Mu February 1998, abashilika ba buteko e lyo na bashilika ba kabungwe ka Economic Community of West African States Monitoring Group (ECOMOG) balibombele pamo pa kufumya bacipondoka bonse mu Freetown. Icabipileko sana ca kuti munyinefwe umo alifwile ku tufyela utwafumine ku munshinga uwapuulike.

Bakasabankanya 150, bafulumukiile ku mayanda ya bamishonari ayali ku Kissy na ku Cockerill. Munyinefwe Laddie Sandy, uwalelonda pa Bethel atile, “Ilyo ine na munyinane Philip Turay twalelonda ubushiku, ifipondo fibili ifya mu kabungwe ka RUF fyalishile, no kutupatikisha ukuti twisule iciibi. Ilyo twabutwike no kufisama, ifi fipondo fyatampile ukulishisha imfuti muli loko ya ciibi. Icapapwishe ca kuti iciibi tacaiswike, e lyo ifipondo na fyo tafyalishiishe imfuti mwi kalashi lya ciibi. Fyalifulilwe, fyabwelelamo no kubwelelamo.

“Ilyo papitile inshiku shibili, ifi fipondo fyalibwelele ubushiku pamo ne fipondo na fimbi nalimo 20 ifyaipangeshe ne fyanso. Bwangu bwangu twalishibishe ulupwa lwa Bethel, twayafisama na mu muputule wa pa nshi uo bapekenye. Mulya mwine mu muputule umwafiita e mo ine na bambi 6 twafiseeme ku numa ya madalamu, ninshi tuletutuma fye ku mwenso. Ifipondo fyatampile ukulishisha imfuti mu ciibi mpaka caisuka, no kwingila fyaingila. Umo pa fipondo apundile ati: ‘Mufwaye uko ba Nte sha kwa Yehova bali, mubaputuleko imitwe.’ Twaile tuleamfula fye ilyo ifipondo fyalefwayafwaya abantu no konaula ifintu mu cikuulwa pa maawala 7. Ilyo bapwile ukonaula ifintu, balisendele ifyo balefwaya, no kubwelelamo babwelelamo.

“Twasendele ifipe fyesu no kubutukila lwa mupepi fye, ku ng’anda ya bamishonari, iyali Bethel kale, ku Cockerill. Ilyo  twaleya, twakumenye ibumba lya fipondo na limbi ilyatusanshile. Twafikile pa ng’anda ya bamishonari ninshi tuletutuma fye ku mwenso, lelo icaweme ca kuti tabatwipeye. Pa numa ya nshiku ishinono, twalibwelele ku Bethel, ku kuwamya ifyo baonawile.”

Ilyo papitile imyeshi ibili, abashilika ba mu kabungwe ka ECOMOG e bakwete amaka mu musumba, kabili bamishonari balitampile ukubwela ukufuma ku Guinea. Nomba ico bashaishibe ca kuti tabali na kukokolamo mu musumba.

Mu December 1998, pa numa fye ya myeshi 8, abantu abengi balilongene mu cibansa ca Freetown National Stadium pa Kulongana kwa Citungu ukwaleti: “Imikalile ya Bukapepa.” Mu kupumikisha fye baumfwile iciunda cati na mpuu, bamona ne cushi calafutumuka pa mpili. Ifipondo fyalibwelele!

Mu nshiku shakonkelepo ifintu mu Freetown fyalibipiileko. Eco, aba mu Komiti ya Musambo bafwaile indeke iya kusenda bamishonari 12, aba mu lupwa lwa Bethel 8 abafumine ku fyalo fimbi, e lyo na ba mu makuule 5, bonse babatwele ku Conakry. Pa numa fye ya nshiku shitatu, pa 6 January 1999, ifipondo fyatampile kampeni ya Kwipaya Abantu mu bunkalwe. Mu Freetown mwali ulukakaala ulwabipa sana, ica kuti abekala calo nalimo 6,000 balibepeye. Bacipondoka baleputaula abantu amaboko na moolu, balifyushishe abana abengi kabili balyonawile ne fikuulwa ifingi.

Munyinefwe uo twatemenwe sana, Edward Toby, balimwipeye bubi bubi. Bakasabankanya ukucila pali 200 babasungiile pa Bethel na pa ng’anda ya bamishonari mu Cockerill. Bambi babeleme mu mayanda yabo. Ba Nte ababutukiile pa ng’anda ya bamishonari iya mu Kissy, balekabila sana ukubatuminako umuti mu kwangufwanya. Lelo ukupita mu musumba ukuya uko baali cali kuibika mu kapoosa mweo. Eco, nani wali no kuibika mu kapoosa mweo? Bamunyinefwe  abashipa babili, Laddie Sandy na Philip Turay, balya bene abalelonda pa Bethel, e baipeeleshe ukutwala.

