GE KE fihla la mathomo mo Sierra Leone, go ntšere dibeke tše pedi feela gore ke e rate. Ke be ke makatšwa ke batho bao ba bego ba rwala merwalo e boima dihlogong tša bona ntle le bothata. Go be go bonagala batho ba ipshina ka bophelo motseng wo. Bana ba be ba bapala le go bina seterateng, ba opa magoswi le go kiba fase ka maoto ba sepedišana le mmino. Ke be ke dikologilwe ke mebalabala, go na le bophelo le mmino.

Seo ke ilego ka se thabela kudu mo ke go dira boboledi. Batho ba Sierra Leone ba tšeela godimo go amogela batho bao ba sa ba tsebego. Ba be ba hlompha Beibele le go theetša molaetša wa yona. Ba be ba fela ba ntaletša malapeng a bona. Ge ke be ke sepela, ba bangwe ba be ba mphelegetša go fihla tlase setarateng. Dika tše tše dibotse di be di nthuša go kgotlelela mathatanyana a itšego, go swana le go hlaela ga meetse le go tšhaba ga mohlagase.

Ka ge ke sa nyalwa, batho ba mpotšiša ge e ba ke sa lewe ke bodutu. Ge e le gabotse, ke na le dilo tše dintši tšeo ke di dirago, ga nke ke lewa ke bodutu. Ke phela bophelo bjo bo nago le morero.