Maragragsakan dagiti miembro ti nagduduma a relihion kadagiti palawag ni Brother Brown isu a napalalo ti imon ken pungtot dagiti lider ti relihion iti Freetown. Kuna ti Disiembre 15, 1923, a ruar ti The Watch Tower: “Rinugian dagiti lider ti relihion nga atakaren ti kinapudno babaen ti media. Maulit-ulit met a sinungbatan ida ni Brother Brown ket naipablaak iti diario ti agsumbangir a dasig.” Idi agangay, nagulimek dagiti lider ti relihion ta naibutaktaken dagiti di umiso a panagrasrasonda. Nagsaknap dagiti kinapudno iti Biblia isu a natignay ti adu nga agbasbasa kadagiti diario nga agkiddaw kadagiti literatura iti Biblia. Gandat dagiti lider ti relihion a pasardengen ti ili ti Dios ngem ‘insubli ni Jehova kadakuada ti dakes nga aramidda.’—Sal. 94:21-23.

Ti grupo dagiti agtutubo a maaw-awagan iti Gladiator kayatda nga idepensa dagiti lider ti relihion. Nangyanunsioda iti agsasaruno a palawag iti publiko tapno mapasardeng ti “Russellismo,” kas awagda iti mensahe ti Pagarian. Inawis met ida ni Brother Brown para iti agsasaruno a debate. Nagkedked dagiti Gladiator ken binabalawda ti editor ti diario a nangyimprenta iti awis ni Brother Brown. Linapdanda pay ni Brother Brown a tumabuno kadagiti panagtataripnongda, isu a ni Alfred Joseph ti napan.

Nagtataripnongda iti Buxton Memorial Chapel, maysa a nalatak a simbaan dagiti Metodista iti Freetown. “Iti paset a saludsod ken sungbat,” malagip ni Alfred, “kinuestionarak dagiti sursuro dagiti Anglicano, ti doktrina a Trinidad, ken dadduma pay a di nainkasuratan a sursuro. Idi kuan, saanen a kayat ti tserman ti umawat kadagiti saludsod.”

Presente iti daydi a rabii ti maysa kadagiti Gladiator a ni Melbourne Garber. Nangngegna idin dagiti immun-una a  palawag ni “Bible” Brown. Isu daydi estudiante iti seminario a nangibaga a “kabesado ni Mr. Brown ti Bibliana!” Kalpasan a tiningitingna a naimbag ti nangngegna, kombinsido ni Garber a nabirokannan ti kinapudno. Nagpayadal metten iti Biblia ken ni Brother Brown. Inawis ni Brother Brown iti linawas a Panagadal iti Watch Tower iti pagtaenganna. Uray no inlaksid ti pamiliana, alisto a rimmang-ay ni Garber iti naespirituan ket di nagbayag, nabautisaran agraman ti dadduma pay.

Napaay ti panagregget ni Satanas a mangpasardeng iti kairugrugi a trabaho a panangasaba. Kas iti kinuna ti mayor ti Freetown kadagiti Gladiator: “No trabaho daytoy ti tao, agpatingganto. Ngem no trabaho ti Dios, saanyonto a mapasardeng.”—Ara. 5:38, 39.

Idi rugrugi ti Mayo 1923, nagtelegrama ni Brother Brown iti sanga nga opisina iti London tapno agkiddaw kadagiti kanayonan a literatura. Di nagbayag, simmangpet ti 5,000 a libro a sinaruno ti ad-adu pay a literatura. Intultuloyna met ti nagpalawag iti publiko a nakaallukoyan ti rinibu nga interesado a tattao.

Sakbay nga agngudo ti tawen, kuna ti The Watch Tower: “Nagalisto a rimmang-ay ti trabaho [iti Sierra Leone] isu a nagkiddaw ni Brother Brown iti katulongan; ket naibaon a mapan tumulong ni Claude Brown a taga-Winnipeg, a dati a sakup ti West Indies.”

Ni Claude Brown ket nasubok ken aduan kapadasan a ministro ti naimbag a damag. Idi Gubat Sangalubongan I, inibturanna ti naranggas a pannakatrato kadagiti pagbaludan a kontrolado ti Canada ken England gapu ta dina kayat nga ikompromiso ti neutral a takderna kas Kristiano. Uppat a tawen a nagserbi iti Sierra Leone, a pinarparegtana dagiti kakabsat.

 Malagip ni Pauline Cole, “Sakbay a nabautisaranak idi 1925, sinaludsodannak a naimbag ni Brother Claude.

“‘Sister Cole, natarusam kadi ti naadalmo iti Studies in the Scriptures?’ dinamagna. ‘Dimi kayat a mayadayoka iti kinapudno gapu ta dimo naawatan dagiti isursuro ti Biblia.’

“‘Brother Claude,’ insungbatko, ‘inulit-ulitko a binasa ti naadalko. Desididoakon!’”

Nagserbi ni Pauline ken ni Jehova iti nasurok nga 60 a tawen, kaaduan kadagita kas special pioneer. Naturposna ti biagna ditoy daga idi 1988.

Maseknan met ni William “Bible” Brown a tumulong iti sabsabali a maaddaan iti nasayaat a naespirituan a rutina. Kinuna ni Alfred Joseph: “No agkitakami ken Brother Brown iti agsapa, kastoy ti taray ti saritaanmi: ‘Komusta ti agsapam, Brother Joe? Ania ti teksto ita nga aldaw?’ No diak makasungbat, ipaganetgetna ti kinapateg  ti panangbasa iti teksto iti kada aldaw manipud iti libro a Daily Manna. [Maawagan itan iti Panangsukimat iti Kasuratan iti Inaldaw.] Kabigatanna, nasapa a binasak ti teksto tapno ammok ti isungbatko no saludsodannak. Diak unay idi maapresiar ti kinapateg ti panangsanayna kaniak, ngem nakasursuroak idi agangay.”

Nagsayaat ti imbunga dagitoy a pannakasanay. Idi 1923, nabuangay ti maysa a kongregasion iti Freetown ken adda 14 a nabautisaran. Ni George Brown ti maysa kadagiti kabbaro a kakabsat isu a nagbalinen a tallo ti pamilia a “Brown” iti kongregasion. Nakaregregta dagitoy tallo a pamilia ket adu nga umili iti Freetown ti nangawag kadagiti Estudiante iti Biblia kas relihion dagiti “Brown.”