Sang 1999, nahibaluan sang kongregasyon nga sign-language sa Kobe, Japan nga may isa ka apa nga lalaki nga ang ngalan Hirofumi. Sang nagduaw ang brother, indi magpasugot ang iloy ni Hirofumi nga istoryahon ang iya bata. Pila ka beses nga nagbalik ang brother kag nagpakiluoy. Sang ulihi, gindala sia  sang iya iloy sa puertahan. Malaba na kag nagaulukay ang iya buhok kag burangos. Daw tinapok sia sa isa ka isla sing isahanon sa malawig nga tion. Blangko ang iya nawong. Indi lamang sia apa kundi bulag pa. Nakibot gid ang brother sa iya nakita. Ginkaptan niya ang mga kamot ni Hirofumi kag naghimo sing mga senyas para sa bulag, pero wala ini sing reaksion. Napulo ka tuig na nga wala makapakig-upod si Hirofumi sa mga tawo sugod sang nabulag sia sa edad nga 31.

Pagligad sang duha ka adlaw nagbalik liwat ang brother. Nagdayaw gid ang iloy kay abi niya indi na sia magbalik sang makita ang kahimtangan sang iya bata. Nagpakiluoy liwat ang brother, gani gindala niya si Hirofumi sa puertahan. Isa ka bulan na nga nagabalikbalik ang brother, pero wala gihapon sing reaksion si Hirofumi. Gani ginsilingan sia sang iloy nga indi na magbalik. Apang wala nangampo ang brother. Nagadala sia sing keyk kag ginahimo ang tanan para ipakita nga nagaulikid gid sia. Pagligad pa gid sang duha ka bulan, wala gihapon sing reaksion si Hirofumi. Pamatyag sang brother daw wala na sia sing mahimo.

Namat-od ang brother nga magduaw sa katapusan nga tion. Pero antes sini, nangamuyo sia kay Jehova nga buligan sia nga mahibaluan kon bala padayunon pa niya ang pagbulig kay Hirofumi. Pag-abot niya sa balay, ginkaptan niya ang mga kamot ni Hirofumi kag nagsenyas nga may isa ka Dios nga ang ngalan si Jehova nga pirme nagatan-aw sa iya halin sa langit kag mas nakaintiende sang iya mga pag-antos sangsa bisan kay sin-o nga tawo.  Palangga gid sia ni Jehova kag luyag sini nga dulaon ang iya pag-antos. Amo ini ang rason kon ngaa ginpadala niya ang isa sang iya mga Saksi. Sang primero wala gihapon sing reaksion si Hirofumi. Pero dugaydugay ginkamusta niya sing hugot ang brother, kag nagtulo ang iya luha. Natandog gid ang brother, gani naghibi man sia. Nasugdan dayon ang isa ka pagtuon sa Biblia.

Pagkatapos sang 11 ka tuig nga pagtuon, nakig-upod si Hirofumi sa lokal nga kongregasyon sa baylo nga padayon nga magbiyahe sing malawig pakadto sa sign-language nga kongregasyon. Wala sing makahibalo magsenyas sa lokal nga kongregasyon. Pero sa sulod sang isa ka tuig kag tunga, 22 ka utod ang nagtuon sa pagsenyas para mabuligan si Hirofumi. Sang Enero 2012, naghatag  sia sang iya una nga bahin sa Teokratikong Eskwelahan Para sa Ministeryo, kag may isa nga naga-interpret sang iya bahin. Sang Oktubre sina nga tuig, nangin di-bawtismado nga manugbantala si Hirofumi.

