lava lamaleke, lexi endleke leswaku ndzi famba kahle.

Loko ndzi ta va ndzi hlaye mintokoto ya Timbhoni tin’wana leti lamaleke swi ndzi khutaze leswaku ndzi tirhela Yehovha hilaha ku engetelekeke. Hi 1988, ndzi ve phayona ra nkarhi hinkwawo. Ndzi khongele eka Yehovha leswaku a ndzi pfuna ndzi fikelela pakani ya mina ya ku va ndzi pfuna munhu un’wana endyangwini wa ka hina kumbe ensin’wini ya mina leswaku a va nandza wa Yehovha. Swikhongelo swa mina swi hlamuriwile hikuva ndzi kote ku pfuna vana va sesi wa mina vambirhi ni wansati un’wana loyi ndzi hlanganeke na yena loko ndzi ri eku chumayeleni exitarateni leswaku va dyondza ntiyiso.

Mavoko ya mina a ma ha koti ku endla nchumu, ndzi titshega hi vanhu van’wana leswaku va ndzi chovha ndzi ya hala ni hala. Nakambe ndzi ni xitlhavi lexi nga heriki. Kambe ndzi kume leswaku nchumu lowu horisaka xitlhavi xa mina i ku dyondzisa van’wana hi Yehovha. Ntsako lowu ndzi wu kumaka wu hunguta xitlhavi xa mina naswona wa ndzi chavelela hikuva Yehovha u ndzi pfunile, sweswi ndzi hanya vutomi lebyi nga ni xikongomelo.