HI 1991, mina ni nsati wa mina Satta, hi balekile hikwalaho ko chava ku dlayiwa tanihi leswi masocha yo xandzuka a ma hlasela edorobeni ra ka hina ra Koindu, le Sierra Leone. Eka malembe ya nhungu lama landzeleke, hi tshame etikampeni to tala to hambana-hambana ta vahlapfa. Kwalaho hi tiyisele ku kayivela ka swakudya ni mavabyi naswona vaakelani va hina a va tikhome ku biha.

Eka kampa yin’wana ni yin’wana a hi kombela valawuri leswaku va hi nyika ndhawu yo aka Holo ya Mfumo. Minkarhi yin’wana xikombelo xa hina a xi amukeriwa, kambe minkarhi yin’wana a xi bakanyeriwa etlhelo. Ku nga khathariseki sweswo, minkarhi hinkwayo a hi hlela leswaku ku va ni ndhawu yo gandzela eka yona. A hi tiyimisele ku tirhela Yehovha. Eku heteleleni, hi ake mune wa Tiholo ta Mfumo etikampeni.

Loko nyimpi yi hela, a hi tlhelelanga ekaya. Hi nkarhi wa nyimpi doroba ra Koindu ri onhiwile. Hi yisiwe ekampeni yin’wana ya vahlapfa leyi nga ekusuhi ni le Bo. Kwalaho hi ake Holo ya hina ya Mfumo ya vuntlhanu hi mali leyi nyikeriweke hi rhavi.