SIERRA LEONE YE GUINEA
Se Ikande Daimọn
Tamba Josiah
-
AKAMANA KE 1948
-
AKANA BAPTISM KE 1972
-
SE IBAN̄ADE ENYE Akanam utom ke itie udọk daimọn mbemiso ọkọbọde akpanikọ. Idahaemi edi owo Kọmiti N̄kọk Itieutom Sierra Leone.
KE 1970, n̄kanam utom ke itieutom Britain oro ẹsidọkde daimọn ke Tongo, obio emi enyenede daimọn etieti ke n̄kan̄ edem edere Kenema. Mma nsiyom daimọn ke idemmi n̄ko. Ini ekededi emi n̄kọfiọhọde daimọn, mma nsisịne ọfọn̄ men enye n̄kanyam ke Kenema nnyụn̄ ndia uwem do.
Ke 1972, mma nsobo ye Mme Ntiense Jehovah nnyụn̄ ntọn̄ọ ndikpep Bible. Mma ndot ndina baptism ke ufan̄ ọfiọn̄ ition. Sia mma n̄kadada ini nduọkodudu mi, mma ndọhọ nsan̄autom mi anam utom ọnọ mi man n̄kpekeme ndika mbono district nnyụn̄ nna baptism. Enye ama ọdọhọ ke iyanam edieke nnọde imọ okụk oro ẹsikpede mi ke urua kiet. Baptism mi ama edi akpan n̄kpọ ọnọ mi akan okụk oro, ntre mma nnyịme ndinọ enye. Ke ini n̄kọnyọn̄de mbono oro ndi, enye ama ọdọhọ mi ke imọ idibọhọ okụk oro sia ndinam n̄kpọ Abasi edi nnennen n̄kpọ oro owo akpanamde. Ke ọfiọn̄ itiokiet ẹma ẹkebe, mma n̄kpọn̄ utom oro ẹkesikpede mi ediwak okụk do man n̄kanam utom akpan asiakusụn̄, sia emi ọwọrọde ndibon n̄kpọuto ke heaven.—Matt. 6:19, 20.
Mma nnam utom akpan asiakusụn̄ nnyụn̄ ndi esenyịn circuit ke isua 18 ke nsio nsio ebiet ke Sierra Leone. Ke ufọt ini oro, mma ndọ Christiana, anam-akpanikọ an̄wan emi eberede ye ami, ndien nnyịn ima inyene Lynette adiaha nnyịn.
Ama odu ini emi n̄kekerede ke nyokụt ediwak daimọn, edi mma n̄kụt se ikande daimọn—oro edi, akpanikọ emi aban̄ade Jehovah ye mme edidiọn̄ emi ẹtode ndinam n̄kpọ esie
Ke ini ẹken̄wanade ekọn̄ ke Sierra Leone, ami ye Christiana ikanam utom usiakusụn̄ ke Bo, emi odude ke ebiet en̄wen emi enen̄erede enyene daimọn. Ima ikụt ediwak mbet emi ẹdide ata mme Christian—emi akande ata daimọn. Ke ufan̄ isua inan̄, ima inyene mbufa mme asuanetop oro ẹkewakde ẹbe mbahade iba ke ibat mme asuanetop oro ẹkedude. Idahaemi ikpọ esop ita ẹdu ke Bo.
Ke 2002, ẹma ẹmek mi owo Kọmiti N̄kọk Itieutom Sierra Leone. Ami ye Christiana imodụn̄ ikpere Bethel. Nsito ufọk n̄ka utom ke Bethel kpukpru usen, ke adan̄aemi Christiana edide akpan asiakusụn̄. Lynette edi akabade n̄wed usem Krio ke Bethel.
Ama odu ini emi n̄kekerede ke nyokụt ediwak daimọn, edi mma n̄kụt se ikande daimọn—oro edi, akpanikọ emi aban̄ade Jehovah ye mme edidiọn̄ emi ẹtode ndinam n̄kpọ esie. Ke adianade do, mma n̄n̄wam owo 18 ẹbọ akpanikọ. Jehovah enen̄ede ọdiọn̄ mi akan nte n̄kekerede.