Ba Philip bebukisha ukuti: “Ala mu musumba mwali sana icimfulumfulu. Bacipondoka balipangile amarodibloko ayengi kabili balecusha bonse abalepita apo balefwaila. Balibindile no kuti takwali uwa kwenda ukutampa akasuba ukushinta 10 koloko ya lucelo ubushiku bwakonkapo. Twaendele inshiku shibili pa kuyafika ku ng’anda ya bamishonari iya ku Kissy kabili twasangile balyonaula ing’anda no kuyoca baliyocele.

“Ilyo twaile tulelolesha ukushinguluka incende, twamwene munyinefwe Andrew Caulker uo bacenene sana ku mutwe. Ifipondo fyalimukakile kabili fyalimukomawile na kasembe. Icawemeko ca kuti tafwile, ilyo apuputwike, alibutwike. Ilyo line fye twalimutwele ku cipatala, kabili mu kuya  kwa nshita, alipolele. Pa numa, alitampile bupainiya bwa nshita yonse.”

Ba Nte bambi tababepeye nangu ukubacena pantu babeshibe ukuti tabaleitumpa mu fikansa fya calo. Munyinefwe umo atile: “Ifipondo fyalitupatikishe ukufwala imipango yabuuta no kulacinda mu musebo pa kulanga ukuti twali ku lubali lwabo. Batwebele abati, ‘nga mwakaana twalamuputaulako amaboko nangu amolu nelyo fye ukumwipaya.’ Ala twalitiinine nga nshi. Eco ine no mwina mwandi twaiminine pa mbali, twatendeka no kupepa mu mutalalila pa kuti Yehova atwafwe. Ilyo umwina mupalamano umo uwaleumfwana ne fipondo amwene ifyalecitika, aebele umukalamba wa fipondo ati: ‘Uyu ni “lupwa wesu.” Taitumpa mu mapolitiki, kanshi twalamucindilako.’ Umukalamba wa fipondo alisumine, kabili alitulekele twaya na ku ng’anda.”

Ilyo ifimfulunganya fyaile filepwa mu musumba, aba bwananyina balitampile ukulongana no kuya mu kushimikila, lelo bali abacenjela. Bakasabankanya balefwala amabaji aya kubeshibilako nga bafika pa marodibloko. Nga nabatantama mu milongo iitali pa marodibloko, balisambilile sana ifya kutampa ukulanshanya na bantu ifya mu Baibolo.

Ilyo ifintu ifyo abantu bakabila sana mu bumi fyacepele mu musumba, umusambo wa ku Britain walitumine ifibokoshi 200 ne ndeke umwali ifya kukumbusuka abantu. Ba Billie Cowan na ba Alan Jones e baile ku Freetown ne ndeke ukufuma ku Conakry ku kutwala ifipe no kufipisha bwino mu fipekeni. Ifipe fyafikile mu Bethel ninshi kwashala fye panono pa kuti icibindo ca kulesha abantu ukwenda citampe. Ba James Koroma e baletwala ifipe ku Conakry, e lyo pa kubwela balesenda ifitabo ne fintu fimbi. Impapulo shimo baletumina bakasabankanya abali ukutali sana pamo nga ku Bo na ku Kenema.

Pa 9 August, 1999, bamishonari abali ku Conakry batampile ukubwelelamo ku Freetown. Umwaka wakonkelepo, abashilika ba ku Britain balitamfishe bacipondoka mu  Freetown. Mu nshita mu nshita kwaleba ifimfulunganya pa nshita inono, lelo mu January 2002, inkondo yalipwile. Pa mulandu ne nkondo iyaliko pa myaka 11, abantu 50,000 balifwile, 20,000 balilemene, amayanda 300,000 yalyonaike e lyo abantu 1.2 milioni balibafumishe mu mayanda yabo.

Ilyo ifi fyalecitika, cali shani ku kuteyanya kwa kwa Yehova? Ukwabula no kutwishika, Yehova alicingilile no kupaala ukuteyanya kwakwe. Ilyo kwali ifimfulunganya, abantu nalimo 700 balibatishiwe. Nangu ca kuti ba Nte abengi balibutwike, bakasabankanya mu Sierra Leone balifuliileko mupepi na hafu. Mu Guinea bakasabankanya balifulile sana ukucila pa mapesenti 300! Ne caweme sana ca kuti abantu ba kwa Lesa balitwalilile aba cishinka kuli ena. Na lintu bali mwi “lungu lya mulilo ilya bucushi,” abantu ba kwa Lesa balitwalilile ukwikatana no kutemwana kabili balitwalilile “ukusambilisha no kubila imbila nsuma ukwabula ukuleka.”—Esa. 48:10; Imil. 5:42.