Go akanyetšwa gore batho ba e ka bago ba 3 000 go ya go 5 000 kua Sierra Leone gotee le ba makgolo kua Guinea ke difoa. Ka ge thato ya Jehofa e le gore “mehuta yohle ya batho e phološwe,” difoa tšona di tla kwa bjang ditaba tše dibotse?—1 Tim. 2:4.

Michelle Washington, e lego moromiwa yo a tšwago Gilead yo a fihlilego Sierra Leone ka 1998, o anega gore: “Nna le monna wa ka Kevin, re be re abetšwe phuthegong yeo e bego e na le difoa tše nne tšeo di bego di etla dibokeng. Ka ge ke be ke kgona go bolela Polelo ya Diatla ya Amerika ke be ke nyaka go di thuša. Ofisi ya lekala e ile ya nkgopela gore ke fetolele dipolelo dibokeng le dikopanong ka polelo ya diatla gomme ya tsebiša diphuthego tša kgauswi ka tokišetšo ye. Ofisi ya lekala e ile ya ba ya rulaganya diklase tša bagoeledi bao ba nyakago go ithuta polelo ya diatla go thuša difoa. Re ile ra nyaka difoa mo motseng gomme ra thoma go swara  dithuto tša Beibele le tšona. Ge batho ba bantši mo motseng ba bona maiteko a rena a go thuša difoa, ba ile ba re reta. Lega go le bjalo, ga se batho ka moka bao ba ilego ba rata modiro wa rena. Moruti yo a bego a rerela difoa o ile a re re ‘baporofeta ba maaka.’ O ile a botša difoa le ditho tša malapa a gabo tšona gore di se re theetše. Tše dingwe di be di boditšwe gore ge e ba di ka itlwaelanya le rena di ka se sa thušwa ka tšhelete. Difoa tše di ile tša arogana ka diripa tše pedi: sehlopha sa pele e be e le sa tšeo di bego di sa re tsebe eupša di thekga moruti yoo, gomme sehlopha sa bobedi e be e le sa tšeo di bego di re tseba gomme di sa thekge moruti yoo. Ba bangwe sehlopheng seo se bego se sa thekge moruti ba ile ba emela therešo gomme ba gatela pele go fihlela ba kolobetšwa.”

Ka mohlala, Femi o belegwe e le sefoa gomme o be a kgona go bolela feela ka go fo šupašupa. O be a belaela motho yo mongwe le yo mongwe—kudukudu batho bao e sego difoa—le gona o be a sa thaba e bile a ikwa eka ga a ratwe. Ke moka o ile a thoma go ithuta Beibele le bana babo rena ba sehlopha sa polelo ya diatla. E se kgale ke ge a šetše a etla dibokeng tša Bokriste ka mehla e bile a ithuta polelo ya diatla. Femi o ile a dira tšwelopele a ba a kolobetšwa gomme gona bjale o ruta difoa tše dingwe therešo.

Ka July 2010, sehlopha sa Freetown seo se dirišago Polelo ya Diatla ya Amerika se ile sa bopa phuthego. Go na le dihlopha tše dingwe tša polelo ya diatla kua Bo le Conakry.

Beibele e bolela gore Bakriste ba bantši ba lekgolong la pele la nywaga ba be ba diila. Morutiwa Jakobo o ngwadile gore: “Na Modimo ga se a kgetha bao ba diilago go ya ka lefase gore ba hume tumelong?” (Jak. 2:5) Go ba le tumelo go Jehofa go tlišeditše bagoeledi khomotšo le kholofelo kua Sierra Leone le Guinea.

Tumelo e tutuetša malapa a mantši a Bakriste ao a diilago  ao a dulago mafelong a lekatana go boloka tšhelete ka dikgwedikgwedi gore a kgone go ya dikopanong tša selete. Ba bangwe ba a lema gomme ba rekiša ditšweletšwa tšeo gore ba kgone go ya kopanong. Dihlopha tša batho ba e ka bago ba 20 go ya go 30 di be di pitlagana ka gare ga dilori tše dinyenyane di tšea maeto a matelele a diiri tše 20 goba go feta moo, mola go fiša e bile di sepela tseleng ya marole le ya dikoti. Ba bangwe ba sepela maeto a matelele. Ngwanabo rena yo mongwe o re: “Re ile ra sepela dikhilomithara tše 80 ka maoto re eya kopanong ya selete re rwele dipanana tše dintši. Re ile ra di rekiša mo tseleng, re leka go fokotša morwalo le go oketša tšhelete gore re kgone go namela lori bakeng sa leeto leo le bego le šetše.”

