Idi tumaltalgeden ti kasasaad, sinublian dagiti kakabsat ti balbalayda. Nabuangay manen dagiti kongregasion kadagiti lugar a dinadael ti gubat, nangruna iti daya a paset ti Sierra Leone. Impadamag dagiti special pioneer iti maysa a lugar: “Iti umuna a gimongmi, 16 ti timmabuno, iti maikadua 36, iti sumaruno 56, ken iti Memorial, 77! Nakaragragsakkami!” Nabuangay ti 9 a baro a kongregasion isu nga agdagupen iti 24. Simmangpet met ti 10 a baro a misionero manipud iti Gilead a nangpabaro iti regta iti trabaho a panangasaba. Idi 2004, adda 7,594 a timmabuno iti Memorial—nasurok a maminlima nga ad-adu ngem iti bilang dagiti agibumbunannag! Kasta met laeng a panagrang-ay ti napasamak iti Guinea.

Nangipaay a dagus ti Bagi a Manarawidwid iti pondo a pangtulong kadagiti agsubsubli a nagbakuit. (Sant. 2:15, 16) Dagiti boluntario a grupo nagibangon wenno nagtarimaanda iti 12 a Kingdom Hall ken tinarimaanda ti Assembly Hall iti Koindu. Nagibangonda pay iti 42 a simple a balay a naaramid iti ladrilio para kadagiti pamilia a nadadael ti balayda. Maysa a balo a kabsat a baket nga agtawen iti 70 ti agtaktakder iti abay ti baro a balayna a naatepan iti galba. Agsangsangit gapu iti ragsak a nangipukkaw: “Agyamanak, Apo Jehova! Agyamanak, Apo Jehova! Agyamanak kadakayo kakabsat!”

Nangrugi met a nagipatakder ti sanga nga opisina kadagiti Kingdom Hall nga inusarda ti pondo manipud iti programa nga agpaay kadagiti pagilian a limitado ti  pinansial a kabaelanda. Kuna ni Saidu Juanah a panglakayen ken payunir iti Bo West Congregation: “Imbaga ti maysa a kabsat a babai, ‘No mangngegko a maibangonantayo iti baro a Kingdom Hall, agpalakpak dagiti ima ken sakak!’ Idi impakaammok a maibangonankami iti baro a paggigimongan, timmakder ti kabsat iti tugawna nga agpalpalakpak ken agsalsala—kayarigananna nga ‘agpalpalakpak’ dagiti ima ken sakana!”

Idi 2010, indedikar ti Waterloo Congregation ti baro a Kingdom Hall a mabalin a mausar nga Assembly Hall nga addaan iti 800 a tugaw. Idi aldaw a gatangen ti kongregasion dayta a lote, adda timmawar iti makinkukua iti dakdakkel a gatad. Imbagana, “Kaykayatko a mabangonan ti lotek iti pasdek a mausar a pagdaydayawan imbes nga iti negosio.”

Babaen ti programa a panagibangon para kadagiti pagilian a limitado ti pinansial a kabaelanda, 17 a Kingdom Hall ti naipatakder iti Sierra Leone, ken 6 iti Guinea. Simple dagitoy ngem maitutop a lugar a pagdayawan a nangallukoy iti ad-adu pay a tattao a tumabuno kadagiti gimong.

Bayat a rumangrang-ay ti trabaho a panangasaba, nangyurnos ti sanga nga opisina iti dua-bulan a kampania a panangasaba kadagiti di unay mawanwanas a teritoria. Nakaipaima dagiti kakabsat iti dandani 15,000 a libro ken adu ti nagsasayaat a kapadasanda. Adda dagiti nagsaludsod no mangbuangay dagiti Saksi ni Jehova iti kongregasion kadagiti mismo nga ilida. Kas resultana, dua a baro a kongregasion ti nabuangay idi agangay. Iti maysa a nasulinek a purok, dua a kakabsat a babbai ti nasarakan. Naputed ti komunikasionda iti organisasion bayat ti gubat. Dagus a nangorganisar dagiti kakabsat kadagiti regular a  gimong ken nakairugida kadagiti panangyadal iti Biblia iti dayta a purok.

Idi 2009, nadamag ti sanga nga opisina nga adda dagiti agkunkuna a Saksi ni Jehova iti maysa a purok iti tengnga ti kabakiran ti Guinea. Nangibaonda kadagiti kakabsat a mapan mangkita ket naammuanda nga adda lakay a kabsat a nagsubli iti purokda kalpasan ti panagretirona. Adda dagiti inyadalanna sakbay a natay. Maysa kadakuada ti namati ken Jehova ket inranudna ti naammuanna iti Biblia. Nangang-angay pay kadagiti gimong nga inusarna dagiti publikasion ti natay a kabsat. Agdaydayawen ken Jehova daytoy a grupo iti 20 a tawen sakbay a nasarakan ida ti maysa a kabsat. Nangibaon a dagus ti sanga nga opisina kadagiti kakabsat a mangtulong kadakuada iti naespirituan. Idi 2012, adda 172 a timmabuno iti Pananglaglagip iti ipapatay ni Kristo iti dayta a purok.

Kadagiti nabiit pay a tiempo, umad-adu dagiti nasarakan a ‘naiwawa a karnero.’ Dagitoy dagiti nayadayo wenno naikkat iti kongregasion. Adu kadakuada ti nagbalbaliw ken nagsubli iti kinapudno. Siraragsak nga inabrasa ida dagiti adipen ni Jehova.—Luc. 15:11-24.

