Sigun iti maysa a pattapatta, agarup 3,000 agingga iti 5,000 a tattao ti tuleng iti Sierra Leone ken ginasut met iti Guinea. Gapu ta ‘pagayatan ni Jehova a maisalakan koma dagiti amin a kita ti tattao,’ kasano ngarud a “mangngeg” dagiti tuleng ti naimbag a damag?—1 Tim. 2:4.

Ni Michelle Washington a misionera manipud Gilead ket simmangpet iti Sierra Leone idi 1998. Kunana: “Naibaonkami ken ni lakayko a Kevin iti kongregasion nga adda uppat a tuleng a tumabtabuno. Gapu ta ammok ti American Sign Language, kayatko a tulongan ida. Inawisnak ti sanga nga opisina nga ag-interpret kadagiti gimong ken asamblea para kadagiti tuleng ken impakaammoda daytoy a probision kadagiti kabangibang a kongregasion. Nangyurnos met ti sanga nga opisina kadagiti sign-language class para kadagiti agibumbunannag nga interesado a tumulong kadagiti tuleng. Rinugianmi ti nagbirok kadagiti  tuleng a tattao iti komunidad ken inyadalanmi ida iti Biblia. Adu a tattao ti nangapresiar kadakami gapu ta nakitada ti panagreggetmi a mangtulong kadagiti tuleng. Ngem adda met dagiti saan a maragsakan iti ar-aramidenmi. Maysa a pastor a mangisursuro kadagiti tuleng ti nangibaga nga ‘ulbodkami a mammadto.’ Pinakdaaranna dagiti tuleng ken ti pamiliada a liklikandakami. Dadduma ti nabagaan a no makikaduada kadakami, saandan a maikkan iti pinansial a tulong. Dagus a nabingay dagiti tuleng iti dua a grupo: dagidiay saan a makaam-ammo kadakami ken sumupsuporta iti pastor, ken dagidiay makaam-ammo kadakami ken saan a sumupsuporta iti pastor. Dadduma iti maikadua a grupo ti dimmasig iti kinapudno agingga a nagpabautisarda.”

Kas pagarigan, nayanak a tuleng ni Femi ken dagiti laeng simple a senias ti ammona. Pagsuspetsaanna ti amin—nangruna dagiti makangngeg a tattao—ken panagriknana ket saan a naragsak ken saan a maipatpateg. Idi kuan, nakipagadal iti Biblia kadagiti kakabsat iti sign-language group. Di nagbayag, regularen a tumabtabuno kadagiti gimong ken agad-adalen iti sign language. Rimmang-ay ni Femi agingga a nagpabautisar ken naragsak itan a mangisursuro iti kinapudno kadagiti dadduma pay a tuleng.

Idi Hulio 2010, nagbalinen a kongregasion ti Freetown American Sign Language group. Adda met dagiti sign-language group iti Bo ken Conakry.

Ipakita ti Biblia a napanglaw ti kaaduan a Kristiano idi umuna a siglo. Insurat ni adalan a Santiago: “Saan aya a ti Dios pinilina dagidiay napanglaw maipapan iti lubong tapno agbalinda a nabaknang iti pammati?” (Sant. 2:5) Ti pammati ken Jehova ti nangyeg met iti liwliwa ken namnama kadagiti kakabsat iti Sierra Leone ken Guinea.

 Pammati ti nangtignay iti adu a napanglaw a pamilia a Saksi kadagiti nasulinek a lugar nga agurnong iti sumagmamano a bulan tapno matabunuanda ti maysa a kombension distrito. Nagmula ti dadduma tapno adda pangalaanda iti pagpleteda. Naglilinnetlet dagiti grupo a buklen ti 20 agingga iti 30 a delegado iti babassit a trak. Napudot, natapok, ken nataltag ti biahe a nagpaut iti 20 nga oras wenno ad-adu pay. Nawatiwat ti pinagna ti dadduma a delegado. Kinuna ti maysa a kabsat: “Pinagnami ti umuna a 80 a kilometro a napan iti kombension nga awit-awitmi ti adu a saba. Inlakomi dagitoy iti dalan tapno lumag-an ti awitmi ken adda pagpletemi iti trak agingga iti pagkombensionan.”