Tumelo e ile ya dira gore bagoeledi ba bantši ba se ke ba lekega go ya dinageng tše dingwe go yo inyakela mafulo a matala. Emmanuel Patton, yo e lego sealoga sa Sekolo sa Beibele  sa Bana Babo Rena ba Sego Lenyalong o re: “Re holofela gore Jehofa o tla hlokomela dinyakwa tša rena. Ka ge re phela nageng yeo go nago le tlhokagalo e kgolo ya bagoeledi ba Mmušo re lemogile gore tirelo ya rena ke ya bohlokwa kudu.” (Mat. 6:33) Ga bjale Emmanuel o hlankela e le mogolo wa phuthego, gomme yena le mosadi wa gagwe Eunice ba šoma ka thata go tšwetša pele dikgahlego tša Mmušo. Dihlogo tše dingwe tša malapa di kgethile go se hudugele dinageng tše dingwe ka ge di nyaka go šireletša botee bja malapa a tšona gotee le bomoya bja ona. Timothy Nyuma yo a hlankelago e le mmulamadibogo yo a kgethegilego e bile e le mothuši wa molebeledi wa tikologo, o re: “Ke ile ka gana mošomo woo o tlago go nkgaoganya le lapa la ka nako e telele.  Nna gotee le mosadi wa ka Florence, re ile ra iša bana ba rena dikolong tša tikologong ya gabo rena go e na le go ba iša kgole gore ba godišwe ke batho ba bangwe.”

Bana babo rena ba bangwe le dikgaetšedi ba bontšha tumelo ka go kgotlelela medirong ya Bokriste go sa šetšwe mathata a fapafapanego. Kevin Washington, yo go boletšwego ka yena pejana o lemogile gore: “Bagoeledi ba bantši ba dira boboledi ka mehla e bile ba hlokomela boikarabelo bja phuthego le ge ba lebeletšane le mathata ao a ka ba dirago gore ba itulele gae gomme ba ikwele bohloko. Ka mohlala, ba bangwe ba swerwe ke malwetši a sa alafegego e bile ga ba na tlhokomelo e kaone ya tša kalafo goba dihlare tšeo dinageng tše dingwe di hwetšagalago gabonolo. Ba bangwe ba dira maiteko a magolo gore ba kgone go bala le go ngwala. Ge e ba nka ikhwetša ke sola tsela yeo ngwanabo rena a phethago boikarabelo, ke ipotšiša gore: ‘Ge nkabe ke šoma, ke babja kudu, ke sa bone gabotse e bile ke se na digalase tša mahlo, ke se na mohlagase le bokgobapuku bja dikgatišo ka moka tša mokgatlo, na nna ke be ke tla dira dilo kaone?’”

Ka ditsela tše le tše dingwe tše dintši, bana babo rena le dikgaetšedi kua Sierra Leone le Guinea ba tumiša Jehofa. Go swana le Bakriste ba lekgolong la pele la nywaga, ba ile ba ipolela gore ke badiredi ba Modimo ‘ka go kgotlelela dilo tše dintši, ka ditlaišego, ka mabaka a go hloka dilo, bjalo ka badiidi fela ba humiša ba bantši, bjalo ka ba se nago selo fela ba na le dilo tšohle.’—2 Bakor. 6:4, 10.

Nywageng e 90 e fetilego, Alfred Joseph le Leonard Blackman ba ile ba bega gore mašemo a Sierra Leone a be a “šweufaletše go bunwa.” (Joh. 4:35) Mo e ka bago nywaga e 35 ka morago, Manuel Diogo o ile a ngwalela lekala lengwalo a le kua Guinea, a re: “Go na le batho ba bantši bao ba thabelago mo.” Lehono, bahlanka ba Jehofa dinageng tšeo ka bobedi  ba kgodišegile gore batho ba bantši ba sa dutše ba tlo arabela gabotse ditabeng tše dibotse.

Ka 2012, kua Guinea batho ba 3 479 ba ile ba ba gona Segopotšong, e lego palo yeo e fetago bagoeledi ba nageng yeo gane le seripa. Bagoeledi ba 2 030 kua Sierra Leone ba ile ba ba le batho ba 7 854 Segopotšong, e lego palo e nyakilego go feta gane palo ya bagoeledi. Mokgekolo yo mongwe yo a bego a le gona Segopotšong seo ke mmulamadibogo yo a kgethegilego wa nywaga e 93, e lego Winifred Remmie. Yena gotee le monna wa gagwe Lichfield, ba fihlile Sierra Leone ka 1963. Ka morago ga nywaga e 60 a le tirelong ya nako e tletšego, o be a sa dutše a hlankela e le mmulamadibogo  yo a kgethegilego. Winifred o re: “Ga go motho yo a bego a nagana gore Sierra Leone e ka ba le bana babo rena le dikgaetšedi ba bantši ba tiilego moyeng ka tsela ye. Le ge ke šetše ke tšofetše, ke sa dutše ke nyaka go tšea karolo kgolong ye e thabišago.” *

Dihlatse tša Jehofa kua Sierra Leone le Guinea di ikwa go swana le Winifred. Go etša dihlare tšeo di nošetšwago gabotse, di ikemišeditše go tšwela pele di enywa dienywa tša go tumiša Jehofa. (Ps. 1:3) Ka matla ao di a newago ke Jehofa di tla tšwela pele di bolela ka kholofelo ya kgonthe ya batho—“tokologo ya letago ya bana ba Modimo.”—Baroma 8:21.