Ilyo ifimfulunganya fyapwile, bamunyinefwe ne nkashi balibwelelemo ku mayanda yabo nangu ca kuti yalyonaike. Ifilonganino ifyapashilwe ilyo kwali inkondo mu Sierra Leone, maka maka ifyali ku ncende uko inkondo yakosele sana, fyalipangilwe na kabili. Bapainiya baibela batile: “Abantu 16 balishile ku kulongana kwa kubalilapo, 36 ku kwakonkelepo, 56 ku kulongana na kumbi e lyo 77 e basangilwe ku cibukisho! Ala twalitemenwe nga nshi!” Ifilonganino 9 ifipya fyalipangilwe, kabili fyonse pamo fyafikile 24. Bamishonari 10 abapwishishe Isukulu lya Gileadi balishile ku kwafwilisha mu mulimo wa kushimikila. Mu 2004 abasangilwe ku cibukisho mu Sierra Leone bali 7,594. Iyi mpendwa yali iikalamba sana ukucila pali bakasabankanya. Na mu Guinea mwine mwali ukulunduluka ukwaba nga mu Sierra Leone.

Bwangu bwangu Ibumba Litungulula lyalitumine indalama sha kwafwilisha imbutushi ishalebwelelamo pa kuti bakwate apakutampila mu mikalile (Yako. 2:15, 16) Amabumba ya kwafwilisha imbutushi yalikuulile ne lyo ukuwamya Amayanda ya Bufumu 12 ukubikako ne Cikuulwa ca Kulonganinamo ukulongana ku kukalamba mu Koindu. Balikuulile na mayanda ya njelwa 42 aya kwikalamo indupwa isho amayanda yaonaike. Nkashi umo mukamfwilwa uwali mu myaka yaba 70 aiminine mupepi ne ng’anda ya malata iyo bamukuulile, alelukusha fye ifilamba pa mulandu ne nsansa, kabili atile: “Mwe Yehova, natasha! Yehova natootela! Na imwe mwe babwananyina ala natootela!”

 Iofeshi lya musambo nalyo lyalitampile ukukuula Amayanda ya Bufumu, kabili lyalebomfya indalama sha programu ya kwafwilisha ifyalo ifipiina. Ba Saidu Juanah baeluda kabili bapainiya ababa mu Cilonganino ca Bo West batile: “Nkashi umo anjebele ati, ‘nga naumfwafwe ukuti bakatukuulila Ing’anda ya Bufumu, nkalaanga fye ku nsansa!’ Ilyo nabilishe ukuti bakatukuulila ing’anda ya Bufumu, nkashi yesu alimine mu cipuna alatoota no kushana alacilibinda fye ku nsansa!”

Mu 2010 Icilonganino ca Waterloo calipeele Ing’anda ya Bufumu iikalamba kwati cikulwa ica kulonganinamo ukulongana kukalamba umwingekala abantu 800. Ubushiku icilonganino cashitile iyi ncende, kwali umuntu na umbi uwalefwaya ukushita uwaebele umwine wa ncende ukuti alamupeela indalama ishingi ukucilapo. Lelo umwine wa ncende alikeene, atile: “Kuti natemwapo ukushitisha aba mapepo ukucila aba kucitilapo amakwebo.”

Amayanda ya Bufumu 17 yalikuulwa mu Sierra Leone, e lyo 6 mu Guinea mu ndalama shibomfiwa mu fyalo ifipiina. Ifi fifulo ifisuma ifya kupepelamo, fyalilenga abantu abengi ukulalongana.

