Idi Pebrero 1998, dagiti soldado ti gobierno ken tropa ti Economic Community of West African States Monitoring Group (ECOMOG) rinautda ti Freetown tapno mapapanaw amin a rebelde. Nakalkaldaang ta maysa a kabsat a lalaki ti natay gapu ta natamaan kadagiti paset ti bimtak a bomba bayat ti nakaam-amak a gubat.

Nagkamang ti agarup 150 nga agibumbunannag iti pagtaengan dagiti misionero iti Kissy ken Cockerill. Kinuna ni Laddie Sandy, maysa kadagiti dua a pangrabii a guardia ti Bethel: “Iti maysa a tengnga ti rabii, bayat ti panagguardiami ken Philip Turay, dua nga armado nga RUF ti dimteng iti Bethel ket pilpilitendakami a manglukat kadagiti sarming a ridaw ti lobby. Iti panaglemmengmi ken ni Philip, pinagsasarunoda a pinaltogan ti serradura ti ridaw. Nakaskasdaaw ta saanda a naluktan ti serradura ken dida napanunot a paltogan ti sarming. Pimmanawda idi awan naaramidanda.

“Kalpasan ti dua a rabii, nagsubli dagiti rebelde agraman ti agarup 20 a porsegido ken armado a kakaduada. Dagus a pinakaammuanmi ti pamilia ti Bethel ket nagtaraykami a napan iti nayurnos a pagkamangan iti basement. Aminkami a pito ti naglemmeng iti nasipnget a likud ti dua a dadakkel a bariles nga agpigpigergerkami iti buteng. Bayat nga umas-asideg dagiti rebelde iti pasdek, tinatekda iti bala ti serradura ti ridaw agingga a nalunag. Impukkaw ti maysa a rebelde: ‘Birokenyo dagita a Saksi ni Jehova, ket ngurungorenyo ida.’ Siuulimekkami a nakarukob bayat a sinawarda ti pasdek iti pito nga oras. Kalpasan a nagdadaelda, innalada ti kaykayatda sa pimmanawdan.

“Innalami dagiti napateg a masapsapulmi sa napankamin iti dati a Bethel iti Cockerill a pagtaengan itan dagiti  misionero. Iti dalan, sabali pay a grupo dagiti rebelde ti nangagaw kadagiti awitmi. Kasta unay ti butengmi a dimmanon iti pagtaengan dagiti misionero ngem agyamankami ta sibibiagkami. Naginanakami iti sumagmamano nga aldaw sa nagsublikami iti Bethel tapno agipakni.”

Kalpasan ti dua a bulan, idi kontroladon ti ECOMOG ti intero a siudad, nagsublin dagiti misionero manipud Guinea. Ngem dida ammo nga apagbiit laeng ti panagtalinaedda ditoy.

Kalpasan ti walo a bulan, idi Disiembre 1998, ginasut a delegado ti mangtagtagiragsak iti “Dalan ti Dios iti Biag” a Kombension Distrito iti National Stadium ti Freetown. Pagammuan ta nakangngegda iti kanalbuong, ket nagpangato ti napuskol nga asuk manipud kadagiti turod. Nagsubli dagiti rebelde!

Kadagiti simmaganad nga aldaw, kimmaro ti kasasaad iti Freetown. Nangarkila ti Branch Committee iti bassit nga eroplano a mangipan idiay Conakry iti 12 a misionero, 8 a ganggannaet a Bethelite, ken 5 a boluntario iti konstruksion. Kalpasan ti tallo nga aldaw, idi Enero 6, 1999, inyusuat dagiti rebelde ti kampania a naranggas a panangpapatay nga inawaganda iti Operation No Living Thing. Nakaam-amak ken nakarangranggas ti panangrautda iti Freetown, a minasakerda ti agarup 6,000 a sibilian. Dagiti rebelde pinutedda dagiti takkiag ken saka ti dadduma a sibilian, kinidnapda ti ginasut nga ubbing, ken dinadaelda ti rinibu a pasdek.

Siraranggas a napapatay ti maysa a maipatpateg a kabsat a ni Edward Toby. Nasurok a 200 a na-trauma a kakabsat ti nagdagus iti Bethel wenno iti pagtaengan dagiti misionero iti Cockerill. Dadduma ti naglemlemmeng lattan kadagiti pagtaenganda. Agkasapulan unay iti pannakaagas dagiti kakabsat a nagdagus iti pagtaengan dagiti misionero iti Kissy, nga adda iti kadayaan a paset ti ili. Ngem nakapegpeggad  ti mapan sadiay. Siasino ti mayat a mangirisgo iti biagna? Dagus a nagboluntario dagiti natured a guardia iti Bethel a da Laddie Sandy ken Philip Turay.

