Eka Malandza-kulorhi:

Hakunene swa hi tsakisa ku mi tsalela papila leri eku sunguleni ka lembe leri ra nkoka! Eku heleni ka lembe ra 2014, se ku ta va ku hundze lembe-xidzana Hosi ya hina Yesu Kreste loyi a rhandzekaka a sungule ku fuma exikarhi ka valala vakwe.—Ps. 110:1, 2.

Eku sunguleni ka lembe leri ra ntirho, eka nhlangano wa lembe ni lembe wa Watch Tower Bible and Tract Society of Pennsylvania, Komiti ya Vuhundzuluxeri bya Bibele ya Misava Leyintshwa yi humese Bibele leyintshwa ya Xinghezi leyi antswisiweke leswaku vanhu va ta yi hlaya. Yehovha u tirhise vana vakwe lava totiweke hi moya leswaku va humesa Vuhundzuluxeri Bya Misava Leyintshwa. (Rhom. 8:15, 16) Leswi swi endla leswaku vuhundzuluxeri lebyi byi va byo hlawuleka, a swi tano ke?

Ku ringana malembe yo tala, Komiti ya Vatsari ya Huvo leyi Fumaka yi ri karhi yi endla leswaku vuhundzuluxeri bya Bibele byi rhangisiwa emahlweni.  Namuntlha, Vuhundzuluxeri Bya Misava Leyintshwa byi kumeka hi tindzimi ta 121 byi helerile kumbe byi nga helelanga. Ha mi khutaza leswaku mi komba Yehovha ndlela leyi mi yi tlangelaka ha yona Bibele leyi mi nga na yona. Yi hlayeni naswona mi anakanyisisa ha yona siku ni siku. Xisweswo, mi ta tshinela eka Mutsari wa yona, ku nga Yehovha Xikwembu.—Yak. 4:8.

Ha khumbeka loko hi twa hi ta miringo leyi vamakwerhu va hina lava rhandzekaka va langutanaka na yona. Swa twisiseka leswi minkarhi yin’wana swi nga ha va tikelaka ku tsaka ni vamakwerhu va vona. Hi xikombiso, ndyangu wun’wana wa le Asia wa ha ku sungula ku koka exilogweni hileswi mana wa kona a lamaleke miri hinkwawo hi xitshuketa. Lexi hlamarisaka hileswaku madokodela a ma swi koti ku endla leswaku a vuyela exiyin’weni lexi a ri eka xona. Hakunene swa vava! Sweswi nuna wa kona u khathalela nsati wakwe vusiku ni nhlikanhi. N’wana wa vona wa jaha swin’we ni vana va vona vambirhi va vanhwanyana va veka xikombiso lexinene tanihi Vakreste hi ku va va seketela vatswari va vona hi rirhandzu. Ndyangu lowu lowunene ku katsa na n’wina hinkwenu lava mi hluleke miringo yo hambana-hambana mi nga va ni ntsako lowu tisiwaka hikwalaho ka ku tiyisela miringo leyi ringaka ripfumelo ra n’wina. (Yak. 1:2-4) Yehovha u tiyisekisa vatotiwa vakwe ni tinyimpfu tin’wana leswaku hi ta va ni ntsako loko hi hambeta hi tiyisela miringo hikuva hi ta katekisiwa hi nyiko ya vutomi lebyi nga heriki!—Yak. 1:12.

N’wexemu ku ve ni vanhu va 19 241 252 eXitsundzuxweni. Hakunene swa khutaza ku vona vanhu vo tala swonghasi va xixima Yehovha na Yesu Kreste hi ku va kona eka nhlangano wa nkoka swinene elembeni wa vanhu va Xikwembu! Hi nkarhi wa Xitsundzuxo, ku dzuneka lokukulu ku ye eka Yehovha loko vanhu va timiliyoni va va maphayona  ya nkarhinyana hi March na April. Hakunene swa khutaza! Kutani xana a swi ku tsakisi ku tiva leswaku lava nga ta va maphayona ya nkarhinyana hi nkarhi wa ku endza ka mulanguteri wa xifundzha va nga va kona eka nhlangano hinkwawo wa maphayona lowu a nga ta wu fambisa, hambiloko riendzo rakwe ri nga ri hi n’hweti ya March kumbe April? Lava xalamukeke hi tlhelo ra moya va wu twisisa nkoka wa ku hambeta va hiseka entirhweni wo chumayela ni le mintirhweni ya vandlha. Ku tshama hi khomekile swi hi pfuna leswaku hi hambeta hi tiyile hi nga tsekatseki hi lwisana ni marhengu ya Sathana yo lava ku tsanisa ripfumelo ra hina ni ku hi hambukisa.—1 Kor. 15:58.

Mawaku ndlela leyi swi khutazaka ha yona ku xiya leswaku eka lembe ra ntirho leri hundzeke ku khuvuriwe vanhu va 277 344 lava kombiseke ku tinyiketela ka vona naswona sweswi va le gondzweni leri yisaka evuton’wini ku katsa ni vamakwerhu va vona emisaveni hinkwayo! (Mat. 7:13, 14) Vamakwerhu lava lavantshwa va lava nseketelo wa hina leswaku va ta “tiyisiwa eripfumelweni.” (Kol. 2:7) Hambetani mi khutazana leswaku mi ta tiyisela ku fika emakumu. (Mat. 24:13) “Vulavulani hi ku chavelela eka mimoya-xiviri leyi karhatekeke, seketelani lava tsaneke, vanani ni mbilu yo leha eka hinkwavo.” (1 Tes. 5:14) Xo hetelela, onge hinkwerhu ka hina hi nga ‘khongela minkarhi hinkwayo,’ hi ku: “Mfumo wa wena a wu te.”—1 Tes. 5:17; Mat. 6:10.

Hi kombela leswaku mi tiphina hi Buku Ya Lembe leri naswona swi tiveni leswaku ha mi rhandza hinkwerhu ka n’wina, n’wina lava rhandzaka Yehovha!

Vamakwenu,

Huvo leyi Fumaka Ya Timbhoni ta Yehovha