Ilyo bakasabankanya batendeke ukubomba sana umulimo wa kushimikila, iofeshi lya musambo lyalipekenye kampeni ya kushimikila pa myeshi ibili mu ncende ishishashimikilwamo sana. Bakasabankanya balipeele abantu ifitabo mupepi na 15,000 kabili balimwene ifisuma ifingi ifyacitike. Abantu bamo baleipusha nga ca kuti ba Nte baali no kupangako ifilonganino ku ncende shabo. Mu kupita kwa nshita ifilonganino fibili fyalipangilwe. Mu mushi umo uwaba sana ukutali, bamunyinefwe basangile ba nkashi babili abafulumwike nkondo kabili tabaishibe no kwali ababwananyina mu kuteyanya. Mu kwangufyanya  bamunyinefwe batantike ukuti kuleba ukulongana lyonse, kabili balitendeke amasambililo ya Baibolo muli ulya mushi.

Mu 2009, aba ku musambo balyumfwile ukuti mu Guinea mwali umushi umo uwali ukutali sana, ukwali abantu abaleita abati ni Nte sha kwa Yehova. Ilyo iofeshi lyatumineko bamunyinefwe ku kuyafwailisha, basangile ukuti, kwali munyinefwe umukoloci uwabweleele kuli ulya mushi ilyo alekele incito. Ilyo ashilafwa alisambilishe abantu abengi Baibolo. Umo pa basambilile Baibolo alisumine muli Yehova kabili atampile ukusambilisha abantu na bambi. Na o wine atampile ukulatungulula ukulongana, alebomfya impapulo isha muyashi. Ili ibumba lyalipepele Yehova pa myaka 20 ilyo munyinefwe umo ashilayako. Ilyo line fye iofeshi lyalitumineko bamunyinefwe ukuyaafwilisha ili ibumba mu fya kwa Lesa. Mu 2012, abantu 172 aba muli ulya mushi balisangilwe ku Cibukisho ca mfwa ya kwa Kristu.

Muli shino nshiku ‘impaanga ishingi ishalubile’ shalisangwa. Aba, bantu abalekele ukulongana nangu abatamfiwe. Abengi abalubile baliiluka kabili balibwelela na mu cine. Abantu ba kwa Yehova balibapokelela na maboko yabili.—Luka 15:11-24.

Ilyo umutumwa Paulo alesambilisha abantu icine atile, “ku bantu bonse mba fye nge fyo bali.” (1 Kor. 9:22, 23) Mu nshila imo ine ababomfi ba kwa Yehova mu Sierra Leone na mu Guinea balyalula inshila bashimikilamo abantu pa kuti bengashimikila abantu abalekanalekana. Katulande pa ca kumwenako cimo pa fyo bakasabankanya bapelulushanya ne bumba lya baShilamu bamo abasumina ukusambilila. Aba, e bumba lya bantu ba mapepo ilyakulisha muli ifi ifyalo.

 Ba Saidu Juanah, abali kale AbaShilamu balondolwele abati: “AbaShilamu balisumina ukuti Adamu abumbilwe ku lukungu, lelo abalilepo ukwikala mu paradaise ku muulu. Nomba pa kuti mbafwe ukumfwikisha icishinka, nabepwishe nati, ‘Bushe ulukungu lufuma kwi?’

“Bayaswike abati ‘kwi loba.’

“Na kabili nabepwishe nati, ‘Nomba ninshi ni kwi Adamu abumbiilwe?’

“Bayaswike abati, ‘ni pa calo.’

“Pa kuti bomfwikishe icishinka, nababelengeele Ukutendeka 1:27, 28 nabepusha no kuti, ‘Bushe abekala ku muulu balakwata abana?’

“Bayaswike abati, ‘Iyo pantu ba malaika te baume kabili te banakashi.’ Lyena nabepwishe nati:

“‘Ilyo Lesa aebele Adamu na Efa ukukwata abana, ninshi ni kwi baleikala?’ Bayaswike abati:

“‘Pa calo.’ Na kabili nabepwishe nati:

“‘Ilyo Lesa akabwesha Paradaise, ninshi ikaba kwi?’ Batile:

“‘Pano calo.’”

Ba Saidu batile, “Ukupelulushanya na bantu Amalembo muli uyu musango kulalenga AbaShilamu abengi abafumacumi ukukutika no kupoka impapulo shesu.”