Si Floren isa ka payunir sa Pilipinas nga nagadumala sing mga 25 ka pagtuon sa Biblia. Ang kalabanan sini mga security guard nga nagaobra sa gab-i kag kon kaisa sa bilog nga gab-i. Gani kinahanglan nga magpasibu si Floren. Ginatun-an niya sila sa ila ulubrahan kon pahuway nila ukon sa iban nga tion nga indi makaupang sa ila obra. May mga ginatun-an sia sa Biblia halin sa alas 7 asta alas 11 sa gab-i, ang iban naman halin alas 5 asta alas 9 sa aga. Kon kaisa, nagakadto sia sa tion nga magabulos na ang masunod nga guardia. Gani, mahiwatan niya sing pagtuon ang guardia nga manugbulos kag ang ginbuslan. “Bangod madamo ako sing pagtuon sa Biblia, nabatyagan ko ang kalipay nga wala ko pa gid maeksperiensiahan,” siling ni Floren. Ang pila ka security guard nagatambong na karon sa mga miting sa Kingdom Hall. Ang isa sa mga estudyante ni Floren sa Biblia bawtismado na kag regular payunir man.

Nagaulan sadto sa Armenia samtang nagabantala ang aton duha ka sister. Nakita nila sa dalan ang iloy nga si Marusya upod ang iya bata nga babayi nga si Yeva. Sang gintanyagan nila ang mag-iloy sing tract, nakibot gid sila sang mahibaluan nga duha ka oras na sila nga nagahulat nga may mag-agi nga mga Saksi ni Jehova. Ngaa? Ang magulang nga lalaki ni Marusya nakatuon sing kamatuoran sa prisuhan sa mga utod nga napriso bangod sa ila neutralidad. Nagapaabot si Marusya nga paggua sang  iya magulang mangin mapintas sia kag wala sing balatyagon. Pero nangin mas kalmado sia kag may pagpugong sa kaugalingon. Samtang nagapakig-upod sia sa mga Saksi, naghimo pa gid sia sing mga pagbag-o. Indi makapati si Marusya kag ang iya bata bangod pirme nila makita sa mga poster sa siudad kag programa sa telebisyon nga ginapakalain ang mga Saksi ni Jehova. Nahunahuna ni Yeva: ‘Kabuot sang akon tiyo. Ti, ngaa kadamo sang indi maayo nga butang nga ginasiling batok sa mga Saksi ni Jehova?’ Para masabat ini, ginsilingan niya ang iya iloy: “Indi naton mahibaluan ang kamatuoran kon indi kita magrisgo. Pangitaon naton ang mga Saksi ni Jehova subong para matapos na ini.” Kag amo gid sina ang ila ginhimo sang nakita nila ang duha ka sister. Duha ka adlaw sang ulihi, nasugdan ang pagtuon sa Biblia sa mag-iloy. Nagtambong sila sa mga miting kag nag-uswag tubtob nangin di-bawtismado nga mga manugbantala.

Sa Adana, Turkey, may isa ka babayi nga nagahunahuna nga maghikog bangod sa mabug-at niya nga mga problema kag sang iya pamilya. Isa ka bes, ang iya kaingod nga mga bata may nakita nga duha ka magasin sa ugsaran, kag abi nila iya ini. Gani ginbutang nila ini sa gua sang puertahan sang iya apartment. Nagdayaw gid ang babayi sa mga sugilanon sa kabuhi sa magasin, kag gusto man niya mabag-o ang iya kabuhi pareho sa iya nabasahan. Gintawgan niya ang numero sang telepono nga nasulat sa isa sa mga magasin kag naistorya ang payunir nga sister nga nagaistar malapit sa iya. Nasugdan ang pagtuon sa Biblia. Naapresyar sang babayi ang iya natun-an kag luyag niya magtambong sa mga miting. Nakibot sia sang mahibaluan nga malapit lang gali sa iya  apartment ang Kingdom Hall. Gani nagtambong sia gilayon kag padayon niya ini nga ginahimo asta subong.

Si Bam, nga isa ka palasimba nga pulis sa Nepal, may naistorya nga mag-asawa nga espesyal payunir sa dalan samtang naga-duty. Nagdayaw gid sia kay ginsabat nila paagi sa Biblia ang tanan niya nga pamangkot. Ginbaton ni Bam ang pagtuon sa Biblia, kag wala magdugay nagtambong sia sa mga miting. Samtang nagauswag ang iya pagtuon, ginakonsiensia na sia sa iya obra. Gani ginpangabay niya ang iya mga superyor nga isaylo sia sa opisina para indi na sia mag-uyat sing armas. Nagpasugot ang iya mga superyor. Pero pagkatapos makatambong sa distrito nga kombension, nakonsiensia naman sia gani nagdesisyon sia nga biyaan ang iya trabaho.