“Nariribuk ti siudad,” malagip ni Philip. “Dagiti rebelde nga agbambantay iti adu a checkpoint pasardengenda dagiti tattao sa maltratuenda ida. Nainget ti curfew isu a narigatankami a nagbiahe. Dua nga aldaw kalpasan ti panagluasmi, nasangpetanmi ti pagtaengan dagiti misionero iti Kissy a naserrek ken napuoranen.

“Idi sinukimatmi ti aglawlaw, nakitami ti maysa a kabsat a ni Andrew Caulker a nakaro dagiti sugat iti ulona. Inggalut dagiti rebelde ken namin-adu a pinang-orda iti wasay. Nakaskasdaaw ta nakalasat ken nakalibas. Intaraymi iti ospital ket sadiay a nagpaimbag. Nagserbi kas regular pioneer idi agangay.”

 Adda dagiti kakabsat a saan a napapatay wenno nasugatan gapu iti neutral a takderda. Inyestoria ti maysa a kabsat: “Pinilitdakami dagiti rebelde nga agusar iti puraw a bandana ken agsala iti kalsada kas panangsuporta kadakuada. ‘No agkedkedkayo, putdenmi ti ima wenno sakayo wenno papatayendakayo,’ kunada. Gapu iti buteng, immadayokami bassit ken baketko ket siuulimek a nagkararagkami ken Jehova. Idi nakitanakami ti maysa nga agtutubo a kaarrubami a tumultulong kadagiti rebelde, imbagana iti komander: ‘“Kabsattayo” daytoy. Saan a makiramraman iti politika isu a dakamin ti mangisaup kenkuana nga agsala.’ Namati ti komander sa pimmanaw isu a nagdardaraskamin a nagawid.”

Idi tumaltalnan ti kasasaad iti siudad, siaannad a naggigimong ken nangasaba manen dagiti kakabsat. Agusar dagiti kakabsat iti badge card ti kombension a pangyam-ammo iti bagida kadagiti checkpoint. Bayat nga agur-urayda kadagiti atiddog a pila iti checkpoint, nagbalinda a nasigo a mangirugi iti saritaan maipapan iti Biblia.

Gapu ta maib-ibusen ti amin a masapsapul iti siudad, nangipatulod ti sanga nga opisina iti Britain iti 200 a karton a relief goods. Manipud Conakry, nagdardaras da Billie Cowan ken Alan Jones a napan iti Freetown tapno makuyogda dagiti naipatulod a karton a lumasat kadagiti agsasaruno a checkpoint. Nakadanon dagitoy iti Bethel sakbay ti curfew iti rabii. Agitulod ni James Koroma kadagiti surat idiay Conakry, sa agyawid kadagiti literatura ken dadduma pay a napapateg a suplay. Dadduma kadagitoy a naespirituan a taraon ti naipan kadagiti kakabsat iti naiputputong a paset ti Bo ken Kenema.

Idi Agosto 9, 1999, nangrugi nga agsubli iti Freetown dagiti misionero iti Conakry. Iti simmaganad a tawen, simmangpet ti armada ti Britain a nangpapanaw kadagiti  rebelde iti Freetown. Nagtultuloy ti sagpaminsan a panaggugubat, ngem idi Enero 2002, naideklara a nagpatinggan ti gubat. Kas resulta ti 11 a tawen a gubat, 50,000 a tattao ti natay, 20,000 ti nabaldado, 1.2 milion ti napilitan a pimmanaw, ken 300,000 a pagtaengan ti nadadael.

Komusta ti organisasion ni Jehova? Nalawag a sinalakniban ken binendisionan ni Jehova. Kabayatan ti gubat, agarup 700 ti nabautisaran. Nupay ginasut a kakabsat ti pimmanaw iti lugar a paggugubatan, immadu iti 50 a porsiento dagiti agibumbunannag iti Sierra Leone. Nasurok met a 300 a porsiento ti immaduan ti agibumbunannag iti Guinea! Kangrunaanna, nataginayon ti ili ti Dios ti kinatarnawda. Iti “urno ti rigat,” saan a nadadael ti Nakristianuan a panagkaykaysa ken ayatda ket ‘nagtultuloyda nga awan sarday a nangisuro ken nangideklara iti naimbag a damag.’—Isa. 48:10; Ara. 5:42.