Na cimbi ica kumwenako, ca ba Momoh AbaShilamu, abalebomba mwi tuuka abalesubila ukuti bushiku bumo bakaba intungulushi ya BaShilamu. Ilyo bamishonari balanshenye nabo Amalembo, ba Momoh balefwaya ukumfwilapo na fimbi. Balisangilweko panono ku kulongana kwa muputule kabili balitemenwe ifyo baumfwile. Ilyo papitile inshiku shine, bena na bena mwabo ba Ramatu na bana babo 5 balisangilweko ku Cibukisho ca mfwa ya kwa Yesu. Lyena ba Momoh batampile ukusambilila sana Baibolo. Pa numa ya kusambililako pa miku yafulilako, balilekele ukushitisha fwaka. Batampile ukweba abaleisa mu kushita fwaka  abati, fwaka ibi kabili Lesa alikaanya. Lyena batendeke ukusambilila Baibolo na bana na bena mwabo pe tuuka. Abantu nga baisa pe tuuka ilyo balesambilila no lupwa, balebeba abati loleleni tupwishe kabili balebalondolwela abati ulupwa lwabo lwalicindika ukusambilila Baibolo. Ilyo bena na bena mwabo balembeshe icupo, ba lupwa wabo balibemiine. Ba Momoh na bena mwabo tabaumfwile umwenso, lelo baleshimikila na kuli ba lupwa wabo bene. Ba Momoh balibatishiwe mu 2008, e lyo abena mwabo bena mu 2011.

Abantu ba kwa Yehova balakonka amafunde ya kwa Lesa, ukubikako fye ne funde lya kucindika umulopa.  (Imil. 15:29) Ababomfi ba mu fipatala abengi mu Sierra Leone na mu Guinea balicindika sana ili funde.

Mu 1978 bamunyinefwe bapeele ba dokota, ba nasi, ababomfi ba mu fipatala na bambi, ba loya e lyo na ba kapingula akatabo akaleti, Jehovah’s Witnesses and the Question of Blood mu Sierra Leone. Tapapitile na nshita, nkashi uo ifumo lyabuukile umulopa watampile ukulasuumina mu kati, ba dokota balikeene ukumundapa ukwabula ukumubikamo umulopa. Lelo nangu cali ifyo, dokota umo alisumine ukumundapa pantu alisambilile ifyali muli aka katabo. Uyu nkashi alipaapile umwana umwaume umutuntulu fye bwino bwino kabili uyu nkashi alipolele.

Nalimo mu 1991, Dokota Bashiru Koroma uwalelepula abantu pa cipatala ca Kenema, alibelengele broshuwa iyaleti, How Can Blood Save Your Life? Alitemenwe sana ifyo abelengele ica kuti alitampile no kusambilila Baibolo no kulongana. Ilyo kalume uwa myaka 9, Inte ya kwa Yehova, lamba yalilepwike ilyo ali mu busanso. Bashing’anga abalemundapa balikeene ukumundapa ukwabula umulopa, baebele abafyashi bakwe abati, “Sendeni umwana wenu aye afwile ku ng’anda!” Abafyashi bailemona dokota Koroma, uwailebombela umwana ukwabula ubwafya.

Tapakokwele, Dokota Koroma aishileba munyinefwe, kabili aishileba kalapashi ku kutungilila ukundapa abantu ukwabula umulopa. Ba dokota banankwe balesuusha ifyo alecita, lelo bonse abo aleundapa balepola bwino sana. Ilyo papitile inshita, ba dokota banankwe batampile ukulamwipusha ifyo bengacita pa kulepula abalwele babo.

Ukutampila mu 1994, dipartimenti ya Hospital Information Desk iya pa musambo mu Freetown yalipangile komiti ya kumfwaninamo ne fipatala mu Sierra Leone na mu Guinea. Aya makomiti yalyafwa ba Nte abalwele abengi kabili yalilanshanya sana na ba dokota abengi ukuti bengomfwikisha ifyo twasuminamo pa mulopa.