Pammati met ti nangtignay iti adu a kakabsat a manglaban iti sulisog a mapan kadagiti nabakbaknang a pagilian.  “Agtalekkami nga ipaay ni Jehova dagiti kasapulanmi,” kuna ni Emmanuel Patton, a nagraduar iti Bible School for Single Brothers. “Mariknami a nakapatpateg ti panagserbimi gapu ta agnanaedkami iti pagilian nga agkasapulan iti adu a manangaskasaba iti Pagarian.” (Mat. 6:33) Agserserbi itan ni Emmanuel kas panglakayen iti kongregasion, ket nakaregregtada ken baketna a Eunice nga agserserbi ken Jehova. Dadduma nga ulo ti pamilia ti saan nga agabrod tapno mataginayon ti panagkaykaysa ken espiritualidad ti pamiliada. “Diak kayat nga awaten ti trabaho a mangyadayo kaniak iti pamiliak iti napaut a tiempo,” kinuna ni Timothy Nyuma, nga agserserbi kas special pioneer ken suno ti manangaywan iti sirkito. “Pinagbasami ken baketko a  Florence dagiti annakmi iti eskuelaan ditoy lugarmi imbes nga iti adayo tapno saan a sabali ti mangaywan kadakuada.”

Impakita ti dadduma a kakabsat ti pammatida babaen ti panangitultuloyda kadagiti Nakristianuan nga aktibidad iti laksid ti nagduduma a pakarigatan. Napaliiw ni Kevin Washington a nadakamat itay: “Adu a kakabsat ti regular a mangaskasaba ken mangas-asikaso kadagiti responsabilidad iti kongregasion uray no adda dagiti problema a no dakami koma ti makapasar, nalabit agaburido ken agtalinaedkami lattan iti balay. Kas pagarigan, dadduma ti addaan iti nakaro a sakit ken awan ti dagus a pagpaagasanda a kas iti dadduma a lugar. Ikagkagumaan ti dadduma ti agsursuro nga agbasa ken agsurat. No agbalinak a kritiko iti panangiparang ti maysa a kabsat iti pasetna, isaludsodko iti bagik: ‘No agtrabahoak iti amin-tiempo, adda nakaro a sakitko, nakapuy ti panagkitak ken awan ti anteohosko, manmano ti literatura a pagsukimatak, ken awan ti koriente, kasta ngata kasayaat ti maaramidak?’”

Kadagitoy ken iti adu pay a pamay-an a dagiti kakabsat iti Sierra Leone ken Guinea idaydayawda ni Jehova. Kas kadagiti Kristiano idi umuna a siglo, irekrekomendada ti bagbagida kas ministro ti Dios “babaen ti panagibtur iti kasta unay, babaen kadagiti rigat, babaen kadagiti panagkasapulan, . . . kas napanglaw ngem mangpabpabaknang kadagiti adu, kas awanan iti aniaman ket kaskasdi a mangtagtagikua iti amin a bambanag.”—2 Cor. 6:4, 10.

Nasurok a 90 a tawenen ti napalabas, inreport da Alfred Joseph ken Leonard Blackman a ti Sierra Leone ket ‘purawen maipaay iti pannakaani.’ (Juan 4:35) Agarup 35 a tawen kalpasanna, insurat ni Manuel Diogo iti Guinea, “Adu ti interesado ditoy.” Kombinsido ita dagiti adipen ni Jehova kadagitoy dua a pagilian nga adu pay a tattao ti mangipangag iti naimbag a damag.

 Idi 2012, adda 3,479 a timmabuno iti Memorial iti Guinea, nasurok nga uppat ket kagudua a daras nga ad-adu ngem iti dagup a bilang dagiti agibumbunannag iti dayta a pagilian. Iti 2,030 nga agibumbunannag iti Sierra Leone, 7,854 ti timmabuno iti Memorial, dandani uppat a daras nga ad-adu ngem iti bilang dagiti agibumbunannag. Ti maysa a nabayagen a Saksi a timmabuno iti rabii ti Memorial ket ti special pioneer a ni Winifred Remmie nga agtawen iti 93. Simmangpetda ken lakayna a Lichfield iti Sierra Leone idi 1963. Kalpasan ti 60 a tawen iti amin-tiempo a serbisio, agserserbi pay laeng ni Winifred kas special pioneer. Kinunana: “Siasino ti mangipagarup  a ti Sierra Leone ket maaddaan iti adu ken naregta nga agkakabsat iti naespirituan. Nupay baketakon, maragragsakanak pay laeng a makiraman iti daytoy a panagrang-ay.” *

Dagiti Saksi ni Jehova iti Sierra Leone ken Guinea marikriknada met ti kas iti nayebkas ni Winifred. Kas kadagiti nagdadakkel ken mapadpadanuman a kayo, determinadoda nga agtultuloy nga agbunga a pakaidayawan ni Jehova. (Sal. 1:3) Iti bileg ni Jehova, itultuloyda nga iwaragawag ti pudpudno a namnama ti sangatauan—ti “nadayag a wayawaya ti annak ti Dios.”—Roma 8:21.