DESISAYIS anyos pa ko dihang gipugos ko sa mga rebelde nga moanib kanila. Suplayan ko nilag droga ug alkoholikong ilimnon, ug sagad makiggubat nga impluwensiyado sa droga. Nakigbugno kog daghang pakiggubat ug nakahimog ngilngig nga mga buhat. Gibasolan gayod nako kini.

Usa ka adlaw, may edaran nga lalaking Saksi nga misangyaw sa among baraks. Ang kadaghanan nahadlok ug nagtamay namong mga rebelde, pero siya gustong motabang namo sa espirituwal. Busa dihang gidapit ko niya sa tigom, misugot ko. Wala koy mahinumdoman sa gihisgotan sa tigom, pero dili ko makalimot sa mainiton nilang pag-abiabi kanako.

Dihang migrabe ang gubat, wala na koy kontak sa mga Saksi. Unya ako grabeng nasamdan ug gidala sa lugar nga kontrolado sa mga rebelde aron didto magpaayo sa samad. Una matapos ang gubat, mieskapo ko ngadto sa lugar nga kontrolado sa gobyerno ug miapil sa programa niini nga nagtabang sa mga rebelde sa pagbag-o.

Nagkinahanglan kog espirituwal nga tabang. Misimba ko sa Pentekostal, pero ginganlan ko nilag Satanas. Busa gipangita ko ang mga Saksi ni Jehova. Pagkakaplag nako nila, misugod ko pag-study ug pagtambong sa tigom. Sa gisugid ko ang akong daotan kaayong mga buhat, gibasahan ko sa mga brader sa makapahupayng mga pulong ni Jesus: “Ang mga tawong himsog wala magkinahanglan ug mananambal, kondili ang mga masakiton. . . . Ako mianhi aron sa pagtawag, dili sa mga tawong matarong, kondili sa mga makasasala.”—Mat. 9:12, 13.

Natandog gyod ko sa maong mga pulong! Gisurender ko ang akong punyal sa nag-study nako, ug miingon: “Proteksiyon nako ni basig dunay manimalos. Pero karon nga nasayod na  ko nga gihigugma ko ni Jehova ug ni Jesus, wala na ko magkinahanglan niini.”

Gitudloan ko sa mga igsoon sa pagbasag pagsulat. Ngadtongadto, ako nabawtismohan ug nahimong regular payunir. Karon, dihang mosangyaw ko sa mga rebelde kanhi, sila moingon nga sila nagtahod nako kay gibag-o nako ang akong kinabuhi. Gitudloan pa gani nako sa Bibliya ang luyoluyo sa komander sa kanhi kong platon.

Dihang sundalo pa ko, may tulo ko ka anak nga lalaki. Pagkakat-on sa kamatuoran, gusto nakong tabangan sila sa espirituwal. Ikalipay kay duha kanila ang midawat! Usa sa akong mga anak maoy di-bawtismadong magmamantala, ug ang kamagulangan oksilyare payunir karon.