SANG 1997, samtang nagainaway ang mga rebelde kag gobierno sa Freetown, nagboluntaryo ako nga magdul-ong sing mga sulat halin sa Freetown pakadto sa temporaryo nga sanga talatapan sa Conakry, Guinea.

Sa estasyon sang mga bus sa siudad, nagsakay ako sa isa ka bus upod sa isa ka grupo sang mga lalaki. Kinulbaan gid kami sang mabatian namon ang mga linupok. Samtang nagalabay kami sa siudad, gulpi lang nga may nagpinalupok sa palibot. Gani ginpaatras sang drayber ang bus kag nag-agi sa lain nga dalan. Wala madugay, ginpadulog kami sang isa ka grupo sang armado nga mga rebelde kag ginpapanaug kami tanan. Pagkatapos sang interogasyon, ginpaagi nila kami. Sang ulihi, ginpapundo kami sang isa naman ka grupo sang rebelde. Bangod kilala sang isa ka pasahero ang ila kumander, ginpaagi nila kami. Sang ara na kami sa punta sang banwa, gin-interogar kami sang lain naman nga grupo sang rebelde  pero ginpaagi man nila kami. Samtang nagapaaminhan, madamo kami sing nalabayan nga mga barikada. Gab-i na sang nakaabot sa Conakry ang amon yab-ukon nga bus.

Sang ulihi, nagdala ako sing kinarton nga mga literatura, kagamitan sa opisina, dokumento sang sanga, kag mga relief goods. Nagasakay ako pirme sa awto kag minibus. Pero nagasuhol man ako sing kargador kag nagaarkila sing baruto para madala ang mga literatura sa kagulangan kag makatabok sa suba.

Isa ka bes, samtang nagadala sing mga kagamitan halin sa Freetown pa-Conakry, ang minibus nga akon ginasakyan ginpadulog sang mga rebelde sa dulunan. Sang nakita sang isa sa ila ang akon bagahe, nagsuspetsa sia kag gin-interogar ako. Dayon nakita ko ang iskolmeyt ko sang una upod sa mga rebelde. Bangis ang tawag nila sa iya, kag sia ang pinakamakahaladlok tulukon sa tanan. Ginsilingan ko ang nag-interogar sa akon nga luyag ko maistorya si Bangis, dayon gintawag ko sia. Nakilal-an ako dayon ni Bangis kag nagdalagan sia pakadto sa akon. Naghaksanay kami kag nagkadlawanay. Dayon gulpi lang sia nagserioso.

“May problema bala?” pamangkot niya.

“Gusto ko tani magtabok sa Guinea,” sabat ko.

Ginmanduan niya gilayon ang iya mga upod nga paagihon ang amon minibus kag indi na pag-inspeksionon.

Halin sadto, kada magdulog ako sa sina nga checkpoint, ginamanduan ni Bangis ang iya mga upod nga paagyon ako. Ginahatagan ko sila sing mga magasin kag nanamian man sila sini. Sang ulihi, gintawag nila ako nga The Watchtower Man.