Idi inranud ni apostol Pablo ti naimbag a damag iti sabsabali, nagbalin nga “amin a bambanag iti amin a kita ti tattao.” (1 Cor. 9:22, 23) Kasta met laeng ti inaramid dagiti adipen ni Jehova iti Sierra Leone ken Guinea. Binalbaliwanda ti pamay-anda tapno maallukoyda ti nagduduma a tattao. Kas pagarigan, usigentayo no kasano a nakirinnason ti dadduma a kakabsat kadagiti mannakaawat a Muslim, ti kadakkelan a relihion kadagita a dua a pagilian.

Inlawlawag ni Saidu Juanah a dati a Muslim: “Patien dagiti Muslim a naparsua ni Adan manipud iti tapok ngem  nagbiag nga immuna iti nailangitan a paraiso. Tapno maawatanda no ania ti umiso, isaludsodko kadakuada, ‘Naggapuan ti tapok?’

“‘Iti daga,’ isungbatda.

“‘Sadino ngarud ti nakaparsuaan ni Adan?’ ituloyko nga isaludsod.

“‘Ditoy daga,’ kunada.

“Tapno maalada ti punto, ibasak ti Genesis 1:27, 28 sa damagek, ‘Adda kadi annak dagiti parsua idiay langit?’

“‘Awan ta saan met a babai wenno lalaki dagiti anghel,’ isungbatda.

“‘Idi imbaga ti Dios nga aganak da Adan ken Eva, sadino ngarud ti ayanda?’ irasonko.

“‘Ditoy daga,’ isungbatda.

“‘Isu nga inton isubli ti Dios ti Paraiso, sadinonto dayta?’ isaludsodko.

“‘Ditoy daga,’ kunada.”

Kinuna pay ni Saidu, “Dagita a pannakirinnason manipud iti Biblia ti nangtignay iti adu a napasnek a Muslim a dumngeg iti ad-adu pay ken umawat kadagiti literatura ti Biblia.”

Kitaentayo ti kapadasan ni Momoh a maysa a Muslim nga addaan pagtagilakuan. Ar-arapaapenna ti agbalinto nga Imam. Idi nakirinnason kenkuana dagiti Saksi a misionero nga inusarda ti Kasuratan, naginteres ni Momoh. Tinabunuanna ti dadduma a paset ti asamblea sirkito ket nagustuanna ti nangngegna. Kalpasan ti uppat nga aldaw, tinabunuanna ti Pananglaglagip iti ipapatay ni Jesus a kaduana ti asawana a ni Ramatu ken ti lima nga annakda. Manipud idin, impasnek ni Momoh ti panagadalna iti Biblia. Kalpasan ti sumagmamano a panagadal, insardengnan ti naglako iti sigarilio. Ibagana kadagiti aggatang a makadangran iti salun-at ti sigarilio ken iparit ti Dios. Inrugina met a yadalan ti asawa ken dagiti annakna iti  pagtagilakuanna. No adda gumatang bayat nga agad-adalda, ibagana nga agtugaw ken agurayda biit, sa ilawlawagna a nakapatpateg ti panagadal ti pamiliana. Idi pinagbalinda a legal ti panagasawada, nakaro ti ibubusor dagiti kakabagianda. Ngem situtured da Momoh ken Ramatu a nangasaba kadagiti kakabagianda. Idi agangay, rinaemda ti nasayaat a konduktada. Nabautisaran ni Momoh idi 2008, ket ni Ramatu idi 2011.

Situtured a sinalimetmetan dagiti adipen ni Jehova dagiti moral a pagalagadan ti Dios, a pakairamanan ti panangmatmatna iti dara. (Ara. 15:29) Gapu iti daytoy, umad-adun a propesional iti medisina iti Sierra Leone ken Guinea ti mangraraem iti takdertayo.

 Idi 1978, nagiwaras dagiti kakabsat iti bokleta a Jehovah’s Witnesses and the Question of Blood kadagiti doktor, nars, administrador iti ospital, abogado, ken hues iti intero a Sierra Leone. Di nagbayag, maysa a kabsat a babai nga agpaspasikal ti nangrugi nga agpadara iti uneg ti bagina ngem saan a kayat nga asikasuen dagiti doktor no awan ti dara. Ngem timmulong ti maysa a doktor gapu ta lohikal ken makagunggona dagiti impormasion a nabasana iti bokleta a Blood. Maysa a nasalun-at a maladaga a lalaki ti impasngay ti kabsat ket alisto ti panagpaungarna.

Idi agarup 1991, ni Dr. Bashiru Koroma a siruhano iti Kenema Hospital, binasana ti broshur a Kasano nga Ispalen ti Dara ti Biagyo? Nagustuanna ti nabasana isu nga inrugina ti nagadal iti Biblia ken nakigimong. Maysa a siam ti tawenna nga ubing a Saksi ti nadangran ti palina gapu iti aksidente. Nagkedked dagiti doktor a mangopera iti ubing no saanda nga agusar ti dara ket kinunada iti nagannakna: “Yawidyon ta anakyo ta idiay a matay!” Ti nagannak kinasaritada ni Dr. Koroma ket naballigi ti panangoperana iti ubing.

Idi agangay, nagbalin ni Dr. Koroma a Brother Koroma—ti napasnek a mangidepdepensa iti panangagas a saan a mausar ti dara. Inumsi ti dadduma a doktor ti takderna, ngem kanayon nga umimbag dagiti pasientena. Idi agangay, dadduma a padana a doktor ti agpatpatulongen kenkuana kadagiti narigat nga operasion.

Sipud idi 1994, ti Hospital Information Desk iti sanga nga opisina iti Freetown ket nangbukel kadagiti Hospital Liaison Committee iti Sierra Leone ken Guinea. Siaayat a tinulongan dagitoy a komite ti adu a masaksakit a Saksi ken kinasaritada ti adu a propesional iti medisina tapno maawatanda ti takdertayo mainaig iti dara.