Wala nalipay ang asawa ni Bam sa iya desisyon, kay ang iya trabaho indi lamang kuntani makahatag sa iya sing respeto sang komunidad kundi sing maayo man nga sueldo, benepisyo, kag pension. Gani para magbag-o ang pensar ni Bam, ang iya asawa nagsiling, “Kon magpabilin ka sa imo trabaho, matuon man ako sa Biblia upod sa mga Saksi.” Sang wala ini nagmadinalag-on, ginkumbinsi niya ang kapitan sang pulis nga prisuhon si Bam. Pagkatapos sang napulo ka adlaw sa prisuhan, ginpagua si Bam. Pero determinado gihapon sia nga mangita sing iban nga obra. Nangin drayber sia sang traysikad, gani inoras sia nga nagapatial sa initan. Bisan pa sa mga kabudlayan, malipayon gid si Bam. Padayon sia nga nag-uswag sa espirituwal kag nangin manugbantala. Sang ulihi, naghaganhagan ang pagpamatok sang iya asawa. Bangod sa kaayo nga ginpakita sang  mga kauturan, nagtuon man sia sa Biblia. Padayon nga gin-amanan ni Bam ang iya pamilya, kag mas daku pa ang iya ginakita bilang drayber. Nabawtismuhan sia sa asembleya sang Pebrero 2013, kag karon nagatambong na sa mga miting ang iya asawa kag bata nga lalaki.

Si Myeong-hee isa ka sister sa Korea. Paralisado ang isa niya ka tiil sugod pa sang dos anyos sia. Madali sia kapuyon kag kon kaisa gulpi lang nagakatumba. Masami man sia ginanerbios bangod sa iya bulong. Nabudlayan man sia magginhawa, kag nagabatyag sia sing kasakit bangod sa tension kag kabalaka. Bisan pa sa sini nga mga problema, gusto gid ni Myeong-hee nga mag-auxiliary payunir kag nahimo niya ini sing halos kada bulan sa sulod na sang duha ka tuig. Nagapasalamat gid sia kay Jehova sa paghatag sa iya sing kusog para matuman ang iya ministeryo.

Si Agnes isa ka misyonera sa Indonesia. Pirme niya ginapanaksihan ang nagabusong nga babayi nga nagabaligya sing utan sa merkado. Nanamian gid sia sa aton mga magasin kag sa pagpakig-istorya parte sa Biblia kon indi sia masako. Isa ka adlaw, sang ginduaw ni Agnes ang babayi sa merkado, wala sia didto. Nagsiling ang bana sini nga nagbata ang iya asawa. Gani nagdesisyon si Agnes nga duawon ang babayi. Ginputos niya Ang Akon Libro sang mga Sugilanon sa Biblia bilang regalo. Nalipay gid ang babayi kay nagtinguha si Agnes nga bisitahan sia  kag ang iya lapsag. Pero nasorpresa gid sia sang gindaho ni Agnes ang regalo. Sang ginbuksan niya ini, daw indi sia makapati. “Diin mo ini ginkuha? Treinta ka tuig ko na ini nga ginapangita! Nakadtuan ko na ang tanan nga balaligyaan sang libro kag madamo na ako sing napamangkutan. Wala sing tawo nga may amo sini, wala man sing nakahibalo parte sini, kag wala na sing libro nga pareho kanami sini,” siling niya. Sang bata pa gali ang babayi, may libro nga Sugilanon sa Biblia ang iya tiyo, kag nanamian gid sia magbasa sini. Sa karon ginabasa liwat sang babayi ini nga libro, kag nanamian man sa sini ang iya subang nga bata nga babayi. Nasugdan sila sing pagtuon sa Biblia.