Kay madasigon sa kamatuoran, ang Freetown Congregation nahimong “okupado kaayo sa pulong.” (Buh. 18:5) Si Alfred Joseph miasoy: “Ibugkot nako ang usa ka karton sa libro sa akong dakong motorsiklo nga Norton. Dayon moangkas si Brader Thomas o si Sylvester Grant ug mangambas mi sa kabaryohan ug gagmayng lungsod duol sa Freetown.”

Hangtod sa 1927, ang Freetown o ang sikbit nga lugar nga gitawag The Colony mao lay gikobrehan sa mga magmamantala. Apan sugod sa 1928, kada tuig sa di pa mosugod ang ting-ulan, ang kongregasyon moabang ug bus aron manangyaw sa mga probinsiya. Ang dili makauban motabang sa gastos sa mga biyahe, nga ang nanguna niini mao si Melbourne Garber. Sila nanangyaw sa mga lungsod ug baryo pasidlakan hangtod sa Kailahun ug pahabagatan duol sa utlanan sa Liberia. Sa unang Dominggo kada bulan, balikan nila ang mga interesado.

Nianang panahona, si Brader Brown mibisita sa West  Indies ug mibalik nga nagdalag kotse, ang usa sa unang mga kotse nga nakasulod sa Sierra Leone. Kini gitaorag trompa para makasibya sa mensahe. Iparking ni Brader Brown ang kotse sa publikong lugar ug magpatokar ug sadyang musika aron modugok ang mga tawo. Unya mohatag siyag mubong pakigpulong o magpatokar ug girekord nga diskurso ug awhagon ang mga tawo sa pagkuhag literatura sa Bibliya. Ang kotseng mosulti—nga maoy ilang tawag niana—gikatingad-an, ug ang mga tawo midugok aron maminaw niini.

Unya si Brader Brown miadto sa teritoryong wa pa masangyawi—ubang bahin sa West Africa nga nagsultig Iningles. Sa hinapos sa katuigang 1920, gisugdan niya ang mga biyahe sa pagsangyaw sa Gambia, Ghana, Liberia, ug Nigeria. Si Brader Brown nakakaplag ug mga  interesado sa matag nasod, pero mas daghag interesado sa Nigeria. Sa 1930, siya ug ang iyang pamilya mibalhin sa Lagos. Gikan didto nagpadayon siya pagdumala sa buluhaton sa Gingharian sa West Africa.

Si Brader Brown mipauli sa Jamaica sa 1950 kay nasakit, pero nagbilin siyag talagsaong rekord sa pag-alagad. Sa 27 ka tuig, nakita niya ug sa iyang asawa ang pagdaghan sa mga Saksi sa West Africa gikan sa 2 ngadto sa kapig 11,000. Nasaksihan nila ang katumanan sa tagna ni Isaias: “Ang diyutay mahimong usa ka libo ug ang gamay usa ka gamhanang nasod.” (Isa. 60:22) Karon, human lang sa kapig 60 ka tuig, ang “gamhanang nasod” sa kapig 500,000 nag-alagad kang Jehova sa West Africa.

Sa dihang ang Africa nalangkit sa Gubat sa Kalibotan II, ang katawhan ni Jehova sa Sierra Leone nagpabiling neyutral. (Miq. 4:3; Juan 18:36) Ang mga awtoridad sa Britanya nag-akusar nga sila subersibo, busa gipanid-an sila ug gidili ang ilang literatura. Ang usa ka kargamento sa literatura giilog ug gisunog sa opisyales sa aduwana sa Freetown. Gidakop ang pipila ka igsoon kay duna silay gidili nga literatura pero gibuhian ra dayon. *

Bisan pa sa pagdili, ang mga Saksi padayong nagsangyaw. Si Pauline Cole miasoy: “Usa ka brader nga tig-atiman sa mga pasahero sa tigdunggoan nga barko nagsuplay namog mga kopya sa Ang Bantayanang Torre. Nagmakenilya mig ekstrang mga kopya para sa tigom. Nag-imprenta sab mig tagsa ka panid nga pahibalo bahin sa mga topiko sa Bibliya ug nanagtag niana sa publiko.  Ug ang mga brader nagpadayon sa pagpahigayog publikong mga diskurso ug pagpatokar sa girekord nga mga pakigpulong sa radyo ni Brader Rutherford, ilabina sa lagyong baryo.”

Bisag simple ra kadto, gipanalanginan ni Jehova ang ilang paningkamot. Si James Jarrett, dugay nang ansiyano ug espesyal payunir, nahinumdom: “Panahon sa giyera, nagtrabaho ko ingong tigtabas ug bato dihang may edarang sister nga mihatag nakog pulyeto nga Refugees. Sanglit daghan ang namakwet sa Freetown, ang ulohan nakapainteres nako. Gibasa ko kana niadtong gabhiona ug naila nako nga kadto kamatuoran. Pagkabuntag, gipangita nako ang sister ug nangayog mga kopya para sa duha nako ka igsoong lalaki. Kaming upat midawat sa kamatuoran.”

Pagkatapos sa gubat sa 1945, ang Freetown Congregation may 32 ka magmamantala. Sila naghupot sa integridad ug aktibo sa espirituwal. Andam ug ikag na silang mopadayon sa buluhaton.

Sa Agosto 29, 1945, sa Tigom sa Pag-alagad, gihisgotan sa Freetown Congregation ang bag-ong kampanya nga gipahibalo sa Disyembre 1944 nga Informant (Atong Ministeryo sa Gingharian karon). Ang matag kongregasyon magpahibalo ug magpahigayog serye sa upat ka publikong tigom sa “matag siyudad, lungsod, ug baryo.” Ang tigom dunay usa ka oras nga pakigpulong sa usa ka brader (18 anyos o mas edaran pa) nga maayong mohatag ug bahin sa Teokratikanhong Tunghaan sa Ministeryo. Human sa upat ka tigom, ang mga brader magpormag mga grupo sa pagtuon sa Bibliya aron tabangan ang mga interesado sa matag teritoryo.

 Unsay reaksiyon sa mga magmamantala sa maong kahikayan? Kini ang mga komento nga natala sa rekord sa Tigom sa Pag-alagad sa Freetown Congregation:

Tsirman: “Unsaon kaha nato paghimo kining bag-ong kampanya?”

Unang Brader: “Di ta magdahom nga molampos kini sama sa Amerika. Lahi ang mga tawo dinhi.”

Ikaduhang Brader: “Tinuod na.”

Ikatulong Brader: “Nganong di nato sulayan?”

Ikaupat nga Brader: “Seguradong malisdan ta niana.”

Ikalimang Brader: “Pero kinahanglang mosunod ta sa kahikayan sa organisasyon ni Jehova.”

Ikaunom nga Brader: “Lagmit di ni mosaler sa atong nasod.”

Unang Sister: “Pero, tin-aw ang direksiyon sa Informant. Sulayan nato ni!”

Busa ila kining gisulayan. Gikan sa kabaybayonan sa Freetown ngadto sa Bo sa habagatan-sidlakan ngadto sa Kabala sa patag nga bahin sa amihanang kabukiran, ang mga igsoon nagpahigayon ug mga tigom sa mga eskuylahan, tiyanggihan, ug kabalayan. Nakadasig kini sa kongregasyon, ug “ang pulong ni Jehova padayong nagatubo ug nagakaylap.”—Buh. 12:24.

Bisan pa niana, ang mga magmamantala nagkinahanglag teokratikanhong pagbansay. Kana ang gitagana ni Jehova.